1 Dóó kʼad, Jacob, nichʼįʼ yáshtiʼ: Doo kééhatʼínígi tiʼhooshníihgo sheʼáłtsé ńdizhchį́. Jó áádóó, áłchíní nílį́įgo ląʼída tiʼhooʼnííh dóó yínííł biiʼ nisíníyá, nikʼisóó bá ńdahachįįhgo biniinaa.

2 Ákótʼée ndi, Jacob, doo kééhatʼínídi sheʼáłtsé hosínílį́įʼii, Diyin God beʼayóó átʼéii nił bééhózin; dóó tiʼhwiisíníniiʼígíí bee nikʼihojídlíigo íidoolííł.

3 Ákohgo, nitsʼíís dóó niyiʼsizíinii bikʼihojidoodliił, dóó nikʼis, Nephi, tʼáadoo átʼéhígóó bił naghan dooleeł; dóó niDiyin God bá nanilnishgo ándoołkááł. Ákohgo, niNináʼnídláii biyáʼátʼéehii hólónígíí biniinaa, yisdáńdoodlóosgo shił bééhózin; háálá Jesus nahasdzáán yikááʼ níyáadi nihookááʼ dineʼé bee yisdáʼiildéehii éí dooleełgo yiniłtsą́.

4 Dóó beʼayóó átʼéii éí tʼahdii tsíłkéí nílį́įgo yiniłtsą́; ákohgo, nahasdzáán bikáaʼgi diné yitaagháago neinitingo bikʼi dahojisdliʼgi átʼáo ni ałdóʼ nikʼihozhdoodliił; háálá Iiʼsizíinii éí, adą́ą́dą́ą́ʼ, dóó díí jį́, dóó hoolʼáágóó tʼáá átʼéhę́ęgi átʼé. Dóó diné asiihgo adáátłizh yę́ędą́ą́ʼ dóó wóshdę́ę́ʼ éí hashtʼehoolyaa, dóó yisdánáʼiildéehii éí tʼáá jííkʼe silá.

5 Dóó nihookááʼ dineʼé éí yáʼátʼéehii dóó doo yáʼáshóonii bił béédahózin bíighahgo ndabidiʼneestą́ą́ʼ. Dóó beehazʼáanii éí nihookááʼ dineʼé beilyá. Dóó éí beehazʼáanii bikʼehgo éí nihookááʼ dineʼé asiihígíí doo tʼóó baa didootʼáał da; éí doodago beehazʼáanii bikʼehgo éí diné Diyin God bichʼįʼ dáʼdeelkaal. Aooʼ, nahasdzáán bibeehazʼáanii bikʼehgo éí Diyin God bichʼįʼ dáʼdeelkaal; dóó ałdóʼ, iiʼsizíinii bibeehazʼáanii bikʼehgo yáʼátʼéehii yę́ę bitah ádajídin dooleeł, dóó hoolʼáágóó bichʼįʼ ndawiiʼnáa dooleeł.

6 Ákohgo, nináʼílyáhígíí éí Ayóó Átʼéii Messiah bee dóó biniinaa hazlį́į́ʼ; háálá bí éiyá, diyingo joobaʼ dóó tʼáá aaníinii biiʼ hadeezbin.

7 Jó, bí éiyá nináʼádeetʼą́ągo bąąhági átʼéii yá tiʼhoozniiʼ, beehazʼáanii biniiyéhígíí yíighahgo nináʼnídlá, tʼáá ałtso bijéí yisdił dóó yínííł nilínígíí bá; dóó doo náánáłaʼ díí beehazʼáanii bíighahgo nináʼídláhá da.

8 Ákohgo, díí tʼáadoo leʼé tsʼídá íiyisíí aláahdi nihookááʼ dineʼé bee bił hodoonihígíí átʼé, áko bił bééhodoozįįł tsʼídá tʼáá háiida Diyin God bił hazʼą́ góneʼ doo yah adoogáał da, tʼáá hazhóʼó Ayóó Átʼéii Messiah biwoosbąʼ, dóó beʼajoobaʼ, dóó bidiyingo joobaʼ binahjįʼ tʼéiyá, bí éí bitsʼíís niʼ níínílá, dóó Iiʼsizíinii bibee adziilii binahjįʼ nínéidiidlá, áko daneeznánígíí náádidoojahgo íidoolííł, bí áłtsé náádidoodáałgo.

9 Ákohgo, bí éí Diyin God bichʼįʼ áłtsé neestʼánígíí átʼį́, háálá bí éiyá nihookááʼ dineʼé tʼáá ałtso yá náʼookąąhii nilį́į dooleeł; dóó tsʼídá tʼáá háiida yoodlánígíí éí, yisdádoogááł.

10 Dóó háálá nihookááʼ dineʼé tʼáá ałtso yá náʼookąąhígíí biniinaa, nihookááʼ dineʼé tʼáá ałtso Diyin God yidááhdóó nínáhidookah; ákohgo, yidááhdóó naazį́įgo, tʼáá aaníinii dóó diyingo hałtʼéí biiʼ hólónígíí binahjįʼ yá nahodiyooʼááł. Ákohgo, beehazʼáanii bikʼehgo ánihwiitʼaahii Ayóó Átʼéii niinílá, háiida beehazʼáanii kʼíinítiʼgo éí yikʼee tiʼhwiidoonih, éí tiʼhooʼníhígíí ił hózhóonii bitsʼą́ą́jígo ályaa, bąąhági átʼéii bikʼé naʼílyá éí díí beehazʼáanii yikʼehgo naalnish.

11 Tsʼídá tʼáá ákótʼée doo laanaa, tʼáá ałtsoní bitsʼą́ą́jígíí dahólǫ́. Díí doo ákótʼéégóó, doo kééhatʼínígi áłtsé shá yizhchíinii, yáʼátʼéehii éí doo ńdidoolyéeł da, índa, bąąhági átʼéii, dóó hodiyinii, dóó tiʼhooʼnííh, índa yáʼátʼéehii dóó doo yáʼáshóonii. Ákohgo, tʼáá ałtso tʼááłáʼígo ádoolnííł; ákohgo, tʼááłáʼígo éí doo hináa da dooleeł ńtʼę́ę́ʼ; iiná dóó ánoonééł bąąh ádin dooleeł ńtʼę́ę́ʼ, índa doochxǫǫłgo dóó doo doochxǫǫłgóó bąąh ádin dooleeł, dóó ił hózhǫ́ dóó tiʼhooʼnííh, índa ééhózinii dóó doo ééhózinii ałdóʼ bąąh ádin dooleeł ńtʼę́ę́ʼ.

12 Ákohgo, tʼáadoo biniiyéhígo ályaa doo ńtʼę́ę́ʼ; ákohgo ályaaí éí tsʼídá tʼáadoo biniiyéhé da dooleeł ńtʼę́ę́ʼ. Ákohgo, díí éí Diyin God bibee ééhózinii dóó hoolʼáágóó bíbiniiyéii, dóó ałdóʼ Diyin God bibee adziilii, dóó bibee ajoobaʼ dóó tʼáá ákogi átʼáo bibee ánihwiitʼaahii éí tʼáadoo biniiyéhé da doo ńtʼę́ę́ʼ.

13 Dóó beehazʼáanii ádin doohniidgo, éí bąąhági átʼéii ałdóʼ ádin didoohniił. Bąąhági átʼéii ádin doohniidgo, éí yáʼátʼéehii ałdóʼ ádin didoohniił. Dóó yáʼátʼééh ádingo éí bee ił hózhóonii ałdóʼ ádin dooleeł. Dóó yáʼátʼéehii índa bee ił hózhóonii ádingo éí achʼįʼ nahwiiʼná índa tiʼhooʼnííh ałdóʼ ádin dooleeł. Dóó díí ádaadingo éí Diyin God ałdóʼ ádin. Dóó Diyin God doo hólǫ́ǫ́góó nihí ałdóʼ doo honiidlǫ́ǫ da, éí doodago nahasdzáán ałdóʼ doo hólǫ́ǫ da; háálá tʼáadoo leʼé tʼáadoo ádaalyaa da doo ńtʼę́ę́ʼ, tʼáadoo leʼé nayiiłnáa dooleełígíí; éí doodago nabiʼdilnáa dooleełígíí ádin doo ńtʼę́ę́ʼ; ákohgo, tʼáadoo leʼé tʼáá ałtso ásdįįd dooleeł ńtʼę́ę́ʼ.

14 Dóó kʼad, shiyeʼ danohłíinii, díí bitsʼą́ą́dóó ndiʼdoohłééł dóó bikʼidadiʼdootį́į́ł biniiyé nihił hashneʼ; háálá Diyin God éí hólǫ́, dóó tʼáá ałtsoní áyiilaa, yáʼąąsh dóó nahasdzáán tʼáá áła, dóó tʼáá ałtso biyiʼ hólónígíí, tʼáadoo leʼé naʼiiłnáanii dóó tʼáadoo leʼé nahaʼnáanii.

15 Dóó hoolʼáágóó bí biniiyéii bílaʼashdlaʼii niilyáí ííshją́ą́ ádoolnííł, áłtsé nihizhéʼé dóó nihimá áyiilaago, índa naaldlooshii dóó hódah ndaatʼaʼí, dóó tʼáá ałtsoní ályaaígíí, biniinaa ałtsʼą́ą́hjígíí hólǫ́; tsin bineestʼąʼ doo doodį́įłii índa tsin bee iinánígíí ałdóʼ ałtsʼą́ą́hjí nilínígi átʼáo; łaʼ éí łikan dóó łaʼ éí díchʼííʼ.

16 Ákohgo, Bóhólníihii Diyin God diné tʼáá bí íinízingo éʼéłʼį́įgo áyiilaa. Ákohgo, diné tʼáá bí bíhólníihgo éʼéłʼį́į dooleełgo éí doo bihónéedzą́ą da tʼáá hazhóʼó ałtsʼą́ąjįʼ átʼéhígíí łaʼ yinízingo tʼéiyá nahaʼná.

17 Dóó shí, Lehi, yííłtaʼígíí binahjįʼ, íinisingo éí, naʼasdzooígíí bikʼehgo, diyin yá naalʼaʼii łaʼ yáʼąąshdę́ę́ʼ adáátłizhgo; ákohgo, éí chʼį́įdii beʼiiníziinii silį́į́ʼ, dóó Diyin God bidááhdóó tʼáadoo leʼé doo yáʼáshóonii yíká átʼį́įgo hahoolzhiizh.

18 Dóó yáʼąąshdę́ę́ʼ adáátłizhígíí biniinaa, hoolʼáágóó tiʼhooʼnííh silį́į́ʼ, dóó tʼáá ałtso nihookááʼ dineʼé ałdóʼ tiʼdahojooníih dooleeł nízin. Ákohgo, éí tłʼiish sání, chʼį́įdii beʼiiníziinii nilíinii, tʼáá ałtso naʼadloʼ yizhéʼé nilíinii, ákohgo, éí Eve kóyidííniid: Tsin bineestʼąʼ doo doodį́įł da haʼnínę́ę niyą́, áko doo éí dadíítsaał da, áko Diyin God biníłtʼée doo, yáʼátʼéehii dóó doo yáʼáshóonii nił bééhózin dooleeł.

19 Dóó Adam dóó Eve tsin bineestʼąʼ doo doodį́įłii yiyííyą́ąʼgo índa dáʼákʼeh hózhóonii Edendóó chʼíbidiʼneelchą́ą́ʼ, nihookááʼ bikáaʼgi kʼéédídléeh dooleeł biniiyé.

20 Dóó baʼáłchíní hodideezlį́į́ʼ; aooʼ, tʼáá ałtso nahasdzáán bikáaʼgi hooghan nahazʼánígíí bitsʼą́ą́dóó hazlį́į́ʼ ndi.

21 Dóó Diyin God íinízinígíí binahjįʼ, nihookááʼ dineʼé nízaagóó dahináago áyiilaa, áko tʼah nahasdzáán bikáaʼgi dahináago beʼiinaʼ łahgo ádeidoolííł biniiyé; ákohgo, ndahwíʼnitaahgo bił hazʼą́ągo bá ályaa dóó beʼiinaʼígíí nízaagóó dinaʼgo ályaa, háálá Bóhólníihii Diyin God nihookááʼ dineʼé beehazʼáanii yeiníláhígíí yikʼeh dahółʼį́į dooleeł biniiyé tʼáá ałtso nihookááʼ dineʼé beʼiinaʼ łahgo íidoolííł biniiyé yichʼįʼ haadzííʼ; áko tʼáá ałtso nihookááʼ dineʼé tsʼídá áłtsé bishchíinii asiihígíí biniinaa, yóóʼ aheeskaiígíí yił ííshją́ą́ áyiilaa.

22 Dóó kʼad, jó, Adam doo asiihgóó doo bąąhági átʼéii yiih yítłizh da ńtʼę́ę́ʼ, ndi dáʼákʼeh Eden hoolyéedi tʼahdii naagháa dooleeł ńtʼę́ę́ʼ. Dóó tʼáadoo leʼé ádaalyaahą́ą, tʼáá ádaalyaahą́ągi ádaatʼée dooleeł ńtʼę́ę́ʼ; dóó hoolʼáágóó, doo nińtʼiʼ da dooleeł ńtʼę́ę́ʼ.

23 Dóó baʼáłchíní éí ádin dooleeł ńtʼę́ę́ʼ; ákohgo doo asiihgo bił hazʼą́ą dooleeł ńtʼę́ę́ʼ, ił hózhóonii bee ádin, háálá tiʼhooʼnííh doo bił bééhózin da, dóó yáʼátʼéehii doo ííłʼį́į da ńtʼę́ę́ʼ, háálá bąąhági átʼéii doo bił bééhózin da.

24 Jó ndi, tʼáá ałtso bił bééhózinii beʼééhózinii binahjįʼ tʼáá ałtsoní ádaalyaa.

25 Diné hodooleeł biniiyé Adam asiihgo adáátłizh; dóó diné bił dahózhǫ́ǫ dooleeł biniiyé, hazlį́į́ʼ.

26 Dóó Messiah bidiʼdoochíiłjįʼ ayííłką́ągo doogááł, nihookááʼ dineʼé asiihgo adáátłizhígíí bitsʼą́ą́dóó yisdánéídooʼnił biniiyé. Dóó háálá díí asiihgo hadaatłizhígíí bá bikʼé nináʼídláago biniinaa hoolʼáágóó tʼáá bí bídahólníihgo deíkááh daazlį́į́ʼ, yáʼátʼéehii dóó doo yáʼáshóonii bił bééhózingo; tʼáá bí bídahólníihgo yáʼátʼéehii dóó doo yáʼáshóonii ndayiiláah dooleeł; tʼáadoo kojígo tʼéiyá yinááł dabiʼdíʼníní, tʼáá hazhóʼó nihoníyáadi, beehazʼáanii bikʼehgo tʼéiyá hanááhodootʼááł, díí éí Diyin God bibeehazʼáanii neiniláhígíí bikʼehgo.

27 Ákohgo, diné éí, tʼáá bí ádídahólnííhgóó nahasdzáán bikáaʼgi dahiná; dóó tʼáá ałtso diné bá átʼéhígíí bąąh niilyá. Áádóó tʼáá bí bídahólnííhgóó tʼáá jííkʼe naʼadáhíjí dóó hoolʼáágóó iináájí ńdeididoolééł, diné tʼáá ałtso yá Ataʼsizíinii ayóó átʼéii éí binahjįʼ, éí doodago ąąh aztį́ dóó anoonééł daatsʼí ńdeididoolééł, chʼį́įdii beʼiiníziinii bibee adziilii dóó yee hótąʼ dooleełígíí bikʼehgo; háálá bí átʼéhígi átʼáo nihookááʼ dineʼé tʼáá ałtso bichʼįʼ ndahwiiʼnáa dooleeł nízin.

28 Dóó kʼad, shiyeʼ danohłíinii, Ataʼsizíinii ayóó átʼéii éí bá danółʼį́į doo nisin, dóó bizaad deinohdlą́ą dooleeł nisin; dóó bibeehazʼáanii ayóó ádaatʼéii bikʼeh dahonołʼį́, dóó hoolʼáágóó iinánígíí daoohłtsóód, biʼIiʼsizį́ Diyinii íinízinígíí bikʼehgo;

29 Dóó hoolʼáágóó anoonééł daoohłtsóód lágo, nihitsʼíís dóó doo yáʼáshóonii nihiyiʼ hólónígíí bikʼehgo, díí éí chʼį́įdii beʼiiníziinii biiʼsizíinii yinahjįʼ bidziilgo hótąʼ yileeh, chʼį́įdiitahgóó yah hodoolóós, áko tʼáá bí bił hazʼą́ądi nihinaatʼáanii nilį́į dooleeł.

30 Tʼáá ánółtso díí áłchʼį́į́dígo saad bee nihichʼįʼ haasdzííʼ, shiyeʼ danohłíinii, nahasdzáán bikáaʼgi nashiʼdinitaahą́ą kʼadę́ę ałtso iiłkáahgo; dóó yáʼátʼéehii ńdiilá, Diyin God yá dahalneʼígíí bizaad bikʼehgo. Dóó doo łaʼ biniiyé áshtʼį́į da tʼáá hazhóʼó nihitsʼíís dóó nihiyiʼsizíinii yáʼátʼéehgo bił hazʼą́ą dooleełígíí tʼéiyá. Amen.