1 Ug nahitabo nga sa dihang nakasulti na si Jesus niini nga mga pulong, namulong siya ngadto sa iyang mga disipulo, sa tinagsa-tagsa, nga nag-ingon kanila: Unsa man ang inyong gitinguha gikan kanako, human nga ako makaadto sa Amahan?

2 Ug silang tanan namulong, gawas sa tulo, nga nag-ingon: Nagtinguha kami nga human kami mopuyo sa katigulangon sa tawo, aron ang among pagpangalagad, diin kami imong gitawag, matapos unta, nga kami moadto dayon kanimo sa imong gingharian.

3 Ug miingon siya kanila: Bulahan kamo kay kamo nagtinguha niini nga butang ngari kanako; busa, human sa inyong kapitoan ug duha ka tuig nga panuigon moadto kamo kanako sa akong gingharian; ug uban kanako makakaplag kamo og kapahulayan.

4 Ug sa dihang nakapamulong na siya kanila, miatubang siya ngadto sa tulo, ug miingon kanila: Unsay gusto ninyo nga akong buhaton kaninyo, kon ako tua na sa Amahan?

5 Ug nagsubo sila sa ilang mga kasingkasing, kay dili sila makasulti kaniya sa butang nga ilang gitinguha.

6 Ug miingon siya kanila: Tan-awa, nasayod ako sa inyong mga hunahuna, nga kamo nagtinguha sa butang nga gitinguha ni Juan, ang akong hinigugma, kinsa akong kauban sa akong pagpangalagad, sa wala pa ako ilansang sa mga Judeo.

7 Busa, mas bulahan kamo, kay dili gayod kamo makatagamtam og kamatayon; apan mabuhi kamo aron makakita sa tanang buluhaton sa Amahan ngadto sa katawhan, gani hangtod nga ang tanang butang matuman sumala sa kabubut-on sa Amahan, sa higayon nga moabot ako sa akong himaya uban sa mga gahom sa langit.

8 Ug dili gayod kamo mag-antos sa mga kasakit sa kamatayon; apan sa higayon nga moanhi ako sa akong himaya kamo mabag-o sa usa ka pamilok sa mata gikan sa pagka-mortal ngadto sa pagka-imortal; ug unya panalanginan kamo didto sa gingharian sa akong Amahan.

9 Ug usab, dili kamo makatagamtam og kasakit samtang magpuyo kamo sa unod, ni kasubo gawas lamang tungod sa mga sala sa kalibotan; ug kining tanan akong buhaton tungod sa butang nga inyong gitinguha kanako, kay nagtinguha man kamo nga inyong madala ang mga kalag sa mga tawo ngari kanako, samtang magpabilin ang kalibotan.

10 Ug tungod niini nga hinungdan makaangkon kamo og kahingpitan sa kalipay; ug magalingkod kamo sa gingharian sa akong Amahan; oo, ang inyong kamaya mahingpit, ingon nga ang Amahan mihatag kanako og kahingpitan sa kamaya; ug mahisama kamo kanako, ug ako mahisama sa Amahan; ug ang Amahan ug ako usa ra;

11 Ug ang Espiritu Santo nagpamatuod sa Amahan ug kanako; ug ang Amahan mihatag sa Espiritu Santo ngadto sa mga anak sa katawhan, tungod kanako.

12 Ug nahitabo nga sa dihang nakapamulong na si Jesus niini nga mga pulong, gihikap niya ang matag usa kanila sa iyang tudlo gawas sa tulo nga magpabilin, ug unya siya mibiya.

13 Ug tan-awa, ang kalangitan naabli ug gibayaw sila ngadto sa langit, ug nakakita ug nakadungog og mga butang nga dili ikapamulong.

14 Ug gidid-an sila sa pagsugilon niini; ni gihatagan sila og gahom nga sila makasugilon sa mga butang nga ilang nakita ug nadungog;

15 Ug kon anaa man sila sa ilang lawas o wala sa lawas, wala sila mahibalo; kay alang kanila nahisama kadto sa ilang transpigurasyon, nga sila nausab gikan niini nga lawas sa unod ngadto sa imortal nga kahimtang, nga makita nila ang mga butang sa Dios.

16 Apan nahitabo nga nangalagad na usab sila sa ibabaw sa yuta; bisan pa niana wala sila mopadayag sa mga butang nga ilang nadungog ug nakita, tungod sa sugo nga gihatag kanila sa langit.

17 Ug karon, kon mga mortal man sila o imortal, sugod sa adlaw sa ilang transpigurasyon, ako wala masayod;

18 Apan mao kini ang akong nasayran, sumala sa talaan nga gihatag—nanglakaw sila sa ibabaw sa yuta, ug nangalagad sa tanang katawhan, naghiusa kutob sa ilang madala ngadto sa simbahan nga mituo sa ilang pagsangyaw; nagbunyag kanila, ug kutob sa gibunyagan nakadawat sa Espiritu Santo.

19 Ug gipangbalhog sila sa bilanggoan niadtong mga dili sakop sa simbahan. Ug ang mga bilanggoan dili makapugong kanila, kay kini nangaguba.

20 Ug gipanghulog sila ngadto sa yuta; apan sila mihampak sa yuta pinaagi sa pulong sa Dios, nga sa ingon pinaagi sa iyang gahom naluwas sila gikan sa mga kahiladman sa yuta; ug busa dili sila makakalot og mga lungag nga igo nga makapugong kanila.

21 Ug tulo ka higayon silang gihulog ngadto sa usa ka hudno ug wala maunsa.

22 Ug duha ka higayon silang gihulog ngadto sa langob sa mabangis nga mga hayop; ug tan-awa nakigdula sila sa mga hayop sama sa usa ka bata uban sa masuso nga karnero, ug wala maunsa.

23 Ug nahitabo nga sa ingon niana nangadto sila sa tanang katawhan ni Nephi, ug nagsangyaw sa ebanghelyo ni Kristo ngadto sa tanang katawhan sa ibabaw sa yuta; ug nakabig sila ngadto sa Ginoo, ug nahiusa sa simbahan ni Kristo, ug sa ingon niana ang katawhan niana nga kaliwatan napanalanginan, sumala sa pulong ni Jesus.

24 Ug karon ako, si Mormon, motapos sa akong pagpamulong kabahin niini nga mga butang sulod sa mubo nga panahon.

25 Tan-awa, mosulat na unta ako sa mga ngalan niadtong dili makatagamtam og kamatayon, apan ang Ginoo midili; busa wala ko kini isulat, kay gitago kini gikan sa kalibotan.

26 Apan tan-awa, nakakita ako kanila, ug nangalagad sila kanako.

27 Ug tan-awa anaa sila taliwala sa mga Hentil, ug ang mga Hentil wala makaila kanila.

28 Ug anaa usab sila taliwala sa mga Judeo, ug ang mga Judeo wala makaila kanila.

29 Ug mahitabo, kon makita sa Ginoo nga haom sa iyang kaalam nga alagaran nila ang tanang nagkatibulaag nga tribo sa Israel, ug tanang kanasoran, kaliwatan, pinulongan ug katawhan, ug pagadalhon ang daghang kalag gikan kanila ngadto ni Jesus, nga matuman ang ilang tinguha, ug usab tungod sa makakabig nga gahom sa Dios nga anaa kanila.

30 Ug sama sila sa mga anghel sa Dios, ug kon mag-ampo sila sa Amahan sa ngalan ni Jesus, makapakita sila sa ilang kaugalingon ngadto kang bisan kinsa nga tawo nga alang kanila maayo.

31 Busa, may mahinungdanon ug kahibulongang mga buhat nga mahimo pinaagi kanila, sa wala pa ang mahinungdanon ug umaabot nga adlaw dihang ang tanang katawhan seguradong mobarog sa atubangan sa hukmanan ni Kristo;

32 Oo bisan sa mga Hentil adunay mahinungdanon ug kahibulongan nga buhat nga mahimo pinaagi kanila, sa wala pa kanang adlaw sa paghukom.

33 Ug kon aduna kamo sa tanang kasulatan nga maghatag sa asoy sa tanang kahibulongan nga mga buhat ni Kristo, kamo, sumala sa mga pulong ni Kristo, masayod nga kini nga mga butang moabot gayod.

34 Ug alaot siya nga dili mopatalinghog sa mga pulong ni Jesus, ug usab kanila nga iyang gipili ug gipadala taliwala kanila; kay kadtong dili modawat sa mga pulong ni Jesus ug sa mga pulong niadtong iyang gipadala dili modawat kaniya; ug busa siya dili modawat kanila sa kataposang adlaw;

35 Ug mas maayo pa alang kanila nga wala sila matawo. Kay nagtuo ba kamo nga makalikay kamo sa kaangayan sa usa ka nasakitan nga Dios, kinsa giyatakan sa tiil sa mga tawo, nga sa ingon niana ang kaluwasan moabot?

36 Ug karon tan-awa, samtang namulong ako kabahin niadtong gipili sa Ginoo, oo, gani sa tulo nga gibayaw ngadto sa kalangitan, nga ako wala masayod kon nalimpyohan ba sila gikan sa pagka-mortal ngadto sa pagka-imortal—

37 Apan tan-awa, sukad sa akong pagsulat, nangutana ko sa Ginoo, ug iyang gipakita kanako nga kinahanglang adunay kausaban nga himoon sa ilang mga lawas, kay kondili magkinahanglan nga sila makatagamtam og kamatayon;

38 Busa, aron dili sila makatagamtam og kamatayon adunay kausaban nga himoon sa ilang mga lawas, aron dili sila mag-antos sa kasakit ug kasubo gawas lamang alang sa mga sala sa kalibotan.

39 Karon kini nga kausaban dili sama nianang mahitabo sa kataposang adlaw; apan adunay kausaban nga nahimo kanila, sa ingon nga si Satanas walay gahom batok kanila, nga siya dili makatental kanila; ug sila gibalaan diha sa unod, nga sila nabalaan, ug ang mga gahom sa yuta dili makapugong kanila.

40 Ug niini nga kahimtang magpabilin sila hangtod sa adlaw sa paghukom ni Kristo; ug niana nga adlaw makadawat sila og mas dako nga kausaban, ug dawaton ngadto sa gingharian sa Amahan aron dili na gayod mobiya, apan magpuyo kauban sa Dios sa kahangtoran didto sa kalangitan.