1 Ug karon, tan-awa, sultihan ko kamo nga kamo kinahanglang mosiksik niini nga mga butang. Oo, usa ka sugo nga akong ihatag kaninyo nga kamo mosiksik nga makugihon niini nga mga butang; kay mahinungdanon ang mga pulong ni Isaias.

2 Kay sa pagkatinuod namulong siya kalabot sa tanang butang mahitungod sa akong katawhan nga sakop sa balay ni Israel; busa kinahanglang mosulti usab siya ngadto sa mga Hentil.

3 Ug ang tanang butang nga iyang gipamulong nahitabo ug mahitabo, gani sumala sa mga pulong nga iyang gipamulong.

4 Busa pamati sa akong mga pulong; isulat ang mga butang nga akong gisulti kaninyo; ug sumala sa panahon ug sa kabubut-on sa Amahan kini moabot ngadto sa mga Hentil.

5 Ug bisan kinsa nga mopatalinghog sa akong mga pulong, ug maghinulsol ug magpabunyag, ang mao maluwas. Pangitaa ang mga propeta, kay adunay daghan diha nga nagpamatuod niini nga mga butang.

6 Ug karon nahitabo nga sa dihang nakasulti na si Jesus niini nga mga pulong misulti siya kanila pag-usab, human siya makapasabot sa tanang kasulatan ngadto kanila nga ilang nadawat, miingon siya kanila: Tan-awa, nga uban pang mga kasulatan ang gusto nako nga inyong isulat, wala pa ninyo masulat.

7 Ug nahitabo nga siya miingon kang Nephi: Dad-a ngari ang talaan nga imong gitipigan.

8 Ug sa dihang gidala ni Nephi ang mga talaan, ug gipahiluna kini sa iyang atubangan, mitan-aw siya ngadto kanila ug miingon:

9 Sa pagkatinuod sultihan ko kamo, ako misugo sa akong sulugoon nga si Samuel, nga Lamanita, nga siya mopamatuod ngadto niining katawhan, nga sa adlaw nga ang Amahan mohimaya sa iyang ngalan ngari kanako adunay daghan nga mga santos nga mabanhaw gikan sa mga patay, ug magpakita sa kadaghanan, ug mangalagad kanila. Ug miingon siya kanila: Dili ba kini mao?

10 Ug ang iyang mga disipulo mitubag kaniya ug miingon: Oo, Ginoo, si Samuel nanagna sumala sa imong mga pulong, ug ang tanan natuman.

11 Ug si Jesus miingon kanila: Sa unsang hinungdan nga kamo wala man mosulat niini nga butang, nga daghang mga santos ang nabanhaw ug nagpakita sa kadaghanan ug nangalagad kanila?

12 Ug nahitabo nga si Nephi nahinumdom nga kini nga butang wala ikasulat.

13 Ug nahitabo kadto nga si Jesus misugo nga kini isulat; busa nasulat kini sumala sa iyang gisugo.

14 Ug karon nahitabo nga sa dihang nakapasabot na si Jesus sa tanang kasulatan sa usa ka higayon, nga ilang sinulat, misugo siya kanila nga kinahanglan nila nga itudlo ang mga butang nga iyang gipasabot ngadto kanila.