1 Ug sa pagkatinuod, sa pagkatinuod sultihan ko kamo nga ako adunay uban pa nga karnero, nga wala dinhi niini nga yuta, ni sa yuta sa Jerusalem, ni sa bisan asa nga bahin libot sa yuta nga akong napangalagaran.

2 Kay sila nga akong gipamulong mao sila kinsa wala pa makadungog sa akong tingog; ni mahitabo nga ako nagpakita sa akong kaugalingon ngadto kanila.

3 Apan nakadawat ako og sugo sa Amahan nga ako moadto kanila, ug nga sila makadungog sa akong tingog, ug pagaiphon nga lakip sa akong mga karnero, aron adunay usa na lamang ka panon ug usa ka magbalantay; mao nga ako mopakita sa akong kaugalingon ngadto kanila.

4 Ug ako mosugo kaninyo nga kamo mosulat niini nga mga pamahayag human sa akong pagbiya, nga kon ugaling ang akong katawhan sa Jerusalem, sila nga nakakita kanako ug nakauban kanako sa akong pagpangalagad, dili mangayo sa Amahan pinaagi sa akong ngalan, nga sila makadawat og kahibalo bahin kaninyo pinaagi sa Espiritu Santo, ug usab bahin sa uban nga mga tribo nga wala pa nila mailhi, nga kini nga mga pamahayag nga inyong isulat ampingan ug ipakita ngadto sa mga Hentil, nga pinaagi sa kahingpitan sa mga Hentil, ang salin sa ilang binhi, kinsa pagatibulaagon sa ibabaw sa yuta tungod sa ilang pagkawalay pagtuo, itipon, o dad-on ngadto sa usa ka kahibalo mahitungod kanako, nga ilang Manunubos.

5 Ug dayon akong pundokon sila gikan sa upat ka suok sa yuta; ug dayon akong tumanon ang pakigsaad nga gihimo sa Amahan ngadto sa tanang katawhan sa balay ni Israel.

6 Ug bulahan ang mga Hentil, tungod sa ilang pagtuo kanako, ug sa Espiritu Santo, nga nagsaksi kanila mahitungod kanako ug sa Amahan.

7 Tan-awa, tungod sa ilang pagtuo kanako, miingon ang Amahan, ug tungod sa inyong pagkawalay pagtuo, O balay ni Israel, sa ulahing mga adlaw ang kamatuoran moabot ngadto sa mga Hentil, nga ang kahingpitan niini nga mga butang ipahibalo ngadto kanila.

8 Apan pagkaalaot, miingon ang Amahan, sa dili matuohon nga mga Hentil—kay bisan pa nga miabot sila dinhi sa ibabaw niini nga yuta, ug mipatibulaag sa akong katawhan nga sakop sa balay ni Israel; ug ang akong katawhan kinsa anaa sa balay ni Israel gipapahawa gikan kanila, ug mitunob-tunob kanila;

9 Ug tungod sa mga kaluoy sa Amahan ngadto sa mga Hentil, ug usab sa mga paghukom sa Amahan sa akong katawhan kinsa sakop sa balay ni Israel, sa pagkatinuod, sa pagkatinuod sultihan ko kamo, nga human niining tanan, ug ako mipahitabo nga ang akong katawhan kinsa sakop sa balay ni Israel bunalbunalan, ug sakiton, ug patyon, ug papahawaon gikan sa ilang taliwala, ug ilang dumtan, ug yubiton ug kataw-an taliwala kanila—

10 Ug sa ingon niana misugo ang Amahan nga ako mosulti kaninyo: Nianang adlawa kon ang mga Hentil makasala batok sa akong ebanghelyo, ug mosalikway sa kahingpitan sa akong ebanghelyo, ug pagabayawon sa garbo sa ilang mga kasingkasing labaw sa tanang kanasoran, ug labaw sa tanang katawhan sa tibuok yuta, ug mapuno sa tanang matang sa pagpamakak, ug mga pagpanglingla, ug sa mga kadaotan, ug tanang matang sa pagpakaaron-ingnon, ug mga pagpatay, ug mga pagpanapi, ug malaw-ay nga mga buhat, ug tinago nga mga pagkasalawayon; ug kon kadtong tanan nga butang ilang buhaton, ug mosalikway sa kahingpitan sa akong ebanghelyo, tan-awa, miingon ang Amahan, akong kuhaon ang kahingpitan sa akong ebanghelyo gikan sa ilang taliwala.

11 Ug unya ako mohinumdom sa pakigsaad nga akong gihimo ngadto sa akong katawhan, O balay ni Israel, ug akong dad-on ang akong ebanghelyo ngadto kanila.

12 Ug ipakita ko kaninyo, O balay ni Israel, nga ang mga Hentil walay gahom ibabaw kaninyo; apan ako mohinumdom sa akong pakigsaad nganha kaninyo, O balay ni Israel, ug makaangkon kamo og kahibalo sa kahingpitan sa akong ebanghelyo.

13 Apan kon ang mga Hentil maghinulsol ug mobalik ngari kanako, miingon ang Amahan, tan-awa pagaiphon sila nga sakop sa akong katawhan, O balay ni Israel.

14 Ug dili ako motugot nga ang akong katawhan, kinsa anaa sa balay ni Israel, nga moadto taliwala kanila, ug motunob-tunob kanila, miingon ang Amahan.

15 Apan kon dili sila mobalik ngari kanako ug maminaw sa akong tingog, ako motugot kanila, oo, ako motugot sa akong katawhan, O balay ni Israel, nga moadto sila taliwala kanila, ug motunob-tunob kanila, ug mahisama sila sa asin nga nawad-an sa kaparat, diin niining higayona wala nay kapuslanan apan angay nga isalikway, ug tunob-tunoban sa tiil sa akong katawhan, O balay ni Israel.

16 Sa pagkatinuod, sa pagkatinuod, sultihan ko kamo, sa ingon niana ang Amahan misugo kanako—nga ako kinahanglang mohatag ngadto niini nga katawhan niining yuta nga ilang kabilin.

17 Ug unya ang mga pulong sa propeta nga si Isaias matuman, nga nag-ingon:

18 Anginyong mga magbalantay mopataas sa tingog; pinaagi sa tingog magdungan sila sa pag-awit, kay makakita sila sa panahon nga ang Ginoo modala pagbalik sa Zion.

19 Maglipay, magdungan sa pag-awit, kamo nga biniyaan nga mga dapit sa Jerusalem; tungod kay ang Ginoo mihupay sa iyang katawhan, siya mitubos sa Jerusalem.

20 Ang Ginoo mipakita sa iyang balaan nga bukton nganha sa mga mata sa tanang kanasoran; ug ang tanang lumulupyo sa yuta makakita sa kaluwasan pinaagi sa Dios.