1 Dóó kʼad, shikʼisóó ayóí ánihííníshʼníinii, Bóhólníihii bibee ahadaʼdeetʼaahii Israel bighandóó danilíinii tʼáá ałtso yił ahaʼdeetʼánę́ę nihił béédahodoozįįł biniiyé díí nihichʼįʼ yíłtaʼ—

2 Áko éí hodeeyáádą́ą́ʼ, dóó kojįʼ daʼíchíhígíí biyiʼjįʼ, Diyin God yá dahalneʼii, Jew dineʼé yichʼįʼ yááłtiʼ, dóó tʼáá yichʼįʼ yááłtiʼgo, ńléí sodizin bá hooghan tʼáá aaníinii dóó Diyin God bidineʼé yaa náhidookah; ahodoolzhishjįʼ éí kéyah bił ahadaʼdeestʼánę́ę bikáaʼjįʼ ahą ándoolníiłgo, dóó kéyah bee ahaʼdeetʼánígi bikááʼgóó tʼáá ałtsogo kéédahatʼį́į dooleeł.

3 Jó, Bóhólníihii Diyin God nihaʼáłchíní yikʼihojidoodliiłígíí biniinaa, shikʼisóó ayóí ánihííníshʼníinii, díí bee nihił hashneʼ áko díí baa nihił dahodoozhǫǫł, dóó hoolʼáágóó bee hadaʼíínółníi dooleeł biniiyé.

4 Háálá, nohłąʼída, náasjįʼ ádahodooníłígíí tʼáá íiyisíí nihił béédahodoozįįł danohsingo, hadanohtá ńtʼę́ʼígíí shił bééhózin; ákohgo, shił bééhózingo nihił béédahózin nihitsʼíís hadadootih dóó dadootsaał; ákótʼée ndi, nihitsʼíís bee éí Diyin God deidiiltsééł.

5 Aooʼ, shił bééhózingo nihił béédahózin Jerusalemdi kéédahatʼínígíí, nihí niikaidę́ę́ʼ, bitsʼíís yee yichʼįʼ ííshją́ą́ ádiʼdidoolnííł; háálá éí bitahdi ákóhodoonííł hwiinízin; háálá nahasdzáán áyiilaaí ayóó átʼé bíniʼ bikʼehgo bitsʼíís hólǫ́ǫgo nihookááʼ dineʼé bá hooʼáałgo ádiʼdidoolnííł, dóó nihookááʼ dineʼé tʼáá ałtso yá dadootsaał, áko tʼáá ałtso nihookááʼ dineʼé bichʼįʼ nináhidookah.

6 Háálá tʼáá ałtso nihookááʼ dineʼé dadínóonééł nahasdzáán áyiilaaí ayóó átʼéii binahatʼaʼ bee ajoobaʼii biʼdoolnííł biniiyé, bee nááʼdidoojahígíí éí nízin, dóó asiihgo adáátłizhígíí biniinaa nihookááʼ dineʼé nááʼdiijeeh bá ályaa; dóó bąąhági átʼéii hazlį́į́ʼ doo ádoolníłę́ę ályaago biniinaa; dóó diné asiihgo adáátłizhígíí biniinaa Bóhólníihii bił hazʼą́ą́dóó nahjįʼ ádabiʼdiilyaa.

7 Ákohgo, díí bąąhági átʼéii bikʼé nináʼílyáhígíí doo nińtʼiʼgóó ádooníiłgo éí tsʼídá nízin—doo tsʼídá hoolʼáágóó bąąhági átʼéii bikʼé nináʼílyáhígíí átʼéego tʼéiyá díí atsʼíís bąąhági átʼéhígíí doo hadaałtʼé ńdadoodleeł da. Ákohgo, nihookááʼ dineʼé áłtsé bee bá nihootʼánę́ę éí tʼahdii hoolʼáágóó bee honítʼiʼ doo ńtʼę́ę́ʼ. Dóó díí kótʼéego éí, díí atsʼíís, ałtso didoołdził dóó bimá nahasdzáán bikáaʼjįʼ didoozééł, dóó doo nááhiidooʼnaał da.

8 ODiyin God bibee ééhózinii, beʼajoobaʼ dóó bidiyingo joobaʼ da lá! Jó áko, nihitsʼíís doo náádiidzáágóó éí diyin yá naalʼaʼii nihiiʼsizíinii binantʼaʼí dooleeł ńtʼę́ę́ʼ éí Hoolʼáágóó Diyin God yitsʼą́ą́dóó náátłizhgo, dóó chʼį́įdii beʼiiníziinii silį́ʼę́ę, doo nínáádidoodáał da.

9 Dóó nihiiʼsizíinii éí chʼį́įdiigi átʼée dooleeł ńtʼę́ę́ʼ, dóó chʼį́įdii beʼiiníziinii dasiidlį́į́ʼ ńtʼę́ę́ʼ, dóó chʼį́įdii beʼiiníziinii yá ndaalʼaʼii daniidlį́, áko nihiDiyin God bił hazʼą́ą́dóó nihidáʼdeelkaalgo, yoochʼííd bizhéʼé bił honiidlǫ́ǫgo, bígi átʼáo, tsʼídá doo nihił dahózhǫ́ǫ́góó ndeikai doo ńtʼę́ę́ʼ; aooʼ, éí diné bichʼįʼ éí áłtsé nihimá dóó nihizhéʼé yinaʼazloʼ, dóó adinídíín yá naalʼaʼii ándiilʼįįhgo, nihookááʼ dineʼé, binaʼachʼąąh yił ííshjání áyoolíiłgo ndaʼałtseed dóó chahałheeł biyiʼ haʼátʼííshį́į́ yaa naakai.

10 O nihiDiyin God yáʼátʼéehgo ayóó átʼée da, éí éiyá naayééʼ tsʼídá báhádzidii bílákʼee hádiilwołgo nihá hashtʼehósin; aooʼ, naayééʼ báhádzidii, anoonééł dóó chʼį́įdiitah, éí éiyá atsʼíís daaztsánígíí ábidishní, dóó iiʼsizíinii daaztsánígíí ałdóʼ ábidishní.

11 Dóó nihiDiyin God, Israel beʼAyóó Átʼéii, nihá hashtʼehoolaaígíí biniinaa, díí anoonééł baa yááłtiʼígíí, éí éiyá atsʼíískʼehgo anoonééł, éí daneeznánígíí néididoodlééł; éí daneeznánígíí łeeyiʼ dahólǫ́.

12 Dóó díí anoonééł baa yááłtiʼígíí, iiʼsizíiniikʼehgo iiná ádingo; éí bidaneeznánę́ę yee deididoochił; iiʼsizíiniikʼehjí ánoonéłígíí éí chʼį́įdiitah; ákohgo atsʼíískʼehjí daneeznánę́ę dóó chʼį́įdiitahdi daneeznánígíí dahólónę́ę wóshdę́ę́ʼ chʼéédooʼnił, chʼį́įdiitahdi iiʼsizíinii dahólónígíí éí wóshdę́ę́ʼ kóńdoolnííł, dóó atsʼíís łeeyiʼ dahólónę́ę wóshdę́ę́ʼ kóńdoolnííł, dóó diné bitsʼíís dóó biiʼsizíinii éí ahiih náhidooʼnił; Dóó díí éí Israel beʼAyóó Átʼéii binááʼdiijeehígíí bibee adziilii bikʼehgo.

13 O nihiDiyin God binahatʼaʼ ayóó átʼée da! Áko ałdóʼ, Diyin God biʼiiʼsizíinii bikéyah hózhónídóó, ayiʼsizíinii yáʼádaatʼéehii yidadidoochił, dóó atsʼíís, łeeyiʼdóó yáʼádaatʼéehii daabitsʼíís yę́ę yidadidoochił; dóó atsʼíís dóó ayiʼsizíinii ahiih ńdootʼash, áádóó tʼáá ałtso nihookááʼ dineʼé doo bidééłníi da dooleeł, dóó doo daatsaah dooleeł, dóó atsʼíís dóó ayiʼsizíinii ahiih nátʼáázhgo dahináanii ni dooleeł, tsʼídá tʼáá ałtsoní bił béédahózin dooleeł nihí nihitsʼíís dahólónígi átʼáo, tʼáá hazhóʼó niheʼééhózinígíí hadaałtʼé éí hałtʼée dooleeł.

14 Ákohgo, asiilzihgo nihainítʼínę́ę, dóó bąąhági ániitʼéhę́ę, dóó baa yá niidzinę́ę tʼáá ałtso nizhónígo nihił béédahózin dooleeł; áádóó tʼáá ákogi ádaatʼéii yę́ę, tʼáá ałtso yaa bił dahózhónígíí, dóó biyáʼádaatʼéehii, índa tsʼídá chin bąąh ádaadinii yee hadadítʼée doo, aooʼ, índa yáʼátʼéehii ééʼ nééz yee hadadítʼéego bił béédahózin dooleeł.

15 Dóó áhodoonííł tʼáá ałtso nihookááʼ dineʼé díí kodóó áłtsé anoonééłdę́ę́ʼ iiná yiyiʼjįʼ chʼékaigo, dóó doo daatsaahii daazlį́įʼgo, Israel beʼAyóó Átʼéii bibee ánihwiitʼaah bikááʼdahʼasdáhí nahiizhdookah; dóó índa há ndahodiyootʼááł, dóó éí, Diyin God bibee ánihwiitʼaah diyinii bikʼehgo há ndahodiyootʼááł.

16 Dóó kʼad tʼáá aaníí, Bóhólníihii hinánígi átʼáo, háálá éí Bóhólníihii Diyin God yee haadzííʼ, dóó hoolʼáágóó bizaadii átʼé, dóó éí nahjįʼ ánéehii átʼé, diné tʼáá ákogi ádaatʼéii éí tʼahdii diné tʼáá ákogi ádaatʼéii dooleeł, dóó diné doo yáʼátʼéehii éí ałdóʼ tʼahdii diné doo yáʼátʼéehii danilį́į dooleeł; ákohgo, doo yáʼátʼéehgo dahinánígíí éí chʼį́įdii beʼiiníziinii dóó yá ndaalʼaʼii ádáátʼį́; éí éiyá hoolʼáágóó hodookʼą́ą́łgóó ahidookah, díí éí bá hashtʼeelyaa; dóó bitiʼdahwiiʼníhígíí éí łeetsoii beʼekʼid doo nitséésgóó hoolʼáágóó dookʼą́łígíí nahalin dooleeł, índa doo nitséésgóó hoolʼáágóó bikǫʼ dego dookʼą́ął dooleeł.

17 O nihiDiyin God bibee ayóó átʼéii dóó tʼáá ákogi átʼáo nahwiiʼaah da! Háálá bizaad tʼáá ałtso éí yeʼełʼį́, dóó bí binééʼ dóó yee haadzííʼ, dóó bibeehazʼáanii tʼáá ałtso bidaʼdoolnííł.

18 Ndi, jó, tʼáá ákogi átʼéii dahinánígíí, Israel beʼAyóó Átʼéii yá ndaazį́įgo, Israel beʼAyóó Átʼéii dayoodlánígíí, nahasdzáán bikáaʼgi beʼoodląʼ biniinaa tiʼhooʼnííh yikʼeh dadeesdlį́įʼii, dóó yáhásin nahjįʼ, kódayiilaaígíí, Diyin God bił hazʼą́ądi bá hazʼą́ą doo, díí éí tʼah doo nahasdzáán álnéhę́ędą́ą́ʼ bá hashtʼeelyaa, dóó hoolʼáágóó bił dahózhǫ́ǫ dooleeł.

19 O bibee ajoobaʼ ayóó átʼéii da nihiDiyin God, Israel beʼAyóó Átʼéii! Háálá bidineʼé naayééʼ báhádzidii chʼį́įdii beʼiiníziinii nilíinii yitsʼą́ą́dóó yisdánáyíʼnííł, dóó anoonééł dóó, chʼį́įdiitah hólónę́ę, dóó łeetsoii dóó beʼekʼid hoolʼáágóó dookʼą́ąłii, éí éiyá hoolʼáágóó tiʼhooʼníihii átʼé.

20 O nihiDiyin God bidiyinii ayóó átʼéii da! Háálá tsʼídá tʼáá ałtsoní bił bééhózin, dóó tʼáadoo leʼé łaʼ doo bił bééhóziní da.

21 Dóó tʼáá ałtso binééʼ deididootsʼį́łígíí yisdéidoonił biniiyé nahasdzáán yikáaʼjįʼ níyá, jó áko, tʼáá ałtso nihookááʼ dineʼé, hastiin dóó asdzání tʼáá áła, Adam baʼáłchíní danilínígíí, yá tiʼhoozniiʼ.

22 Dóó, díí biniiyé tiʼhoozniiʼ, tʼáá ałtso diné nááʼdidoojah áádóó tʼáá ałtso bidááhdóó deidoozįįł, ayóó átʼé ándahwiitʼaah bijį́įdi.

23 Dóó tʼáá ałtso nihookááʼ dineʼé kódoonííł yiłní, niheʼiinaʼ łahgo áńdaahdlééh dóó shízhiʼ binahjįʼ tó bee danihiʼdilzį́į́h, hazhóʼó Israel beʼAyóó Átʼéii deinohdlą́, éí doodago éí doo Diyin God bił hazʼą́ądi yisdánáhidookah da.

24 Dóó doo beʼiinaʼ łahgo áńdayiidlaagóó, dóó doo bízhiʼ dayoodlą́ą́góó, dóó doo bízhiʼ binahjįʼ tó bee dabiʼdoolzį́į́ʼgóó, dóó náádabiʼdiilyáajįʼ doo yáʼátʼéehgo dahináágóó éí tsʼídá doo náásgóó dadínóoséeł da; háálá Bóhólníihii Diyin God, Israel beʼAyóó Átʼéii, éí yee haadzííʼ.

25 Ákohgo, beehazʼáanii éí niinílá; dóó háadida beehazʼáanii ádingo éí ndaʼiisdzííʼ bą́ą́h daʼílínígíí ałdóʼ ádin doo; dóó ndaʼiisdzííʼ bą́ą́h daʼílínígíí ádingo éí bee akʼihodidootʼáłígíí ałdóʼ ádin doo; dóó bee akʼihodidootʼáłígíí ádingo éí Israel beʼAyóó Átʼéii bibee adajoobaʼ bá nináʼdoodlééł, háálá diné bąąhági átʼéii bikʼé nináʼílyáhígíí biniinaa; índa bibee adziilii binahjįʼ yisdánáhidookah.

26 Háálá tʼáá ałtso beehazʼáanii doo baa haasyáhígíí éí, bąąhági átʼéii bikʼé nináʼílyáhígíí nináʼdadoodlééł, áko naayééʼ báhádzidii, anoonééł dóó chʼį́įdiitah, dóó chʼį́įdii beʼiiníziinii, dóó łeetsoii beʼekʼid dookʼą́łígíí, éí éiyá hoolʼáágóó tiʼhooʼnííh átʼé, bitsʼą́ą́dóó yisdánáhidookah; dóó éí éiyá Diyin God, éí Israel beʼAyóó Átʼéii níłchʼi beiníláhígíí biiʼ nínáhádlááh.

27 Ndi yíi tʼáá háiida beehazʼáanii beʼelyaaígíí, aooʼ, nihígi átʼáo, éí tʼáá ałtso Diyin God bibeehazʼáanii bił béédahózinígíí, dóó doo yikʼeh hółʼį́įgo, dóó nabidiʼnitingo bíiníłką́ ndi tʼóó yee naazneʼgo, háálá tʼóó báhádzidgo bił hazʼą́ą dooleeł!

28 O chʼį́įdii doo yáʼáshóonii binahagizii da! O nihookááʼ dineʼé bił dahatsoh da, dóó doo dabidziil da, dóó doo ádahalyą́ą da! Ídahoołʼą́ąʼgo ayóo nihił éédahózin danízin, dóó Diyin God bá nahaʼáago doo dayiistsʼą́ąʼ da, háálá éí tʼóó nahjįʼ kódayiiłʼįįh, tʼáá nihił béédahózin daaníigo, ákohgo, beʼééhózinii éí doo áhályáanii átʼé dóó doo yitsʼą́ą́dóó ńdeididooléłí da. Dóó dadínóonééł.

29 Ndi Diyin God binaʼnitin ajíistsʼą́ąʼgo íhwijiiłʼą́ąʼgo éí yáʼátʼééh.

30 Ndi yíi naalyéhé ląʼígo deitʼíinii, nahasdzáánkʼehgo ayóo binaalyeʼ dahólónígíí. Háálá ayóo binaalyeʼ dahólónígíí biniinaa éí baa dahojoobáʼígíí dabijoołá dóó aa hojoobaʼígíí yichʼįʼ ndahwiiłná, binaalyeʼ tʼéiyá yaa ntsídaakees; ákohgo, binaalyeʼ éí biDiyingo ádayósin. Jó áádóó, binaalyeʼ ałdóʼ yił dínóonééł.

31 Dóó yíi bijééhdaakałii dóó tʼáá kʼad daʼdiiztsʼą́ʼígíí; háálá éídóʼ jidínóonééł.

32 Yíi binááʼ ádaadinii doo tʼáá kʼad dadeezghalii, háálá éídóʼ dadínóonééł.

33 Yíi tsʼídá doo bijéí biyiʼdi Diyin God deiyoodlánígíí, háálá bibąąhági átʼéii ánihwiitʼaahdi bił béédahózingo atídabidoolííł.

34 Yíi biyoochʼídígíí, háálá chʼį́įdiitahgóó yah abidiʼyoolghą́ą́ł.

35 Yíi naʼałtseedii éí tʼáá aaníí átʼį́įgo naʼałtseedgo, háálá éí éiyá dadootsaał.

36 Yíi asdzání dóó diné yee tsiʼnaakaií, háálá éí éiyá chʼį́įdiitahgóó yah abidiʼyoolghą́ą́ł.

37 Aooʼ, yíi tʼáadoo leʼé ádaalyaago yichʼįʼ sodadilzinígíí, háálá éí éiyá, aláahdi chʼį́įdii beʼiiníziinii nilíinii haa bił dahózhǫ́.

38 Dóó, índa, yíi tʼáá ałtso bąąhági átʼéii tʼahdii yaa ndaakaigo daneeznánígíí; háálá Diyin God baa náhizhdookah, tʼahdii bąąhági ádaatʼéego Diyin God biniiʼ deidoołtsééł.

39 O, shikʼisóó ayóí ánihííníshʼníinii, Diyin God bikʼijįʼ ajiisiihgo tʼóó báhádzidígi átʼéhígíí béédaohłniih, dóó chʼį́įdii nahagizii bee ájítʼį́įgo ałdóʼ tʼóó báhádzidígi átʼéhígíí! Béédaohłniih, atsʼíískʼehgo doo yáʼátʼéehii tʼéí hontsékeesgo éí anoonééł átʼé, dóó diyinkʼehgo ntsíjíkeesgo éí hoolʼáágóó iiná átʼé.

40 O, shikʼisóó ayóí ánihííníshʼníinii, shizaad deísínóołtsʼą́ą́ʼ. Israel beʼAyóó Átʼéii tsʼídá aláahdi átʼéii béédaohłniih. Tʼáadoo leʼé chʼééh álʼíinii bee nihichʼįʼ yéíníłtiʼ éí, tʼáadoo dadohníní; háálá ákódaahdzaago éí, tʼáá aaníinii bikʼijįʼ dadoohłeeł; háálá Ánihiilaaígíí éí bizaad bee haasdzííʼ. Tʼáá ałtso bąąhági átʼéii yaa naakaiígíí éí saad tʼáá aaníinii doo yídaaghahgóó shił bééhózin; ndi diyinkʼehgo dahinánígíí éí doo yéédaaldzid da, háálá éí éiyá tʼáá aaníinii ayóí ádayóʼníi dóó doo bidaʼdiiłʼáa da.

41 O índa, shikʼisóó ayóí ánihííníshʼníinii, wóshdę́ę́ʼ Bóhólníihii, éí Ayóó Átʼéii, baa hohkááh. Bihonítʼiʼjí éí yáʼátʼéehgo iiná éí béédaohłniih. Jó, diné éí áłtsʼóózígo bá honítʼiʼ, ndi bitsijįʼ éí kʼéhózdongo átʼé, dóó dáádílkał yaa áhályánígíí éí Israel beʼAyóó Átʼéii; dóó doo éí łaʼ bá naalnish da áadi; doo éí náánáłahgo átʼáo yah aʼatiin da anítʼiʼ bidáńdítį́hí góneʼ tʼéiyá; háálá doo éí bidiʼnóotʼah da, háálá Bóhólníihii Diyin God éí bízhiʼ.

42 Dóó tʼáá háíshį́į́ dáádílkał neiniłtsʼinígíí, yichʼįʼ ąą íidoolííł; áádóó shił ééhózin nízinígíí, dóó íhoołʼaahígíí, dóó daʼatʼínígíí, háálá ayóó shił ééhózin, dóó íhoołʼą́ą́ʼ dóó ashtʼį́ nízingo éí ádaa haʼniihígíí—aooʼ, díí éiyá tʼáá íiyisíí tʼóó yijoołaah; dóó tʼáá hazhóʼó díí tʼáadoo leʼé nahjįʼ ádayiilaagóó tʼéiyá, dóó tʼáadoo Diyin God bidááhdóó tʼóó shá yáhásin niizį́įʼgo, dóó hojoobaʼ áhwiinidzin yę́ę tʼáadoo niizį́įʼgo, éí doo yichʼįʼ ąą íidoolíił da.

43 Ndi tʼáá íiyisíí binahjįʼ éédahózinii dóó binahjįʼ nizhónígo ntsáhákeesii éí hoolʼáágóó bitsʼąą nanilʼin dooleeł—aooʼ, ił hózhóonii éí Diyin God yá naazínígíí yá hashtʼelnééh.

44 O, shikʼisóó ayóí ánihííníshʼníinii, shizaad éí béédaohłniih. Jó sheʼééʼ éí ádaadiistsóós, dóó nihidááhdóó yishxáád; shí sodiszin Diyin God yisdáshidoołtéełii binááʼ tsʼídá tʼáá ałtsoní yee haisíídii yee shidínóołʼįįł nisingo; ákohgo, kʼadę́ę nihoolzhíishgo nihił béédahodoozįįł, tʼáá ałtso nihookááʼ dineʼé naanish ádayiilaahą́ą binahjįʼ bá ndahwiitʼaahgo, éí Israel biDiyin God binááł, nihibąąhági átʼéii shitsʼíís dóó shiyiʼsizíiniidóó yígháád, dóó shitsʼádinídíingo bidááhdóó sézį́, dóó nihidił shąąh ádin.

45 O, shikʼisóó ayóí ánihííníshʼníinii, nihibąąhági átʼéii bitsʼą́ą́dóó nahjįʼ kódaahnééh; bibéésh daʼahólzhaʼí yéigo yee nihikʼínaʼaztłʼónę́ę nahjįʼ kódaahłééh; Diyin God nitseʼ bee yisdáʼiildéehii nilíinii baa hohkááh.

46 Diné tʼáá ákogi átʼéii éí tʼáá ákogi átʼáo ánihwiitʼaah bá ndahodiyootʼáałgo, bichʼįʼ hoolzhishígíí bibaʼ nihitsʼíís dóó nihiyiʼsizíinii hashtʼeidoohłííł, áko doo ńdaałdzidgóó nahjįʼ kódadoohníił da; áádóó nihibąąhági átʼéii tsʼídá doo béédadoohłnih da, dóó doo kódadidoohniił da: O Bóhólníihii Diyin God Ayóó Átʼéii neʼánihwiitʼaah éí diyin, éí diyin—ndi bąąhági átʼéii shee hólónígíí éí shił bééhózin; nibeehazʼáanii kʼíhétiʼí, dóó asésiihígíí éí tʼáá shí. Dóó chʼį́įdii beʼiiníziinii éí sisił, áko tʼáá íiyisíí tʼóó baaʼihgo doo bił hózhónígíí éí bá hajaʼ íishłaa.

47 Jó ndi, shikʼis danohłíinii, daʼ doo yáʼátʼéehgo nihił hazʼánígíí nihił ííshją́ą́ íishłaago tʼéí chʼéénihideesił? Nihintsékees yáʼátʼéehgoósh éí díí bee nihichʼįʼ nahwiiʼnáa doo? Daʼ áádóó nanitłʼahgoísh nihił hashneʼ dooleeł tʼáá aaníinii baa haneʼ doo nanitłʼahígi átʼáo dóó bąąhági átʼéii nihídadéétʼiʼgo?

48 Jó, dahodíínóhsingo éí dadiyinii bee nihichʼįʼ yáshtiʼ dooleeł ńtʼę́ę́ʼ; ndi doo éí dahodinohsingo, dóó nihinaʼnitiní nílį́ dashíínóhʼníigo dashinółʼį́, éí bąą bąąhági átʼéii bitsʼą́ą́dóó nihwiileehígíí bąąhági átʼéii bee nanihidínéeshtįįł nízin.

49 Jó, shitsʼíís dóó shiyiʼsizíinii éí bąąhági átʼéii tsʼídá doo bił yáʼátʼéeh da, dóó shijéí éí yáʼátʼéehii tsʼídá bił nizhóní; dóó shiDiyin God bízhiʼ diyinii éí baa hashniih dooleeł.

50 Wóshdę́ę́ʼ, shikʼis danohłíinii, tʼáá ánółtso dibááʼ danohłínígíí, díí tó baa hohkááh; dóó tʼáá háiida bibéeso ádinígíí, wóshdę́ę́ʼ ndaʼiyołniih dóó daʼohsą́; aooʼ, wóshdę́ę́ʼ béeso tʼáá géedgo chʼil naʼatłʼoʼí tó dóó abeʼ ndahołniih doo éí bą́ą́h ílínígóó.

51 Ákohgo, haʼátʼííshį́į́ doo daʼílíinii tʼáadoo nihibéeso bee ndahohłniihí, dóó naanish doo bee náás adoodáałii tʼáadoo nihinaanish ádeínóhsiní. Tʼáá íiyisíí dashíínóołtsʼą́ą́ʼ, dóó saad bee yááłtiʼę́ę béédaohłniih; dóó Israel beʼAyóó Átʼéii baa hohkááh, dóó tʼáadoo leʼé doo ádoodįįłígíí chodeinoołʼįįh, índa dóó doochxǫǫłii, dóó bíniʼ nihitsʼíís dóó nihiyiʼsizíinii tʼáadoo leʼé daneeskʼahii yaa bił dahózhǫ́.

52 Jó, shikʼisóó ayóí ánihííníshʼníinii, nihiDiyin God bizaad béédaohłniih; tʼáá ákwíí jį́ éí bichʼįʼ sodadołzin, dóó tʼáá ákwíí tłʼééʼ, bízhiʼ diyinii bichʼįʼ ahéheeʼ dadohní. Bíniʼ nihijéí bił dahózhǫ́.

53 Jó áádóó dooládóʼ Bóhólníihii bibee ałhadaʼdeetʼaahii da, dóó dooládóʼ binaanish baʼáłchíní yá ííłʼínígíí ayóó átʼée da; dóó dooládóʼ ayóó átʼáo nihookááʼ dineʼé yichʼįʼ adááyáa da, dóó háálá beʼayóó átʼéii, dóó diyingo joobaʼ dóó beʼajoobaʼ biniinaa, atsʼíískʼehjí, náásgóó nihaʼáłchíní dooleełígíí doo tʼáá ałtso ndabidiʼdootsiłgóó yee nihił ahaʼdeetʼą́, ndi yaa áhályą́ągo doo éí ádadooníłí da; áádóó náásgóó hodeeshzhiizhgo éí Israel bighandóó danilíinii bitsʼáozʼaígíí diné yáʼátʼéehiigo dadínóosééł.

54 Dóó kʼad, shikʼisóó danohłíinii, ląʼída bee nihichʼįʼ hanáádeesdzih nisin; ndi yiską́ągo éí shizaad yidziihígíí bee nihichʼįʼ hanáádeesdzih. Amen.