1 Ao e a koro bukina bwa iai te bwanaa ae a ongo i buakoia kaain te aonaba ni kabane iaon te aba, ae takaruaea:

2 Te maraia, te maraia, te maraia nakoia te botanaomata aio; te maraia nakoia kaain te aonaba aio ni kabane ngkana aki rairinanoia; bwa e ngarengare te riaboro, ao a kimwareirei ana anera, ibukin tiringakia natiia mwaane ma aine au botanaomata aika a tamaroa; ao e riki aio ibukin aia bure ma aia mwakuri aika a bati n ribaki mangaia are a bwaka.

3 Nooria, I a tia ni kabueka te kaawa are Taraemera ma kaaina n te ai.

4 Ao nooria, I a tia ni karekea te anga are te kaawa are Moronaai e na iinako i kabin marawa, ao a na bwabwa kaaina.

5 Ao nooria, te kaawa ae korakora are Moronaaia I a tia n rabunna n te tano, ma kaaina, ni karaba aia bure ma aia mwakuri aika bati n ribaki mai i matau, bwa e aonga n ae raraaia burabeti ma aomata aika itiaki a na aki manga roroko irou ni kaitaraia.

6 Ao nooria, I a tia ni karekea te anga are e na iinako iai te kaawa are Kirekara, ao kaaina a taunaki i kabin te tano.

7 Eng, te kaawa are bubura are Oniia ao kaaina, ao te kaawa are Mokam ao kaaina, ao te kaawa are Ierutarem ao kaaina; ao I karekea te anga are a na oneaki mwiia n te ran, bwa e na karaba buakakaia ma aia mwakuri aika bati n ribaki mai i matau, bwa e aonga n ae raraaia burabeti ma aomata aika itiaki a na aki manga roroko irou ni kaitaraia.

8 Ao nooria, te kaawa are Kateantei, ao te kaawa are Kateomna, ao te kaawa are Iakobwa, ao te kaawa are Kimkimono, ni kabane aikai I karekea angan ae a na iinako, ao I karaoi tabuki ma mwarua bwa onean mwiia; ao kaaia I a tia n tauniia i kabin te tano, bwa e aonga n raba buakakaia ma aia mwakuri aika bati n ribaki mai i matau, bwa e aonga n ae raraaia burabeti ma aomata aika itiaki a na aki manga roroko irou ni kaitaraia.

9 Ao nooria, te kaawa are Iakobuka, are e kaainaki irouia ana botanaomata te uea are Iakobwa, I a tia n tua bwa e na kabuekaki n te ai ibukin aia bure ma buakakaia, are e a bon riaoni buakakan te aonaba ni kabane, ibukin aia tiritiri ni karaba ao aia mwakuri ni kamwamwane aika a raba; bwa bon ngaia aika a urua rauiia au botanaomata ao te tautaeka n te aba; mangaia are I karekea te anga ae a na kabuekaki iai, bwa N na kamaunaia mai matau, bwa e aonga n ae raraaia burabeti ma aomata aika itiaki a na aki manga roroko irou ni kaitaraia.

10 Ao nooria, te kaawa are Reimwan, ao te kaawa are Ioti, ao te kaawa are Kata, ao te kaawa are Kitekuman, I a tia ni karekea te anga bwa a na kabuekaki n te ai, ma kaaia, ibukin buakakaia ngke a teweia nako burabeti, ma ni karebanaia n te atibu ake I a tia ni kanakomaia bwa a na tataekina nakoia buakakaia ma aia mwakuri aika bati n ribaki.

11 Ao ibukina bwa a bon teweia nako, ao bon akea ae raoiroi i buakoia, I karaoa te ai bwa a na kamaunaki, n te aro are e na raba buakakaia ma aia mwakuri aika bati n ribaki mai i matau, bwa e aonga n ae raraaia burabeti ma aomata aika itiaki ake I a tia ni kanakomaia nako buakoia a na aki tang mai aontano ni kabuakakaia.

12 Ao a mwaiti urubwai ake I karekea angaia bwa a na roko nakon aon te aba aio, ao i aoia te botanaomata aio ibukin buakakaia ma aia mwakuri aika bati n ribaki.

13 O ngkami aika kam kamaiuaki ibukina bwa kam raoiroi riki nakoia, kam aki okirai ngkai, ma n rairinanomi man ami bure, ma n rairaki, bwa I aonga ni kamarurungngkami.

14 Eng, e koaua ae N na taekinna nakoimi, ngkana kam kawarai ao e na reke iroumi te maiu ae akea tokina. Nooria, e aroraki baiu ae nanoanga nakoimi, ao ane e roko nakoiu ao N na butimwaia; ao a na kakabwaiaki akana a na roko nakoiu.

15 Nooria, bon Ngai Iesu Kristo Natin te Atua. I karika karawa ma aonaba, ao bwaai ni kabane ake a mena iai. Bon raou te Tama mai i moana. I mena iroun te Tama, ao te Tama e mena irou; ao e mimitong aran te Tama irou.

16 I roko nakoia ake au bwai, ao ake au bwai aki butimwaeai. Ao koroboki aika tabu ake a kaineti ma rokou a kakoroaki nanoia.

17 Ao te mwaiti ake a butimwaeai, I a bon tia ni karaoia bwa a na riki bwa natin te Atua mwaane; ao e na riki aio naba nakoia ake a na kakoaua arau, bwa nooria, e na reke te kaboaki mai irou, ao e na kakoroaki nanon ana tua Mote irou.

18 Ngai te oota ao maiun te aonaba. Ngai te Arebwa ao te Omeka, te moan ao te kabane.

19 Ao kam na aki manga oki n uota kawawaean te raraa nakoiu; eng, ami karea ao ami bwaintangira aika a kabuokaki a riai n toki, bwa N na bon aki butimwaea ami anga karea ao ami bwaintangira aika a kabuokaki.

20 Ao kam na anganai bwa ami karea te nano ae uruaki ao te tamnei ae raraoma. Ao ane e kawarai ma te nano ae uruaki ao te tamnei ae raraoma, ao N na bwabetitoia n te ai ao te Tamnei ae Raoiroi, n ai aroia Reimwanaite, ibukin aia onimaki irou n te tai are a rairaki iai, ao a bwabetitoaki n te ai ao te Tamnei ae Raoiroi, ao a bon aki ataia.

21 Nooria, I roko nakon te aonaba n uota te kabomwi nako te aonaba, bwa N na kamaiua te aonaba man te bure.

22 Mangaia are, ane e rairananona ao ma ni kawarai n aron te teei ae uarereke, ao N na butimwaia bwa ana bwai Uean te Atua. Nooria, bwa I bukiia naakai ao I a tia ni kawenea maiu, ao ma ni manga anaia riki, mangaia are rairinanomi, ao roko nakoiu man tokin aonaba, ao kam na kamaiuaki.