1 Ug nahitabo nga siya misugo kanila nga isulat nila ang mga pulong nga gihatag sa Amahan ngadto kang Malaquias, nga iyang isulti kanila. Ug nahitabo nga human sa pagsulat niini iya kining gipasabot. Ug mao kini ang mga pulong nga iyang gisulti kanila, nga nag-ingon: Miingon ang Amahan kang Malaquias—Tan-awa, mopadala ako sa akong sinugo, ug moandam siya sa agianan sa dili pa ako moabot, ug ang Ginoo nga inyong gipangita sa kalit moabot sa iyang templo, gani ang sinugo sa pakigsaad, kang kinsa kamo nahimuot; tan-awa, moanhi siya, miingon ang Ginoo sa mga Panon.

2 Apan kinsa ang makasugakod sa adlaw sa iyang pag-anhi, ug kinsa ang makalahutay kon siya magpakita? Kay sama siya sa kalayo sa magtutunaw, ug sama sa sabon sa tiglaba.

3 Ug molingkod siya sama sa usa magtutunaw ug maglilimpyo sa pilak; ug pagaputlion niya ang mga anak nga lalaki ni Levi, ug limpyohon sila sama sa bulawan ug sa pilak, aron ilang mahalad sa Ginoo ang usa ka halad sa pagkamatarong.

4 Unya ang halad sa Juda ug sa Jerusalem makapahimuot sa Ginoo, sama sa karaang mga adlaw, ug sama sa nangaging katuigan.

5 Ug mopaduol ako kaninyo ngadto sa paghukom; ug mahimo akong dihadiha dayon nga saksi batok sa mga barangan, ug batok sa mga mananapaw, ug batok sa mga bakakon nga mga saksi, ug batok kanila nga nanglupig sa mga sinuholan sa ilang mga suhol, sa mga biyuda ug sa mga walay amahan, ug sa misalikway sa mga estranyo, ug sa mga walay kahadlok kanako, miingon ang Ginoo sa mga Panon.

6 Kay ako ang Ginoo, dili ako mausab; busa kamong mga anak nga lalaki ni Jacob wala malaglag sa hingpit.

7 Gani sukad pa sa mga adlaw sa inyong mga amahan mipahilayo kamo gikan sa akong mga ordinansa, ug wala motuman niini. Balik kamo kanako ug dawaton ko kamo, miingon ang Ginoo sa mga Panon. Apan kamo miingon: Asa man kami mobalik?

8 Makapangawat ba ang tawo sa Dios? Bisan pa niana nakapangawat kamo kanako. Apan moingon kamo: Diin man kami nakapangawat kanimo? Sa mga ikapulo ug sa mga halad.

9 Kamo gitunglo sa usa ka tunglo, kay kamo nangawat kanako, gani kining tibuok nga nasod.

10 Dad-a ninyo ang tanan nga mga ikapulo ngadto sa balay nga tipiganan, aron adunay pagkaon sa akong balay; ug sulayi ako karon, miingon ang Ginoo sa mga Panon, kon ako dili ba moabli kaninyo sa mga bintana sa langit, ug mobu-bo kaninyo og usa ka panalangin nga walay dapit nga mopaigo sa pagdawat niini.

11 Ug ako mobadlong sa mga manunukob alang kaninyo, ug siya dili na modaot sa mga bunga sa inyong yuta; ni ang inyong bagon mohulog sa bunga niini nga dili pa panahon diha sa kaumahan, miingon ang Ginoo sa mga Panon.

12 Ug ang tanang nasod motawag kaninyo nga bulahan, kay kamo mahimong usa ka yuta nga kahimut-an, miingon ang Ginoo sa mga Panon.

13 Ang inyong mga pulong magahi batok kanako, miingon ang Ginoo. Apan kamo moingon: Unsa ang among gipamulong batok kanimo?

14 Kamo miingon: Walay kapuslanan ang pagserbisyo sa Dios, ug unsay pulos sa atong pagtuman sa iyang mga ordinansa ug kita naglakaw nga masulub-on sa atubangan sa Ginoo sa mga Panon?

15 Ug karon tawagon nato ang mapagarbohon nga malipayon; oo, sila nga nagbuhat og pagkadaotan gipahimutang; oo, gani sila nga mitintal sa Dios giluwas.

16 Unya sila nga may kahadlok sa Ginoo kanunay nga namulong sa usag usa, ug ang Ginoo nagpatalinghog ug nakadungog; ug usa ka basahon sa handomanan gisulat sa iyang atubangan alang kanila nga may kahadlok sa Ginoo, ug nagtahod sa iyang ngalan.

17 Ug sila maakòa, miingon ang Ginoo sa mga Panon, niana nga adlaw nga ako mopundok sa akong bililhon nga mga kabtangan; ug ako moluwas kanila sama sa usa ka tawo nga miluwas sa iyang kaugalingong anak nga nagserbisyo kaniya.

18 Ug unya kamo mobalik ug makaila tali sa matarong ug sa daotan, tali kaniya nga nag-alagad sa Dios ug kaniya nga wala mag-alagad kaniya.