1 Dóó kʼad shí, Nephi, tsʼídá ałtso shidineʼé bee nabidiʼneestą́ą́ʼígíí, nááhídéesohígíí doo bíighah da; háálá doo ayóó naʼaso da, yáshtiʼgo éí íiyisíí sidziil; háálá diné Iiʼsizį́ Diyinii yinahjįʼ yáłtiʼgo éí Iiʼsizį́ Diyinii nihookááʼ dineʼé bijéí biyiʼdi tʼáá aaníinii yił ííshją́ą́ ádeileʼ.

2 Jó ndi ląʼída éí Iiʼsizį́ Diyinii doo dayiistsʼą́ąʼ da éí biniinaa doo biiʼ dahólǫ́ǫ da; ákohgo, ląʼída nááháasdzooígíí doo tʼáá aaníinii ádaatʼée da danízingo nahjįʼ kódeileʼ.

3 Ndi shí, Nephi éí nááházooígíí éí niʼsézo dóó ílíinii ádaatʼé nisin, dóó shidineʼé éí íiyisíí bá nisin. Háálá éí tʼáá ákwíí jį́ bá sodiszin, dóó tʼáá ákwíí tłʼééʼ bá yishchago shitsʼiiʼáál nínáshtłoh éí biniinaa; dóó sheʼoodląʼ binahjįʼ éí shiDiyin God bichʼįʼ sodiszin, áádóó tʼáá aaníí shił bééhózingo éí shisodizin yididootsʼį́į́ł.

4 Dóó shił bééhózin éí díí Bóhólníihii Diyin God shisodizinígíí shidineʼé yee yáʼátʼéehii yee yikʼijidoodliił. Dóó tʼáá ałtso saad doo dabidziilgóó nááházo yę́ę éí, dabidziilgo bichʼįʼ ádadoolnííł; binahjįʼ naanish yáʼátʼéehii ádeidoolííł; dóó ałkʼidą́ą́ʼ dabizhéʼé yę́ę bił ííshją́ą́ ádadoolnííł; dóó Jesus yaa yáłtiʼ, dóó éí deidoodląął, dóó nihookááʼ iiná bijį́įjįʼ daʼoodlą́ągo, éí hoolʼáágóó iiná shódeidoołtʼeełgo yaa halneʼ.

5 Dóó bąąhági átʼéii yéigo yikʼijįʼ yáłtiʼ, tʼáá aaníinii doo nanitłʼahii bikʼehgo; ákohgo, nihookááʼ dineʼé doo łaʼ díí naʼnitin nááházooígíí biniinaa bá hodoochįįł da tʼáá hazhóʼó chʼį́įdii beʼiiníziinii biiʼsizíinii biiʼ hólǫ́ǫgo tʼéiyá.

6 Tʼáá bééhózinígíí éí baa shił hózhǫ́; tʼáá aaníinii éí baa shił hózhǫ́; shiJesus éí baa shił hózhǫ́, háálá chʼį́įdiitahdę́ę́ʼ éí yisdáshííłtį́.

7 Shidineʼé éí diyingo ayóó óʼóʼníinii bee ayóí ííníshʼní, dóó Christ tʼáá íiyisíí yinishdlą́ągo ląʼída atsʼíís dóó ayiʼsizíinii tsʼídá bąąhági átʼéii bąąh ádaadingo beʼánihwiitʼaah bikááʼdahʼasdáhídi deideestsééł.

8 Jew dineʼé diyingo ayóó óʼóʼníinii bee ayóí ííníshʼní—Jew dineʼé dishní, háálá éí éiyá bitsʼą́ą́dóó hosélį́į́ʼ.

9 Gentile dineʼé ałdóʼ diyingo ayóó óʼóʼníinii bee ayóí ííníshʼní. Jó ndi, díí bá laanaa nisin ndi tʼáá hazhóʼó Christ ńdeiyoosdląądgo tʼéiyá, dóó hoolʼáágóó iiná bichʼįʼ, dóó adáńdítį́hí áłtsʼóózígíí, dóó kʼéhózdongo atiin yiiʼ yah eekaigo tʼéiyá, dóó náábiʼdiilyáajįʼ tʼáá áłahjįʼ díí atiinígíí yikʼi yikahgo tʼéiyá.

10 Dóó kʼad, shikʼisóó ayóí ánihííníshʼníinii, dóó Jew dineʼé, dóó tʼáá ánółtso nahasdzáán bikááʼgóó dahinohnánígíí, díí saad deísínóołtsʼą́ą́ʼ dóó Christ deinohdlą́; dóó díí saad doo deinohdlą́ą́góó éí Christ tʼéí deinohdlą́ą dooleeł. Dóó Christ deinohdlą́ągo díí saad deidoohdląął, háálá éí Christ bizaad átʼé, dóó éí éiyá sheinílá; dóó éí diné tʼáá ałtso yáʼátʼéehgo naʼadájí yee neinitin.

11 Dóó doo Christ bizaad átʼéégóó éí, tʼáá nihí baa ntsídaahkees—háálá Christ, bizaad éí, bibee adziilii dóó bibee ayóó átʼéii binahjįʼ, nihił ííshją́ą́ íidoolííł, ńléí áajįʼ nihoolzhiizhdi; dóó, ni dóó shí éí beʼánihwiitʼaahdi dasitánígíí bidááhdóó ałchʼįʼ yidiidzįįł; dóó díí nááhidíízoh shidííníniidígíí nił bééhodoozįįł, azhą́ doo shidziil da ndi.

12 Dóó aTaaʼ bichʼįʼ Christ bízhiʼ binahjįʼ sodiszingo éí niidlą́ʼí da, índa tʼáá áníiltso da, ńléí ayóó átʼéiijįʼ ayííłką́ągo bił hazʼą́ądi yisdánáhidiikah.

13 Dóó kʼad, shikʼisóó ayóí ánihííníshʼníinii, tʼáá ałtso Israel bighandóó danilínígíí, dóó tʼáá ánółtso nahasdzáán ndaneezʼáajįʼ bikááʼgóó kéédahohtʼínígíí łeezh biyiʼdóó łaʼ iinééʼ yáʼátiʼ nahalingo nihichʼįʼ yáshtiʼ: Hágoóneeʼ ńléí ayóó átʼéiijįʼ ayííłką́ągo índa ńdaʼahiidiiltsééł.

14 Dóó nihí Diyin God biyáʼátʼéehii doo danohsinígíí, dóó Jew dineʼé bizaad, dóó shí shizaad, doo nihił danilínígíí, dóó Diyin God biDibé Yázhí bizaad bikʼijįʼ danohłínígíí, jó, hágoóneeʼ nihidishníi dooleeł, háálá ńléí áajįʼ ayííłką́ągo éí díí saad atínihiidoolííł.

15 Háálá tʼáá ałtso nahasdzáán bikáaʼgi ahíheestłʼǫ́ǫgo íishłaaígíí, éí nahodiyootʼáałdi dasitánígíí, nihikʼijįʼ ndootʼááł; háálá ákótʼáo éí Bóhólníihii shił nahasneʼ, dóó bá biʼdeeshłííł. Amen.