Kapitulo 15
Si Jesus mipahibalo nga ang balaod ni Moises natuman diha Kaniya—Ang mga Nephita mao ang lain nga karnero nga Iyang gipamulong didto sa Jerusalem—Tungod sa pagkadaotan, ang katawhan sa Ginoo sa Jerusalem wala masayod bahin sa natibulaag nga karnero sa Israel. Mga A.D. 34.
1 Ug karon nahitabo nga sa dihang nahuman na si Jesus niini nga mga pamahayag gilibot niya ang iyang panan-aw ngadto sa pundok sa katawhan, ug miingon kanila: Tan-awa, nakadungog kamo sa mga butang nga akong gitudlo sa wala pa ako mokayab ngadto sa akong Amahan; busa, kinsa kadtong makahinumdom niining akong mga pamahayag ug mobuhat niini, siya akong ibangon sa kataposang adlaw.
2 Ug nahitabo nga sa dihang nasulti na ni Jesus kini nga mga pulong iyang nasabtan nga taliwala kanila dihay natingala, ug naglibog unsa ang iyang buot ipasabot kabahin sa balaod ni Moises; kay wala sila makasabot sa gisulti nga ang daan nga mga butang milabay na, ug ang tanang butang nahimo na nga bag-o.
3 Ug gisultihan niya sila: Ayaw kamo og katingala nga ako miingon kaninyo nga ang daan nga mga butang milabay na, ug ang tanang butang nahimo na nga bag-o.
4 Tan-awa, sultihan ko kamo nga ang balaod natuman na nga gihatag ngadto kang Moises.
5 Tan-awa, ako mao ang naghatag sa balaod, ug ako mao siya kinsa mihimo og pakigsaad ngadto sa akong katawhan sa Israel; busa, ang balaod natuman na pinaagi kanako, tungod kay mianhi ako aron pagtuman sa balaod; mao nga kini adunay kataposan.
6 Tan-awa, wala ako molaglag sa mga propeta, kay kutob sa wala pa matuman dinhi kanako, sa pagkatinuod sultihan ko kamo, ang tanan pagatumanon.
7 Ug tungod kay gisultihan ko man kamo nga ang daan nga mga butang milabay na, wala ako moguba nianang gipamulong na kabahin sa mga butang nga moabot.
8 Kay tan-awa, ang pakigsaad nga akong gihimo ngadto sa akong katawhan wala pa matuman ang tanan; apan ang balaod nga gihatag ngadto kang Moises adunay kataposan pinaagi kanako.
9 Tan-awa, ako ang balaod, ug ang kahayag. Tan-aw ngari kanako, ug lahutay hangtod sa kataposan, ug kamo mabuhi; kay siya nga molahutay hangtod sa kataposan ako mohatag og kinabuhi nga dayon.
10 Tan-awa, gihatagan ko kamo sa mga sugo; busa sunda ang akong mga sugo. Ug mao kini ang balaod ug ang mga propeta, kay kini sa pagkatinuod nagpamatuod kanako.
11 Ug karon nahitabo nga sa dihang nakapamulong na si Jesus niini nga mga pulong, miingon siya sa napulog duha nga iyang gipili:
12 Kamo ang akong mga disipulo; ug kamo ang kahayag niini nga katawhan, kinsa mga salin sa balay ni Jose.
13 Ug tan-awa, mao kini ang yuta nga inyong kabilin; ug gihatag kini sa Amahan nganha kaninyo.
14 Ug wala pa mahitabo nga ang Amahan misugo kanako nga ako kinahanglang mosulti niini ngadto sa inyong kaigsoonan sa Jerusalem.
15 Ni mahitabo nga ang Amahan misugo kanako nga ako kinahanglang mosulti kanila kabahin sa uban nga mga tribo sa balay ni Israel, nga gipahilayo sa Amahan gikan sa yuta.
16 Mao lamang kini ang gisugo sa Amahan kanako, nga kinahanglan nga akong isulti kanila:
17 Nga ako adunay uban pang mga karnero nga wala niini nga panon; ug ako kinahanglang modala usab kanila, ug makadungog sila sa akong tingog; ug mahimong usa na lamang ka panon, ug usa ka magbalantay.
18 Ug karon, tungod sa pagkatikig og liog ug sa pagkadili matuohon wala sila makasabot sa akong pulong; busa gisugo ako sa Amahan nga dili na mosulti kabahin niini nga butang ngadto kanila.
19 Apan, sa pagkatinuod, sultihan ko kamo nga ang Amahan misugo kanako, ug isulti ko kini kaninyo, nga gibulag kamo gikan kanila tungod sa ilang pagkadaotan; busa tungod sa ilang pagkadaotan sila wala makaila kaninyo.
20 Ug sa pagkatinuod, sultihan ko kamo pag-usab, nga ang uban nga mga tribo gibulag sa Amahan gikan kanila; ug tungod kadto sa ilang pagkadaotan nga sila wala makaila kanila.
21 Ug sa pagkatinuod sultihan ko kamo, nga kamo mao ang akong giingon: Nga ako adunay uban pang mga karnero nga wala niini nga panon; ug kinahanglan nga ako modala usab kanila, ug makadungog sila sa akong tingog; ug mahimong usa na lamang ka panon, ug usa ka magbalantay.
22 Ug wala sila makasabot kanako, kay nagdahom sila nga mao kini ang mga Hentil; kay wala sila makasabot nga ang mga Hentil makabig pinaagi sa ilang pagsangyaw.
23 Ug wala sila makasabot kanako nga ako miingon nga sila makadungog sa akong tingog; ug wala sila makasabot kanako nga ang mga Hentil dili gayod mahitabo nga makadungog sa akong tingog—nga ako dili mopakita sa akong kaugalingon ngadto kanila gawas lamang pinaagi sa Espiritu Santo.
24 Apan tan-awa, nakadungog kamo sa akong tingog, ug nakakita kanako; ug kamo akong mga karnero, ug naihap kamo uban niadtong gihatag sa Amahan kanako.