1 Ug karon nahitabo nga ang katawhan sa mga Nephita mipauli sa ilang kaugalingong mga yuta sa ikakawhaan ug unom nga tuig, matag tawo, uban sa iyang pamilya, iyang mga pundok sa gagmayng kahayopan ug iyang mga pundok sa dagkong kahayopan, iyang mga kabayo ug iyang mga baka, ug tanang butang nga ilang gipanag-iya.

2 Ug nahitabo nga wala sila makahurot og kaon sa tanan nila nga pagkaon; busa ilang gidala ang tanan nga wala pa nila makaon, ang tanan nila nga lugas sa matag matang, ug ang ilang mga bulawan, ug ang ilang mga pilak, ug ang tanan nila nga bililhong mga butang, ug namauli sila sa ilang kaugalingong mga yuta ug sa ilang mga kabtangan, sa amihanan ug sa habagatan, sa yuta sa amihanan nga bahin ug sa yuta sa habagatan nga bahin.

3 Ug gihatagan nila og mga yuta ang mga tulisan nga misulod og usa ka pakigsaad nga ipadayon ang kalinaw sa yuta, kinsa matinguhaon nga magpabiling mga Lamanita, mga yuta sumala sa ilang gidaghanon, aron sila makaangkon, pinaagi sa ilang mga paghago, og ilang kabuhian; ug sa ingon niana sila nagmugna og kalinaw sa tanang yuta.

4 Ug nagsugod na usab sila sa pag-uswag ug nag-anam kaadunahan; ug ang ikakawhaan ug unom ug pito nga tuig milabay, ug dihay dako nga kahusay sa yuta; ug naghimo sila og ilang mga balaod sumala sa katarong ug kaangayan.

5 Ug karon walay butang diha sa yuta nga makapugong sa katawhan sa padayon nga pag-uswag, gawas kon sila makahimo og kalapasan.

6 Ug karon mao kadto si Gidgiddoni, ug ang maghuhukom, nga si Lachoneus, ug kadtong gitudlo nga mahimong mga pangulo, ang mimugna niining dako nga kalinaw diha sa yuta.

7 Ug nahitabo nga dihay daghang siyudad nga gitukod pag-usab, ug dihay daghang karaan nga mga siyudad ang giayo.

8 Ug dihay daghang dagko nga mga dalan ang gipahimutang, ug daghang agianan ang gihimo, nga nagpaingon gikan sa usa ka siyudad ngadto sa laing siyudad, ug gikan sa usa ka yuta ngadto sa laing yuta, ug gikan sa usa ka dapit ngadto sa laing dapit.

9 Ug sa ingon niana milabay ang ikakawhaan ug walo nga tuig, ug ang katawhan nakaangkon og padayon nga kalinaw.

10 Apan nahitabo sa ikakawhaan ug siyam nga tuig dihay nagsugod nga mga panaglalis taliwala sa katawhan; ug ang uban gibayaw ngadto sa garbo ug mga pagpanghambog tungod sa ilang hilabihan nga kaadunahan, oo, gani ngadto sa hilabihan nga mga pagpanglutos;

11 Kay dihay daghang magpapatigayon sa yuta, ug usab daghang manlalaban, ug daghang opisyal.

12 Ug ang katawhan nagsugod nga mailhan sigon sa kahimtang, sumala sa ilang mga katigayonan ug sa ilang mga kahigayonan alang sa pagkat-on; oo, ang uban walay alamag tungod sa ilang kakabos, ug ang uban nakadawat og dagko nga kahibalo tungod sa ilang mga katigayonan.

13 Ang uban gibayaw sa ilang garbo, ug ang uban hilabihan ka mapainubsanon; ang uban mobalos sa pagtamay batok sa pagtamay, samtang ang uban modawat sa pagtamay ug pagpanglutos ug tanan nga matang sa mga kasakit, ug dili mobalos ug mobiaybiay og balik, apan mapainubsanon ug mahinulsolon sa atubangan sa Dios.

14 Ug sa ingon niana dihay nahitabo nga dakong kawalay kaangayan sa tanang yuta, nga niana ang simbahan nagsugod sa pagkabahin; oo, hangtod sa ikakatloan nga tuig ang simbahan nabahin sa tibuok yuta gawas sa pipila lamang ka Lamanita kinsa nakabig sa tinuod nga pagtuo; ug dili gayod sila mobiya niini, kay lig-on sila, ug makanunayon, ug dili matarog, andam uban sa tanan nga kakugi sa pagsunod sa mga sugo sa Ginoo.

15 Karon ang hinungdan niining pagkadaotan sa katawhan mao kini—si Satanas adunay dakong gahom, sa pag-aghat sa katawhan sa pagbuhat sa tanang matang sa kadaotan, ug sa pagpataas sa ilang garbo, nagtental kanila sa pagtinguha og gahom, ug katungod, ug mga katigayonan, ug walay kapuslanan nga mga butang sa kalibotan.

16 Ug sa ingon niana si Satanas milingla sa mga kasingkasing sa katawhan sa pagbuhat sa tanang matang sa pagkadaotan; busa nakatagamtam sila og kalinaw apan sa pipila lamang ka tuig.

17 Ug sa ingon, niana sa pagsugod sa ikakatloan nga tuig—ang katawhan kay mitugyan sulod sa dugay nga panahon nga madala sa mga pagtental sa yawa sa bisan asa nga iyang gitinguha nga sila dad-on, ug sa pagbuhat sa bisan unsa nga pagkadaotan nga iyang gitinguha nga ilang buhaton—ug sa ingon niana sa pagsugod niining ikakatloan nga tuig, anaa sila sa usa ka kahimtang sa makahahadlok nga pagkadaotan.

18 Karon nakasala sila dili tungod sa ka walay alamag, kay sila nasayod man sa kabubut-on sa Dios kabahin kanila, kay kini gitudlo ngadto kanila; busa sila mituyo gayod sa pagsupil batok sa Dios.

19 Ug karon sa mga adlaw kadto ni Lachoneus, anak nga lalaki ni Lachoneus, kay si Lachoneus mipuli sa katungdanan sa iyang amahan ug nagmando sa katawhan niana nga tuig.

20 Ug dihay nagsugod nga mga tawo nga dinasig sa langit ug gipadala, nagbarog taliwala sa katawhan sa tanang yuta, maisogong nagsangyaw ug nagpamatuod bahin sa mga sala ug sa mga kadaotan sa katawhan, ug nagpamatuod kanila kabahin sa katubsanan nga pagahimoon sa Ginoo alang sa iyang katawhan, o sa laing pagkasulti, ang pagkabanhaw ni Kristo; ug sila maisogong nagpamatuod bahin sa iyang kamatayon ug mga pag-antos.

21 Karon dihay daghan sa katawhan nga hilabihan ang kasuko tungod niadtong nagpamatuod niini nga mga butang; ug kadtong mga nasuko una sa tanan mao ang labaw nga mga maghuhukom, ug sila nga nahimong halangdon nga mga pari ug mga manlalaban; oo, tanan niadtong mga manlalaban nasuko niadtong nagpamatuod niini nga mga butang.

22 Karon walay manlalaban ni maghuhukom ni halangdon nga pari nga adunay gahom sa paghukom ni bisan kinsa ngadto sa kamatayon gawas kon ang ilang paghukom gipirmahan sa gobernador sa yuta.

23 Karon dihay daghan niadtong nagpamatuod sa mga butang kabahin ni Kristo kinsa maisogong nagpamatuod, nga gidakop ug gipahamtangan og kamatayon sa tinago nga paagi sa mga maghuhukom, nga ang kasayoran bahin sa ilang kamatayon wala moabot sa gobernador sa yuta hangtod human sa ilang kamatayon.

24 Karon tan-awa, supak kini sa mga balaod sa yuta, nga si bisan kinsa nga tawo pahamtangan og kamatayon gawas kon sila adunay gahom gikan sa gobernador sa yuta—

25 Busa ang usa ka sumbong miabot sa yuta sa Zarahemla, ngadto sa gobernador sa yuta, batok niini nga mga maghuhukom nga misilot sa mga propeta sa Ginoo ngadto sa kamatayon, nga dili pinasubay sa balaod.

26 Karon nahitabo nga gidakop sila ug gidala sa atubangan sa maghuhukom, aron pagahukman sa mga sala nga ilang nabuhat, pinasubay sa balaod nga gihatag sa katawhan.

27 Karon nahitabo nga kadtong mga maghuhukom adunay daghang higala ug kaliwatan; ug ang nahibilin, oo, gani hapit tanang manlalaban ug halangdon nga mga pari, nagkatigom, ug nagkahiusa uban sa kaliwatan niadtong mga maghuhukom nga pagahukman pinasubay sa balaod.

28 Ug misulod sila og usa ka pakigsaad sa usag usa, oo, gani nianang pakigsaad nga gihatag kanila sa karaan, diin nga pakigsaad hinatag ug gipangalagad sa yawa, aron maghiusa batok sa tanang pagkamatarong.

29 Busa naghiusa sila batok sa katawhan sa Ginoo, ug misulod og usa ka pakigsaad sa paglaglag kanila, ug sa pagluwas niadtong sad-an sa pagpatay gikan sa kamot sa kaangayan, nga hapit na ipahamtang pinasubay sa balaod.

30 Ug misupak sila sa balaod ug sa mga katungod sa ilang nasod; ug mihimo sila og pakigsaad sa usag usa sa paglaglag sa gobernador, ug sa pagpahimutang og usa ka hari ibabaw sa yuta, aron ang yuta wala nay kalingkawasan apan ubos sa pagmando sa mga hari.