1 Dóó kʼad, jó, shikʼisóó ayóí ánihííníshʼníinii, yah ahóótʼiʼ góneʼ yah ooyáago haʼátʼíí baa naagháa dooleełígíí éí nihijéí biyiʼdi baa ntsídaahkees. Ndi, jó, haʼátʼíí éí biniiyé nihijéí biyiʼdi díí baa ntsídaahkees?

2 Doósh éí béédaohłniih da Iiʼsizį́ Diyinii nihaílyáago diyin yá naalʼaʼii bizaad bee yádaałtiʼ dooleeł nihidííniidę́ę? Dóó kʼad, haash yitʼáo éí diyin yá naalʼaʼii bizaad bee yádaałtiʼ dooleeł tʼáá hazhóʼó Iiʼsizį́ Diyinii nihee hólǫ́ǫgo tʼéiyá?

3 Diyin yá naalʼaʼii éí Iiʼsizį́ Diyinii yinahjįʼ yádaałtiʼ; ákohgo, Christ bizaad éí yee yádaałtiʼ. Ákohgo, shí éí ánihidííniid, Christ bizaad baa daʼíínółtaʼ; jó háálá, Christ bizaad éí tʼáá ałtso ádoohłíłígíí yee nihił hodoolnih.

4 Ákohgo, kʼad díí saad ałtso bee yááłtiʼgo, doo bikʼidaʼdoohtą́ą́góó éí, tʼáá nihí doo ndaʼídółkidgóó biniinaa átʼée doo, dóó doo dáádílkał ńdanoołtsʼin da; ákohgo, adinídíín éí doo nihił ííshją́ą́ ádoolníił da ndi, tʼóó chahałheeł biyiʼ náánihidiʼdoolyééł.

5 Jó áko ánáánihidishníigo éí yah ahóótʼiʼ góneʼ yah ooyáago, dóó Iiʼsizį́ Diyinii nihaílyáago, tʼáá ałtso ádoohłíłígíí éí nihił ííshją́ą́ íidoolííł.

6 Jó, díí éí Christ binaʼnitin átʼé, dóó doo nááná łaʼ binaʼnitin ííshją́ą́ ádoolníił da tʼáá nahasdzáán bikááʼ bitsʼíís yee nihichʼįʼ ííshją́ą́ áʼdiilyaago índa. Áko bitsʼíís yee nihichʼįʼ ííshją́ą́ áʼdiilyaago, yee nihichʼįʼ hadoodzihígíí éí bidaʼdoohłííł.

7 Dóó kʼad shí, Nephi, tʼáá ákódígo bee hadeesdzih, háálá Iiʼsizíinii éí nashiníłtłʼah; éí biniinaa tʼóó yínííł nisin, háálá nihookááʼ dineʼé éí tsʼídá doo daʼoodlą́ą da, dóó bąąhági átʼéii tʼéiyá yaa naakai, dóó tsʼídá doo bił éédahózin da, dóó bikʼos daniłdzil; tsʼídá saad doo nanitłʼahgóó bee nanishtingo ndi, doo yikʼidaʼdiitįįh da, dóó doo ndeiłkaah da.

8 Dóó kʼad, shikʼisóó ayóí ánihííníshʼníinii, tʼahdii éí nihijéí biyiʼdi baa ntsídaahkeesgo shił bééhózin; dóó díí bee nihichʼįʼ hadeesdzihígíí éí shá bitsxeʼ. Háálá Iiʼsizíinii sodizin yínaʼniłtinii yísíníłtsʼą́ąʼgo, éí ádá sohodizin nił bééhózin dooleeł ńtʼę́ę́ʼ; háálá doo yáʼáshóonii biiʼsizíinii éí diné sodizin doo yee neinitin da, ndi tʼáadoo sodílziní níigo yee neinitin.

9 Jó ndi, ánihidishníigo éí tʼáá áłahjįʼ sodadołzin, áko doo nihił chádahodoołhił da; áádóó Bóhólníihii tʼáadoo leʼé tsʼídá doo bá ádoohłíił da tsʼídá áłtsé Christ bízhiʼ binahjįʼ aTaaʼ bichʼįʼ sodoołzingo tʼéiyá, áko ádoohłíłígíí éí yee nihikʼizhdoodliił, áko ádoohłíłígíí nihá yáʼátʼéeh dooleeł.