1 Ug sa pagkatinuod sultihan ko kamo, ako mohatag kaninyo og usa ka timailhan, aron masayod kamo sa panahon kanus-a kini nga mga butang mahitabo—nga ako mopundok, gikan sa ilang dugay nang pagkatibulaag, sa akong katawhan, O balay ni Israel, ug motukod pag-usab taliwala kanila sa akong Zion;

2 Ug tan-awa, mao kini ang butang nga akong ihatag kaninyo isip timailhan—kay sa pagkatinuod sultihan ko kamo nga sa higayon nga kining mga butang nga akong gipahayag kaninyo, ug akong ipahayag kaninyo human niini sa akong kaugalingon, ug pinaagi sa gahom sa Espiritu Santo nga itugyan kaninyo sa akong Amahan, ipadayag ngadto sa mga Hentil aron masayod sila kabahin niini nga katawhan nga salin sa balay ni Jacob, ug kabahin niining akong katawhan nga ilang pagatibulaagon;

3 Sa pagkatinuod, sa pagkatinuod sultihan ko kamo, sa higayon nga kini nga mga butang ipahibalo na kanila pinaagi sa Amahan, ug magagikan sa Amahan, gikan kanila nganha kaninyo;

4 Kay kaalam kini sa Amahan nga sila kinahanglang mapahiluna niini nga yuta, ug mapahimutang isip usa ka gawasnon nga katawhan pinaagi sa gahom sa Amahan, aron kini nga mga butang moabot gikan kanila ngadto sa salin sa inyong binhi, nga ang pakigsaad sa Amahan matuman nga iyang gipakigsaad ngadto sa iyang katawhan, O balay ni Israel;

5 Busa, kon kini nga mga buhat ug ang mga buhat nga pagahimoon taliwala kaninyo human niini moabot gikan sa mga Hentil, ngadto sa inyong binhi nga mokunhod sa pagkawalay pagtuo tungod sa pagkadaotan;

6 Kay sa ingon niana tinguha sa Amahan nga kinahanglang moabot kini gikan sa mga Hentil, nga ipakita niya ang iyang gahom ngadto sa mga Hentil, kay tungod niini nga hinungdan nga ang mga Hentil, kon dili sila mopatig-a sa ilang mga kasingkasing, nga makahinulsol sila ug makaduol kanako ug magpabunyag pinaagi sa akong ngalan ug masayod sa tinuod nga mga punto sa akong doktrina, nga sila pagaiphon taliwala sa akong katawhan, O balay ni Israel;

7 Ug kon mahitabo kini nga mga butang nga ang inyong binhi mosugod sa pagkasayod niini nga mga butang—usa kini ka timailhan kanila, aron masayran nila nga ang buhat sa Amahan nagsugod na aron matuman ang pakigsaad nga iyang gihimo ngadto sa katawhan kinsa mga sakop sa balay ni Israel.

8 Ug kon moabot kana nga adlaw, mahitabo nga ang mga hari motak-om sa ilang mga ba-ba; kay kana nga wala pa isugilon kanila ilang makita; ug kanang wala pa nila madungog ilang masabtan.

9 Kay nianang adlawa, tungod og alang kanako ang Amahan mobuhat og usa ka buhat, nga mahinungdanon ug kahibulongan nga buhat taliwala kanila; ug adunay mga tawo taliwala kanila kinsa dili motuo niini, bisan pa og ang usa ka tawo mopahayag niini ngadto kanila.

10 Apan tan-awa, ang kinabuhi sa akong sulugoon anaa sa akong kamot; busa dili sila mopasakit kaniya, bisan pa og siya mahimong ngil-ad tungod kanila. Apan ako moayo kaniya, kay ako mopakita kanila nga ang akong kaalam mas labaw pa kaysa kamalipoton sa yawa.

11 Busa mahitabo nga si bisan kinsa nga dili motuo sa akong mga pulong, ako nga si Jesukristo, nga gisugo sa Amahan nga iyang dad-on ngadto sa mga Hentil, ug mohatag kaniya og gahom nga siya modala niini ngadto sa mga Hentil, (kini matuman sama sa giingon ni Moises) nga papahawaon sila gikan sa taliwala sa akong katawhan nga anaa sa pakigsaad.

12 Ug ang akong katawhan nga mga salin ni Jacob moipon kauban sa mga Hentil, oo, sa taliwala kanila sama sa usa ka liyon taliwala sa mga mananap sa kalasangan, sama sa batan-on nga liyon taliwala sa mga panon sa karnero, kinsa, kon siya moagi parehong moyatak-yatak ug mokunis-kunis, ug walay makaluwas.

13 Ang ilang kamot ibakyaw ngadto sa ilang mga kaaway, ug ang ilang tanan nga kaaway mamatay.

14 Oo, alaot ngadto sa mga Hentil gawas kon sila maghinulsol; kay mahitabo niana nga adlaw, miingon ang Amahan, nga akong patyon ang inyong mga kabayo gikan sa inyong taliwala, ug akong gub-on ang inyong mga karwahe;

15 Ug akong wagtangon ang mga siyudad sa inyong mga yuta, ug lumpagon ang ilang mga kuta;

16 Ug akong wagtangon ang mga pamarang gikan sa inyong yuta, ug kamo wala nay mga mananag-an;

17 Ang inyong kinulit nga mga larawan akong wagtangon usab, ug ang inyong nagbarog nga mga larawan gikan sa inyong taliwala, ug kamo dili na mosimba sa mga binuhat sa inyong mga kamot;

18 Ug akong ibton ang inyong mga kakahoyan diha sa inyong taliwala; ingon man akong laglagon ang inyong mga siyudad.

19 Ug mahitabo nga ang tanang pagpamakak, ug mga pagpanglimbong, ug mga kasina, ug mga panagbangi, ug panapi sa mga pari, ug malaw-ay nga mga buhat, pagahunongon.

20 Kay mahitabo, miingon ang Amahan, nga niana nga adlaw kadtong dili maghinulsol ug moduol sa akong Hinigugmang Anak, sila akong papahawaon gikan sa akong katawhan, O balay ni Israel;

21 Ug ako mopahamtang og panimalos ug kabangis diha kanila, gani ingon nganha sa mga pagano, nga ang sama niini wala pa sukad nila madungog.

22 Apan kon maghinulsol sila ug maminaw sa akong mga pulong, ug dili magpatig-a sa ilang mga kasingkasing, ako motukod sa akong simbahan taliwala kanila, ug sila mosulod sa pakigsaad ug pagaiphon taliwala niining salin ni Jacob, ngadto kinsa Ako mihatag niini nga yuta alang sa ilang kabilin;

23 Ug motabang sila sa akong katawhan, ang salin ni Jacob, ug usab kutob sa moadto sa balay ni Israel, aron magtukod sila og usa ka siyudad, nga tawagon og Bag-ong Jerusalem.

24 Ug unya motabang sila sa akong katawhan aron mapundok sila, kinsa nagkatibulaag sa ibabaw sa tibuok yuta, ngadto sa Bag-ong Jerusalem.

25 Ug unya ang gahom sa langit manaog nganha kanila; ug Ako maanaa usab sa taliwala.

26 Ug unya ang buhat sa Amahan magsugod niana nga adlaw, gani sa higayon nga kini nga ebanghelyo isangyaw taliwala sa salin niini nga katawhan. Sa pagkatinuod sultihan ko kamo, nga nianang adlawa ang buhat sa Amahan magsugod taliwala sa tanang nahimulag sa akong katawhan, oo, bisan sa mga tribo nga nawala, nga gidala sa Amahan pagawas sa Jerusalem.

27 Oo, ang buhat magsugod taliwala sa tanang natibulaag nako nga katawhan, kauban sa Amahan sa pag-andam og paagi nga sila moduol kanako, nga sila motawag sa Amahan pinaagi sa akong ngalan.

28 Oo, ug unya ang buhat, magsugod, kauban sa Amahan taliwala sa tanang kanasoran sa pag-andam og paagi diin ang iyang katawhan pagapundokon pauli sa yuta nga ilang kabilin.

29 Ug mogula sila gikan sa tanang kanasoran; ug dili sila mogula nga magdali, ni magdagan, kay Ako mag-una kanila, miingon ang Amahan, ug Ako ang magbalantay sa ilang luyo.