1 Ug nahitabo nga sa ulahing bahin sa ikanapulo ug walo nga tuig kadtong kasundalohan sa mga tulisan nangandam alang sa pagpakig-away, ug misugod sa pagpanganaog ug paspas nga nanggawas gikan sa mga bungtod, ug sa mga kabukiran, ug sa kamingawan, ug sa ilang mga kuta, ug sa ilang tinago nga mga dapit, ug misugod sa pagpanag-iya sa mga yuta, niadtong anaa sa yuta sa habagatan ug niadtong anaa sa yuta sa amihanan, ug misugod sa pagpanag-iya sa tanang yuta nga gibiyaan sa mga Nephita, ug sa mga siyudad nga gibiyaan nga awaaw.

2 Apan tan-awa, walay mabangis nga mga mananap ni mga mananap sa pangayam niadto nga mga yuta nga gibiyaan sa mga Nephita, ug walay mga mananap sa pangayam alang sa mga tulisan gawas lamang sa kamingawan.

3 Ug ang mga tulisan dili mabuhi gawas lamang sa mga kamingawan, tungod sa ilang panginahanglan sa pagkaon; kay ang mga Nephita mibiya sa ilang mga yuta nga awaaw, mipundok sa ilang mga pundok sa gagmayng kahayopan ug sa ilang mga pundok sa dagkong kahayopan ug sa ilang tanan nga katigayonan, ug sila anaa sa usa ka pundok.

4 Busa, walay higayon ang mga tulisan nga makalungkab ug makakuha og pagkaon, gawas lamang kon sila mogula aron makig-away sa mga Nephita; ug kay ang mga Nephita anaa sa usa ka pundok, ug hilabihan gayod ka daghan, ug nakaandam alang sa ilang kaugalingon og mga tagana, ug mga kabayo ug mga baka, ug mga pundok sa gagmayng kahayopan sa matag matang, aron mabuhi sila sulod sa pito ka tuig, nga nianang panahona nanghinaot sila nga malaglag ang mga tulisan sa ibabaw sa yuta; ug sa ingon niana ang ikanapulo ug walo nga tuig milabay.

5 Ug nahitabo nga sa ikanapulo ug siyam nga tuig nakita ni Giddianhi nga kinahanglan siya nga mosulong aron makig-away sa mga Nephita, kay walay paagi nga sila mabuhi gawas lamang sa pagpanglungkab ug pagpanulis ug pagpatay.

6 Ug wala sila mangahas sa pagkatag sa ilang kaugalingon sa ibabaw sa yuta nga niana makapasanay sila og mga lugas, basin pa unya og ang mga Nephita mosulong kanila ug mopatay kanila; busa si Giddianhi mimando sa iyang kasundalohan nga niini nga tuig kinahanglang mosulong sila aron makig-away sa mga Nephita.

7 Ug nahitabo nga misulong sila aron makig-away; ug atol kini sa ikaunom nga bulan; ug tan-awa, makuyaw ug makalilisang kadto nga adlaw sa ilang pagsulong aron makig-away; ug nagbakos sila sumala sa paagi sa mga tulisan; ug sila adunay panit sa karnero nga gibakos sa ilang mga bat-ang, ug natina sila sa dugo, ug ang ilang mga ulo gikagisan ug sila adunay panagang sa ulo; ug makuyaw ug makalilisang ang panagway sa kasundalohan ni Giddianhi, tungod sa ilang taming, ug tungod kay natina sila sa dugo.

8 Ug nahitabo nga ang kasundalohan sa mga Nephita, sa ilang pagkakita sa panagway sa kasundalohan ni Giddianhi, ang tanan mihapa sa yuta, ug mipaabot sa ilang mga pangamuyo ngadto sa Ginoo nga ilang Dios, nga siya mopanalipod kanila ug moluwas kanila gikan sa mga kamot sa ilang mga kaaway.

9 Ug nahitabo nga sa pagkakita sa kasundalohan ni Giddianhi niini misugod sila sa pagsinggit uban sa usa ka makusog nga tingog, tungod sa ilang kalipay, kay nagtuo sila nga ang mga Nephita natumba sa kahadlok tungod kay nalisang sa ilang kasundalohan.

10 Apan niini nga butang sila nasagmuyo, kay ang mga Nephita wala mahadlok kanila; apan nahadlok sila sa ilang Dios ug nangamuyo kaniya aron panalipdan; busa, sa dihang ang kasundalohan ni Giddianhi midasmag kanila andam sila sa pagsugat kanila; oo, diha sa kalig-on sa Ginoo sila midawat kanila.

11 Ug ang panag-away nagsugod niining ikaunom nga bulan; ug makuyaw ug makalilisang ang panag-away, oo, makuyaw ug makalilisang ang pagpamatay, nga niana wala pay nahibaloan sukad nga hilabihan ka makuyaw nga pagpamatay taliwala sa tanang katawhan ni Lehi sukad sa iyang pagbiya sa Jerusalem.

12 Ug bisan pa sa mga panghulga ug mga panumpa nga gihimo ni Giddianhi, tan-awa, ang mga Nephita mipildi kanila, hangtod nga misibog sila gikan sa ilang atubangan.

13 Ug nahitabo nga si Gidgiddoni mimando nga ang iyang kasundalohan mogukod kanila hangtod sa mga utlanan sa kamingawan, ug walay si bisan kinsa nga ilang pasayloon nga mahulog sa ilang mga kamot diha sa agianan; ug sa ingon niana sila migukod kanila ug mipatay kanila, hangtod sa mga utlanan sa kamingawan, gani hangtod nga ilang natuman ang mando ni Gidgiddoni.

14 Ug nahitabo nga si Giddianhi, nga mibarog ug nakig-away uban sa kaisog, gigukod samtang siya milayas; ug kay gikapoy tungod sa tumang pakig-away naapsan siya ug gipatay. Ug mao kana ang kataposan ni Giddianhi ang tulisan.

15 Ug nahitabo nga ang kasundalohan sa mga Nephita mibalik pag-usab ngadto sa ilang dapit nga tagoanan. Ug nahitabo nga kining ikanapulo ug siyam nga tuig milabay, ug ang mga tulisan wala na mosulong pag-usab aron makig-away; ni sila mibalik pag-usab sa ikakawhaan nga tuig.

16 Ug sa ikakawhaan ug usa nga tuig wala sila mosulong aron makig-away, apan mibalik sila sa tanang dapit aron palibotan ang katawhan ni Nephi; kay nagtuo sila nga kon mababagan nila ang katawhan ni Nephi gikan sa ilang mga yuta, ug moliyok kanila sa matag kilid, ug kon mababagan nila gikan sa tanan nila nga mga kahigayonan sa gawas, nga sila makapahimo nila sa pagtugyan sa ilang kaugalingon sumala sa ilang mga tinguha.

17 Karon mitudlo sila diha kanila og laing pangulo kansang ngalan mao si Zemnarihah; busa kadto si Zemnarihah ang misugo nga kini nga paglibot mahitabo.

18 Apan tan-awa, usa kadto ka bintaha sa mga Nephita; kay ang mga tulisan dili makahimo sa paglibot og igong gidugayon nga makaapekto sa mga Nephita, tungod sa ka daghan sa mga tagana nga ilang giandam,

19 Ug tungod sa kakulang sa mga tagana taliwala sa mga tulisan; kay tan-awa, sila walay lain gayod gawas sa mga karne alang sa ilang kabuhian, diin ang karne nakuha nila sa kamingawan;

20 Ug nahitabo nga ang ihalas nga mga mananap nagkanihit diha sa kamingawan nga niana ang mga tulisan hapit na mangamatay tungod sa kagutom.

21 Ug ang mga Nephita mipadayon sa pagmartsa sa adlaw ug sa gabii, ug misulong sa ilang kasundalohan ug mipatay kanila sa mga tinaglibo ug mga tignapulo ka liboan.

22 Ug sa ingon niana nagtinguha ang katawhan ni Zemnarihah nga mosibog sa ilang plano, tungod sa dako nga kalaglagan nga midangat kanila sa magabii ug sa maadlaw.

23 Ug nahitabo nga si Zemnarihah mimando sa iyang katawhan nga mosibog sila gikan sa paglibot, ug momartsa ngadto sa kinalay-an nga mga bahin sa yuta sa amihanan.

24 Ug karon, si Gidgiddoni ingon nga nasayod sa ilang plano, ug nasayod sa ilang kahuyang tungod sa panginahanglan sa pagkaon, ug sa dako nga pagpamatay nga nahitabo taliwala kanila, busa gipadala niya ang iyang kasundalohan panahon sa kagabhion, ug mibabag sa agianan sa ilang pagsibog, ug mibutang sa iyang kasundalohan sa agianan sa ilang dangpanan.

25 Ug gibuhat nila kini sa panahon sa kagabhion, ug nag-una sa pagmartsa sa mga tulisan, aron pagkaugma, kon ang mga tulisan magsugod na sa pagmartsa, sugaton sila sa kasundalohan sa mga Nephita sa ilang atubangan ug sa ilang luyo.

26 Ug ang mga tulisan nga anaa sa habagatan gibabagan usab sa ilang mga dapit nga dangpanan. Ug kining tanan nga butang nahimo pinaagi sa mando ni Gidgiddoni.

27 Ug dihay daghang liboan nga mitugyan sa ilang kaugalingon isip mga binilanggo ngadto sa mga Nephita, ug ang nahibilin kanila gipamatay.

28 Ug ang ilang pangulo, si Zemnarihah, gidakop ug gibitay sa kahoy, oo, gani ngadto sa tumoy niana hangtod nga siya namatay. Ug human sa ilang pagbitay kaniya hangtod nga siya namatay giputol nila ang kahoy, ug misinggit sa makusog nga tingog, nga nag-ingon:

29 Hinaot pa unta nga ang Ginoo mopanalipod sa iyang katawhan sa pagkamatarong ug sa pagkabalaan sa kasingkasing, nga mapatumba nila ngadto sa yuta ang tanang magtinguha sa pagpatay kanila tungod sa gahom ug tinago nga mga kalihokan, gani sama niining tawo nga gitumba ngadto sa yuta.

30 Ug nalipay sila ug misinggit pag-usab uban sa usa ka tingog, nga nag-ingon: Hinaot nga ang Dios ni Abraham, ug ang Dios ni Isaac, ug ang Dios ni Jacob, mopanalipod niini nga katawhan sa pagkamatarong, hangtod nga sila motawag sa ngalan sa ilang Dios aron panalipdan.

31 Ug nahitabo nga sila nagdungan, ang tanan nagkahiusa, sa pag-awit, ug sa pagdayeg sa ilang Dios tungod sa mahinungdanon nga butang nga gihimo niya alang kanila, sa pagpanalipod kanila gikan sa pagkahulog ngadto sa mga kamot sa ilang mga kaaway.

32 Oo, sila misinggit: Hosanna ngadto sa Labing Halangdon nga Dios. Ug sila misinggit: Bulahan ang ngalan sa Ginoong Dios nga Labing Makagagahom, ang Labing Halangdon nga Dios.

33 Ug ang ilang mga kasingkasing napuno sa kamaya, ngadto sa pagtubod sa daghang luha, tungod sa dakong kaayo sa Dios sa pagluwas kanila gikan sa mga kamot sa ilang mga kaaway; ug nasayod sila nga tungod kini sa ilang paghinulsol ug sa ilang pagpaubos nga sila giluwas gikan sa walay kataposan nga kalaglagan.