1 Ut anajwan laa’in, aj Nefi, nin’aatinak ka’ch’inaq chirix li aatin xintz’iib’a, li yeeb’il rik’in xtz’uumal re laj Isaias. Xb’aan naq k’ehomaq reetal, laj Isaias kixye k’iila na’leb’ li ch’a’aj xtawb’al ru choq’ re naab’al re lin tenamit; xb’aan naq eb’ a’an ink’a’ neke’xnaw chirix chanru na’uxk li aatinak jo’ profeet sa’ xyanqeb’ laj Judio.

2 Xb’aan naq laa’in, aj Nefi, moko xink’ut ta chiruheb’ k’iila na’leb’ chirix li k’a’ru reheb’ laj Judio, xb’aan naq lix k’anjeleb’, a’an k’anjel re q’ojyin, ut lix b’aanuhomeb’, a’an li b’aanunk tz’eqb’eetalil.

3 Jo’kan ut, nintz’iib’ak choq’ reheb’ lin tenamit, choq’ reheb’ chixjunil li te’k’uluq re moqon li k’a’aq re ru a’in nintz’iib’a, re naq te’xnaw lix raqb’a-aatin li Dios, naq te’chalq sa’ xb’eeneb’ chixjunil li tenamit, jo’ chanru li aatin li xye chaq a’an.

4 Jo’kan ut, ab’ihomaq, ex intenamit, li wankex sa’ lix junkab’al laj Israel, ut k’ehomaq eexik chirab’inkil li waatin, xb’aan naq rik’in naq moko saqen ta ru li raatin laj Isaias cheru laa’ex, saqen ru b’an chiruheb’ chixjunil li xe’nujak rik’in li musiq’ej re profeetil aatin. A’b’anan nink’e eere jun li profeetil aatin, jo’ chanru li musiq’ej li wan wik’in; jo’kan naq tin’aatinaq jo’ profeet, jo’ chanru li saqen ruhil aatin li wanjenaq wik’in chalen chaq xkutankil li welik chaq Jerusalen wochb’een lin yuwa’; xb’aan naq k’ehomaq reetal, nasaho’ li waam rik’in saqen ruhil aatin choq’ reheb’ lin tenamit, re te’tzoloq.

5 Relik chi yaal, ut nasaho’ li waam rik’in li raatin laj Isaias, xb’aan naq kinchal chaq Jerusalen, ut lix naq’ wu xk’ehom reetal li k’a’aq re ru reheb’ laj Judio, ut ninnaw naq eb’ laj Judio neke’xtaw ru li k’a’aq re ru reheb’ li profeet, ut maajun chik tenamit wan li natawok ta ru li k’a’ru yeeb’il chaq reheb’ laj Judio jo’eb’ a’an, ka’ajwi’ wi tzolb’ileb’ jo’ chanru li k’a’aq re ru reheb’ laj Judio.

6 A’ut k’ehomaq reetal, laa’in, aj Nefi, moko xintzol ta li walal ink’ajol jo’ chan ru eb’ laj Judio, a’ut k’ehomaq reetal, laa’in ajwi’ wanjenaq chaq wochoch aran Jerusalen, jo’kan naq ninnaw chirixeb’ li na’ajej wankatqeb’ sa’ xsutam; ut xin’aatinak reheb’ li walal ink’ajol chirixeb’ lix raqb’a-aatin li Dios, li ke’k’ulman sa’ xyanqeb’ laj Judio, reheb’ li walal ink’ajol jo’ chanru chixjunil li yeeb’il xb’aan laj Isaias, ut ink’a’ nintz’iib’a a’an.

7 A’ut k’ehomaq reetal, nin’ok wi’chik rik’in lin profeetil aatin, jo’ chanru xsaqenkil ru li waatin, sa’ li ninnaw wi’ naq maajun winq naru chi sachk; a’b’anan sa’ li kutan te’tz’aqloq wi’ ru lix profeetil aatin laj Isaias, eb’ li winq te’xnaw chi ch’olch’o ru, sa’ li hoonal naq te’k’ulmanq.

8 Jo’kan ut, wankeb’ xloq’al choq’ reheb’ li ralal xk’ajoleb’ li winq, ut ani nak’oxlank re naq ink’a’, reheb’ a’an q’axal wi’chik nawaj aatinak, ut ka’ajwi’ re tz’aqal intenamit tink’e li waatin; xb’aan naq ninnaw naq nimaq xloq’al choq’ reheb’ sa’ roso’jik li kutan; xb’aan naq sa’ li kutan a’an te’xtaw ru; jo’kan naq choq’ re lix chaab’ilaleb’ a’an naq kintz’iib’a.

9 Ut jo’ chanru naq xsache’ jun tasal tenamit sa’ xyanqeb’ laj Judio sa’ xk’ab’a’ li maa’usilal, jo’kan ajwi’ xe’sache’ chiru li junjunq tasal tenamit, jo’ chanru lix maa’usilaleb’; ut maajun wa xsache’ anihaq reheb’ chi ink’a’ yeeb’il chi junxilaj reheb’ xb’aaneb’ lix profeet li Qaawa’.

10 Jo’kan ut, ak yeeb’il reheb’ chirix li sache’k li taachalq sa’ xb’eeneb’ sa’ junpaat chirix naq lin yuwa’ ki’el chaq Jerusalen; a’b’anan, eb’ a’an ke’xkawob’resi li raameb’, ut jo’ chanru lin profeetil aatin, ak sachb’ileb’, ka’ajwi’ junjunq ke’k’ame’ chi preexil aran Babilonia.

11 Ut anajwan ninye a’in xb’aan li musiq’ej li wan wik’in. Ut us ta ke’k’ame’ aran, te’sutq’iiq wi’chik chaq, ut te’reechani li ch’och’ Jerusalen; jo’kan naq te’k’ojob’aaq wi’chik sa’ xch’och’il li reechanihomeb’.

12 A’ut k’ehomaq reetal, te’wanq li pleet ut resil li pleet rik’ineb’, ut naq taawulaq li kutan naq li Junaj Yo’lajenaq chiru li Yuwa’b’ej, relik chi yaal, lix Yuwa’il li choxa ut li ch’och’, tixk’utb’esi rib’ chiruheb’ sa’ li tz’ejwalej, k’ehomaq reetal, eb’ a’an te’xtz’eqtaana, sa’ xk’ab’a’ lix maa’usilaleb’, ut lix kawileb’ li raam, ut lix jipileb’ lix k’a’uxl.

13 K’ehomaq reetal, eb’ a’an te’xk’e chiru krus, ut chirix naq yokob’anb’il sa’ jun li muqleb’aal kamenaq chiru xnumik oxib’ kutan taawakliiq chaq sa’ xyanqeb’ li kamenaq, chi wanq li k’irtesink sa’ xxik’; ut chixjunileb’ li neke’paab’ank re lix k’ab’a’ te’kole’q sa’ li rawa’b’ejihom li Dios. Jo’kan ut, nasaho’ li waam rik’in aatinak jo’ profeet chirix, xb’aan naq wilom lix kutan, ut lin ch’ool naxnimob’resi lix santil k’ab’a’.

14 Ut k’ehomaq reetal, taak’ulmanq naq chirix naq li Mesias akaq xwakli chaq sa’ xyanqeb’ li kamenaq, ut xk’utb’esi rib’ chiruheb’ lix tenamit, chiru jo’ k’ihaleb’ li te’paab’anq re lix k’ab’a’, k’ehomaq reetal, taasachmanq wi’chik Jerusalen; xb’aan naq rahilal sa’ xb’eeneb’ li neke’pleetink re li Dios ut re li ani wankeb’ sa’ lix iglees.

15 Jo’kan ut, te’jek’iiq laj Judio sa’ xyanqeb’ chixjunil li tenamit; relik chi yaal, ut taasachmanq ajwi’ Babilonia; jo’kan naq te’jek’iiq laj Judio xb’aaneb’ jalan chik li tenamit.

16 Ut chirix naq akaq xe’jek’iik, ut li Qaawa’ Dios xrapleheb’ rik’in li jalanil tenamit chiru xnumikeb’ k’iila tasal tenamit, relik chi yaal, chiru ajwi’ li junjunq tasal tenamit, toj reetal naq te’q’unb’esiiq xch’ool chixpaab’ankil li Kristo, li Ralal li Dios, ut lix tojb’al rix li maak, li maak’a’ roso’jik choq’ reheb’ chixjunil li winq—ut naq taawulaq li kutan a’an naq te’xpaab’ li Kristo, ut te’xloq’oni li Yuwa’b’ej sa’ lix k’ab’a’ a’an, chi saqeb’ ru xch’ool ut ch’ajb’ileb’ li ruq’, ut ink’a’ chik te’royb’eni jalan chik li Mesias, toja’ ut naq sa’ li hoonal a’an, taachalq xkutankil naq taa’ajmanq ru naq te’xpaab’ li k’a’aq re ru a’in.

17 Ut li Qaawa’ tixk’e wi’chik li ruq’ xkab’ sut chixk’ojob’ankil wi’chik lix tenamit sa’ li sachk ut li t’ane’k li wankeb’ wi’. Jo’kan naq taa’ok chixb’aanunkil jun li sachb’a-ch’oolejil k’anjel ut jun li eetalil sa’ xyanqeb’ li ralal xk’ajoleb’ li winq.

18 Jo’kan ut, a’an tixk’e chi k’utmank li raatin chiruheb’, a’ li aatin li taaraqoq aatin chirixeb’ sa’ roso’jik li kutan, xb’aan naq taak’eemanq reheb’ re naq te’q’unb’esiiq xch’ool chirix li tz’aqal Mesias, li kitz’eqtaanaak xb’aaneb’, ut re te’q’unb’esiiq xch’ool naq ink’a’ chik na’ajman naq te’royb’eni junaq Mesias li toj taachalq, xb’aan naq maajun taachalq, ka’ajwi’ tana’ junaq balaq’il Mesias li taab’alaq’inq reheb’ li tenamit; xb’aan naq ka’ajwi’ jun li Mesias ke’aatinak wi’ li profeet, ut li Mesias a’an, a’an li taatz’eqtaanaaq xb’aaneb’ laj Judio.

19 Xb’aan naq jo’ chanru li raatineb’ li profeet, li Mesias taachalq waqib’ cient chihab’ relik chaq lin yuwa’ Jerusalen; ut jo’ chanru li raatineb’ li profeet, jo’ ajwi’ li raatin lix anjel li Dios, a’anaq li Jesukristo xk’ab’a’, li Ralal li Dios.

20 Ut anajwan, ex was wiitz’in, saqen ru xin’aatinak re naq ink’a’ texruuq chi sachk. Ut jo’ naq yo’yo li Qaawa’ Dios li kik’amok chaq re laj Israel sa’ li ch’och’ Egipto, ut kixk’e re laj Moises wankilal re tixk’irtesiheb’ li ninqi tenamit chirix naq ke’tiwe’ xb’aaneb’ li k’anti’ li wankeb’ xmay, wi te’xb’eresi li rilob’aal chiru li k’anti’ li kixwaklesi chiruheb’, ut kixk’e ajwi’ wankilal re a’an, re naq tixsak’ li pek ut taayo’laaq li ha’; relik chi yaal, k’ehomaq reetal, ninye eere, jo’ naq yaal li k’a’aq re ru a’in, ut jo’ naq yo’yo li Qaawa’ Dios, maajun chik k’ab’a’ej k’eeb’il rub’el choxa, ka’ajwi’ li Jesukristo a’in, li kin’aatinak wi’, li taaruuq taakole’q wi’ li winq.

21 Jo’kan ut, xb’aan a’in naq li Qaawa’ Dios kixyeechi’i we naq taak’uulamanq ut taakole’q rix li k’a’aq re ru a’in nintz’iib’a, ut taak’ehe’q reheb’ li wiyajil chiru li junjunq tasal tenamit, re naq taatz’aqloq ru li k’a’ru yeechi’inb’il re laj Jose, naq maajo’q’e te’oso’q li riyajil naq toj xaqxooq li ruchich’och’.

22 Jo’kan ut, taanume’q li na’leb’ a’in chiru li junjunq tasal tenamit, chiru jo’ najtil xaqxooq li ruchich’och’; ut taaxik jo’ chanru li naraj ut li nasaho’ wi’ xch’ool li Dios; ut eb’ li tenamit li te’k’uluq re te’raqe’q aatin chirixeb’ xb’aan, jo’ chanru li aatin li tz’iib’anb’il.

23 Xb’aan naq nokok’anjelak chi yalb’il qaq’e chi tz’iib’ak, re xq’unb’esinkileb’ xch’ool li qalal qak’ajol, jo’keb’ ajwi’ li qas qiitz’in, naq te’xpaab’ li Kristo, ut te’xk’am wi’chik rib’ sa’ usilal rik’in li Dios; xb’aan naq naqanaw naq a’ sa’ xk’ab’a’ li usilal naq nokokole’, chirix chixjunil li nokoru chixb’aanunkil laa’o.

24 Ut, us ta naqapaab’ li Kristo, naqapaab’ lix chaq’rab’ laj Moises, ut noko’ilok chi uub’ej re rilb’al li Kristo, chi xaqxooko junelik, toj reetal naq taatz’aqloq ru li chaq’rab’.

25 Xb’aan naq, a’in aj-e naq kik’eeman li chaq’rab’; jo’kan naq li chaq’rab’ kamenaq chik choq’ qe, ut kanajenaqo chi yo’yo rik’in li Kristo sa’ xk’ab’a’ li qapaab’aal; a’ut naqapaab’ li chaq’rab’ xb’aaneb’ li taqlahom.

26 Ut noko’aatinak chirix li Kristo, nasaho’ sa’ qach’ool rik’in li Kristo, nokojultikan chirix li Kristo, naqaye profeetil aatin chirix li Kristo, ut nokotz’iib’ak jo’ chanru li qaprofeetil aatin, re naq eb’ li qalal qak’ajol te’ruuq chixnawb’al b’ar taaruuq te’iloq re te’isiiq lix maakeb’.

27 Jo’kan ut, noko’aatinak chirix li chaq’rab’, re naq eb’ li qalal qak’ajol te’xnaw naq kamenaq li chaq’rab’, ut rik’in xnawb’al naq kamenaq li chaq’rab’, te’ruuq chirilb’al chi uub’ej li yu’am a’an li wan rik’in li Kristo, ut te’xnaw k’a’ aj-e naq xk’eeman li chaq’rab’. Ut chirix naq tz’aqlojenaq ru li chaq’rab’ rik’in li Kristo, naq ink’a’ taa’aje’q naq te’xkawob’resi li raameb’ chirix a’an naq tento raj taak’ehe’q xraqik li chaq’rab’.

28 Ut anajwan k’ehomaq reetal, ex intenamit, laa’ex jun li tenamit jip xk’a’uxl; jo’kan naq kexwaatina chi saqen ru li waatin, re naq ink’a’ taaruuq taasachq eena’leb’. Ut li aatin kinye taawanq chixch’olob’ankil li yaal cherix; xb’aan naq tz’aqal a’an re xk’utb’al li tiikil b’e chiru anihaq chi winq; xb’aan naq li tiikil b’e, a’an xpaab’ankil li Kristo ut ink’a’ xtz’eqtaanankil xyaalal; xb’aan naq rik’in xtz’eqtaanankil xyaalal, neketz’eqtaana ajwi’ eb’ li profeet ut li chaq’rab’.

29 Ut anajwan k’ehomaq reetal, ninye eere naq li tiikil b’e a’an xpaab’ankil li Kristo, ut ink’a’ xtz’eqtaanankil xyaalal; ut li Kristo a’an lix Santil Dios laj Israel; jo’kan naq tento teekub’si eerib’ chiru, ut teeloq’oni chi anchal lee metz’ew, lee k’a’uxl, ut lee kawilal, rik’in chixjunil lee raam; ut wi nekeb’aanu a’in, maamin tex’isiiq chaq.

30 Ut a’ yaal jo’ chanru taa’ajmanq ru, tento teepaab’ li b’aanunb’il na’leb’ ut li k’ojob’anb’il k’anjel re li Dios, toj reetal naq taatz’aqloq ru li chaq’rab’ li kik’eeman re laj Moises.