Wase 7
E tomana o Jekope nona wiliwili mai na Aisea: Sa vosa vaka na Mesaia ko Aisea—Ena tiko vua na Mesaia na yame ni vuku—Ena solia na Dakuna vei ira na dau veivakanakuitataki—Ena sega ni vakalialiai ko koya—Vakatautauvatataka kei na Aisea 50. Rauta na 559–545 B.K.
1 Io, ni sa kaya vakaoqo na Turaga: Au sa biuti kemudou tani li, se’u muduki kemudou tani me sega ni mudu? Ni sa kaya vakaoqo na Turaga: Sa evei na ivola ni veibiu nei tinamu? Au sa vakatalai iko vei cei, se ko cei ka’u sa dinau vua au sa volitaki iko kina? Io, ka’u sa volitaki iko vei cei? Raica, ena vuku ni nomudou caka cala dou sa volitaki kemudou vakai kemudou kina, kei na vuku ni nomudou talaidredre sa biu tani kina na tinamudou.
2 Ia, ni’u a lako mai sa sega e dua na tamata; ni’u a kaci, io, sa sega e dua me rogo mai. Oi kemudou na mataqali i Isireli, sa lekaleka li na ligaqu me dredre kina ni ia na veivueti, se sa sega beka vei au na kaukauwa me’u veisereki kina? Raica, ena noqu veivunauci au sa vakamacara kina na wasawasa, au sa vukica na nodra uciwai me lekutu ka me bona na kedra ika ni sa maca na wai, ka ra sa mate ena vuku ni karamaca.
3 Au sa vakaisulutaka na lomalagi ena butobuto, ka’u cakava na isulu taga me kedra iubi.
4 Sa solia vei au na Turaga na Kalou na yame ni tamata vuku, me’u kila ka vosataka vei kemudou na mataqali i Isireli na vosa ena kena gauna dodonu. Ni dou sa oca sa veivakayadrati ena veimataka. Sa vakayadrata na daligaqu me’u rogoca me vakataki ira sa vuku.
5 Sa dolava na Turaga na Kalou na daligaqu, ka’u a sega ni veisaqasaqa, se vuki tani ka vakanadaku.
6 Au a solia na dakuqu ki vua na dauveiyaviti, kei na baluqu vei ira na dauvuti drauniulu. Au a sega ni vunitaka na mataqu mai na veivakamaduataki kei na veikasiviti.
7 Ni na vukei au na Turaga na Kalou, o koya au na sega kina ni vakamaduataki. O koya au sa vaqaqataka kina na mataqu me vaka na qiwa, ka’u sa kila ni’u na sega ni madua.
8 Ka sa voleka na Turaga, ka sa vakadonui au ko koya. Ko cei me na veileti kei au? Me keirau tucake vata mada. Ko cei e kequ meca? Me toro voleka mai vei au ko koya, ka’u na yaviti koya ena kaukauwa ni gusuqu.
9 Ni na vukei au na Turaga na Kalou. Ia ko ira kece era na vakacalai au, raica, era na madra kece mai me vaka na isulu, ka na kani ira na sarasara.
10 Ko cei ena kemudou maliwa sa rerevaka na Turaga, ka sa talairawarawa ki na domo ni nona italai, ka sa lako ena butobuto ka sa sega vua na rarama?
11 Raica koi kemudou kece sa tutuvaka na buka, ka vakawavoliti kemudou ena lidi ni bukawaqa, dou lako voli ga ena rarama ni nomudou bukawaqa kei na lidi ni bukawaqa dou sa tutuvaka. Oqo dou na rawata mai na ligaqu—dou na davo sobu ga ena rarawa.