1 Dóó kʼad éí ni nichʼįʼ yáshtiʼ Joseph, akéeʼdi niʼdizhchínígíí. Doo kééhatʼínígi tiʼhooshníihgo niʼdizhchį́; aooʼ, tsʼídá íiyisíí tiʼhoozníihgo nimá nishchį́.

2 Dóó Bóhólníihii díí kéyah tʼáá sahdii íidoolíiłgo nihaa didootʼááł nisin, háálá díí kéyah éí tsʼídá aláahdi ílíinii átʼé, áko ni dooleeł dóó náásgóó naʼáłchíní danilį́į dooleełígíí dóó nikʼisóó bił dooleeł, áko Israel biDiyin Ayóó Átʼéii bibeehazʼáanii bikʼeh dahonołʼį́įgo, hoolʼáágóó nihaa áhályą́ą dooleeł.

3 Dóó kʼad, Joseph, akéeʼdi niʼdizhchínígíí, dóó tiʼhooshníihgo doo kééhatʼínígidę́ę́ʼ chʼíniníłtínígíí, Bóhólníihii hoolʼáágóó nikʼijídlíi dooleeł, háálá náásgóó naʼáłchíní danilį́į dooleełígíí doo ałtso ndooltsił da.

4 Jó háálá, ni éí shitsʼą́ą́dóó hosínílį́į́ʼ; dóó Joseph yisnáhgo Egyptgóó abiʼdooltį́hę́ę éí bitsʼą́ą́dóó hosélį́į́ʼ. Dóó Bóhólníihii Joseph yił ałhaʼdeetʼánę́ę éí tsʼídá ayóó ádaatʼé.

5 Ákohgo, Joseph éí tʼáá aaníí dííshjį́ nihiyoołkáłígíí yiyiiłtsą́. Dóó Bóhólníihii hoł ahaʼdeetʼą́ągo, hó hatsʼą́ą́dóó óchíłígíí bineestʼąʼ bitahdóó Bóhólníihii Diyin God diné yáʼátʼéehii néididoołjah Israel bighandóó danilíinii, dóó éí Messiah da, ndi tʼáá sahdii ałtsʼádookah, ákótʼée ndi, éí Bóhólníihii yił ałhaʼdeetʼánę́ę bééhodoonih éí Messiah kʼad dííshjį́įdi hoolzhishdi bił ííshją́ą́ ádadoolnííł, beʼadziilii bee, chahałheełdóó ńléí adinídíinjįʼ chʼíidooʼish—aooʼ, chahałheeł doo yitʼį́į́dóó dóó dahoʼdeesnahą́ą biyiʼdę́ę́ʼ tʼáá nííkʼe nahjįʼ chʼíbidiʼdootʼish.

6 Háálá Joseph tʼáá aaníí ádííniid, kóníigo: Ééhózinii yaa halneʼii éí Bóhólníihii shiDiyin God łaʼ yidínóosééł, éí éiyá shitsʼą́ą́dóó oochíłígíí bineestʼąʼ yichʼįʼ ééhózinii yaa halneʼii tsʼídá yáʼátʼéehii nilį́į dooleeł.

7 Aooʼ, Joseph tʼáá aaníí ádííniid: Bóhólníihii kóshiłní: Ééhózin yaa halneʼii tsʼídá yáʼátʼéehii éí nitsʼą́ą́dóó oochíłígíí bineestʼąʼ bitahdóó łaʼ dínéesééł; dóó éí éiyá, nitsʼą́ą́dóó oochíłígíí bineestʼąʼ ayóó bił danilį́į dooleeł. Dóó beehazʼáanii łaʼ baa deeshłééł, nitsʼą́ą́dóó oochíłígíí bineestʼąʼ, bikʼisóó danilíinii, bá ndoolnish, dóó éí éí tsʼídá bił yáʼádaatʼéeh dooleeł, índa naanishígíí éí danihizhéʼé bił ahadaʼdinishtʼánę́ę bił béédahodoozįįł.

8 Dóó beehazʼáanii baa deeshłééł, náánáłaʼ naanish óóleʼ lágo bidideeshniił, tʼáá hazhóʼó naanish baa diníʼánígíí tʼéiyá. Áádóó ayóó átʼéego baa ntséskees dooleeł; háálá éí éiyá shinaanish shá íidoolííł.

9 Dóó Mosesgi átʼáo ayóó átʼéii dooleeł, éí nihá dínéessééł nihidííniidę́ę, shidineʼé, yisdéidooʼish biniiyé, O Israel bighandóó danilíinii.

10 Dóó Moses éí dínéesééł, nidineʼé Egypt bikéyahdóó chʼíidooʼish.

11 Ákondi ééhózinii yaa halneʼii nitsʼą́ą́dóó óchíłígíí bineestʼąʼ bitahdóó laʼ dínéessééł; dóó sheʼadziilii baa deeshłéełgo nitsʼą́ą́dóó óchíłígíí bikʼǫ́ǫ́ʼ bitahjįʼ shizaad doolyééł—dóó Bóhólníihii ání, doo shizaad tʼéiyá doolyéeł da, ndi shizaad tʼáá íídą́ą́ʼ baa daheesyáhígíí, ałdóʼ deidoodląął.

12 Ákohgo, nitsʼą́ą́dóó óchíłígíí bineestʼąʼ ndaʼdoozoh; dóó Judah bitsʼą́ą́dóó oochíłígíí bineestʼąʼ ndaʼdoozoh, dóó nitsʼą́ą́dóó oochíłígíí bineestʼąʼ ńdeidíyóozohígíí, dóó Judah bitsʼą́ą́dóó óchíłígíí bineestʼąʼ ńdeidíyóozohígíí ałdóʼ, éí ałhąąh dínóosééł, naʼnitin doo tʼáá aanínígíí éí tʼóó ádaatʼé yididooniił dóó saad dahólónígíí niʼ kwíidoolííł, dóó nitsʼą́ą́dóó oochíłígíí bineestʼąʼ kʼé bitah hólǫ́ǫgo íidoolííł, dóó bizhéʼé yę́ę náasdi bideiyiłkáhígíí bił béédahodoozįįł, dóó bił ahadaʼdinishtʼánę́ę ałdóʼ bił béédahodoozįįł, ní Bóhólníihii.

13 Dóó doo bidziil yę́ę binahjįʼ bitsxeʼgo ádoolnííł, tʼáá ałtso shidineʼé bitahgóó shinaanish haalwod bijį́įdi, hashtʼeʼánihiʼdilnéeh dooleeł, O Israel bighandóó danohłíinii, ní Bóhólníihii.

14 Dóó ákótʼáo Joseph náásgóígíí yaa hoolneʼ, kóníigo: Jó, Bóhólníihii ééhózin yaa halneʼii yikʼihodidoodliił; dóó dadiyiilyééł danízinígíí éí ałtso niʼ kwíidoolííł; háálá díí ahaʼdeetʼáanii, Bóhólníihii bitsʼą́ą́dóó shóíséłtʼeʼígíí, éí shitsʼą́ą́dóó óchíłígíí bineestʼąʼ bitahdóó, ałtso biʼdoolnííł. Jó, tʼáá aaníí éí shił bééhózin díí ahaʼdeetʼánígíí biʼdoolnííł.

15 Dóó bízhiʼ éí, shízhiʼígíí bee yídóojiił; dóó bizhéʼédóʼ yił aheelyée doo. Dóó shígi átʼée dooleeł; háálá díí tʼáadoo leʼé, Bóhólníihii bílaʼ yee neidoołtééł, éí Bóhólníihii bibee adziilii bee shidineʼé yisdáʼiidoonił.

16 Aooʼ, ákótʼéego Joseph náásgóígíí yaa hoolneʼ: Díí éí tʼáá aaníí biʼdoolnííł nisin, Moses tʼáá aaníí doogááł hodooʼniidígi átʼáo; háálá Bóhólníihii éí áshidííniid, hoolʼáágóó naʼáłchíní danilį́į dooleełígíí baa áháshyą́ą dooleeł.

17 Dóó Bóhólníihii ádííniid: Mosesgi átʼéhígíí éí dínéesééł; áádóó bigish yee bidziilgo ádeeshłííł; dóó shibeehazʼáanii baa deeshłééł dóó nááyidíyóozoh. Ákondi éí doo hazhóʼó yáłtiʼgóó ádeeshłííł, áko doo ayóó yáłtiʼ da dooleeł, índa doo éí ayóó saad yee yáłtiʼ dago ádeeshłííł. Ndi tʼáá shílaʼ bee, shibeehazʼáanii bá nááhídéesoh; dóó bá yáłtiʼii éí bá ádeeshłííł.

18 Dóó Bóhólníihii ałdóʼ áshidííniid: Nitsʼą́ą́dóó oochíłígíí bineestʼąʼ bá ééhózinii yaa halneʼii dínéesééł; dóó bá yáłtiʼii éí hólǫ́ǫgo ádeeshłííł. Dóó shí, jó, sheʼadziilii bąąh ndeeshłéełii nitsʼą́ą́dóó oochíłígíí bineestʼąʼ ńdaʼiidzoh yę́ę néidzoh dooleeł biniiyé, dóó nitsʼą́ą́dóó oochíłígíí bineestʼąʼ yichʼįʼ naʼazogo ádeeshłííł; áádóó nitsʼą́ą́dóó oochíłígíí łaʼ yáłtiʼii nilį́įgo yaa halneʼ dooleeł.

19 Dóó saad néidíyóozohígíí éí, shintsékees beełtʼéego saad aláahdi ádaatʼé nízingo náasdi nitsʼą́ą́dóó óchíłígíí bineestʼąʼ bichʼįʼ íidoolííł. Dóó náasdi nitsʼą́ą́dóó óchíłígíí bineestʼąʼ niʼdóó yichʼįʼ chaał yádaałtiʼ dooleeł; háálá beʼoodląʼ éí shił bééhózin.

20 Dóó éí niʼdóó yéigo yádaałtiʼ dooleeł; índa bikʼis niheʼiinaʼ łahgo áńdaahdlééh deiłníi dooleeł, azhą́ bitaʼ tʼóó ahayóí są́ náʼoogą́ąʼ ndi. Áádóó dabizaad doo nanitłʼahgóó bikʼiʼdiitįįhígíí, bikʼehgo áhodoonííł.

21 Háálá beʼoodląʼ dahólónígíí biniinaa bizaad náasdi shizééʼdóó bikʼisóó éí nitsʼą́ą́dóó óchíłígíí bineestʼąʼ deididootsʼį́į́ł; dóó bizaad doo dabidziilígíí beʼoodląʼ binahjįʼ ayóó dabidziilgo ádadeeshłííł, binahjįʼ ałkʼidą́ą́ʼ danihizhéʼé yę́ę bił ahadaʼdinishtʼánę́ę yéédadoolnih.

22 Dóó kʼad, jó, shiyeʼ Joseph, díigi átʼáo éí ałkʼidą́ą́ʼ shizhéʼé sání yę́ę, náásgóígíí yaa hoolneʼ.

23 Ákohgo, háálá díí bee ałhaʼdeetʼánígíí binahjįʼ nikʼihojisdliʼ; áko naʼáłchíní danilį́į dooleełígíí doo ndooltsił da, háálá saad naaltsoos biyiʼígíí éí deidoodląął.

24 Dóó tʼááłáʼí ayóo bidziilgo bitahdóó yidoozįįł, ląʼígo yáʼátʼéehii íidoolííł, bizaad dóó binaanish bee, Diyin God bibee naʼanishí nilį́įgo, tʼáá íiyisíí beʼoodląʼ bidziilgo, naanish doo ájóleʼii íidoolííł, dóó Diyin God binááł ayóó átʼéii íidoolííł, binahjįʼ Israel bighandóó danilíinii, dóó nikʼisóó baʼáłchíní danilį́į dooleełígíí bichʼįʼ, ląʼída tʼáadoo leʼé doo béédahózinę́ę ninéidoodlééł.

25 Dóó kʼad, Joseph, nikʼihojoosdlííʼ. Jó, tʼahdii éí áníłtsʼíísíyeeʼ, ákohgo nikʼis, Nephi bizaad yísíníłtsʼą́ą́ʼ doo, dóó díí saad ninááł bee haasdzíʼígíí bikʼehgo ná biʼdoolnííł. Nizhéʼé kʼadę́ę náádiilyéhígíí bizaad béénílniih. Amen.