1 Ket ita siak, ni Nephi, saanko a maisurat ti amin a banag a naisuro kadagiti tattaok; kasta met a saannak a nalaing nga agsurat, a kas iti panagsao; gapu ta no agsao ti tao babaen ti bileg ti Espiritu Santo, idanon ti bileg ti Espiritu Santo iti puso dagiti annak ti tattao.

2 Ngem kitaen, adu ti mangpatangken iti puspusoda a mangbusor iti Nasantuan nga Espiritu, ket awan ti lugarna kadakuada; gapuna, iwaksida ti adu a banag a naisurat ken ibilangda nga awanan iti pateg daytoy a banag.

3 Ngem siak, ni Nephi, naisuratkon ti naisuratko, ket ibilangko a naindaklan ti pategna, ken nangnangruna kadagiti tattaok. Ta agtultuloy ti kararagko para kadakuada iti aldaw, ket basbasaen ti luluak ti punganko iti rabii, gapu kadakuada; ket yararawko iti Diosko nga addaan iti pammati, ket ammok a denggenna ti ararawko.

4 Ket ammok nga ikkan ti Apo a Dios iti pateg dagiti kararagko nga agpaay iti pagsayaatan dagiti tattaok. Agbalinto a nabileg kadakuada dagiti balikas a naisuratko bayat ti kinakapsutko; gapu ta allukoyenna ida nga agaramid iti naimbag; maipakaammo kadakuada ti pannakabigbig kadagiti lallaki a kapuonanda; ket sawenna ti maipapan ken ni Jesus, ket allukoyenna ida a mamati kenkuana, ken agibtur agingga iti panungpalan, nga isu ti biag nga agnanayon.

5 Ket naiget ti panagsaona a maibusor iti basol, a mayannurot ti kinalawag ti kinapudno; gapuna, awan ti tao nga agpungtot kadagiti balikas a naisuratko malaksid no addaan daytoy iti espiritu ti sairo.

6 Agrag-oak ti kinalawag; agrag-oak ti kinapudno; agrag-oak ken ni Jesusko, gapu ta sinubbotna ti kararuak manipud iti impierno.

7 Addaanak iti asi kadagiti tattaok, ken naindaklan ti pammatik ken ni Cristo a maam-ammokto ti adu a kararua nga awan mulitna iti pangukomanna.

8 Addaanak iti asi iti Hudio—kunak a Hudio, gapu ta mapanunotko ida a naggapuak.

9 Addaanak met iti asi kadagiti Gentil. Ngem kitaen, ta awan kadagitoy ti manamnamak malaksid no makikappiada ken ni Cristo, ken sumrekda iti akikid a ruangan, ken magna iti nailet a dalan nga agturong iti biag, ket agtuloy iti dalan agingga iti panaggibus ti aldaw a pannakapadas.

10 Ket ita, ay-ayatek a kakabsatko, ken kasta met iti Hudio, ken kadakayo amin iti pagpatinggaan ti daga, denggenyo dagitoy a balikas ken mamatikayo ken ni Cristo; ket no saankayo a mamati kadagitoy a balikas mamatikayo koma ken ni Cristo. Ket no mamatikayto ken ni Cristo mamatikayto kadagitoy a balikas, agsipud ta balikas dagitoy ni Cristo, ket intedna kaniak dagitoy; ket isurona ti amin a tao nga agaramid iti naimbag.

11 Ket no saan a balikas ni Cristo dagitoy, kednganyo—gapu ta ipakitanto kadakayo ni Cristo, babaen iti bileg ken naindaklan a dayag, a balikasna dagitoy, iti maudi nga aldaw; ket agtakderakto iti rupanrupa iti pangukomanna; ket maammuanyonto a binilinnak a mangisurat kadagitoy a bambanag, iti laksid ti pagkapsutak.

12 Ket ikararagko iti Ama iti nagan ni Cristo nga adu koma kadatayo, no saan man nga amin, ti maisalakan iti pagarianna iti naindaklan ken maudi nga aldaw.

13 Ket ita, ay-ayatek a kakabsatko, amin a kameng iti balay ti Israel, ken adda iti amin a pagpatinggaan ti daga, agsaoak kadakayo a kas iti timek ti maysa nga umar-araraw iti tapok: Agpakadaak, agingga a dumteng ti naindaklan nga aldaw.

14 Ket kadakayo a saan a makiranud iti kinaimbag ti Dios, ken mangdayaw kadagiti balikas dagiti Hudio, ken kasta met kadagiti balikasko, ken kadagiti balikas nga agtaud iti ngiwat ti Kordero ti Dios, kitaen, agpakadaak kadakayo iti agnanayon a pakada, agsipud ta kedngandakayto dagitoy a balikas iti maudi nga aldaw.

15 Agsipud ta no ania ti pinatalgedak ditoy daga, mairuarto a maibusor kadakayo iti pangukoman a lugar; gapu ta kasta ti bilin ti Apo kaniak, ket nasken nga agtungpalak. Amen.