1 Dóó kʼad, shí, Nephi, shizhéʼé náásgóígíí yaa nahasneʼę́ę baa yáshtiʼ, díí éí Joseph, Egyptgóó biʼdisnáhą́ą baa haneʼ.

2 Jó áko, tʼáá ałtso baʼáłchíní danilį́į doo náásgóígíí yaa hoolneʼ dooleełígíí yaa yááłtiʼ. Áádóó náásgóígíí yaa halneʼgo yaa náʼiidzohígíí, doo ląʼída biláahdi ádaatʼée da. Dóó nihí dóó nihaʼáłchíní danilį́į dooleełígíí yaa yááłtiʼ; dóó éí éiyá béésh łitsoii bikáaʼgi haneʼígíí nááháasdzo.

3 Ákohgo, shizhéʼé, Joseph náásgóígíí yaa hoolneʼ yaa yááłtiʼgo dóó bikʼijįʼ, Laman baʼáłchíní, biyeʼ, dóó bitsiʼ, ahaniiníʼeezh, dóó kóyidííniid: Jó, shitsóóké, dóó shinálíké danohłíinii, éí sheʼawééʼ alą́ąjįʼígíí, biyeʼ dóó bitsiʼ danohłíinii, shizaad dadidoohtsʼį́į́ł nisin.

4 Háálá Bóhólníihii Diyin God ádííniid: Áko shibeehazʼáanii bikʼeh dahonołʼį́įgo índa díí kéyah bikáaʼgi yáʼátʼéehgo iiná bee náás didookah, dóó shibeehazʼáanii doo bikʼeh dahonołʼį́į́góó índa shitsʼą́ą́dóó nahjįʼ kónihidiʼdoolnííł.

5 Jó ndi, shiyeʼ dóó shitsiʼ nohłínígíí, tʼah doo nááshiʼdiilyéhídą́ą́ʼ tʼáá hazhóʼó bee akʼihojídlíhígíí bee nihá sodideeszįįł ndi; jó háálá, yáʼátʼéhíjígo bee nihidiʼneesdzą́ągo doo bitsʼádoohkah da.

6 Ákohgo, hóyéeʼgo nihikʼijįʼ haʼoodzíiʼgo, akʼihojídlíhígíí nihąąh ninishłé, áko hóyéeʼgo nihikʼijįʼ haʼoodzíʼígíí nahjįʼ nihá kódoolnííł dóó nihishchíinii éí baa ńdoolyééł.

7 Ákohgo, sheʼakʼihojídlíhígíí biniinaa Bóhólníihii Diyin God doo bíniʼdii ałtso ádoodįįł dago íidoolííł; ákohgo, Diyin God éí nihaa joobaʼ doo, índa hoolʼáágóó naʼáłchíní danilį́į dooleełígíí ałdóʼ yaa joobaʼ dooleeł.

8 Áádóó shizhéʼé Laman bitsiʼ dóó biyeʼ yichʼįʼ yááłtiʼgo índa, Lemuel bitsiʼ dóó biyeʼ shidááhdóó ndadoohʼish níigo bidááhdóó niitʼeezh.

9 Dóó kóníigo, yichʼįʼ yááłtiʼ: Jó, shitsóóké dóó shinálíké danohłíinii shiyeʼ naaki góneʼ naagháhígíí biyeʼ dóó bitsiʼ danohłíinii; jó Laman biyeʼ dóó bitsiʼ sodizin bee bá haasdzííʼ yę́ę nihídóʼ nihaa nishłé; ákohgo, doo éí ałtso nanihiʼdooltsił da; háálá nihoolzhiizhdi nihaʼáłchíní dooleełígíí bikʼidahojidoodliił.

10 Áádóó shizhéʼé ałtso yichʼįʼ yááłtiʼgo, jó, Ishmael biyeʼ danilíinii, aooʼ, dóó índa tʼáá ałtso bighandóó yichʼįʼ yááłtiʼ.

11 Áádóó bikʼijįʼ ałtso yichʼįʼ yááłtiʼgo, Sam yichʼįʼ hanáánáádzííʼ, kóníigo: Ni, dóó naʼáłchíní dooleełígíí bikʼihojídlíi dooleeł; háálá Nephigi átʼáo kéyah shóidííłtʼeeł. Dóó naʼáłchíní dooleełígíí dóó baʼáłchíní dooleełígíí yił naakai dooleeł; dóó nikʼisígi ánítʼée dooleeł, dóó náásgóó naʼáłchíní danilį́į dooleełígíí éí ałdóʼ áájí baʼáłchíní danilį́į dooleełígíí ałdóʼ ádaatʼée dooleeł; dóó níiníłką́ąjįʼ nikʼihojídlíi dooleeł.

12 Áádóó shizhéʼé, Lehi, tʼáá ałtso bighan hazʼą́ą dooleełígíí yichʼįʼ yááłtiʼgo, bijéí biyiʼdóó íinízin dóó Bóhólníihii biiʼSizíinii bił hólónígíí bikʼehgo yááłtiʼgo índa, są́ yiih yíyá. Áádóó éí náádiilyá, dóó łeeh yiltį́.

13 Áádóó náádiilyáádóó tʼáadoo díkwíida yiłkaahí, Laman dóó Lemuel dóó Ishmael biyeʼ danilíinii Bóhólníihii hachʼįʼ hahaasdzíʼígíí biniinaa shichʼįʼ bá dahóóchįįd.

14 Háálá shí, Nephi, bizaadígíí bikʼehgo, éí bichʼįʼ yáníłtiʼ shidiʼníigo biniinaa bichʼįʼ yááłtiʼ; háálá ląʼígo bichʼįʼ yéíłtiʼ, dóó shizhéʼé ałdóʼ, tʼah doo náádiilyéhę́ędą́ą́ʼ yichʼįʼ yááłtiʼ; ląʼída ádííniidígíí éí nááná łaʼ shibéésh tʼą́hí bikááʼ haneʼígíí bikááʼ nááháasdzo; háálá shidineʼé bitahgóó ádahóótʼįįdígíí éí náánáłahjí shibéésh tʼą́hí bikááʼ nááháasdzo.

15 Dóó shijéí biyiʼdóó íinisinígíí, dóó Diyin God bizaad béésh łitsoii tʼą́hí biyiʼ bee bikʼeʼeshchínígíí, díí bikááʼ nááhásóóh. Háálá shitsʼíís dóó shiyiʼsizíinii Diyin God bizaad tʼáá íiyisíí bił nizhóní, dóó shijéí bee tʼáá íiyisíí baa ntséskees, dóó shaʼáłchíní yitsʼą́ą́dóó ídahwiidoołʼááł dóó yee dínóosééł biniiyé nááhásóóh.

16 Jó, shitsʼíís dóó shiyiʼsizíinii Bóhólníihii biiʼ nilíinii tʼáá íiyisíí yaa bił hózhǫ́; dóó tʼáá áłahjįʼ tʼáadoo leʼé yiiłtsánígíí dóó disétsʼą́ʼígíí tʼáá íiyisíí shijéí bee baa ntséskees.

17 Ákótʼée ndi, azhą́ Bóhólníihii biyáʼátʼéehii ayóó átʼéii ndi, binaanish tʼáá íiyisíí ayóó átʼé dóó nizhónígo shił ííshją́ą́ áyiilaa ndi, shijéí neezgaigo ání: O tʼáá íiyisíí hastiin doo bił hózhóonii nishłį́! Aooʼ, atsʼíískʼehgo nisinígíí biniinaa shijéí tʼáá íiyisíí yínííł silį́į́ʼ; bąąhági átʼéii baa niséyáhígíí biniinaa shitsʼíís dóó shiyiʼsizíinii tʼáá íiyisíí yínííł nízin.

18 Sistłʼáséyah, háálá hoʼdinitaah dóó bąąhági átʼéii doo bínísdzilígíí biniinaa.

19 Dóó baa shił hózhǫ́ǫ doo nisingo, shijéí neezgai łeh, shibąąhági átʼéii biniinaa; ákótʼée ndi, baʼííníshłíhígíí éí shił bééhózin.

20 ShiDiyin God shíká análwoʼ, doo kééhatʼínígi tiʼhooshníihgo áádę́ę́ʼ shinílóóz; dóó tónteel bikáaʼgi shíká eelwod.

21 Beʼayóó óʼóʼníinii shiiʼ hadéébįįd, tsʼídá shitsʼíís ałtso néidiilá.

22 Shikʼijįʼ danilínę́ę yikʼeh deesdlį́į́ʼ, shidááhdę́ę́ʼ bitah dahoditsízgo áyiilaa.

23 Jó, jį́įgo shisodizin yidiiztsʼą́ą́ʼ, dóó tłʼééʼ biyiʼ ééhózinii ił áhoodzaa binahjįʼ ííshją́ą́ ííłʼį́į́ ńtʼę́ę́ʼ.

24 Dóó jį́įgo éí tʼáá íiyisíí bichʼįʼ sodiszin; aooʼ, yáʼąąshgóó shinééʼ bee hodiitsʼaʼgo sodiszin; dóó diyin yá ndaalʼaʼii shichʼįʼ adahaaskai dóó ndashineeztą́ą́ʼ.

25 Dóó biʼIiʼsizíinii bitʼaʼ bikááʼ shitsʼíís hólǫ́ǫgo dził ayóó ádaatʼéhígíí bighą́ą́ʼgóó shił haazhʼáázh. Dóó shinááʼ bee tʼáadoo leʼé ayóó átʼéii nééłʼį́į́ʼ, aooʼ, diné yidoołtséłígíí éí doo yíneelʼáanii ndi; éí bąą éí doo bikááʼ ádíílíił da shiʼdooʼniid.

26 O índa, ayóó ádaatʼéii yiiłtsą́ą ndi, dóó Bóhólníihii beʼajoobaʼ tʼáá íiyisíí ląʼígo yee nihookááʼ dineʼé yaa níyáa ndi, haʼátʼíísh éí biniiyé shijéí yicha dóó shitsʼíís dóó shiyiʼsizíinii yínííł yiiʼ hólǫ́ǫ dooleeł, dóó shitsʼíís doo bidziil da yileeh, dóó sheʼadziil niʼ kwáániił dooleeł, díí tiʼhooshníhígíí biniinaa?

27 Dóó haʼátʼíísh éí biniiyé shitsʼíís biniinaa bąąhági átʼéii bá hoséłʼą́? Aooʼ, haʼátʼíísh biniiyé bąąhági átʼéii bá hoséłʼą́, binahjįʼ doo yáʼáshóonii shijéí biyiʼdi bá hoséłʼą́ shił hodeesyeelę́ę yidoołchxǫǫł dóó shitsʼíís dóó shiyiʼsizíinii atíidoolííł? Haʼátʼíísh biniiyé shikʼijįʼ danilínígíí bichʼįʼ shá háchįʼ?

28 Chʼéénídzííd, shitsʼíís dóó shiyiʼsizíinii! Tʼáadoo bąąhági átʼéii bee niʼkwínítʼéhé. Nił hózhǫ́, O shijéí, áádóó shitsʼíís dóó shiyiʼsizíinii beʼenaʼí bá hoołʼaah lágo.

29 Tʼáadoo shikʼijįʼ danilínígíí biniinaa nánááháchįįhí. Tiʼhooshníhígíí biniinaa tʼáadoo sheʼedziil niʼ kwíínísiní.

30 Nił hózhǫ́, O shijéí, dóó Bóhólníihii bichʼįʼ sodílzin, dóó kódíníigo: Bóhólníihii, hoolʼáágóó naa hashniih dooleeł; shitsʼíís dóó shiyiʼsizíinii naa bił hózhǫ́ǫ dooleeł, ShiDiyin God, shitseʼ bee yisdáʼiildéehii nilíinii.

31 O Bóhólníihii, yisdánáshidííłtéłísh? Sheʼenaʼí bílákʼeedóó, yisdánáshidííłtéłísh? Bąąhági átʼéii hólǫ́ǫgo bikʼee shitah hoditsxizgo dóó tʼóó baaʼih nisingo áshidíílíłísh?

32 Chʼį́įdiitah biyah atiin góneʼ tʼáá áłahjįʼ shá dáʼdeelkaal dooleeł laanaa, háálá shijéí yisdił dóó shiiʼsizíinii díí asésiihígíí yąąh bíniʼ! O Bóhólníihii, tʼáá shǫǫdí, niyáʼátʼéehii bee honítʼiʼgi shidáʼdóółkaał lágo, áko tééh góyaa yisháał dooleeł, áko dilkǫǫhgo atiinígíí tʼéiyá bikááʼ yisháał dooleeł.

33 O Bóhólníihii, tʼáá shǫǫdí, niyáʼátʼéehii éénééz shikíníłtʼih! O Bóhólníihii, tʼáá shǫǫdí, sheʼenaʼí adashiłʼíinii bił chʼídeeshwołgo bitsʼádeeshwołgo shá áhólééh! Tʼáá shǫǫdí tʼáá shitsiijįʼ atiin kʼéhózdongo shá ánílééh! Tʼáadoo leʼé shidínóołtłʼahígíí, tʼáadoo shidáahgi nihíʼaahí—ndi shilą́ąjįʼ shá hashtʼehwiinísin, dóó tʼáadoo shidáahgi tʼáadoo leʼé nihíléhé, ndi sheʼenaʼí adashiłʼíinii éí tʼáadoo leʼé bidáahgi nihínííł.

34 OBóhólníihii, ni éí naʼííníshłí, dóó hoolʼáágóó éí naʼííníshłíi dooleeł. Bílaʼashdlaʼii éí doo baʼííníshłíi da; háálá tʼáá háiida bílaʼashdlaʼii yaʼólíhígíí éí hóyéeʼii yiih doogáałgo shił bééhózin. Aooʼ, hóyéeʼii biishdoogááł tʼáá háíshį́į́ bílaʼashdlaʼii yaʼólíhígíí éí doodago bílaʼashdlaʼii bibee adziilii yaa joozlíʼígíí.

35 Aooʼ, tʼáá aaníí shił bééhózin, Diyin God tʼáá jííkʼe tʼáá háiida biʼdókeedígíí yaʼdoolééł. Aoo, shiDiyin God éí tʼáá aaníí shaʼ doolééł, yáʼátʼéhígíí yíníshkeedgo; éí bąą hodiitsʼaʼgo nichʼįʼ sodiszin dooleeł; aooʼ, nichʼįʼ deeshcha, shiDiyin God, tʼáá ákogi átʼéii sheʼadziilii nílíinii. Jó, hoolʼáágóó shisodizin diitsʼaʼ dooleeł, sheʼadziilii dóó hoolʼáágóó shiDiyin God nílíinii. Amen.