1 E dina, e dina, au sa kaya ni’u gadreva, mo ni soli ka ni loloma vei ira na dravudravua; ia mo ni qarauna vinaka mo ni kakua ni soli ka ni loloma e matadra na tamata me ra raici kemuni kina; kevaka e vakaoqo, ena sega na kemuni isau mai vua na tamamuni sa tiko mai lomalagi.

2 O koya gona, ni ko sa soli ka ni loloma, mo kakua ni uvuca na davui e matamu me vaka era sa dau kitaka na dauveivakaisini ena veivalenilotu kei na veigaunisala, me ra vakalagilagi kina mai vei ira na tamata. Au sa kaya vakaidina vei kemuni, sa tu ga vei ira na kena isau.

3 Ia ko iko, ni ko sa soli ka ni loloma me kakua ni kila na ligamu imawi na ka sa solia na ligamu imatau;

4 Me vuni kina na nomu soli ka ni loloma; ia na Tamamu sa raica na ka e vuni, ena sauma votu vei iko.

5 Ia ni ko sa masu, mo kakua ni vakataki ira na dauveivakaisini, raica era sa vinakata me ra tu ena veivalenilotu kei na veitutu ni sala ka masu, me ra raici ira kina ko ira na tamata. Au sa kaya vakaidina vei kemuni, sa tu ga vei ira na kena isau.

6 Ia ko iko, ni ko sa masu, curu ki na nomu loqi, ia ni ko sa sogota na kena katuba, masu vua na Tamamu sa tabogo; ia na Tamamu sa raica na ka e vuni, ena sauma votu vei iko.

7 Ia ni ko ni sa masu, kakua ni cavuta na vosa tawayaga me vakataki ira na tawa lotu, ni ra sa nanuma era na rogoci ni ra sa vosa balabalavu.

8 O koya mo ni qai kakua ni vakataki ira, raica sa kila e liu na Tamamuni na ka sa yaga vei kemuni, qai muri na nomuni kerekere vua.

9 O koya mo ni qai masu kina vakaoqo: Tamai keimami mai lomalagi, me vakarokorokotaki na yacamuni.

10 Me caka na lomamuni e vuravura me vaka sa caka mai lomalagi.

11 Ka mo ni vosoti keimami ena vuku ni neimami idinau, me vaka keimami sa vosoti ira era sa dinau vei keimami.

12 Mo ni kakua ni kauti keimami ki na veitemaki, ka mo ni vakabulai keimami mai na ca.

13 Ni sa nomuni na matanitu, kei na kaukauwa, kei na lagilagi, ka sega ni mudu. Emeni.

14 Ni kevaka ko ni sa vosoti ira na tamata ena nodra caka cala, ena vosoti kemuni tale ga na Tamamuni vakalomalagi;

15 Ia kevaka ko ni sa sega ni vosoti ira na tamata era sa cakacala vei kemuni, ena sega tale ga ni vosota na nomuni cakacala na Tamamuni.

16 Me kena ikuri, ni dou sa lolo, kakua ni vakaveveku mata me vakataki ira na dauveivakaisini, ni ra sa vakatanitaka na matadra me rairai vei ira na tamata na nodra lolo. Au sa kaya vakaidina vei kemuni, sa tu ga vei ira na kena isau.

17 Ia ko iko, ni ko sa lolo, lumuta na ulumu ka tavoya na matamu;

18 Me kakua kina ni rairai vei ira na tamata na nomu lolo, vua ga na Tamamu sa tabogo; ia na Tamamu sa raica na ka sa vuni, ena sauma votu vei iko.

19 Mo ni kakua ni kumuna vata vei kemuni na iyau e vuravura, ka na vakacacana kina na sarasara kei na veveka, a sa ravabasuka kina na daubutako ka butakoca;

20 Ia mo ni kumuna vata vei kemuni na iyau mai lomalagi, sa sega ni vakacacana na sarasara se na veveka, a sa sega ni ravabasuka kina na daubutako me butakoca.

21 Raica ena tiko ga na yalomuni ena yasana sa tiko kina na nomuni iyau.

22 A cina ni yago na mata; kevaka, sa dua tu ga na rai ni matamu, ena rarama kina na yagomu taucoko.

23 Ia kevaka sa rai na matamu ki na ca, ena sinai na yagomu ena butobuto. Ia kevaka sa butobuto na rarama sa tu e lomamu, sa vakacava na levu ni butobuto ko ya!

24 Sa sega ni dua na tamata sa qarava rawa e rua na turaga; raica ena cata e dua ka lomani koya ka dua, se na kabita e dua ka beci koya ka dua. Ko ni sa sega ni qarava rawa na Kalou kei na iYau.

25 Ka sa yaco ni sa cavuta oti na vosa oqo ko Jisu, sa qai golevi iratou na le tinikarua sa digitaka ko koya ka kaya: Mo dou nanuma tiko na vosa au sa vosataka. Raica au sa digitaki kemudou mo dou qaravi ira na tamata oqo. O koya au sa kaya kina vei kemudou, mo dou kakua ni lomaocaoca ena vuku ni nomudou bula, ena ka mo dou kania se na ka mo dou gunuva; se ena vuku ni yagomudou ena ka mo dou vakaisulu kina. Sa sega li ni ka levu na bula ka lailai na kakana, ia na yago tale ga ka lailai na isulu?

26 Raica, na manumanu vuka, ni ra sa sega ni daukabukaburaki se dautamusuki se daukumuna vata ki na lololo; a sa vakani ira na Tamamuni vakalomalagi. Dou sa sega beka ni uasivi cake vei ira?

27 Ia ko cei vei kemudou, ena nona vakasama ga, sa rawa me vakuria na kena balavu ena dua na kiupiti?

28 Ia a cava dou sa lomaocaocataka kina na isulu? Dou vakananuma mada na viavia ni veikau, era sa tubu vakaevei? Era sa sega ni daucakacaka se dautali;

29 Ia au sa kaya vei kemudou, O Solomoni sara mada ga ena nona lagilagi kecega, sa sega ni vakaisulu me vaka e dua vei ira oqo.

30 Ia kevaka sa vakasuluma vakaoqo na Kalou na co ni veikau ka tu edaidai, ka sa biu ki na lovo ena mataka, ena gu vakalevu cake me vakasulumi kemudou kevaka dou sa vakabauta vakaidina sara.

31 O koya mo dou qai kakua ni lomaocaoca ka kaya: A cava eda na kania? se, A cava eda na gunuva? se, A cava eda na vakaisulu kina?

32 Raica sa kila na Tamamudou Vakalomalagi ni sa yaga vei kemudou na ka kecega oqo.

33 Ia mo dou vakasaqara taumada na matanitu ni Kalou kei na nona ivalavala dodonu, ia ena soli me kena ikuri vei kemudou na ka kecega oqo.

34 O koya mo dou qai kakua ni lomaocaoca ena vuku ni mataka, ena lomaocaoca na mataka ena vuku ni kena ka. Sa rauta na siga na kena ca.