1 Anajwan k’ehomaq reetal, tink’ut cheru naq ink’a’ ke’xxaqab’ jun li rey sa’ xb’een li ch’och’; a’b’anan sa’ li chihab’ ajwi’ a’in, relik chi yaal, li xlaje xka’k’aal chihab’, ke’sachok sa’ li raqleb’aal aatin; relik chi yaal, ke’xkamsi li xb’eenil aj raqol aatin re li ch’och’.

2 Ut eb’ li tenamit ke’kana chi jachjo ru chirib’ileb’ rib’; ut ke’xjach rib’ chirib’ileb’ rib’ sa’ junjunq teepal, li junjunq chi winq jo’ chanru lix junkab’al ut li rech alal ut li rochb’een; ut chi jo’kan ke’xsach lix jolomil tenamit re li ch’och’.

3 Ut li junjunq chi teep kixxaqab’ jun xb’eenil malaj aj jolominel reheb’; ut chi jo’kan ke’ok choq’ teep ut aj jolominel teep.

4 Anajwan ut, maajun winq wan sa’ xyanqeb’ li moko wan ta naab’al lix junkab’al ut xk’ihal li rech alal ut li rochb’een; jo’kan naq ke’kana chi q’axal nim lix teepeb’.

5 Anajwan kib’aanuman chixjunil a’in, ut toj maak’a’ li pleet sa’ xyanqeb’; ut chixjunil li maa’usilal a’in kichal chaq sa’ xb’eeneb’ li tenamit xb’aan naq ke’xq’axtesi rib’ chiru xwankil laj Satanas.

6 Ut kisachman li na’leb’ tuqub’anb’il wi’ xjolomil li tenamit, sa’ xk’ab’a’ li muqmuukil molam reheb’ li rochb’eeneb’ ut li rech alaleb’ li ke’kamsink chaq reheb’ li profeet.

7 Ut xb’aaneb’ a’an kiwan nimla wech’ok-ib’ sa’ li ch’och’, jo’kan naq ka’ch’in chik ma chixjunil li jun raqal tiik xch’ool re li tenamit ke’kana chi aj maakeb’; relik chi yaal, yal junjunq li tiikil winq ke’wan sa’ xyanqeb’.

8 Ut chi jo’kan moko numenaq ta waqib’ chihab’ chalen naq lix k’ihaleb’ li tenamit ke’xkanab’ chaq wi’chik xtiikilaleb’, jo’ nasutq’i li tz’i’ rik’in xxa’aw, malaj li xan aaq chixb’aqlenkil rib’ sa’ li sulul.

9 Anajwan li muqmuukil molam a’in, li kixk’am chaq xnimal li maa’usilal a’in sa’ xb’een li tenamit, ke’xch’utub’ rib’ chi pleetik, ut ke’xk’ojob’ sa’ xjolomil jun winq aj Jakob ke’xye re;

10 Ut xreyeb’ ke’xye re, jo’kan naq ki’ok choq’ rey sa’ xb’een li maa’us aj molam a’in, ut a’an jun reheb’ li q’axal nawb’il ru li kixk’e chaq xyaab’ xkux chixjitb’aleb’ li profeet li ke’xch’olob’ chaq xyaalal li Jesus.

11 Ut kik’ulman naq moko kiwan ta xkawileb’ sa’ xk’ihaleb’ jo’ chanru li jar teep reheb’ li tenamit, li ke’wan chi junajinb’il, ka’aj b’an wi’ naq eb’ lix jolomineleb’ ke’xxaqab’ lix chaq’rab’eb’, li junjunq jo’ chanru xteepal; a’b’anan wankeb’ choq’ xik’ ilonel; us ta maawa’eb’ jun tenamit tiik xch’ool, wankeb’ sa’ junajil sa’ xik’ rilb’aleb’ li ke’ok chaq sa’ jun sumwank re xsachb’al xjolomil li tenamit.

12 Jo’kan naq laj Jakob, naq kiril naq k’iheb’ wi’chik li xik’ neke’ilok reheb’ chiruheb’ a’an, rik’in naq a’an li rey sa’ xb’een li molam, jo’kan naq kixtaqlaheb’ lix tenamit naq te’eeleliq toj sa’ li jun raqal re li ch’och’ li q’axal sa’ xnim li saq’e wan, ut aran te’xwaklesi jun awa’b’ejihom choq’ reheb’, toj reetal naq te’xjunaji rib’ rik’ineb’ li ani ke’risi chaq rib’ (xb’aan naq kixsahob’resi xch’ooleb’ re naq te’wanq naab’al li te’risi chaq rib’) ut te’nimanq tz’aqal xmetz’ew re te’ruuq chixyalb’al ru rik’ineb’ li jar teep re li tenamit; ut jo’kan ke’xb’aanu.

13 Ut q’axal sa’ junpaat xb’eenikeb’, jo’kan naq ink’a’ kiru xramb’al toj reetal naq ink’a’ chik neke’tawe’ xb’aaneb’ li tenamit. Ut chi jo’kan kiraqe’ li xlaje xka’k’aal chihab’, ut jo’ka’in li ki’uxman sa’ xtenamit laj Nefi.

14 Ut kik’ulman sa’ li xjunlaju xka’k’aal chihab’, naq jachjookeb’ ru sa’ li jar teepal, li junjunq chi winq jo’ chanru lix junkab’al, li rech alal ut li rochb’een; a’b’anan ak ke’ok sa’ aatin naq ink’a’ te’ok sa’ pleet chirib’ileb’ rib’, a’b’an moko wankeb’ ta sa’ junajil chirix lix chaq’rab’eb’, ut li na’leb’ chirix xjolominkil li tenamit, xb’aan naq kixaqab’aak a’in jo’ chanru xk’a’uxleb’ li ani ke’wan choq’ xb’eenileb’ ut choq’ aj jolominel reheb’. A’b’anan ke’xxaqab’ li chaq’rab’ q’axal kaw naq li jun teepal ink’a’ tixb’aanu junaq ra re li jun chik, jo’kan naq ke’wan ka’ch’inaq sa’ tuqtuukilal sa’ li ch’och’; a’b’anan jalb’ehinb’il chaq xch’ooleb’ rik’in li Qaawa’ lix Dios, ut ke’xkutiheb’ chi pek li profeet ut ke’risiheb’ chaq sa’ xyanqeb’.

15 Ut kik’ulman naq laj Nefi—rik’in naq ula’aninb’il chaq xb’aaneb’ li anjel ut xb’aan ajwi’ xyaab’ xkux li Qaawa’, jo’kan ut, rik’in naq xrileb’ chaq li anjel ut rilom rik’in xnaq’ ru, ut rik’in naq wan wankilal k’eeb’il re, re tixnaw chirix lix k’anjel li Kristo, ut rik’in ajwi’ naq rilom rik’in xnaq’ ru naq sa’ junpaat ke’el chaq sa’ li tiikilal ut ke’sutq’i sa’ xmaa’usilaleb’ ut xtz’eqb’eetalileb’;

16 Jo’kan ut, rik’in naq ra xch’ool xb’aan xkawileb’ li raam ut xmutz’ileb’ lix k’a’uxl—a’an xko’o sa’ xyanqeb’ sa’ li chihab’ ajwi’ a’an, ut ki’ok chixch’olob’ankil chi kaw xch’ool, xyaalal li jalb’a-k’a’uxlej ut li risinkil li maak xb’aan xpaab’ankil li Qaawa’ Jesukristo.

17 Ut k’iila na’leb’ kixtzoleb’ wi’; ut ink’a’ naru xtz’iib’ankil chixjunil, ut moko tz’aqalaq ta jun raqal, jo’kan naq moko tz’iib’anb’il ta sa’ li hu a’in. Ut laj Nefi kik’anjelak rik’in wankilal ut chi k’eeb’il xnimal xwankil.

18 Ut kik’ulman naq ke’josq’o’ rik’in, xb’aan naq nim wi’chik xwankil chiruheb’ a’an, xb’aan naq moko kiru ta naq ink’a’ te’xpaab’ li raatin, xb’aan naq k’a’jo’ xnimal xpaab’aal chirix li Jesukristo, jo’kan naq wulaj wulaj neke’k’anjelak li anjel chiru.

19 Ut sa’ lix k’ab’a’ li Kristo a’an kirisiheb’ chaq laj tza ut li tz’aj aj musiq’ej; ut li riitz’in ajwi’ kixwaklesi chaq sa’ xyanqeb’ li kamenaq, chirix naq kikutiik chaq chi pek ut kixk’ul li kamk sa’ ruq’eb’ li tenamit.

20 Ut eb’ li tenamit ke’ril, ut ke’xk’e reetal, ut ke’josq’o’ rik’in xb’aan xwankilal; ut kixb’aanu ajwi’ naab’al chik li sachb’a-ch’oolej, sa’ rilob’aaleb’ li tenamit, sa’ lix k’ab’a’ li Jesus.

21 Ut kik’ulman naq kinume’ li xjunlaju xka’k’aal chihab’, ut yal junjunq ke’wan li ke’jale’ xch’ool choq’ re li Qaawa’; a’b’anan jo’ k’ihal ke’jale’ xch’ool ke’reetali chi yaal chiru li tenamit naq ula’aninb’ileb’ xb’aan lix wankil ut lix Musiq’ li Dios, li kiwan rik’in li Jesukristo, li paab’anb’il xb’aaneb’.

22 Ut jo’ k’ihaleb’ li ke’isiik chaq aj tza rik’ineb’, ut ke’k’irtesiik chiru xyajeleb’ ut xmajelal lix kawilaleb’, ke’xk’utb’esi chi yaal chiru li tenamit naq kik’anjelak chaq lix Musiq’ li Dios sa’ xb’eeneb’, ut naq ke’k’irtesiik chaq, ut ke’xk’ut ajwi’ li eetalil ut ke’xb’aanu junjunq li sachb’a-ch’oolej sa’ xyanqeb’ li tenamit.

23 Chi jo’kan kinume’ ajwi’ li xkab’laju xka’k’aal chihab’. Ut laj Nefi ki’elajin chiruheb’ li tenamit sa’ xtiklajik li roxlaju xka’k’aal chihab’, ut kixjultika chiruheb’ li jalb’a-k’a’uxlej ut li risinkil li maak.

24 Anajwan nawaj raj naq taajultiko’q ajwi’ eere, naq maajun kik’ame’ sa’ li jalb’a-k’a’uxlej li ink’a’ kikub’e xha’ rik’in ha’.

25 Chi jo’kan, ke’wan li winq k’ojob’anb’ileb’ xb’aan laj Nefi choq’ re li k’anjel a’in, re naq jo’ k’ihal li ani te’wulaq rik’ineb’, te’kub’eeq xha’ rik’in ha’, ut a’in re xk’utb’al ut xch’olob’ankil xyaalal chiru li Dios, ut chiru ajwi’ li tenamit, naq xe’xjal xk’a’uxl ut xe’xk’ul risinkil lix maakeb’.

26 Ut ke’wan naab’al sa’ xtiklajik li chihab’ a’an li ke’kub’e xha’ choq’ re li jalb’a-k’a’uxlej, ut chi jo’kan kinume’ xnimal li chihab’ a’an.