1 Anajwan ut k’ehomaq reetal, ex was wiitz’in, kexwaatina jo’ chanru xinrelaji li Musiq’ej, jo’kan naq ninnaw naq tento taak’ulmanq chi yaal.

2 Ut li k’a’ru sa’ li hu li taatz’iib’amanq chaq, nimaq xloq’al choq’ reheb’ li ralal xk’ajoleb’ li winq, ut q’axal wi’chik choq’ reheb’ li qiyajil, a’an jun rela’ lix junkab’al laj Israel.

3 Xb’aan naq taak’ulmanq sa’ li kutan a’an naq eb’ li iglees li waklesinb’ilaqeb’, ut moko re ta li Qaawa’, naq li jun tixye re li jun chik: K’e reetal laa’in, laa’in re li Qaawa’; ut li jalaneb’ chik te’xye: laa’in, laa’in re li Qaawa’; ut jo’ka’in tixye li junjunq li xwaklesink reheb’ li jar iglees, ut moko re ta li Qaawa’—

4 Ut te’xwech’ rib’ chirib’ileb’ rib’; ut eb’ laj tij reheb’ te’xwech’ rib’ chirib’ileb’ rib’, ut te’k’utuq rik’in tz’aqal lix tzolomeb’, ut te’xtz’eqtaana xyaalal li Santil Musiq’ej, li nak’ehok re li aatin.

5 Ut neke’xtz’eqtaana xyaalal lix wankil li Dios, lix Santil Dios laj Israel; ut neke’xye reheb’ li tenamit: Chex’ab’inq chiqu, ut ab’ihomaq li qana’leb’; xb’aan naq k’ehomaq reetal naq maak’a’ junaq Dios anajwan, xb’aan naq li Qaawa’ ut laj Tojol-ix ak xb’aanu lix k’anjel, ut xk’e lix wankilal reheb’ li winq;

6 K’ehomaq reetal, chex’ab’inq chiru lin na’leb’; wi te’xye naq wan junaq sachb’a-ch’oolej k’anjelanb’il xb’aan li ruq’ li Qaawa’, meepaab’; xb’aan naq sa’ li kutan a’in moko wan ta a’an choq’ Dios re sachb’a-ch’oolej; ak xb’aanu lix k’anjel.

7 Relik chi yaal, ut te’wanq naab’al li te’yehoq re: Chexwa’aq, chex’uk’aq, ut chisaylanq sa’ eech’ool, xb’aan naq wulaj tookamq, ut usaq choq’ qe.

8 Ut te’wanq ajwi’ naab’al li te’yehoq re: Chexwa’aq, chex’uk’aq, ut chisaylanq sa’ eech’ool; a’ut chexuwa ru li Dios—a’an tixtiikob’resi eeru rik’in xb’aanunkil b’ayaq li maak; relik chi yaal, tik’ti’inqex b’ayaq, nimahomaq eerib’ sa’ xb’een junaq sa’ xk’ab’a’ li raatin, b’ekomaq junaq jul choq’ re lee ras eeriitz’in; maajun ra taa’uxq rik’in a’in; ut b’aanuhomaq chixjunil li k’a’aq re ru a’in, xb’aan naq wulaj tookamq; ut wi taa’uxq naq wan qamaak, li Dios tooxraple jarub’aq sut, ut sa’ roso’jik tookole’q sa’ li rawa’b’ejihom li Dios.

9 Relik chi yaal, ut te’wanq naab’al li te’k’utuq re chi jo’ka’in li tzol’leb’ moko yaal ta ut jo’maajo’ ut maak’a’ xyaalal, ut te’xnima rib’ sa’ xch’ool, ut cham te’xsik’ xmuqb’al lix na’leb’eb’ chiru li Qaawa’; ut lix k’anjeleb’ te’wanq sa’ li q’ojyin.

10 Ut lix kik’eleb’ laj santil paab’anel taayaab’aq chaq chi ch’och’ chixjitb’aleb’.

11 Relik chi yaal, chixjunileb’ elenaqeb’ chaq sa’ li b’e; po’jenaqeb’ xna’leb’eb’.

12 Sa’ xk’ab’a’ li q’etq’etil, ut sa’ xk’ab’a’eb’ laj tzolonel aj b’alaq’, ut li b’alaq’il tzol’leb’, xe’kana chi po’jenaq lix igleeseb’, ut taqsinb’ileb’ lix igleeseb’; sa’ xk’ab’a’ li q’etq’etil xe’xnimob’resi rib’.

13 Neke’elq’ak chiruheb’ li neb’a’ sa’ xk’ab’a’eb’ lix chaq’al ru santil muheb’aaleb’; neke’elq’ak chiruheb’ li neb’a’ sa’ xk’ab’a’ lix chaq’al ru aq’; ut neke’xrahob’tesi li tuulan ut li neb’a’eb’ sa’ xch’ool, xb’aan naq sa’ xq’etq’etileb’ xch’ool xe’xnimob’resi rib’.

14 Neke’xtiqib’ rib’ rik’in li jipil k’a’uxlej ut taqsinb’il jolomej; relik chi yaal, ut sa’ xk’ab’a’ li q’etq’etil, ut li maa’usilal, ut li tz’eqb’eetalil, ut li yumb’eetak ko’b’eetak, chixjunileb’ sachenaqeb’ lix b’e, ka’ajwi’ junjunq ink’a’, li tuulaneb’ xch’ool chixtaaqenkil li Kristo; a’ut eb’ a’an neke’k’ame’ xb’e, jo’kan naq naab’al sut neke’sach xb’aan naq tzolb’ileb’ rik’in lix na’leb’eb’ li winq.

15 Aay, li ninqeb’ xna’leb’, ut li tzolb’ileb’, ut li b’ihomeb’, li xnimob’resihomeb’ rib’ sa’ xq’etq’etileb’ lix ch’ool, ut chixjunileb’ li neke’jultikank re li b’alaq’il tzol’leb’, ut chixjunileb’ li neke’b’aanunk re li yumb’eetak ko’b’eetak, ut neke’xpo’ ru lix tiikil b’e li Qaawa’, rahilal, rahilal, rahilal chichalq sa’ xb’eeneb’, chan li Qaawa’ Dios Nimajwal, xb’aan naq eb’ a’an te’tz’eqe’q taq’a sa’ xb’alb’a!

16 Rahilal sa’ xb’eeneb’ li neke’tz’eqtaanank re li tiik xna’leb’ chanchan yal jo’maajo’ ut neke’hob’ok re li k’a’ru chaab’il, ut neke’xye naq maak’a’ xloq’al! Xb’aan naq taachalq xkutankil naq li Qaawa’ Dios taarula’ani sa’ junpaat eb’ li ani wankeb’ sa’ li ruchich’och’; ut sa’ li kutan a’an naq xe’q’ano’ chi tz’aqal sa’ li maa’usilal, eb’ a’an te’oso’q.

17 A’ut k’ehomaq reetal, wi eb’ li wankeb’ sa’ li ruchich’och’ te’xjal xk’a’uxl chirix lix maa’usilaleb’ ut tz’eqb’eetalileb’ ink’a’ te’sache’q, chan li Qaawa’ reheb’ li Teepal.

18 A’ut k’ehomaq reetal, li nimla tz’eqb’eetal iglees a’an, laj yumb’eet re chixjunil li ruchich’och’, tento taa’uq’e’q chi ch’och’, ut nimaq lix t’anik naq tento taawanq.

19 Xb’aan naq tento taachiq’manq li rawa’b’ejihom laj tza, ut eb’ li neke’oken chi sa’ tento te’eek’asiiq chixjalb’aleb’ xk’a’uxl, malaj laj tza tixchapeb’ rik’in lix b’ak’leb’ ch’iich’ li maajo’q’e na’oso’, ut te’eek’asiiq sa’ josq’il, ut te’oso’q;

20 Xb’aan naq k’ehomaq reetal, sa’ li kutan a’an, a’an taajosq’ob’resinq sa’ xch’ooleb’ li ralal xk’ajoleb’ li winq, ut taareek’asiheb’ chi josq’o’k rik’in li k’a’ru chaab’il.

21 Ut jalaneb’ chik li tixk’ojob’eb’ xch’ool, ut tixwartesiheb’ rik’in xtuqub’ankil xch’ool li tz’ejwalej, re te’xye: Chaab’il chixjunil arin Sion; relik chi yaal, yoo chi tamk Sion, chaab’il chixjunil—ut chi jo’kan laj tza naxb’alaq’iheb’ li raam, ut chi seeb’ xch’ool naxk’ameb’ xb’e taq’a sa’ xb’alb’a.

22 Ut k’ehomaq reetal, jalaneb’ chik naxsachb’ehi rik’in sahil aatin, ut naxye reheb’ naq maak’a’ junaq xb’alb’a, ut a’an naxye reheb’: Maawa’in aj tza, xb’aan naq maak’a’ junaq—ut chi jo’kan nahasb’ak sa’ xxikeb’, toj reetal naq naxchapeb’ rik’in lix xuwajel b’ak’leb’ ch’iich’, b’ar wi’ chaq maak’a’ kole’k.

23 Relik chi yaal, neke’chape’ xb’aan li kamk, ut li xb’alb’a; ut li kamk, ut li xb’alb’a, ut laj tza, ut chixjunileb’ li chapb’ileb’ xb’aaneb’ tento te’xaqliiq chiru lix k’ojarib’aal li Dios, ut taaraqe’q aatin chirixeb’ jo’ chanru lix k’anjeleb’, ut chirix a’an tento te’xik sa’ li na’ajej kawresinb’il choq’ reheb’, a’an jun li palaw re xam ut chuhil pek, a’an li rahilal li maak’a’ roso’jik.

24 Jo’kan ut, rahilal chichalq sa’ xb’een li ani k’ojk’o xch’ool aran Sion!

25 Rahilal chichalq sa’ xb’een li tixjap re chixyeeb’al: Chaab’il chixjunil!

26 Relik chi yaal, rahilal chichalq sa’ xb’een li ani naxk’e xxik chirab’inkil lix na’leb’eb’ li winq, ut naxtz’eqtaana xyaalal lix wankil li Dios, ut li maatan re li Santil Musiq’ej!

27 Relik chi yaal, rahilal chichalq sa’ xb’een li naxye: Ak xook’uluk, ut maak’a’ chik naqaj ru!

28 Relik ut chi yaal, rahilal sa’ xb’eeneb’ chixjunil li neke’siksot, ut neke’josq’o’ sa’ xk’ab’a’ li yaal naxk’e li Dios! Xb’aan naq k’ehomaq reetal, li ani kab’lanb’il sa’ xb’een li saqoonaq naxk’ul a’an chi sa sa’ xch’ool, ut li ani kab’lanb’il sa’ xb’een li samahib’ choq’ k’ojleb’aal, nasiksot maare anchal taat’ane’q.

29 Rahilal chichalq sa’ xb’een li taayehoq re: Ak xqak’ul li raatin li Dios, ut maajun chik raatin li Dios naqaj ru, xb’aan naq ak tz’aqal qe!

30 Xb’aan naq k’ehomaq reetal, jo’ka’in naxye li Qaawa’ Dios: Laa’in tink’e reheb’ li ralal xk’ajoleb’ li winq chi junjunqil li raqal, chi junjunqil li na’leb’, b’ab’ay arin ut b’ab’ay aran; ut osob’tesinb’ileb’ li neke’ab’ink chiru lin na’leb’, ut neke’xk’e xik chixk’ulb’al li aatin tink’e, xb’aan naq eb’ a’an te’xtzol xchaab’ilal li na’leb’; xb’aan naq re li ani nak’uluk, wan chik li k’a’ru tink’e; ut chiruheb’ li neke’yehok re, Ak tz’aqal qe, chiruheb’ a’an taa’isiiq chaq li k’a’ru ak wan ajwi’ reheb’.

31 Majewanb’ilaq li ani naxkanab’ rib’ chiru li winq, malaj naxk’e li tz’ejwalej choq’ xtel, malaj taa’ab’inq chiru lix na’leb’eb’ li winq, wi moko k’eeb’ilaq ta lix na’leb’eb’ rik’in lix wankil li Santil Musiq’ej.

32 Rahilal chichalq sa’ xb’eeneb’ laj Gentil, chan li Qaawa’ Dios reheb’ li Teepal! Xb’aan naq us ta tinyeechi’i li wuq’ chiruheb’ wulaj wulaj, eb’ a’an tine’xtz’eqtaana; a’b’anan laa’in tinwuxtaanaheb’ ru, chan li Qaawa’ Dios, wi te’xjal xk’a’uxl ut te’chalq wik’in; xb’aan naq chiru chixjunil li kutan yeech’inb’il li wuq’, chan li Qaawa’ Dios reheb’ li Teepal.