1 Ut chirix naq li Kristo akaq xwakli chaq sa’ xyanqeb’ li kamenaq, tixk’ut rib’ cheru laa’ex, ex walal ink’ajol, ut ex was wiitz’in raarookex inb’aan; ut li aatin li tixye eere a’anaq li chaq’rab’ li teeb’aanu.

2 Xb’aan naq k’ehomaq reetal, ninye eere naq wilom naq te’nume’q k’iila tasal tenamit, ut te’wanq ninqi pleet ut wech’ok-ib’ sa’ xyanq lin tenamit.

3 Ut chirix naq akaq xk’ulun li Mesias, te’wanq eetalil li k’eeb’ilaq re lin tenamit chirix lix yo’lajik, jo’ ajwi’ chirix lix kamik ut lix waklijik chi yo’yo; ut nimaq ut xuwajelaq li kutan a’an choq’ reheb’ laj maak, xb’aan naq eb’ a’an te’oso’q; ut neke’oso’ xb’aan naq neke’risiheb’ chaq li profeet, ut eb’ laj santil paab’anel, ut neke’xkutiheb’ chi pek, ut neke’xkamsiheb’; jo’kan naq lix yaab’ lix kik’eleb’ laj santil paab’anel chalen chaq sa’ ch’och’ taataqe’q rik’in li Dios chixjitb’aleb’.

4 Jo’kan naq chixjunileb’ li neke’xq’etq’eti rib’, ut li neke’b’aanunk re li maa’usilal, li kutan li taachalq tixk’ateb’, chan li Qaawa’ reheb’ li Teepal, xb’aan naq te’wanq chanchan li roq waj.

5 Ut eb’ li neke’kamsin reheb’ li profeet, ut eb’ laj santil paab’anel, lix chamal li ch’och’ tixnuq’eb’, chan li Qaawa’ reheb’ li Teepal; ut eb’ li tzuul te’xmuqeb’, ut li sut iq’ tixk’ameb’, ut li ninqi kab’l te’t’ane’q sa’ xb’eeneb’ ut te’xjoriheb’ ut te’xpuk’iheb’.

6 Ut te’ula’aniiq rik’in kaaq, ut raq’ kaaq, ut hiik, ut li k’iila paay chi sache’k, xb’aan naq taalochq xxamlel lix josq’il li Qaawa’ chirixeb’, ut te’wanq chanchan roq waj, ut li kutan li taachalq tixk’ateb’, chan li Qaawa’ reheb’ li Teepal.

7 Aay, lix rahil ut lix yot’ik li waam xb’aan lix sachikeb’ li kamsinb’ileb’ re lin tenamit! Xb’aan naq laa’in, aj Nefi, wilom, ut ka’ch’in chik ma nin’oso’ chiru li rilob’aal li Qaawa’ xb’aan; a’b’anan tento tinyaab’a chiru lin Dios: Tiik ru laa b’e.

8 A’ut k’ehomaq reetal, li tiikeb’ xch’ool li neke’ab’in chiru li raatineb’ li profeet, ut ink’a’ neke’xsacheb’, ut neke’ril b’an chi uub’ej li Kristo chi xaqxookeb’ junelik chirilb’aleb’ li eetalil li k’eeb’ileb’, us ta taanumtaaq li rahob’tesiik—k’ehomaq reetal, a’aneb’ a’an li ink’a’ te’oso’q.

9 Li K’ajolb’ej re Tiikilal tixk’ut b’an rib’ chiruheb’; ut a’an tixk’irtesiheb’, ut eb’ a’an te’wanq sa’ tuqtuukilal rik’in, toj reetal taanume’q oxib’ tasal tenamit, ut naab’al re lix kaa tasal tenamit akaq xe’nume’ ajwi’ sa’ tiikilal.

10 Ut naq akaq xnume’ li k’a’aq re ru a’in, taachalq jun li junpaatil sache’k reheb’ lin tenamit; xb’aan naq us ta naraho’ inch’ool rik’in, ak wilom; jo’kan naq ninnaw naq taak’ulmanq; ut eb’ a’an neke’xk’ayi rib’ chi maajo’ nimaleb’ xtz’aq; xb’aan naq choq’ reeqaj lix q’etq’etileb’ ut lix majelaleb’ xna’leb’ te’xq’ol li sache’k; xb’aan naq rik’in naq neke’xq’axtesi rib’ chiru laj tza ut neke’xsik’ ru li k’anjel re q’ojyin chiru li saqen, chi jo’kan tento te’kub’eeq sa’ xb’alb’a.

11 Xb’aan naq lix Musiq’ li Qaawa’ moko junelik ta tixyal xq’e rik’in li winq. Ut naq tixkanab’ li Musiq’ej chixyalb’al xq’e rik’in li winq, chirix a’an taachalq li junpaatil sache’k, ut rik’in a’in naraho’ li waam.

12 Ut jo’ xin’aatinak chirix xq’unb’esinkileb’ xch’ool laj Judio, naq li Jesus a’an tz’aqal li Kristo, tento taa’uxq naq eb’ laj Gentil te’q’unb’esiiq ajwi’ xch’ool naq li Jesus a’an li Kristo, li Junelik Dios;

13 Ut naq a’an naxk’utb’esi rib’ chiruheb’ chixjunil li neke’paab’ank re, rik’in lix wankil li Santil Musiq’ej; relik chi yaal, re li junjunq chi tenamit, junkab’al, aatinob’aal, ut teepal, rik’in xk’anjelankil li xninqal ru sachb’a-ch’oolej, ut eetalil, ut sachb’a-ch’oolejil k’anjel, sa’ xyanqeb’ li ralal xk’ajoleb’ li winq a’ yaal jo’ chanru lix paab’aaleb’.

14 A’ut k’ehomaq reetal, nekexwaatina jo’ profeet chirix li roso’jikeb’ li kutan; chirix li kutan naq li Qaawa’ Dios tixk’e chi k’ute’k li k’a’aq re ru a’in chiruheb’ li ralal xk’ajoleb’ li winq.

15 Chirix naq li wiyajil, ut li riyajileb’ li was akaq xe’laj chi maak’a’aqeb’ xpaab’aal, ut akaq xe’sak’e’ xb’aaneb’ laj Gentil; relik chi yaal, chirix naq li Qaawa’ Dios akaq xk’eheb’ li teep chi sutsu chirixeb’, ut akaq xrameb’ rix ut xtub’la li ch’och’ chirixeb’, ut xwaklesi li kawil na’ajej chiruheb’; ut chirix naq akaq xe’kub’siik taq’a sa’ li poqs, toj reetal naq maak’a’aqeb’ chik, rik’in a’an toj tz’iib’anb’ilaq li raatineb’ li tiikeb’ xch’ool, ut te’ab’imanq lix tijeb’ li tiikeb’ chi paab’ank, ut chixjunileb’ li xe’laj chi maak’a’eb’ xpaab’aal ink’a’ te’kanaaq chi moko jultikanb’ileb’ ta.

16 Xb’aan naq eb’ li te’sache’q chaq te’raatinaheb’ chaq sa’ li ch’och’, ut taa’ab’imanq chaq taq’a sa’ poqs li raatineb’, ut lix yaab’ xkux taawanq chanchan junaq li wan xmuhel li kamenaq rik’in; xb’aan naq li Qaawa’ Dios tixk’e xwankil re taaruuq taahasb’aq chirixeb’, chanchan raj sa’ ch’och’; ut sa’ poqs taahasb’aq chaq li raatineb’.

17 Xb’aan naq jo’ka’in naxye li Qaawa’ Dios: Te’xtz’iib’a li k’a’aq re ru xb’aanuman sa’ xyanqeb’, ut taatz’iib’amanq ut taatz’ape’q chaq sa’ jun li hu, ut eb’ li xe’laj chi maak’a’eb’ xpaab’aal ink’a’ te’xk’ul, xb’aan naq neke’xsik’ xsachb’al li k’a’aq re ru re li Dios.

18 Jo’kan ut, jo’ chanru naq ke’sache’ sa’ junpaat li ani ke’sache’, ut lix k’ihaleb’ li ani xuwajel reheb’ taawanq chanchan lix mulel q’olom li na’oso’—relik chi yaal, jo’ka’in naxye li Qaawa’ Dios: Sa’ junpaat naq taawanq, sachaamilaqeb’—

19 Ut taak’ulmanq naq eb’ li ani ke’laj chi maak’a’eb’ xpaab’aal te’sak’e’q rik’in ruq’eb’ laj Gentil.

20 Ut eb’ laj Gentil taqsinb’ileb’ sa’ xq’etq’etileb’ li ru, ut neke’tichk’ok xb’aan lix nimal ru lix tichk’ob’aal, jo’kan naq xe’xwaklesi k’iila iglees; a’b’anan neke’xkub’si lix wankilal ut lix sachb’a-ch’oolej li Dios, ut neke’xjultika chirib’ileb’ rib’ tz’aqal lix na’leb’eb’ ut tz’aqal lix tzolomeb’, re te’xk’ul tumin ut te’xke’i li rilob’aaleb’ li neb’a’.

21 Ut wankeb’ naab’al li iglees li waklesinb’ileb’, ut xb’aan a’an wan li kaqalink, li wech’ij-ib’, ut li xik’ ilok.

22 Ut wankeb’ ajwi’ li muqmuukil molam, jo’ ajwi’ chaq sa’ najter kutan, jo’ chanruheb’ lix molam laj tza, xb’aan naq a’an laj k’ojob’ahom re chixjunil li k’a’aq re ru a’in; relik chi yaal, laj k’ojob’ahom re li kamsink, ut eb’ li k’anjel re q’ojyin, relik chi yaal, ut a’an naxb’eresiheb’ rik’in jun li q’unil k’aam chixkuxeb’, toj reetal naq naxb’ak’eb’ rik’in lix kawil k’aam chi junajwa.

23 Xb’aan naq k’ehomaq reetal, ex was wiitz’in raarookex inb’aan, ninye eere naq li Qaawa’ Dios moko sa’ q’ojyin ta nak’anjelak.

24 A’an maak’a’ naxb’aanu, ka’ajwi’ wi taawanq choq’ re lix chaab’ilal li ruchich’och’; xb’aan naq naxra li ruchich’och’, jo’kan naq naxq’axtesi tz’aqal lix yu’am re naq taaruuq chixjilosinkil chaq chixjunileb’ li winq rik’in. Jo’kan naq maajun naxtaqla naq ink’a’ te’xk’ul li kolb’a-ib’ xb’aan.

25 K’ehomaq reetal, ma naxjap re chixyeeb’al re anihaq: Elen wik’in? K’ehomaq reetal, ninye eere, ink’a’; naxye b’an: Chalqex wik’in chejunilex xmaril li ruchich’och’, loq’omaq li leech ut lix ya’al kab’, chi maak’a’ tumin ut chi maak’a’ xtz’aq.

26 K’ehomaq reetal, ma xtaqla re anihaq naq te’eelq chaq sa’eb’ li ch’utleb’aal, malaj sa’eb’ li kab’l re loq’onink? K’ehomaq reetal, ninye eere, Ink’a’.

27 Ma xtaqla anihaq naq ink’a’ te’xyal li kolb’a-ib’ xb’aan? K’ehomaq reetal ninye eere, Ink’a’; kixk’e b’an chi siib’il choq’ reheb’ chixjunil li winq; ut xtaqlaheb’ lix tenamit naq te’xq’unb’esiheb’ xch’ool chixjunil li winq re te’xjal xk’a’uxl.

28 K’ehomaq reetal, ma xtaqla li Qaawa’ anihaq naq ink’a’ tixyal lix chaab’ilal? K’ehomaq reetal ninye eere, ink’a’; chixjunileb’ b’an li winq k’eeb’ileb’ re, li jun jo’ li jun chik, ut maa’ani yeeb’il re naq ink’a’.

29 A’an kixtaqla naq miwan li tijok chi tojb’il; xb’aan naq k’ehomaq reetal, li tijok chi tojb’il, a’an naq li winq neke’jultikank aatin ut neke’xxaqab’ rib’ choq’ saqen chiru li ruchich’och’, re te’xk’ul xtumin ut te’nimaaq ru xb’aan li ruchich’och’; a’ut ink’a’ neke’xsik’ xchaab’ilal Sion.

30 K’ehomaq reetal, li Qaawa’ xye naq mi’uxk li na’leb’ a’in; jo’kan naq li Qaawa’ Dios xk’e jun xtaqlahom naq chixjunileb’ li winq taawanq rahok rik’ineb’, a’ rahok a’in, a’an li tz’aqal rahok. Ut wi moko wan ta li tz’aqal rahok rik’ineb’, maak’a’ neke’ok wi’. Jo’kan ut, wi wan li tz’aqal rahok rik’ineb’, ink’a’ te’xkanab’ chi oso’k laj k’anjel sa’ Sion.

31 A’ut laj k’anjel sa’ Sion taak’anjelaq choq’ re Sion; xb’aan naq wi neke’k’anjelak re xk’ulb’al tumin, te’oso’q.

32 Ut jo’kan wi’chik, li Qaawa’ Dios kixtaqla naq eb’ li winq ink’a’ te’kamsinq; naq ink’a’ te’tik’ti’iq; naq ink’a’ te’elq’aq; naq ink’a’ te’xpatz’ xk’ab’a’ li Qaawa’ lix Dios chi maak’a’ xyaalal; naq ink’a’ te’kaqalinq; naq ink’a’ xik’ te’iloq; naq ink’a’ te’wech’oq li jun rik’in li jun chik; naq ink’a’ te’xb’aanu li yumb’eetak ko’b’eetak; ut naq maajun reheb’ li k’a’aq re ru a’in te’xb’aanu; xb’aan naq ani nab’aanunk reheb’ taa’oso’q.

33 Xb’aan naq maajun reheb’ li maa’usilal a’in rik’in li Qaawa’ nachal; xb’aan naq a’an naxb’aanu li k’a’ru chaab’il sa’ xyanqeb’ li ralal xk’ajoleb’ li winq; ut maak’a’ naxb’aanu, ka’ajwi’ wi saqen ru chiruheb’ li ralal xk’ajoleb’ li winq; ut naxb’oqeb’ chixjunil chi chalk rik’in ut chixyalb’al lix chaab’ilal; ut maajun naxtz’eqtaana li nachal rik’in, q’eq ut saq, moos ut ach’ab’anb’il, winq ut ixq, ut najultiko’ re li maak’a’eb’ xnawom chirix li Dios; ut juntaq’eeteb’ chixjunil chiru li Dios, laj Judio jo’ ajwi’ laj Gentil.