1 Toja’ ut naq taak’ulmanq li k’a’ru tz’iib’anb’il: B’ichan, at xma’al ixq, laa’at li ink’a’ kat-alan; jap aawe chi b’ichank, ut kawaq xyaab’ aakux, laa’at li ink’a’ katraho’ rik’in alank; xb’aan naq k’iheb’ wi’chik xkok’al li ink’a’ ki’alan chiruheb’ lix kok’al li sumsuukil ixaqilb’ej, chan li Qaawa’.

2 Nimob’resi xna’aj laa muheb’aal t’ikr, ut che’xk’e chi hele’k xt’ikrul laa muheb’aal; maakotz aametz’ew, tiq roq laa k’aamal ut k’e xkawub’ laa woqechal;

3 Xb’aan naq tattamq’iiq sa’ li nim uq’ ut sa’ li tz’e, ut eb’ laa wiyajil te’reechaniheb’ laj Gentil, ut sa’eb’ li tenamit neke’k’irirnak te’xk’e chi tamk li ochoch.

4 Matxuwak, xb’aan naq ink’a’ tatxutaanaq; chi moko taasache’q aana’leb’, xb’aan naq moko taak’ute’q ta aaxutaan; xb’aan naq taasachq sa’ aach’ool lix xutaanal aasaajil, ut moko jultikaq ta aawe laa tz’eqtaanankil sa’ aasaajil, ut moko taajultiko’q ta chik aawe lix tz’eqtaanankil aaxmalka’anil.

5 Xb’aan naq laj yiib’ahom aawe, laa b’eelom, li Qaawa’ reheb’ li Teepal xk’ab’a’; ut laj Tojol aawix, lix Santil Dios laj Israel—li Dios re chixjunil li ruchich’och’ tixk’ab’a’in.

6 Xb’aan naq li Qaawa’ katxb’oq chaq jo’ jun ixq kanab’anb’il xjunes ut rahob’tesinb’il sa’ xmusiq’, ut jun ixaqilb’ej sa’ saajil, naq kattz’eqtaanaak chaq, chan laa Dios.

7 Chiru ch’ina junpaat katinkanab’ aajunes, a’b’an rik’in nimla uxtaan tatinch’utub’.

8 Rik’in b’ayaq li josq’il kinmuq chawu li wilob’aal chiru junpaat, a’b’an rik’in chaab’ilal ch’oolej li junelik taakanaaq tinwuxtaana aawu, chan li Qaawa’ laj Tojol aawix.

9 Xb’aan a’in, xha’il laj Noe choq’ we, xb’aan naq jo’ chanru kinxaqab’ aatin naq lix ha’il laj Noe maajun wa chik taanume’q sa’ xb’een li ch’och’, chi jo’kan kinxaqab’ aatin naq ink’a’ tinjosq’o’q aawik’in.

10 Xb’aan naq te’elq chaq li tzuul, ut li b’ool te’isiiq chaq, a’b’an lix chaab’ilal inch’ool moko taa’elq ta aawik’in, chi moko taa’isiiq chaq li sumwank re lin tuqtuukilal, chan li Qaawa’ li na’uxtaanank aawu.

11 At tawasinb’il, qujlenb’il xb’aan kaq-sut-iq’, ut moko k’ojob’anb’il ta aach’ool! K’e reetal, tink’ojob’ aapekal rik’in chaq’al ru b’onol, ut tink’e laa k’ojleb’aal rik’in raxi lemtz’ q’ol.

12 Ut tinyiib’ rilob’aal laa wochoch rik’in saq ruhil q’ol pek, ut laa wokeb’aal rik’in kaqi lemtz’ pek, ut chixjunil laa nub’aal rik’in sahil lemtz’ pek.

13 Ut chixjunileb’ laa kok’al te’tzole’q chirix li Qaawa’; ut nimaq lix tuqtuukilaleb’ laa kok’al.

14 Sa’ tiikilal tatxaqab’aaq; najt tatwanq rik’in li rahob’tesink xb’aan naq ink’a’ tatxuwaq, ut rik’in li nimla xiw xb’aan naq ink’a’ taanach’oq aawik’in.

15 K’e reetal, te’xch’utub’ rib’ chi yaal chapleetinkil, moko sa’ ink’ab’a’ ta laa’in; yalaq ani tixch’utub’ rib’ chapleetinkil taat’ane’q sa’ aak’ab’a’.

16 K’e reetal, laa’in kinyo’ob’tesink re laj tenol ch’iich’ li na’apusink re li ru xam, ut nayiib’ank re jun k’anjeleb’aal choq’ re xk’anjel; ut kinyiib’ laj sachonel re taasachoq.

17 Maajun k’anjeleb’aal li yiib’anb’il re aapleetinkil taa’usaaq, ut li junjunq chi ru’uj aq’ej li taahob’oq chawix sa’ li raqleb’aal aatin, laa’at taak’e sa’ tojb’a-maak. A’in li reechanihomeb’ lix moos li Qaawa’, ut we laa’in lix tiikilaleb’ xch’ool, chan li Qaawa’.