1 Ug karon tan-awa, walay bisan usa nga buhi nga kalag taliwala sa tanang katawhan sa mga Nephita nga nagduhaduha sa labing ubos sa mga pulong sa tanang balaan nga mga propeta kinsa nakapamulong; kay nasayod sila nga kini kinahanglan gayod nga matuman.

2 Ug nasayod sila nga gikinahanglan gayod nga si Kristo moabot, tungod sa daghang timailhan nga gihatag, sumala sa mga pulong sa mga propeta; ug tungod sa mga butang nga nahitabo na nasayod sila nga gikinahanglan nga ang tanang butang mahitabo sumala nianang gipamulong na.

3 Busa sila misalikway sa ilang tanan nga sala, ug ilang mga pagkasalawayon, ug ilang malaw-ay nga mga buhat, ug nag-alagad sa Dios uban sa tanang kakugi sa adlaw ug gabii.

4 Ug karon nahitabo nga sa dihang ilang gidala ang tanang binilanggo nga tulisan, nga niana walay usa nga nakalayas nga wala mapatay, ilang gibalhog ang ilang mga binilanggo ngadto sa bilanggoan ug misugo nga ang pulong sa Dios isangyaw ngadto kanila; ug kutob sa maghinulsol sa ilang mga sala ug misulod og pakigsaad nga sila dili na mopatay gihatagan og kalingkawasan.

5 Apan kutob niadtong wala mosulod og pakigsaad, ug nagpadayon sa tinago nga mga pagpatay sulod sa ilang mga kasingkasing, oo, kutob sa nakaplagan nga namulong og mga pagpanghulga batok sa ilang kaigsoonan gihukman ug gisilotan sumala sa balaod.

6 Ug sa ingon niana gitapos nila ang kadtong tanang daotan, ug tinago, ug salawayon nga mga kalihokan, diin dihay hilabihan gayod nga pagkadaotan, ug hilabihan ka daghang pagpatay nga gibuhat.

7 Ug sa ingon niana milabay ang ikakawhaan ug duha nga tuig, ug ang ikakawhaan ug tulo nga tuig usab, ug ang ikakawhaan ug upat nga tuig, ug ang ikakawhaan ug lima nga tuig; ug sa ingon niana milabay ang ikakawhaan ug lima nga tuig.

8 Ug dihay daghan nga butang nga nahitabo nga, sa mga mata sa uban, mahinungdanon ug kahibulongan; bisan pa niana, kining tanan dili masulat dinhi niini nga basahon; oo, kini nga basahon dili igo bisan sa usa ka gatosan nga bahin kon unsa ang nabuhat taliwala sa daghan kaayo nga katawhan sulod sa ikakawhaan ug lima nga tuig;

9 Apan tan-awa, adunay mga talaan nga naglangkob sa tanang kahimoan niini nga katawhan; ug usa ka mas mubo apan tinuod nga asoy ang gihatag ni Nephi.

10 Busa naghimo ako og akong talaan niini nga mga butang sumala sa talaan ni Nephi, nga gikulit diha sa mga palid nga gitawag og mga palid ni Nephi.

11 Ug tan-awa, gihimo nako ang talaan dinhi sa mga palid nga akong gihimo sa akong kaugalingong mga kamot.

12 Ug tan-awa, ako ginganlan og Mormon, nga gitawag sunod niana nga yuta nga Mormon, ang yuta diin si Alma mitukod og simbahan taliwala sa katawhan, oo, ang unang simbahan nga natukod taliwala kanila human sa ilang kalapasan.

13 Tan-awa, tinun-an ako ni Jesukristo, ang Anak sa Dios. Gitawag niya ako aron sa pagpahayag sa iyang pulong taliwala sa iyang katawhan, aron sila makabaton og walay kataposang kinabuhi.

14 Ug gikinahanglan nga ako, sumala sa kabubut-on sa Dios, aron ang mga pag-ampo niadtong mitaliwan na niini nga kinabuhi, kinsa mga balaan, matuman sumala sa ilang pagtuo, maghimo og talaan niini nga mga butang nga nahimo na—

15 Oo, usa ka gamay nga talaan sa nanghitabo gikan sa panahon nga si Lehi mibiya sa Jerusalem, gani hangtod karon nga panahon.

16 Busa maghimo ako og akong talaan gikan sa mga asoy nga gihatag niadtong nahauna kanako, hangtod sa pagsugod sa akong adlaw;

17 Ug unya maghimo ako og talaan sa mga butang nga nakita nako sa akong kaugalingong mga mata.

18 Ug nasayod ako nga ang talaan nga akong himoon usa ka makiangayon ug tinuod nga talaan; bisan pa niana adunay daghang butang diin, sumala sa among pinulongan, kami dili makahimo sa pagsulat.

19 Ug karon akong taposon ang akong pagpamulong, mahitungod sa akong kaugalingon, ug magpadayon sa paghatag sa akong sugilanon sa mga butang nga nahitabo sa wala pa ako.

20 Ako si Mormon, ug usa ka tiunay nga kaliwat ni Lehi. May katarongan ako sa pagdayeg sa akong Dios ug akong Manluluwas nga si Jesukristo, nga siya midala sa atong mga amahan gikan sa yuta sa Jerusalem, (ug walay usa nga nasayod niini gawas lamang sa iyang kaugalingon ug niadtong iyang gidala gikan niana nga yuta) ug nga siya naghatag kanako ug sa akong katawhan og daghang kasayoran ngadto sa kaluwasan sa among mga kalag.

21 Sa pagkatinuod gipanalanginan niya ang balay ni Jacob, ug nagmaluluy-on sa binhi ni Jose.

22 Ug tungod kay ang mga anak ni Lehi nagsunod sa iyang mga sugo siya mipanalangin kanila ug mipauswag kanila sumala sa iyang pulong.

23 Oo, ug sa pagkatinuod siya modala pag-usab sa usa ka salin sa kaliwat ni Jose ngadto sa kahibalo sa Ginoo nga ilang Dios.

24 Ug sa pagkatinuod samtang ang Ginoo buhi, pundokon niya gikan sa upat ka suok sa yuta ang tanang salin sa mga binhi ni Jacob, nga nagkatibulaag sa ibabaw sa tibuok yuta.

25 Ug kay siya nakigsaad sa tibuok balay ni Jacob, gani aron ang pakigsaad nga iyang gipakigsaad sa balay ni Jacob matuman diha sa iyang kaugalingong tukma nga panahon, ngadto sa pagpahiuli sa tibuok balay ni Jacob ngadto sa kasayoran sa pakigsaad nga iyang gipakigsaad uban kanila.

26 Ug unya sila makaila sa ilang Manunubos, nga mao si Jesukristo, ang anak sa Dios; ug unya pagapundokon sila gikan sa upat ka suok sa yuta ngadto sa ilang kaugalingong mga yuta, diin sila gipatibulaag; oo, ingon nga ang Ginoo buhi sa ingon mahitabo usab kini. Amen.