1 Dóó kʼad shí, Nephi, shikʼisóó ayóí ánihííníshʼníinii, ałtso náásgóó ádahodooníłígíí bee nihichʼįʼ yááłtiʼ. Dóó tʼáá aaníí áhodooníłígíí, áłchʼį́į́dígo tʼéiyá bikááʼ náhásóóh; dóó shikʼis Jacob bizaad ałdóʼ áłchʼį́į́dígo tʼéiyá bikááʼ nááházo.

2 Ákohgo tʼáadoo leʼé baa niʼsézooígíí shił bíighah, tʼáá hazhóʼó Christ binaʼnitin tʼéí áłchʼį́į́dígo baa hodeeshnih nisin; ákohgo, doo nanitłʼahgóó nihichʼįʼ hadeesdzih, doo nanitłʼahgóó náásgóó ádahodooníłígíí baa yááłtiʼígi átʼáo.

3 Háálá shitsʼíís dóó shiyiʼsizíinii éí doo nanitłʼahígíí yaa bił hózhǫ́; háálá díigi átʼáo éí Bóhólníihii Diyin God nihookááʼ dineʼé yitahgóó naalnish. Háálá Bóhólníihii Diyin God éí akʼiʼdiitįįhii bee adinídíín aa yiilé; háálá nihookááʼ dineʼé, akʼidadiʼdootį́į́ł biniiyé, tʼáá bí bizaad yee yichʼįʼ yáłtiʼ.

4 Ákohgo, Diyin God yá halneʼii Bóhólníihii shił ííshją́ą́ áyiilaahą́ą éí béédaohłniih, éí éiyá Diyin God biDibé Yázhí jílíinii tó yee yidoosį́į́ł, éí éí nahasdzáán bibąąhági átʼéii nahjįʼ íidoolííł.

5 Dóó kʼad, Diyin God biDibé Yázhí jílíinii, diyin nilį́į ndi, tó bee bidiʼdoolzį́į́ł, bee hazʼánígíí hólǫ́ǫgo yáʼátʼéehii biniinaa yiʼdoolíiłii, O índa, nihí, doo dadiniiyinígíí biniinaa, tʼáá íiyisíí tó bee nihidiʼdoolzį́į́ł nidzin, aooʼ, tó bee ndi!

6 Dóó kʼad, shikʼisóó ayóí ánihííníshʼníinii, nanihídíshkid, haitʼáo éí Diyin God biDibé Yázhí tʼáá ałtso yáʼátʼéehii yiʼiilaa tó bee biʼdoolzį́įʼgo?

7 Daʼ diyingo naayáhígíísh doo nihił béédahózin da? Ndi azhą́ diyin nilį́į ndi, nihookááʼ dineʼé binááł, atsʼíískʼehjí aTaaʼ yidááhdóó hojoobaʼ ádílnééh, dóó aTaaʼ bibeehazʼáanii yikʼeh hółʼį́į dooleeł biniiyé kótʼáo yichʼįʼ ííshją́ą́ iʼiilaa.

8 Ákohgo, tó bee biʼdoolzį́įʼgo Iiʼsizį́ Diyinii hasbídí nahalingo bikʼi hooleʼ.

9 Dóó náánáá, nihookááʼ dineʼé bił ííshją́ą́ ályaa díí kʼéházdon atiinígíí, dóó áłtsʼóózígo yah ahóótʼiʼígíí, éí yee yah ahidookahígíí, tʼáá bí áłtsé hanááł ákóʼiilaago.

10 Dóó nihookááʼ dineʼé kóyidííniid: Shikééʼ deínóhkááh. Ákohgo, shikʼisóó ayóí ánihííníshʼníinii, haash yitʼáo Jesus bikééʼ yiikah dooleeł, tʼáá hazhóʼó aTaaʼ bibee hazʼáanii bikʼeh dahoniilʼį́į́góó tʼéiyá?

11 Dóó aTaaʼ éí ání: Niheʼiinaʼ łahgo áńdaahdlééh, Niheʼiinaʼ łahgo áńdaahdlééh, dóó shiYeʼ Ayóí ííníshʼníinii bízhiʼ binahjįʼ tó bee danihiʼdilzį́į́h.

12 Dóó ałdóʼ, aYeʼ binééʼ shichʼįʼ ííshją́ą́ ályaa, áshidííniidgo: Tʼáá háiida shízhiʼ binahjįʼ tó bee biʼdoolzį́įʼgo, éí aTaaʼ Iiʼsizį́ Diyinii yeidoolééł, shígi átʼáo; ákohgo, shikééʼ deínóhkááh, dóó nihinááł tʼáadoo leʼé íishłaaígíí bidaʼołʼį́.

13 Ákohgo, shikʼisóó ayóí ánihííníshʼníinii, tʼáá aaníí shił bééhózin aYeʼ bikééʼ woháałgo, nijéí biyiʼdóó tʼáá aaníí ádadohníigo, naʼadloʼí tʼáá gééd dóó yoochʼííd Diyin God yidááhdóó, ndi tʼáá aaníí ádóhníigo, nihibąąhági átʼéii yóó adahidohʼaahgo, aTaaʼ binááł Christ bízhiʼ ákʼidideeshtʼááł nohsingo, tó bee nihiʼdiilzį́į́h—aooʼ, bizaad ánínígi átʼáo, nihiBóhólníihii dóó nihiYisdáʼiiníiłii bikééʼ táyiʼ góyaa ahohkááh, jó índa Iiʼsizį́ Diyinii nihaa doolyééł; aooʼ, índa kǫʼ dóó Iiʼsizį́ Diyinii bee nihidiʼdoolzį́į́ł; dóó índa diyin yá naalʼaʼii bizaad bee yáłtiʼ dooleeł, dóó Israel beʼAyóó Átʼéii baa hohniihgo baa dadoohłwosh.

14 Ndi, jó, shikʼisóó ayóí ánihííníshʼníinii, ákótʼáo éí aYeʼ binééʼ shichʼįʼ ályaa, haadzíiʼgo: Bąąhági átʼéii baa nisíníyáhígíí ałtso yóóʼ adííníʼą́ągo, bibeehazʼáanii bikʼeh honishʼį́į dooleeł diníigo aTaaʼ bił ííshją́ą́ íinilaago; tó bee niʼdoolzį́įʼgo bee, dóó kǫʼ dóó índa Iiʼsizį́ Diyinii bee niʼdoolzį́įʼgo, dóó nááná łaʼ saad ániidígíí bee yánááníłtiʼgo, aooʼ, índa diyin yá naalʼaʼii bizaad, dóó díí bikééʼdę́ę́ʼ shikʼijįʼ sínílį́įʼgo, tʼáadoo shééhonísin ńtʼę́ę́ʼjígo tʼéiyá ná yáʼátʼéeh dooleeł ńtʼę́ę́ʼ.

15 Dóó aTaaʼ binééʼ yee haadzííʼ disétsʼą́ą́ʼ, kóníigo: Aooʼ, sheʼÁyóí ííníshʼníinii bizaad éí tʼáá aaníí dóó baʼódlíhígíí átʼé. Tʼáá háiida nihoníyáajįʼ bee jíłdzilgo, éí yisdáńdoodááł.

16 Dóó kʼad, shikʼisóó ayóí ánihííníshʼníinii, díí éí shił bééhózin nihookááʼ dineʼé łaʼ náádiilyáajįʼ, Diyin God hináanii biYeʼ yee sizínígíí yikééʼ yigáałgo tʼéiyá, yisdáńdoodááł.

17 Ákohgo, nihiBóhólníihii, dóó niNináʼnídláii yiiłtsą́ągo bee nihił hweeshneʼ éí bidaʼołʼį́į dooleeł; háálá, díí biniiyé shił ííshją́ą́ ádaalyaa, áko yah adoohałí góneʼígíí nihił béédahodoozįįł. Háálá bee yah ahóótʼiʼígíí éí iiná łahgo álnééh dóó tó bee alzį́į́h, dóó índa kǫʼ dóó Iiʼsizį́ Diyinii bee nihibąąhági átʼéii nahjįʼ kóohłaago nihaa ńdidootʼááł.

18 Dóó índa díí áłtsʼóózí kʼéhózdongo honítʼiʼígíí bikʼeh wohááł dooleeł éí éiyá hoolʼáágóó iiná bichʼįʼ honítʼiʼ; aooʼ, náʼáztʼiʼ bidáńdítį́hí éí biiʼ yah ooyá; aTaaʼ dóó aYeʼ bibeehazʼáanii éí biʼoohłaa; dóó Iiʼsizį́ Diyinii éí nihaílyá, éí éiyá aTaaʼ dóó aYeʼ yá oolí, díí ahaʼdeetʼánígíí yiʼdoołíłígíí, atiin góneʼ yah ooyáago nihaa doolyééł.

19 Dóó kʼad, shikʼisóó ayóí ánihííníshʼníinii, nanihídíshkid, díí áłtsʼóózígo kʼéhózdongo atiinígíí bikʼeh ninooyáago, daʼ tʼáá ałtsoósh óohłaa? Jó, shí ánihidishníigo éí, Ndagaʼ; háálá doo éí kónízáhájįʼ ninooyáa da dooleeł ńtʼę́ę́ʼ tʼáá hazhóʼó Christ bizaad doo nahjįʼ kółééhgóó yinohdlą́ągo, dóó yisdáʼiiníiłii bibee adziilii dóó bibee ajoobaʼ baʼíínílíigo tʼéiyá.

20 Ákohgo, Christ yéigo deinohdlą́ągo, dóó tʼáá íiyisíí laanaa danohsingo, dóó Diyin God ayóí ádeiínóhʼníigo, dóó nihookááʼ dineʼé tʼáá ałtso ayóó ádeiínóhʼníigo, náás deínóhkááh. Ákohgo, náás deínóhkáahgo, Christ bizaad tʼáá íiyisíí nihił yáʼádaatʼéehgo, dóó tʼáá dahinohnáajįʼ daʼiinohdlą́ągo, jó, éí aTaaʼ kóní: Hoolʼáágóó iiná éí nihí dooleeł.

21 Dóó kʼad, jó, shikʼisóó ayóí ánihííníshʼníinii, kótʼáo éí ahóótʼiʼ; áádóó náánáłahgo éí doo yah ahóótʼiʼ da índa doo éí nááná łaʼ ázhiʼ yáʼąąsh biyaagi Diyin God bił hazʼą́ góneʼ yee yisdáńdoodááł hodooʼniid da. Dóó kʼad, jó, díí éí Christ binaʼnitin átʼé, dóó tʼáá éí tʼéiyá dóó tʼáá aaníí aTaaʼ, dóó aYeʼ, dóó Iiʼsizį́ Diyinii, tʼáá ałtso łáʼí Diyin God danilį́, doo bee nihoolʼáágóó bindaʼnitiní átʼé. Amen.