1 Jó, áádóó shí, Nephi, shínaaí á háchįʼígíí biniinaa, tʼáá áłahjįʼ Bóhólníihii shiDiyin God bichʼįʼ sodiszin.

2 Jó ndi, tʼóó yówehédi shichʼįʼ bá háchįʼ, áko índa dadiyiilyééł daniizį́į́ʼ.

3 Aooʼ, shidááh yáłtiʼ daazlį́į́ʼ, kódaaníigo: Nihitsilí nihinaatʼáanii deeshłeeł nízingo nihaa ntsékees; dóó biniinaa ayóó átʼáo tiʼdahwiisiiʼniiʼ; ákohgo kʼad éí dahodiyiilyééł, áko bizaad doo bikʼee tiʼnáádahwiidiiʼnih da. Jó áko, doo éí nihinaatʼáanii jidooleeł da; háálá nihí alą́ąjįʼ niidlínígíí éí, díí diné binaatʼáanii ílíinii, nihaa deetʼą́.

4 Kʼad, doo éí tʼáá ałtso saad yee shikʼijįʼ hadahasdzíʼę́ę díí béésh tʼą́hí bikááʼ haneʼígíí doo bikááʼ áshłéeh da. Ndi dadiyiilyééł daanínę́ę, tʼéiyá baa hashneʼ.

5 Áádóó Bóhólníihii shił nááhoolneʼ, kóníigo, éí shí, Nephi, dóó tʼáá háiida ádeinízinígíí, doo kééhatʼínígi dah didoohnééł, nihínaaí bitsʼą́ą́dóó nihidííniid.

6 Ákohgo áádóó, shí, Nephi, sheʼesdzáán dóó shaʼáłchíní dóó Zoram ałdóʼ, dóó beʼesdzáán dóó baʼáłchíní, índa Sam, shínaaí, dóó beʼesdzáán dóó baʼáłchíní dóó Jacob dóó Joseph, shitsilí yázhí, dóó shádí dóó shideezhí ałdóʼ, áádóó háíshį́į́ shídóʼ, dóó danízinígíí. Dóó tʼáá ałtso shił dadiikaihígíí éí Diyin God kótʼáogo nínígíí dóó nihił ííshją́ą́ áyiilaaígíí deiyoodlánígíí tʼéí ádáátʼį́; áko, shizaad deidiiztsʼą́ą́ʼ.

7 Dóó nihiníbaal dóó tʼáadoo leʼé chodeidiilʼįįłígíí, doo kééhatʼínígi bił dah dadiiʼná tʼáá yiiʼnéełgo tʼóó ahayóí danihiiską́. Áádóó, tʼáá yiiʼnéełgo ląʼída danihiiską́ągo índa, nihiníbaal ndasiiʼnil.

8 Dóó shidineʼé éí niniiʼnánígíí, Nephi bee deiyídíijiił dadííniid; áko Nephi éí, hoolyéego yee deiyízhiʼ.

9 Dóó tʼáá ałtso shił naakaiígíí, Nephi bidineʼé deiniilyée dooleeł, dadííniid.

10 Dóó tʼáá ałtsojįʼ Bóhólníihii yee nahwiisʼáanii, dóó bibeehazʼáanii dóó yee hahaadzihii bikʼeh dahoniilʼį́į́ ńtʼę́ę́ʼ, díí éí Moses bibeehazʼáanii bikʼehgo.

11 Dóó Bóhólníihii éí nihił hólǫ́ǫ́ ńtʼę́ę́ʼ; dóó tʼáá íiyisíí náásdeekai; háálá kʼǫ́ǫ́ʼ kʼéédadiilyéehgo tsʼídá ląʼígo ńdaʼniiltį́į́h ńtʼééʼ. Áádóó dibé dóó tłʼízí, dóó béégashii ádaatʼéii índa naaldlooshii ałʼąą ádaatʼéhígíí, nihee dahazlį́į́ʼ.

12 Dóó shí, Nephi, béésh łitsoii tʼą́hí bikááʼ haneʼ nááháasdzo yę́ę ałdóʼ níʼą́; dóó tʼáadoo leʼé nímazgo, biyiʼ dah astsihígíí, bikʼehgo niiʼnánę́ę, Bóhólníihii bílaʼ yee, shizhéʼé yá áyiilaahą́ą ałdóʼ níʼą́ naʼasdzo yę́ę bikʼehgo.

13 Áádóó, tʼáá íiyisíí náás deekai, dóó nihidineʼé ląʼída silį́į́ʼ díí kéyah bikáaʼgi.

14 Dóó shí, Nephi, Laban bibééshhał ńdiitą́, dóó bikʼehgo bééshhał ląʼída ádaashłaa, Laman bidineʼé daosyeʼígíí baa ayoʼhoolníihgo bąą; háálá shí dóó shaʼáłchíní dóó shidineʼé dabiʼdiʼnínígíí deijoołáhígíí shił bééhózingo biniinaa.

15 Dóó shidineʼé, kin álʼínígíí bee nanétą́ą́ʼ, dóó tʼáá ałtso tsin, dóó béésh nitłʼizii, dóó béésh łichíiʼii, índa béésh łitsoii, dóó béésh óola, dóó béésh łigai, índa tʼáá ałtso béésh daʼílíinii ałʼąą ádaatʼéhígíí, bee naʼanishígíí dóó álʼínígíí bee nanétą́ą́ʼ: Háálá díí éí tʼóó ádahayóí.

16 Dóó shí, Nephi, Diyin bighan íishłaa; dóó Solomon Diyin bighan áyiilaahą́ą bikʼehgo íishłaa ákondi tʼáadoo leʼé daʼílínígíí tʼéiyá áłchʼį́į́dígo bee íishłaa; háálá, díí kéyah bikáaʼgi ákódaatʼéhígíí tʼáá ádingo biniinaa, ákohgo Solomon biDiyin bighangi átʼáo ádoolníiłgo doo bihónéedzą́ą da. Ákondi ályaaígi éí Solomon Diyin bighan áyiilaa yę́ę nahalin; dóó tsʼídá nizhónígo ályaa.

17 Áádóó shí, Nephi, shidineʼé ayóó ndaalnishgo íishłaa, dóó bílaʼ yee ndaalnishgo íishłaa.

18 Áádóó, aláahdi nihinaatʼáanii dííleeł dashiłníí ńtʼę́ę́ʼ. Ndi shí, Nephi éí doo aláahdi binaatʼáanii dahólǫ́ǫ da dooleeł nisin ńtʼę́ę́ʼ; ákótʼée ndi, tʼáá bííníshghahígi átʼáo bíká eeshwod.

19 Jó áádóó, Bóhólníihii saad yee haadzíʼę́ę, shínaaí binaatʼáanii dóó binaʼnitiní nílį́į dooleeł nínę́ę, éí beʼelyaa. Ákohgo, dadiyiilyééł daaníijįʼ ahoolzhiizhgo, Bóhólníihii ánínę́ęgi átʼáo tʼáá aaníí shikʼisóó binaatʼáanii dóó binaʼnitiní nishłį́į́ ńtʼę́ę́ʼ.

20 Ákohgo, Bóhólníihii saad yee shichʼįʼ haadzíʼę́ę éí beʼelyaa, éí kóníigo: Háálá nizaad doo dayiistsʼą́ą́ʼgóó éí Bóhólníihii bitsʼą́ą́dóó nahjįʼ ábidiʼdoolnííł. Jó áádóó, tʼáá aaníí bitsʼą́ą́dóó nahjįʼ ábiʼdiilyaa.