1 Raica oqo, au na vakaraitaka vei kemuni ni ra a sega ni vakataudeitaka e dua na tui ena vanua; ia ena yabaki vata ga oqo, io, na ika tolusagavulu ni yabaki, era a vakarusa kina na itikotiko ni veilewai, io, ka ra labata na turaganilewa levu ni vanua.

2 Era sa dui veitawasei vakai ira na tamata; era sa dui tawase ki na veiyavusa, na tamata yadua me vaka na nona matavuvale kei na nona mataqali kei na nona itokani; ka ra sa vakarusa kina na matanitu ni vanua.

3 Era sa lesia na yavusa yadua e dua me nodra turaga se nodra iliuliu; a ra sa tu kina na veiyavusa kei na iliuliu ni veiyavusa.

4 Raica oqo, sa lewe levu na nona matavuvale kei na wekana kei na nona itokani; na tamata yadua, ka sa levu sara kina na iwiliwili ni nodra yavusa.

5 A sa vakayacori na veika kece oqo, ka se bera mada ni tubu na ivalu ena kedra maliwa; ka sa yaco vei ira na tamata na ca kece oqo baleta ni ra sa soli ira ki na kaukauwa i Setani.

6 Ka sa vakarusai na yavu vakalawa ni matanitu ena vuku ni nodra isoqosoqo vuni na wekadra kei na nodra itokani o ira era a vakamatei ira na parofita.

7 Ka ra sa vakavuna me tubu e dua na veileti levu ena vanua, ka voleka me ra sa caka ca kece kina na iwase ni tamata yalododonu cake; io, era sa lewe vica wale ga na tamata yalododonu ena kedra maliwa.

8 Ia sa bera ni oti e ono na yabaki mai na gauna era sa vuki tani kina mai na nodra ivalavala dodonu na iwase levu cake ni tamata, me vaka ni sa lesu tale na koli ki na nona luwa, se na vuaka ki na nona boroboro e na lolobo.

9 Ia era sa sosoqoni vata na lewe ni isoqosoqo vuni, ka sa mai vakavuna tiko na duidui levu vei ira na tamata oqo, ka ra lesia me nodra iliuliu e dua na tamata ka ra vakatoka me ko Jekope;

10 Ka ra sa vakatokai koya me nodra tui; ka sa yaco kina ko koya me nodra tui na ilawalawa ca oqo; ia sai koya e dua vei ira ka a domovata ena nodra vorati na parofita era a vakadinadinataka tiko na ivakavuvuli i Jisu.

11 Ka sa yaco ni ra sa sega soti ni lewe levu sara na ilawalawa daubutako me vakataki ira na veiyavusa tamata ka ra sa duavata tu, ia era qai dui bulia ga na lawa ni nodra yavusa ko ira na nodra iliuliu; era sa veimecaki tu; ni ra sega ni tamata ivalavala dodonu, ia era sa duavata ga ena nodra cati ira era sa curu ki na dua na veiyalayalati me ra vakarusa na matanitu.

12 Ia ni sa raica ko Jekope na nodra tui na tamata ca ni ra sa lewe levu cake na nodra meca, sa vakaroti ira na nona tamata me ra dro ki na yasana ki na vualiku ni vanua ka vakaduria kina na nodra matanitu, ka waraki ira kina era na se tani mai (a sa cavilaki ira ko koya ni na levu sara era na se tani) ia me ra mai cokovata me ra lewe vuqa ka kaukauwa, me ra qai valuti ira yani na lewe ni veiyavusa; a ra sa kitaka vakakina.

13 A sa rui totolo na nodra lako ka sega kina ni rawa me ra tarovi ni ra sa yawa tani sara mai vei ira na tamata. A sa mai cava kina na ika tolusagavulu ni yabaki; ka sa vaka tu kina na veika me baleti ira na tamata i Nifai.

14 Ka sa yaco ni ena ika tolusagavulu kadua ni yabaki, era sa wasewase kina ki na veiyavusa, na tamata yadua kei na nona matavuvale, na wekana kei na nona itokani; ia era sa duavata ena dua na veidinadinati me ra kakua ni veivaluvaluti vakataki ira; ia era a sega ni duavata ena nodra lawa kei na ivakarau ni nodra matanitu, ni ra a sa dui vakadeitaki tu me vaka na nodra nanuma na nodra turaga kei na nodra iliuliu. Ia era sa virikotora ga na lawa dredre sara me kakua kina ni dua na yavusa me curu vakailoa ki na dua tale, ka sa bau rawa toka kina na tiko veisaututaki ena nodra vanua; ia sa vukitani ga na lomadra mai vua na Turaga na nodra Kalou, ka ra sa vakaviriki ira na parofita ena vatu, ka vakasevi ira tani mai na kedra maliwa.

15 Ka sa yaco ni ra sa sikovi Nifai—na agilosi kei na domo tale ga ni Turaga, ia ni sa raica vakaidina sara na agilosi, ka kena ivakadinadina bula talega, ka sa soli talega vua na kaukauwa me kila kina na itavi ni ilesilesi i Karisito; ka sa raica tale ga na totolo ni nodra vukitani na tamata, mai na ivalavala dodonu ki na nodra caka ca kei na itovo vakasisila;

16 O koya gona, sa rarawataka kina na kaukauwa ni lomadra kei na mataboko ni nodra vakasama—a sa lako yani vei ira ena yabaki tikoga ko ya ka tekivu me vakadinadinataka vakadoudou me ra veivutuni ka vakabauta na Turaga ko Jisu Karisito, me bokoci kina na nodra ivalavala ca.

17 A sa vunautaka vei ira ko koya e vuqa na ka; ka sega ni rawa me ra volai kece, sa sega ni ganita me volai wale ga e dua na kena iwase, o koya ka sa sega kina ni volai ena ivola oqo. A sa vunau ko Nifai ena kaukauwa kei na lewa cecere.

18 Ka sa yaco ni ra sa cudruvi koya, baleta ni sa levu cake na nona kaukauwa vei ira ka sa dredre me sega ni vakadinati na nona vosa, raica era sa dau mai vakavulici koya na agilosi ena veisiga, ena vuku ni sa rui levu na nona vakabauta na Turaga ko Jisu Karisito.

19 A sa vakasavi ira tani na tevoro kei na yalo tawasavasava ena yacai Jisu; a sa vakaturi tacina cake mai na mate, ni ra a vakavirika mate ena vatu ko ira na tamata.

20 Era sa raica na tamata ka vakadinadinataka, ka ra sa cudruvi koya ena vuku ni nona kaukauwa; a sa kitaka tale ga ko koya e vuqa na cakacaka mana e matadra na tamata, ena yacai Jisu.

21 Ka sa yaco ni sa oti yani na ika tolusagavulu kadua ni yabaki, ka ra sa lewe lailai ga era sa saumaki vua na Turaga; ia ko ira kece sa saumaki mai, era sa vakatakilakilataka sara vei ira na tamata ni sa curumi ira na kaukauwa kei na Yalo ni Kalou, ka tu vei Jisu Karisito, o koya era sa vakabauta.

22 Ia ko ira yadua sa vakasevi tani mai vei ira na tevoro, ka ra sa vakabulai mai na nodra tauvimate kei na nodra malumalumu, era sa vakaraitaka vakaidina vei ira na tamata ni sa curumi ira na Yalo ni Kalou, ka ra sa vakabulai; era sa vakaraitaka tale ga e so na ivakatakilakila, ka ra kitaka e so na cakacaka mana ena kedra maliwa na tamata.

23 A sa oti yani na ika tolusagavulu karua ni yabaki. Ia ena itekivu ni ika tolusagavulu katolu ni yabaki, sa vunau tikoga vei ira na tamata ko Nifai; ka sa vunautaka vei ira na veivutuni kei na vakabokoci ni valavala ca.

24 Ia oqo, au gadreva mo ni nanuma tale tikoga, ni sega sara ni dua vei ira na sa veivutuni me sega ni papitaisotaki ena wai.

25 O koya sa tabaki ira kina e so na tamata ko Nifai ki na cakacaka oqo me ra papitaisotaki ena wai ko ira kece sa lako mai vei ira, me ivakadinadina ena mata ni Kalou, kei ira tale ga na tamata, ni ra sa veivutuni ka sa bokoci na nodra ivalavala ca.

26 Ka ra sa lewevuqa sara era sa veivutuni ka papitaisotaki ena itekivu ni yabaki oqo; a sa oti yani na iwase levu cake ni yabaki.