1 Mo nao, luk, ol brata blong mi we mi lavem tumas, mi ting se yufala i tingting hevi samtaem long hat blong yufala long saed blong wanem yufala i mas mekem afta we yufala i bin go tru long rod ia. Be, luk, ?from wanem yufala i stap tingting hevi long ol samting ia long hat blong yufala?

2 ?Yufala i no tingbaot we mi bin talem long yufala se afta we yufala i bin kasem Tabu Spirit bae yufala i toktok wetem lanwis blong ol enjel? Mo nao, ?olsem wanem nao bae yufala i toktok wetem lanwis blong ol enjel sapos i no tru long Tabu Spirit?

3 Ol enjel oli toktok tru long paoa blong Tabu Spirit; taswe, oli talemaot ol toktok blong Kraes. Taswe, mi bin talem long yufala, “kakae gud long ol toktok blong Kraes;” from luk, ol toktok blong Kraes bae oli talem long yufala evri samting we yufala i mas mekem.

4 Taswe, afta nao we mi bin talemaot ol toktok ia, sapos yufala i no save andastanem olgeta bae hem i from we yufala i no askem, mo tu, we yufala i no noknok; from hemia, yufala i no kam long laet, be bae yufala i mas ded long tudak.

5 From luk, bakegen mi talem long yufala se sapos yufala i go tru long rod, mo kasem Tabu Spirit, bae hem i soem long yufala evri samting we bae yufala i mas mekem.

6 Luk, hemia i doktrin blong Kraes, mo bae i no gat moa doktrin we bae oli givim kasem taem we bae hem i soemaot hemwan long yufala long bodi blong mit mo bun. Mo taem we bae hem i soemaot hemwan long yufala long bodi blong mit mo bun, ol samting we bae hem i talem long yufala bae yufala i mas mekem.

7 Mo nao mi, Nifae, mi no save talem moa; Spirit i stopem mi blong toktok, mo mi mi stap blong krae sore from ol pipol oli no biliv, mo ol fasin nogud, mo fasin blong no lanem samting, mo stronghed fasin blong ol man; from bae oli no lukaotem save, o andastanem bigfala save, taem we oli givim long olgeta long klia fasin, hem i klia olsem we ol toktok i save kam klia.

8 Mo nao, ol brata blong mi we mi lavem tumas, mi luk se yufala i tingting hevi yet long hat blong yufala; mo mi harem nogud we mi nid blong tokbaot samting ia. From sapos yufala i lisin long Spirit we i tijim wan man blong prea, bae yufala i save se yufala i mas prea; from ivel spirit i no tijim wan man blong prea, be i tijim hem se hem i no mas prea.

9 Be luk, mi talem long yufala se yufala i mas prea oltaem, mo no letem tingting blong yufala i foldaon, blong yufala i no mas mekem eni samting long Lod sapos, fastaem, yufala i no prea long Papa long nem blong Kraes, blong hem i konsekretem wok blong yufala long yufala bakegen, blong wok blong yufala i save helpem gudfala laef blong sol blong yufala.