1 Ug unya kanang nahisulat mahitabo: Pag-awit, O babaye nga dili manganak, ikaw nga wala manganak; tuaw ngadto sa pag-awit, ug singgit sa makusog, kamo nga wala mag-antos sa pagpanganak; kay mas daghan ang mga anak sa biniyaan kaysa mga anak sa kinasal nga asawa, miingon ang Ginoo.

2 Padak-i ang lugar sa inyong tolda, ug ipabukhad kanila ang mga tabil sa inyong mga pinuy-anan; ayaw pagbilin, ilugway ang inyong mga higot ug lig-ona ang inyong mga istaka;

3 Kay kamo mogula sa tuo nga bahin ug sa wala, ug ang inyong mga binhi makapanunod sa mga Hentil ug mohimo sa mga biniyaan nga mga siyudad nga mapuy-an.

4 Ayaw kahadlok, kay kamo dili maulaw; ni kamo maglibog, kay kamo dili pakaulawan; kay kamo makalimot na sa kaulawan sa inyong pagkabatan-on, ug dili na makahinumdom sa kaulawan sa inyong pagkabatan-on, ug dili na makahinumdom sa kaulawan sa inyong pagkabiyuda.

5 Kay ang inyong magbubuhat, ang inyong bana, ang Ginoo sa mga Panon mao ang iyang ngalan; ug ang inyong Manunubos, ang Balaan sa Israel—ang Dios sa tibuok nga yuta siya pagatawgon.

6 Kay ang Ginoo nagtawag kaninyo nga ingon sa usa ka babaye nga biniyaan ug naguol diha sa espiritu, ug asawa sa pagkabatan-on, sa dihang kamo gisalikway, miingon ang inyong Dios.

7 Kay sa mubo nga panahon ako mibiya kaninyo, apan uban sa dakong kaluoy ako mopundok kaninyo.

8 Sa gamay nga kasuko akong gitago ang akong nawong gikan kaninyo sa mubo nga panahon, apan uban sa walay kataposang pagkamabination, ako adunay kaluoy kaninyo, miingon ang Ginoo nga inyong Manunubos.

9 Kay kini, ang mga tubig ni Noe ngari kanako, kay sama sa akong gipanumpa nga ang mga tubig ni Noe dili na molunop sa yuta, ako usab manumpa nga ako dili na masuko kaninyo.

10 Kay ang mga bukid mobiya ug ang mga bungtod mawala, apan ang akong pagkamabination dili mobiya kaninyo, ni ang akong pakigsaad sa kalinaw mawala, miingon ang Ginoo nga adunay kaluoy diha kaninyo.

11 O kamo nga gisakit, nga gikuso-kuso sa bagyo, ug wala mahupay! Tan-awa, akong butangan ang inyong mga bato og maanindot nga mga kolor, ug mopahiluna sa inyong mga tukoranan, og mga sapiro.

12 Ug ako mohimo sa inyong mga bintana nga mga rubi, ug sa inyong mga ganghaan nga mga karbungko, ug sa tanan ninyong mga palibot sa mahalon nga mga bato.

13 Ug ang tanan ninyong mga anak pagatudloan mahitungod sa Ginoo; ug hilabihan ang kalinaw sa inyong mga anak.

14 Diha sa pagkamatarong kamo pagatukoron; ipahilayo kamo sa mga pagdaogdaog kay kamo dili mahadlok, ug sa kalisang kay dili kini magpaduol kaninyo.

15 Tan-awa, sa pagkatinuod magpundok sila batok kaninyo, dili tungod kanako; ug kinsa kadtong magpundok batok kaninyo mapukan alang sa inyong kaayohan.

16 Tan-awa, naglalang ako og panday sa puthaw nga mohuyop sa mga karbon diha sa kalayo, ug sa paghimo og himan alang sa iyang buhat; ug naglalang ako og tigguba aron sa pagguba.

17 Walay hinagiban nga gibuhat batok kaninyo nga molambo; ug ang matag dila nga mobiaybiay batok kaninyo aron sa paghukom inyong ipanghimaraot. Ug mao kini ang panulondon sa mga sulugoon sa Ginoo, ug ang ilang pagkamatarong ania kanako, miingon ang Ginoo.