1 Imdengandak, dakayo a sumurot iti kinalinteg. Kitaenyo ti bato a nakatikapanyo, ken ti lubbot ti abut a nakakalianyo.

2 Kitaenyo ni Abraham, ti amayo, ken ni Sara, isu a nangyanak kadakayo; ta inawagak a kakaisuna, ket binendisionak.

3 Ta liwliwaento ti Apo ti Zion, liwliwaennanto amin a nadadael a lugar; ket aramidennanto ti langalangna a kasla Eden, ken kasla minuyongan ti Apo ti disiertona. Masarakanto sadiay ti rag-o ken ragsak, panagyaman ken samiweng.

4 Imdengandak, tattaok; ket dumngegkayo kaniak, O pagiliak; agsipud ta agtaudto kaniak ti paglintegan, ket pagbalinekto ti lintegko nga agtalinaay a silaw kadagiti tattao.

5 Asidegen ti kinalintegko; inyegkon ti pannakaisalakanko, ket kednganto ti takiagko dagiti tattao. Urayendakto dagiti isla, ket agtalekdanto iti takiagko.

6 Iturongyo dagiti matayo iti langit, ken kumitakayo iti daga iti baba; ta langit ket agpukawto a kasla asuk, ket agdaanto ti daga a kasla kawes; ket matayto iti kasta a wagas dagiti agnaed dita. Ngem agnanayonto ti panakaisalakanko, ket saanto a mawaswas ti kinalintegko.

7 Imdengandak, dakayo a makaammo iti kinalinteg, kadagiti puso ti tattao a nangisuratak ti paglintegak, saanyo a pagbutngan ti panangumsi ti tattao, uray pay a saankayo agbuteng kadagiti panangsusikda.

8 Agsipud ta kanento ida ti sanga a kas iti kawes, ken kanento ida ti igges a kas iti lupot a delana. Ngem mataginayonto ti kinalintegko, ken ti pannakaisalakanko iti agsasaruno nga henerasion.

9 Agriingkayo, agriingkayo! Ipanyo ti pigsayo, O takiag ti Apo; agriingkayo a kas kadagiti nagkauna nga al-aldaw. Saan kadi nga isu ti nangtagtagbat ken ni Rahab, ken nangsugat iti dragon?

10 Saan aya nga isu ti nangabbat iti baybay, dagiti danum ti nalawa a taaw, nga inaramidna a dalan ti lansad ti baybay a pagdaliasatan dagiti nasubbotna?

11 Ngarud, agsublinto dagiti nasubbot ti Apo, ken umaydanto nga agkankanta iti Zion; ket maipatawto iti uloda ti agnanayon a rag-o ken kinasanto; ket magun-oddanto ti kinaragsak ken rag-o; pumanawto ti leddaang ken panagladladingit.

12 Siak isuna; wen, siak ti mangliwliwa kadakayo. Kitaen, asinoka, ta nasken nga agbutengka iti tao, a matay, ken ti anak ti tao, nga agbalinto a kasla ruot?

13 Ken manglipat iti Apo a namarsua kenka, a nangyunnat iti langit, ken nangipasdek ti pundasion iti daga, ken nagtultuloy a nagbuteng iti inaldaw, gapu iti pungtot ti mangidadanes, a kas man la sisasagana a mangdadael? Ket sadino ti yan ti pungtot ti mangidadanes?

14 Maganatan ti naadipen a balud, a mawayawayaanto, ken saanto a matay iti abut, wenno saanto a maibus ti tinapayna.

15 Ngem siak ti Apo a Diosyo, a dagiti dalluyonna ket nagungor; ti Apo ti Pangen ti naganko.

16 Ket naitedko dagiti balikasko iti ngiwatmo, ket inabungotankayo iti anniniwan ti imak, tapno maimulak ti langit ken maipasdekko dagiti pundasion iti daga, ket kunak iti Zion: Kitaen, dakayo ti taok.

17 Agriingka, agriingka, tumakderka, O Jerusalem, nga imminum iti ima ti Apo ti kopa ti pungtotna—sika nga imminum iti ared-ed manipud iti napespes nga agkilkilno a kopa—

18 Ket awan ti mangiwanwan kenkuana kadagiti lallaki nga impasngayna; uray man la koma no nangkibin kenkuana, kadagiti annakna a lallaki a tinarakenna.

19 Umayto kenka dagitoy dua nga annak a lallaki, a maasianto kenka—iti pannakadidigram ken pannakadadaelmo, ken iti panagbisin ken iti espada—ken asino ti pangliwliwaek kenka?

20 Natalimudaw dagiti lallaki nga annakmo, malaksid dagitoy dua; nakaiddada iti pagsapalan ti amin a kalsada; a kas iti atap a toro iti iket, napnoda iti pungtot ti Apo, ti pammabalaw ti Diosmo.

21 Ngarud denggem ita daytoy, sika a nagrigrigat, ken nabartek, ket saan nga iti arak:

22 Kastoy ti kinuna ti Apom, impakaasi ti Apo ken Diosmo ti panggep ti taona; kitaen, innalakon iti imam ti agkilkilno a kopa, ti ared-ed iti kupa ti rungsotko; saanmunto nga inumen daytoy manen.

23 Ngem siak ti mangikabilto iti ima dagiti namarparigat kenka; a nagkuna iti kararuam: Agtamedka, tapno makapagtultuloykami—ket inyunnatmo ti bagim a kasla daga ken kalsada kadagiti magna.

24 Agriingka, agriingka, ipanmo amin a pigsam, O Zion; yusongmo ti napintas a pagan-anaymo, O Jerusalem, ti nasantuan a siudad; ta awanen ti umay kenka manipud ita a saan a nakugit ken narugit.

25 Iwagsakmo ti tapok ti bagim; bumangonka, agtugawka, O Jerusalem; rumuk-atka iti nangbekkel kenka, O naadipen a balud a babai nga anak ti Zion.