1 Ug karon nahitabo nga sumala sa among talaan, ug nasayod kami nga ang among talaan tinuod, kay tan-awa, usa ka matarong nga tawo ang nagtipig sa talaan—kay siya sa pagkatinuod nakahimo og daghang milagro sa ngalan ni Jesus; ug walay bisan usa ka tawo nga makahimo og usa ka milagro sa ngalan ni Jesus gawas kon siya mahugasan sa matag tipik gikan sa iyang pagkadaotan—

2 Ug karon nahitabo, kon walay sayop nga nahimo kining tawhana sa pag-ihap sa among panahon, ang ikakatloan ug tulo nga tuig milabay na;

3 Ug ang katawhan misugod sa pagpaabot uban sa dakong tinguha alang sa timailhan nga gihatag ni propeta Samuel, nga Lamanita, oo, alang sa panahon nga may kangitngit sulod sa tulo ka adlaw sa ibabaw sa yuta.

4 Ug adunay nagsugod nga dako nga mga pagduda ug mga panaglalis taliwala sa katawhan, bisan pa sa daghang timailhan nga gipakita.

5 Ug nahitabo nga sa ikakatloan ug upat nga tuig, sa unang buwan, sa ikaupat nga adlaw sa buwan, dihay miabot nga usa ka kusog nga unos, nga sukad wala pa masinati sa tibuok yuta.

6 Ug dihay usa usab ka kusog ug makalilisang nga bagyo; ug dihay makalilisang nga dugdog, nga niana mitay-og kini sa tibuok yuta ingon og hapit na kini mabuak.

7 Ug dihay hilabihan ka hait nga mga kilat, nga sukad wala pa masinati sa tibuok yuta.

8 Ug ang siyudad sa Zarahemla nasunog.

9 Ug ang siyudad sa Moroni naunlod sa kinahiladman sa dagat, ug ang mga lumulupyo niini nangalumos.

10 Ug ang yuta mitubo sa siyudad sa Moronihah, nga didto sa dapit sa siyudad dihay nahimong usa ka dako nga bukid.

11 Ug dihay hilabihan ka dako ug makalilisang nga kalaglagan sa yuta sa habagatan nga bahin.

12 Apan tan-awa, dihay mas dako ug makalilisang nga kalaglagan sa yuta sa amihanan nga bahin; kay tan-awa, ang ibabaw sa tibuok yuta nausab, tungod sa bagyo ug mga alimpulos, ug mga dugdog ug mga kilat, ug hilabihan ka kusog nga linog sa tibuok yuta;

13 Ug ang dagkong mga dalan nangaguba, ug ang mga patag nga agianan nadaot, ug daghang patag nga mga dapit nahimo nga libaong.

14 Ug daghang dagko ug inila nga mga siyudad nangaunlod, ug daghan ang nangasunog, ug daghan ang nauyog hangtod nga ang mga gambalay niini nangatumba sa yuta, ug ang mga lumulupyo niini nangamatay, ug ang mga dapit nahimo nga biniyaan.

15 Ug dihay mga siyudad nga nahibilin; apan ang kadaot niini hilabihan gayod ka dako, ug daghan nga anaa niini ang gipatay.

16 Ug dihay pipila nga nadagit sa alimpulos; ug kon asa sila paingon, walay tawo nga nasayod, gawas lamang sa ilang nahibaloan nga sila nadagit.

17 Ug sa ingon niana ang ibabaw sa tibuok yuta nausab, tungod sa mga bagyo, ug sa mga dugdog, ug sa mga kilat, ug sa paglinog sa yuta.

18 Ug tan-awa, ang mga bato nangapikas; nabuakbuak kini sa ibabaw sa tibuok yuta, nga niana makita kini nga nagkatipaktipak, ug ningkang-al ug nangliki, sa ibabaw sa tibuok yuta.

19 Ug nahitabo nga ang mga dugdog ug mga kilat, ang unos, bagyo, ug ang mga linog sa yuta mihunong—kay tan-awa, milungtad kini sulod sa tulo ka oras; ug miingon ang uban nga ang gidugayon sobra pa; bisan pa niana, kining tanang dako ug makalilisang nga mga butang nahitabo sulod sa tulo ka oras—ug unya tan-awa, dihay kangitngit sa ibabaw sa yuta.

20 Ug nahitabo nga dihay bagâ nga kangitngit ibabaw sa tibuok yuta, nga niana ang mga lumulupyo nga wala mamatay mibati sa inalisngaw sa kangitngit;

21 Ug walay makita nga kahayag, tungod sa kangitngit, ni mga kandila, ni mga sulo; ni bisan kalayo nga ikahaling sa ilang maanindot ug uga kaayo nga kahoy, mao nga walay bisan unsa gayod nga kahayag;

22 Ug walay bisan unsang kahayag nga makita, ni kalayo, ni dan-ag, bisan ang adlaw, ni ang buwan, ni ang mga bitoon, kay hilabihan ka dako ang mga gabon sa kangitngit nga mitabon sa ibabaw sa yuta.

23 Ug nahitabo nga milungtad kini sulod sa tulo ka adlaw nga walay kahayag nga makita; ug dihay hilabihan nga pagbangotan ug pagdanguyngoy ug paghilak taliwala sa tanang katawhan sa walay hunong; oo, hilabihan ang pag-agulo sa katawhan, tungod sa kangitngit ug sa dako nga kalaglagan nga miabot kanila.

24 Ug diha sa usa ka dapit nadungog sila nga nagsinggit, nga nag-ingon: O kon nakahinulsol pa lamang unta kami sa wala pa kining mahinungdanon ug makalilisang nga adlaw, ug niana ang among kaigsoonan maluwas unta, ug dili unta sila masunog diha nianang dako nga siyudad sa Zarahemla.

25 Ug didto sa lain nga dapit nadungog sila nga nagsinggit ug nagbangotan, nga nag-ingon: O kon nakahinulsol pa lamang unta kami sa wala pa moabot kining mahinungdanon ug makalilisang nga adlaw, ug wala mopatay ug mobato sa mga propeta, ug mosalikway kanila; niana ang among mga inahan ug ang among matahom nga anak nga mga babaye, ug ang among mga bata naluwas unta, ug dili unta matabonan nianang dako nga siyudad sa Moronihah. Ug ingon niana ang mga danguyngoy sa katawhan hilabihan ka kusog ug makalilisang.