1 Karon tan-awa, akong ipakita kaninyo nga wala sila mopahimutang og usa ka hari ibabaw sa yuta; apan niining mao nga tuig, oo, sa ikakatloan nga tuig, gilaglag nila ang hukmanan, oo, gipatay ang labaw nga maghuhukom sa yuta.

2 Ug ang katawhan nabahin batok sa usag usa; ug nagbulag sila sa usag usa ngadto sa mga tribo, matag tawo sumala sa iyang pamilya ug sa iyang kaliwatan ug mga higala; ug sa ingon niana gilaglag nila ang gobyerno sa yuta.

3 Ug ang matag tribo nagtudlo og usa ka labaw o usa ka pangulo diha kanila; ug sa ingon niana nahimo silang mga tribo ug mga pangulo sa mga tribo.

4 Karon tan-awa, walay tawo taliwala kanila nga walay dakong pamilya ug daghang kaliwatan ug daghang higala; busa ang ilang mga tribo nahimo nga hilabihan ka daghan.

5 Karon kining tanan nabuhat, ug wala nay mga gubat sa pagkakaron taliwala kanila; ug ang tanan niini nga pagkadaotan miabot sa katawhan tungod kay gitugyan nila ang ilang kaugalingon ngadto sa gahom ni Satanas.

6 Ug ang mga lagda sa gobyerno nalaglag, tungod sa tinago nga kalihokan sa mga higala ug kaliwatan niadtong mipatay sa mga propeta.

7 Ug nakamugna sila og dakong panagbingkil sa yuta, nga niana ang mas matarong nga bahin sa katawhan hapit tanan nahimong daotan; oo, dihay pipila lamang ka matarong nga mga tawo taliwala kanila.

8 Ug sa ingon niana wala matapos ang unom ka tuig sukad nga ang mas daghang bahin sa katawhan mibiya sa ilang pagkamatarong, sama sa iro ngadto sa iyang sinuka, o sama sa anay nga baboy ngadto sa iyang lunangan nga lapok.

9 Karon kining tinago nga kalihokan, nga nagdala og hilabihan gayod ka pagkadaotan sa katawhan, nagkatigom, mibutang og usa ka tawo nga ilang pangulo nga ilang gitawag og Jacob;

10 Ug sila mitawag kaniya nga ilang hari; busa nahimo siyang hari niining daotan nga pundok; ug usa siya sa labing labaw nga mipadangat sa iyang tingog batok sa mga propeta nga nagpamatuod kang Jesus.

11 Ug nahitabo nga dili kaayo sila daghan kay sa mga tribo sa katawhan, nga nagkahiusa gawas lamang sa ilang mga pangulo nga nagpahimutang sa ilang mga balaod, matag usa sumala sa iyang tribo; bisan pa niana sila mga managkaaway; bisan pa kon dili sila matarong nga katawhan, apan nagkahiusa sila sa pagdumot niadtong misulod og usa ka pakigsaad sa paglaglag sa gobyerno.

12 Busa, sa pagkakita ni Jacob nga ang ilang mga kaaway mas daghan pa kanila, kay siya man ang hari sa pundok, busa iyang gimandoan ang iyang katawhan nga moadto sila sa kinatumyang bahin sa yuta sa amihanan, ug didto magtukod sa ilang mga kaugalingon og usa ka gingharian, hangtod nga miapil nila ang mga masinupakon, (kay gilingla niya sila nga adunay daghan pa nga mosupak) ug igo na unya ang ilang kalig-on aron makig-away sa mga tribo sa katawhan; ug sila mibuhat niini.

13 Ug paspas kaayo ang ilang pagmartsa nga kadto dili kapugngan hangtod nga nakalakaw sila nga dili na maabtan sa katawhan. Ug sa ingon niana natapos ang ikakatloan nga tuig; ug sa ingon niana ang mga kalihokan sa katawhan ni Nephi.

14 Ug nahitabo sa ikakatloan ug usa nga tuig nga sila nabahin ngadto sa mga tribo, matag tawo sumala sa iyang pamilya, kaliwatan ug mga higala; bisan pa niana nagkauyon sila nga dili sila makiggubat sa usag usa; apan wala sila magkahiusa sa ilang mga balaod, ug sa matang sa ilang gobyerno, kay natukod man kini gikan sa mga hunahuna niadtong ilang mga labaw ug ilang mga pangulo. Apan nagtukod sila og higpit nga mga balaod nga ang usa ka tribo dili makalapas batok sa lain, nga niana sa pipila ka butang sila adunay kalinaw sa yuta; bisan pa niana, ang ilang mga kasingkasing gipalayo gikan sa Ginoo nga ilang Dios, ug gibato nila ang mga propeta ug misalikway kanila sa taliwala kanila.

15 Ug nahitabo nga si Nephi—kay giduaw sa mga anghel ug usab sa tingog sa Ginoo, busa kay nakakita sa mga anghel, ug nakasaksi, ug nakabaton og gahom nga gihatag kaniya nga siya masayod kabahin sa pagpangalagad ni Kristo, ug usab kay nakasaksi sa ilang dali nga pagbalik gikan sa pagkamatarong ngadto sa ilang pagkadaotan ug mga pagkasalawayon;

16 Busa, kay nasubo tungod sa katig-a sa ilang mga kasingkasing, ug kakulang sa panabot sa ilang mga hunahuna—miadto taliwala kanila nianang mao nga tuig, ug misugod sa pagpamatuod, nga maisogon, sa paghinulsol ug sa kapasayloan sa mga sala pinaagi sa pagtuo diha ni Ginoong Jesukristo.

17 Ug nangalagad siya og daghang butang ngadto kanila; ug ang tanan niini dili ikasulat, ug ang usa ka bahin niini dili paigo, busa wala kini mahisulat niini nga basahon. Ug si Nephi nangalagad uban sa gahom ug uban sa dako nga awtoridad.

18 Ug nahitabo nga nasuko sila kaniya, ilabi na tungod kay siya adunay mas dako nga gahom kay kanila, kay dili mahimo nga sila dili motuo sa iyang mga pulong, kay hilabihan ka dako ang iyang pagtuo ni Ginoong Jesukristo nga ang mga anghel nangalagad kaniya matag adlaw.

19 Ug sa ngalan ni Jesus gihinginlan niya ang mga yawa, ug ang hugaw nga mga espiritu; ug gani ang iyang igsoon nga lalaki iyang gibuhi og balik gikan sa pagkamatay, human siya gibato sa katawhan ug nakasinati og kamatayon.

20 Ug ang katawhan nakakita niini, ug nakasaksi niini, ug nasuko kaniya tungod sa iyang gahom; ug siya nagbuhat usab og daghan pa nga milagro, sa panan-aw sa katawhan, pinaagi sa ngalan ni Jesus.

21 Ug nahitabo nga milabay ang ikakatloan ug usa nga tuig, ug dihay pipila lamang nga nakabig ngadto sa Ginoo; apan kutob sa nakabig mipamatuod gayod ngadto sa katawhan nga giduaw sila sa gahom ug sa Espiritu sa Dios, nga anaa kang Jesukristo, nga ilang gituohan.

22 Ug kutob sa nakasinati nga ang mga panulay gihinginlan gikan kanila, ug nangaayo sa ilang mga sakit ug sa ilang mga balatian, mipamatuod gayod ngadto sa katawhan nga nasinati nila ang Espiritu sa Dios, ug nangaayo; ug sila mipakita usab og mga timailhan ug nagbuhat og mga milagro taliwala sa katawhan.

23 Sa ingon niana milabay usab ang ikakatloan ug duha nga tuig. Ug si Nephi nagsangyaw sa katawhan sa pagsugod sa ikakatloan ug tulo nga tuig; ug siya misangyaw kanila og paghinulsol ug kapasayloan sa mga sala.

24 Karon manghinaot ako nga kamo mahinumdom usab, nga walay bisan usa kinsa nga nadala ngadto sa paghinulsol nga wala mabunyagi pinaagi sa tubig.

25 Busa, dihay mga gi-orden si Nephi, nga kalalakin-an niini nga pangalagad, nga ang tanang moduol kanila pagabunyagan pinaagi sa tubig, ug kini isip usa ka pagsaksi ug pagpamatuod sa atubangan sa Dios, ug ngadto sa katawhan, nga sila naghinulsol ug nakadawat og kapasayloan sa ilang mga sala.

26 Ug dihay daghan sa pagsugod niini nga tuig nga nabunyagan ngadto sa paghinulsol; ug sa ingon niana milabay ang mas daghang bahin sa tuig.