1 Na afei, mo nuanom, adɔfo emi, Nephi, medze mo nkɔnhyɛ a medze ma hom no aba ewiei. Na murunntum nnkyerɛw ndzɛmba pii gyedɛ kakra a minyim dɛ otwar dɛ osi yi; nna murunntum nnkyerɛw pii so gyedɛ mo nua Jacob ne nsɛm no mu kakra.

2 Dɛm ntsi, ndzɛmba a makyerɛw yi dɔɔ sõ ma me, gyedɛ nsɛm kakra a ɔwɔ dɛ mekã a ɔfa Christ ne nkyerɛkyerɛ ho; dɛm ntsi, mebɛkasa akyerɛ hom wɔ nokwar mu, dɛ mbrɛ mo nkɔnhyɛ no nokwar tse.

3 Na me kra enyi gye wɔ nokwardzi ho; na ɔnam dɛm kwan yi do na Ewuradze Nyankopɔn yɛ n’edwuma wɔ adasamba mu. Na Ewuradze Nyankopɔn ma nyia ɔwɔ ntseasee no kan; osiandɛ ɔkasa kyerɛ adasa dɛ mbrɛ hɔn kasaa na hɔn ntseasee tse.

4 Dɛm ntsi, mebɛpɛ dɛ hom kaa dɛ makã dza ɔfa dɛm nkɔnhyɛnyi no a Ewuradze yii no kyerɛɛ me no ho asɛm, nyia otwar dɛ onuma Nyame Eguambaa no a obeyi wiadze bɔn nyina akɔ no.

5 Na afei, sɛ Nyame Eguambaa no, Ɔno a ɔyɛ krɔnkrɔn, hia ma dɛ wɔdze nsu numa no, ama ɔaahyɛ tseneneeyɛ no mã a, O nna ohia kɛsekɛse ma hɛn a hɛnho nntsew yi dɛ wobonuma hɛn, nyew, wɔ nsu mu!

6 Na afei, mibebisa hom, mo nuanom adɔfo, dɛ ebɛnadze mu na Nyame Eguambaa no dze hyɛɛ tseneneeyɛ no mã dɛ wɔdze nsu numaa no?

7 Ana hom nnyim dɛ ɔyɛ krɔnkrɔn? Mbom ɔno a ɔyɛ krɔnkrɔn no ɔyɛe dze kyerɛɛ adasamba dɛ, ɔnam honam afamu brɛɛ noho adze wɔ Egya n’enyim, na ɔdze gyee dase kyerɛɛ Egya no dɛ ɔbɛyɛ setsie ama no na oedzi ne mbrasɛm do.

8 Dɛm ntsi, wonumaa no wɔ nsu mu wiei no, Sunsum Krɔnkrɔn no baa no do wɔ ebubur su mu.

9 Na bio, ɔdze kyerɛɛ adasamba mbrɛ kwan tsenenee no tse, na mbrɛ abow tseatseaba no tse, ɔno mu na ɔwɔ dɛ wɔhɛn, dɛ mbrɛ ɔnoara ayɛ fasusu ama hɔn no.

10 Na ɔse adasamba dɛ: Hom nka mo do. Dɛm ntsi, mo nuanom adɔfo, ana yebotum akã Jesus do, wɔ ber a yenyaa pɛ dɛ yebedzi Egya no ne mbrasɛm do?

11 Na Egya no se: Hom nnu hom ho, hom nnu hom ho, na wonnuma hom wɔ mo Dɔba no ne dzin mu.

12 Na ɔba no so ne ndze baa mo hɔ dɛ: Nyia woenuma no wɔ me dzin mu no, ɔno na Egya no bɛma no Sunsum Krɔnkrɔn, dɛ mbrɛ ɔdze ama me yi; dɛm ntsi, hom nkã mo do, na hom nyɛ ndzɛmba a hom hu dɛ meyɛ yi.

13 Dɛm ntsi, mo nuanom adɔfo, minyim dɛ sɛ hom yi hom akoma mu nyina kã Ɔba no do, na dɛ hom remmfa ndabraba nye ndaadaa nnkɔ Nyame enyim, na mbom dɛ hom dze nokwardzi, hom bonu hom ho wɔ hom bɔn ho, na hom edzi dase akyerɛ Egya no dɛ hom pɛ dɛ hom fa Christ ne dzin to hom do, wɔ enuma mu—nyew, dɛ hom bɛka hom Ewuradze na hom Agyenkwa no do akɔ nsu no ho, dɛ mbrɛ n’asɛm tse, hwɛ, ɔno na hom benya Sunsum Krɔnkrɔn no; nyew, iyi ekyir no na ogya na Sunsum Krɔnkrɔn enuma no bɛba; nna afei hom dze abɔfo tɛkyerɛma betsea mu atonton Israel Krɔnkrɔnnyi no.

14 Mbom, hwɛ, mo nuanom adɔfo, dɛm na Ɔba no ne ndze baa mo hɔ dɛ: Hom enu hom ho wɔ hom bɔn ho ekyir no, na hom edzi dase akyerɛ Egya no dɛ hom pɛ dɛ hom dzi me mbrasɛm do no, na wɔnam nsu do enuma hom, na hom nsa akã ogya nye Sunsum Krɔnkrɔn enuma no, na hom botum akã kasafofor, nyew, dɛ hom dze abɔfo tɛkyerɛma mpo, na iyi ekyir no hom pow me a, nkyɛ obeye ama hom dɛ hom ennhu me koraa mpo.

15 Na metsee ndze fi Egya no hɔ rese dɛ: Nyew, mo Dɔba ne nsɛm no yɛ nokwar. Nyia otsim kodu ewiei no, ɔno na wɔbɛgye no nkwa.

16 Na afei, mo nuanom adɔfo, iyi mu muhu dɛ, gyedɛ ɔdasanyi tsim kodu ewiei na ɔnantsew Nyame tseasefo ne Ba no n’anamɔn mu, annyɛ dɛm a wɔrenngye no nkwa.

17 Dɛm ntsi, hom nyɛ ndzɛmba a makã akyerɛ hom a mehu dɛ hom Ewuradze na hom Pomfo se dɛ wɔnyɛ; osiandɛ osian iyi ho ntsi na woeyi akyerɛ me, ama hom eehu abow kor a ɔsɛ dɛ hom hɛn mu. Osiandɛ abow a ɔsɛ dɛ hom hɛn mu no nye nnuho na nsu mu enuma; na iyi ekyir no na hom bɔnfakyɛ a ofi ogya nye Sunsum Krɔnkrɔn mu no bɛba.

18 Na afei a hom ahɛn dɛm kwan tseaba a no mu nkekãnkekã yi a wɔdze kɔ onnyiewiei nkwa mu yi; hwɛ hom nam abow no mu ahɛn mu; hom edzi Egya no nye Ɔba no hɔn mbrasɛm do; na hom nsa akã Sunsum Krɔnkrɔn no a, ɔgye Egya nye Ɔba no ho dase dze hyɛ anohoba a ɔabɔ no mã, dɛ sɛ hom fa kwan no do ba mu a hom nsa bɛkã.

19 Na afei, mo nuanom adɔfo, ber a hom akɛhɛn dɛm kwan tseaba a no mu yɛ nkekãnkekã yi mu yi, mibebisa dɛ hom ewie ne nyinara yɛ? Hwɛ, mese hom dɛ, Oho; hom nnwiee koraa, gyedɛ hom dze gyedzi a onnhihim suo Christ ne ndwuma pa mu, dze homho nyinara twer nyia otum gye nkwa no n’emudzi no.

20 Dɛm ntsi, ɔwɔ dɛ hom per kɔ kan gyina pintsinn wɔ Christ mu, nya enyidado a ɔhyerɛn na odzi mu, na hom nya Nyankopɔn nye nyimpa nyina ho dɔ. Dɛm ntsi, sɛ hom per kɔ kan, na hom mee wɔ Christ n’asɛm mu, na hom tsim kodu ewiei a, hwɛ, dɛm na Egya no se: Hom benya onnyiewiei nkwa.

21 Na afei, hwɛ, mo nuanom adɔfo, iyi nye kwan no; na kwan fofor biara nnyi hɔ anaa dzin biara nnyi wi ase yi mu a wɔnam do bɛgye ɔdasanyi nkwa wɔ Nyankopɔn n’ahenman no mu. Na afei, hwɛ, iyi nye Christ ne nkyerɛkyerɛ, nokwar nkyerɛkyerɛ kor pɛr a ofi Egya nye Ɔba nye Sunsum Krɔnkrɔn no a ɔyɛ Nyame kor a onnyiewiei no. Amen.