1 Jó ndi, tʼóó ahayóí dooleeł—áajįʼ ahoolzhiizhgo shinaanish ayóó átʼéii bitahgóó bee naashnishgo, áko nihookááʼ dineʼé bił ałhadadiʼnishtʼánę́ę béédadeeshnih, áko kʼad naaki góneʼ nínáádideeshnih shidineʼé Israel bighandóó danilínígíí ahąąh ánáádeeshdlííł.

2 Dóó ałdóʼ, nił ahaʼdinishtʼánę́ę béédeeshnih, Nephi, índa nizhéʼé ałdóʼ, éí naʼáłchíní dooleełígíí béédeeshnih; áko, naʼáłchíní dooleełígíí bizaad éí náasdi náánóoséłígíí tʼáá shí shizééʼdę́ę́ʼ bee bichʼįʼ hadeesdzih; áádóó tʼáá ałtso nahasdzáán bikááʼgóó, shizaad deididootsʼį́į́ł, éí shidineʼé, Israel bighandóó danilínígíí bá siláa dooleeł.

3 Dóó háálá shizaad náásgóó didoohtsʼį́łígíí biniinaa—ląʼída Gentile dineʼé kódaaníi dooleeł: Diyin God Bizaad! Diyin God Bizaad! Diyin God Bizaad éí łaʼ nihee dahólǫ́; doo éí łaʼ Diyin God Bizaad náhodoodleeł da.

4 Ndi Bóhólníihii Diyin God kóní: O doo ádahojilyą́ą da, Diyin God Bizaad łaʼ hwee dahólǫ́ǫ doo, ałkʼidą́ą́ʼ shidineʼé bił ałhadiʼnishtʼánę́ę, Jew dineʼé éí bitsʼą́ą́dóó hodooleeł. Diyin God Bizaad Jew dineʼé bitsʼą́ą́dę́ę́ʼ ńdeidiiʼánígíísh yichʼįʼ ahééh danízin? Aooʼ, Gentile dineʼéʼshąʼ éí, haʼátʼíí áádeiłní? Béédajilniih daatsʼí Jew dineʼé hajoobáʼágo ádáádzaa yę́ę, dóó bindaanish yę́ę, dóó tiʼdahoozniiʼ yę́ę, dóó tsʼídá yéigo shá ndashnishę́ę, Gentile dineʼé yisdádahidookah biniiyé?

5 O nihí Gentile dineʼé danohłíinii, Jew dineʼésh béédaohłniih, ałkʼidą́ą́ʼ shidineʼé bił ałhadadiʼnishtʼání? Ndagaʼ; tʼóó bídanoohdzin, dóó tʼáá íiyisíí dajiinohłáá ńtʼę́ę́ʼ, dóó doo Diyin God bichʼįʼ ninádanohʼéesh da. Jó ndi, díí tʼáá ałtso nihikʼijįʼ ńdadoodleeł; háálá Bóhólníihii nishłíinii éí shidineʼé doo beisénah da.

6 Doo ádahołyą́ą da, kódadohnínígíí, Diyin God Bizaad, Diyin God Bizaad éí łaʼ nihee dahólǫ́, dóó Diyin God Bizaad éí doo łaʼ náádaniidzin da. Daʼ Diyin God Bizaadísh nihee hólǫ́ǫ dooleeł Jew dineʼé tʼáá gééd?

7 Doo hanii nihił béédahózin da dineʼé dah deínéhígíí doo tʼááłáʼí da? Tʼáá ałtso shí, Bóhólníihii nihiDiyin God nishłíinii, nihookááʼ dineʼé íishłaaígíísh éí doo nihił béédahózin da, dóó tʼáá ałtso tónteel kéyah bikááʼ dineʼé kéédahatʼínígíí éí bénáshniih; dóó wódahdi yáʼąąshdi índa wóyahdi nahasdzáán bikáaʼgi éí bee shíhólnííh; aooʼ, índa nihookááʼ dineʼé dóó tʼáá ałtso kédaayahgóó, bílaʼ ashdlaʼii badaʼáłchíní éí shizaad deididootsʼį́į́ł?

8 Ákohgo haʼátʼíísh biniiyé saad dahonohłǫ́, háálá shizaad łaʼ náádadidoohtsʼį́łígíí daatsʼí biniiyé? Doósh nihił béédahózin da naakigo ałʼąą dahʼoonéłígíí baa haneʼígíí éí tʼáá aaníí Diyin God nishłį́įgo ooʼíní danilį́, dóó łaʼ dah deínéhígíí bénáshniihígíí átʼéego tʼáá ałtso diné dah deínéhígíí bénáshniih? Ákohgo, tʼáá ałtso kédaayahgo éí tʼáá aheełtʼéego bichʼįʼ yáshtiʼ. Dóó naakidę́ę́ʼ kéyah ahiih yínáago éí beʼoodląʼ ałdóʼ aheełtʼéego ahiih dookaah.

9 Dóó díí kótʼáo íishłaaígíí éí adą́ą́dą́ą́ʼ, dóó díí jį́, dóó hoolʼáágóó doo łahgo ánááshʼníłígíí yaa halneʼ; dóó tʼáá shí íinisingo éí shizaad bee yáshtiʼ. Dóó háálá tʼááłáʼí saad bee haasdzíiʼgo biniinaa tʼáadoo tʼáá éí tʼéiyá bee hadeesdzih danohsiní; háálá shinaanish éí tʼah doo ałtso álnéeh da; índa doo éí nihookááʼ dineʼé bił nihoníyáajįʼ da, índa kodóó dóó hoolʼáágóó shinaanishgo ahoolʼáa dooleeł.

10 Ákohgo, háálá Diyin God bizaad nihee dahólónígíí bąą shizaad tʼáá ałtso biyiʼ nááháasdzo tʼáadoo danohsiní; dóó doo éí łaʼ nínááhídóodzoh da tʼáadoo danohsiní.

11 Háálá tʼáá ałtso nihookááʼ dineʼé, haʼaʼaah, dóó eʼeʼaah, dóó náhookǫs, dóó shádiʼááh, dóó kéyah danidaaʼeełígóó, éí saad bee bichʼįʼ yáshtiʼígíí ńdeidíyóozoh bidííniid; háálá naaltsoos ádaalyaaígíí biyiʼdóó éí, tʼáá ałtso nihookááʼ dineʼé naanish yaa naaskaiígíí bikʼehgo, bee bá nihodiyeeshʼááł.

12 Jó áko, Jew dineʼé bichʼįʼ hadeesdzih, éí ńdeidíyóozoh; dóó Nephi bidineʼé bichʼįʼ hadeesdzih, éí ałdóʼ ńdeidíyóozoh; dóó nááná łaʼ dineʼé Israel bighandóó danilíinii, chʼéhéʼeezh yę́ę, bichʼįʼ hadeesdzih, dóó éí ńdeidíyóozoh; dóó tʼáá ałtso kédaayahgóó diné dah naajaaʼígíí bichʼįʼ hadeesdzihii éí ałdóʼ ńdeidíyóozoh.

13 Áádóó Jew dineʼé éí Nephi bidineʼé bizaad shódeidoołtʼeeł, dóó Nephi bidineʼé éí Jew dineʼé bizaad shódeidoołtʼeeł; dóó Nephi bidineʼé dóó Jew dineʼé éí, Israel bidineʼé łaʼ yóó eekaiígíí bizaad shódeidoołtʼeeł; nááná Israel bidineʼé łaʼ yóó eekaiígíí éí Nephi bidineʼé dóó Jew dineʼé bizaad shódeidoołtʼeeł.

14 Áádóó, shidineʼé, Israel bighandóó danilínígíí, bighangi bikéyahjįʼ, ahanínáhidookah; nááná shizaad éí tʼááłáhájí ahanihidoojih. Dóó tʼáá háiida shizaad dóó shidineʼé, Israel bighandóó danilínígíí yił daʼahigánígíí, Diyin God nishłínígíí bił ííshją́ą́ ádeeshłííł, dóó Abraham bił ałhadiʼnishtʼánę́ę, hoolʼáágóó naʼáłchíní bénáshniih dooleeł dishnínę́ę.