1 Ka sa yaco ni sa takali tale ga yani vakakina na ikaciwasagavulu kalima ni yabaki, ka ra sa tekivu guilecava na tamata na veivakatakilakila kei na veika veivakurabuitaki era a rogoca, ia sa lailai sobu tiko ga na nodra kurabuitaka na ivakatakilakila kei na ka e veivakurabuitaki mai lomalagi, sa tekivu me kaukauwa mai na lomadra, ka mataboko na nodra vakasama, ka ra sa tekivu sega ni vakabauta na veika kece era a rogoca ka raica—

2 Era sa vakananuma e lomadra e so na ka wale, ni ra a vakayacora ga na tamata ena kaukauwa ni tevoro, me temaka ka vagolea tani na yalodra na tamata; a sa rawata tale vakaikoya na yalodra na tamata ko Setani, sa vakamatabokotaka na matadra ka tuberi ira tani me ra vakabauta ni sa ka wale ka vakalialia na ivakavuvuli i Karisito.

3 Ka sa yaco ni ra sa kaukauwa vakalevu cake na tamata ena caka ca kei na itovo vakasisila; era sa sega ni vakabauta ni na soli tale mai e so na veivakatakilakila se na veika veivakurabuitaki e so; a sa veilakoyaki voli ko Setani, ka temaka ka vagolea tani na lomadra na tamata ka vakavuna me ra kitaka na caka ca levu ena nodra vanua.

4 Ka sa takali tale ga yani vakakina na ikaciwasagavulu kaono ni yabaki; kei na ikaciwasagavulu kavitu ni yabaki; sa vakatalega kina na ikaciwasagavulu kawalu ni yabaki; kei na ikaciwasagavulu kaciwa tale ga ni yabaki;

5 Ka sa takali tale ga yani e dua na drau na yabaki mai na gauna i Mosaia, o koya ka a tui vei ira na tamata i Nifaiti.

6 Ka sa takali yani e ono na drau kaciwa na yabaki mai na gauna a biuti Jerusalemi mai kina ko Liai.

7 Ka sa takali yani e ciwa na yabaki mai na gauna ka vakaraitaki kina na ivakatakilakila, ni nona lako mai ki vuravura na Karisito, me vaka era a vosa kina na parofita.

8 Ia era sa wilika na nodra gauna ko ira na Nifaiti mai na gauna oqo, na gauna ka a vakaraitaki kina na ivakatakilakila, se ena gauna ka lako mai kina na Karisito; a ka oqo era sa okata kina me sa oti yani e ciwa na yabaki.

9 E a sega ni lesu tale ki na vanua ko Saraemala; ko Nifai na tamai Nifai, o koya ka maroroya tu na ivolatukutuku, ka sa sega tale ga ni kunei rawa ena vanua taucoko.

10 Ka sa yaco ni ra sa ia tikoga na caka ca ko ira na tamata, ka dina ga ni sa vakau yani ena kedra maliwa e vuqa na vunau kei na parofisai; a sa takali yani na ikatini ni yabaki; kei na ikatinikadua talega ni yabaki ia era sa ivalavala ca tikoga.

11 Ka sa yaco ni ena ikatinikatolu ni yabaki sa tekivu kina na veileti kei na ivalu ena vanua taucoko; ni ra sa lewevuqa sara mai na daubutako i Ketianitoni, ka ra sa vakamatea e vuqa na tamata, ka vakalala e vuqa na veikoro, ka ra sa vakavuna na mate kei na rusa ena vanua taucoko, a ka oqo era sa cokovata kina ko ira na tamata na Nifaiti kei ira na Leimanaiti, me ra taura cake nodra iyaragi ka valuti ira.

12 O koya gona ko ira kece na Leimanaiti ka ra sa saumaki vua na Turaga era sa to vata kei ira na wekadra, na Nifaiti, a ra sa uqeti me ra tauri yaragi ka valuti ira na daubutako i Ketianitoni me ra taqomaka kina na nodra bula kei ira na nodra yalewa kei ira na luvedra, io, me ra taura tiko ga kina na nodra dodonu, kei na galala ni nodra lotu kei na nodra qaravi Kalou, kei na nodra bula sereki kei na bula galala.

13 Ka sa yaco ni sa bera ni takali yani na ikatinikatolu ni yabaki oqo, sa kaukauwa sara na ivalu ka voleka me ra vakarusai sara na Nifaiti.

14 Ka sa yaco ni ko ira na Leimanaiti ka ra sa to vata kei ira na Nifaiti, era sa wili vata sara kei ira na Nifaiti;

15 Ka sa kau tani vei ira na nodra cudruvi, ka sa vulavula mai na kuli ni yagodra me vakataki ira na Nifaiti;

16 Era sa rairai totoka sara na nodra cauravou kei na nodra goneyalewa, era sa wili vata kei ira na Nifaiti, ka ra sa vakatokai me ra Nifaiti. Sa mai cava kina na ikatinikatolu ni yabaki.

17 Ka sa yaco ena itekivu ni katinikava ni yabaki, era sa veivaluvaluti tikoga ko ira na daubutako kei ira na tamata i Nifai, ka sa tubu me kaukauwa sara; ia era sa qaqa na tamata i Nifai vei ira na daubutako, ka ra vakasavi ira tani kina mai na nodra vanua ki na veiulunivanua kei na nodra vei itikotiko vuni.

18 Sa mai cava kina na ikatinikava ni yabaki. A ra sa lako tale mai ena ikatinikalima ni yabaki me ra valuti ira na tamata i Nifai; ia ena vuku ni nodra caka ca na tamata i Nifai, kei na levu ni nodra veicacati ka veisei, era sa gumatua vakalevu kina vei ira ko ira na daubutako i Ketianitoni.

19 Sa mai cava kina na ikatinikalima ni yabaki, ia era sa bikai tu ena vuqa na veivakararawataki ko ira na tamata; ka sa waraki ira tu na iseleiwau ni veivakarusai ka sa vakarau tu me ra yaviti sobu kina oqo ena vuku ni nodra cakacala.