1 Me yibi buch ni yibi mʼay e bin guyey nge aningeg e duw, nge ku aram rogon ko bin guyey nge lal, ma musap gaed fapi gachalpen Yesus e kar sunmiyed ba galasia rokʼ Kristus u lan gubin yang e pi nam nib liyeg e ginnʼem. Ma oren gubin e piʼin ni rabaed ngoraed, nriyulʼ ni kar kalgaed ngaenʼraed ko pi denen roraed, e ni tawfe nagraed u fithingan Yesus; mar thapeged fare Kan ni Thothup.

2 Me yibi buch nu lan e bin guyey nge nelʼ e duw, ma fapi gidiiʼ e yaed gubin make michaenʼraed ngakʼ Somoel, u dakean gubin yang e nam, ni fapi Nephites nge fapi Lamanites, me yaeni aw ni dariy e togopluw nge maleʼeg thin u fithikʼraed, ma gubin e gidiiʼ nra beeʼ ma be rinʼ gubin banʼen nib matʼaw ngakʼ beeʼ.

3 Ma bay roraed gubin banʼen ni taʼareb rogon; ere dariy e falaʼab nge gafgow, kalbus nge gathi kalbus, ere yaed gubin nib puf rograed, ma yaed e piʼin nra yib nga paʼaraed e tawaʼath nu tharmiy.

4 Me yibi buch niki mʼay e bin guyey nge medilip e duw, ni kub ʼulʼul e gapas nga lan fare nam.

5 Ma bay e muruwel nib gaaʼ mab maʼangʼang ni rinʼ fapi gachalpen Yesus, ni arame ra gol niged e mʼar, mar faseged e yamʼ, mar gol niged e mugutgut nge yaen, nge piʼin nib maʼew ngar guyed banʼen, nge piʼin nib baling ngar rungʼaged banʼen; nge gubin mite maʼangʼang ni rrinʼed u fithikʼ e gidiiʼ; ma dariy banʼen ni rrinʼed e maʼangʼang u dakean ma kemus nu dakean fithingan Yesus.

6 Ma aray rogon ni mʼay e bin guyey nge meruk e duw, nge ku aram rogon ko bin guyey nge mereb e duw, nge bin aningeg i ragag nge taʼareb, nge bin aningeg i ragag nge lʼagruw, arragon, iyaen nge madaʼ ko ngiyalʼ ni ke mʼay e bin aningeg i ragag nge mereb e duw, nge ku aram rogon ko bin wugem nge taʼareb, nge bin wugem nge lʼagruw; arragon, nge yaeni madaʼ ko ngiyalʼ ni mʼay e bin wugem nge mereb e duw.

7 Ma fare Somoel e ri monʼog nagraed u lan fare nam; arragon, ni arame ra sunmiyed e pi binaw bayay ko gin ni ke yikʼ e binaw riy.

8 Arragon, ni mus ko fare binaw ni gaaʼ nu Zarahemla ma kur sunmiyed bayay.

9 Machane boʼor bogi binaw ni ke ligil nga ʼaer, me yaeni paer ni raen e bay u gilʼ; ere pi binaw ney e dab kiyog ni ngan beʼech nag.

10 Ere chiney, e musap gaed, yibi buch ni fapi gidiiʼ ku Nephi e rragel gaed, mar yoʼor gaed nib papay, mar manged bogi gidiiʼ nib pichoʼay nge pidorang mab felʼ dakeanraed.

11 Ma yaed be mabgol, ma yaed be piiʼ e gidiiʼ ko mabgol, min tawaʼath nagraed nib yoʼor ni woed rogon ni michmicheg Somoel ngoraed.

12 Ma arame dakur leaked e pi muruwel nge gamʼing ko fare motochiyel rokʼ Moses; machane mar leaked fapi motochiyel ni ke thap ngoraed rokʼ e Somoel roraed nge Got roraed, ma yaed be ululiy i baley nag e abich nge meybil, ma yaed be moʼolung nga taʼabang nga ur meybil gaed ma yaed be motoyil ko thin rokʼ Somoel.

13 Me yibi buch ni arame dariy e togopluw u fithikʼ gubin e gidiiʼ, u lan gaʼangin yang fare nam; ya rib noemow e pi maʼangʼang u fithikʼ fapi gachalpen Yesus.

14 Me yibi buch ni mʼay e bin medilip I ragag nge taʼareb e duw, nge ku aram rogon ko bin medilip i ragag nge lʼagruw e duw, arragon, ma ngan ngoch nag i yoeg, nge madaʼ ko ngiyalʼ nike mʼay e bin medilip i ragag nge mereb e duw; arragon, nike mʼay e bin raʼay e duw, ma fapi gachalpen Yesus, ni ke melʼeg raed, e yaed gubin ni ranoed nga paraedis rokʼ Got, ma kemus ni fadalip nem e ra magaey gaed; ere kubay boech i gachalpen nni yibliy raed ni kar feked luwraed; ma kub yoʼor e gidiiʼ ko binem e mfen nra mʼaed.

15 Me yibi buch ni dariy e maleʼeg thin u lan fare nam, ni bachan e fare tʼufeg rokʼ Got ni bay u lan gumʼirchaʼen fapi gidiiʼ.

16 Ma dariy e moʼowaenʼ, ara togopluw, ara gatheay e gapas, ara gathar, ara baen, ara mathang pogofan, ara ba mite dirngalen e galong; ma rriyulʼ ni dakuriy ba ulung i gidiiʼ ni aram fini falfalaenʼ ngab yang u fithikʼ gubin e pi gidiiʼ ni sunmiy Got nga paʼ.

17 Dariy e moroʼroʼ, ara piʼin ni tamathang pogofan, ara bay reb fapi Lamanites, ara beeʼ u ba ulung ni-(ites); ya yaed ba taʼareb, ni fapi bitir rokʼ Kristus, nge piʼin taferaed fare gilʼilungun Got.

18 Ma rib felʼ waʼathraed! Ya fare Somoel e tawaʼath nagraed u fithikʼ e pi ngongol roraed; arragon, ni arame ni tawaʼath nagraed me felʼ rograed nge yaeni madaʼ ko ngiyalʼ ni ke mʼay e bin raʼay nge ragag e duw; me mʼay e bin sommʼon e mfen ko ngiyalʼ ni yib Kristus, ma dariy e maleʼeg thin u lan gaʼangin yang fare nam.

19 Me yibi buch ni arame yimʼ Nephi, niʼir e chaʼariy e biney nib tomur e babyor, (ni i chaʼariy u dakean fapi plates ku Nephi) ere fak ni Amos e ire paer rokʼ nge chaʼariy; ma ki chaʼariy u dakean fapi plates ku Nephi.

20 Ere chaʼariy u lan meruk i ragag nge aningeg e duw, ma kubay e gapas u lan fare nam, ma kemus ni boechi ulung ko fapi gidiiʼ ni kar chuw gaed ko fare galasia mar feked nga dakeanraed fare fithingan ni Lamanites; ere arame tabolngin me yib bayay e Lamanites nga lan fare nam.

21 Me yibi buch nike yimʼ Amos, (ma ke yaeni gaman e raʼay nge mereb i ragag nge aningeg e duw u napʼan e wub rokʼ Kristus) ma fak ni Amos e yinʼ luwan i chaʼariy fare chep; ma ki chaʼariy u dakean fapi yungi plates ku Nephi; ma ku arragon nni yoloey nga lan fare ke babyor ku Nephi, ni re ke babyor ney.

22 Me yibi buch ni mʼay e bin lʼagruw miriʼay e duw; ma gidiiʼ ko bin lʼagruw e mfen e yigoʼ kar mʼaed ma kemus ni buchʼuw e magaey.

23 Ere chiney e Gag, Mormon, e gubaʼadag ni ngam nanged ni fapi gidiiʼ e kar yoʼor gaed, ni arame ra garar gaed u dakean gaʼangin yang fare nam, ma arame kari gel e falaʼab roraed, ni bachan e tawaʼath ni ke yog ngoraed rokʼ Kristus.

24 Ere chiney, lan e biney ni lʼagruw miriʼay nge taʼareb e duw me tabab boech e gidiiʼ u fithikʼraed ko langlang ngalang nga fithikʼ e ufʼuf, ni woed ni yaed be yinʼ e mad nib totolang puluwon nga dakeanraed, nge gubin mite churwoʼ ni fafalelʼ, nge pinʼen fafalelʼ nu fayleng.

25 Ma arame ngiyalʼ nem iyaen e ngaram ma daki taʼareb rogon e chugum nge falaʼab roraed u fithikʼraed.

26 Ma arame ra tabolngin niged e kiiʼ ni yu ulung u butʼ; mar tabab gaed i sunmiy e pi galasia roraed ni nge yog banʼen riy ngoraed, mar tabab gaed i fek yathin e bin riyulʼ e galasia rokʼ Kristus.

27 Me yibi buch u napʼan ni mʼay e bin lʼagruw miriʼay nge ragag e duw, make yoʼor bogi galasia nga lan fare nam; arragon, ke yoʼor bogi galasia ni yaed be yoeg ni yaed manang Kristus, machane yaed be fek yathin e yungin gaʼfan ko gospel rokʼ, ma arame yog riy ngoraed gubin mite kireb, mar piiʼed e tin nib thothup ngakʼ e chaʼ nib mathngeluwol ni nge fek ni bachan e bee ni dematʼaw.

28 Ere re galasia ney e ri yoʼor gidiiʼen ni bachan e denen, nge bachan fare gelingin Moʼoniyanʼ niʼir e ke koel gumʼirchaʼraed.

29 Nge ku bayay, bay rebo galasia ni be fek yathin Kristus; ma yaed be gafgow nag fabin riyulʼ e galasia rokʼ Kristus, ni bachan e sobutʼaenʼ roraed nge michaenʼ roraed ngakʼ Kristus; mar dariy fan niged raed ni bachan e pi maʼangʼang nib yoʼor nni gagyeg nag u fithikʼraed.

30 Ere ra gagyeg niged e gelingin nge matʼawon nga dakean fapi gachalpen Yesus ni kar pired roraed, mar yinʼed raed nga kalbus; machane u dakean fare gelingin fare thin rokʼ Got, ni bay roraed, e pil e pi kalbus riy nge ruw rabaʼ, ma ranoed iyaen ni yaed be rinʼ e pi maʼangʼang u fithikʼraed.

31 Machane, nge yug aram rogon urngin e pi maʼangʼang ney, ma fapi gidiiʼ e ra ʼelʼel niged gumʼirchaʼaraed, mar gayed rogon ni ngar liiʼed raed ngar mʼaed, ni woed fapi Jews u Jerusalem nra gayed rogon ni ngar liiʼed Yesus, ni boed ni yoeg.

32 Mar yinʼed raed nga fithikʼ e dramrom ko nifiy, marbaed nga wuruʼ ni dawor rayikʼ gaed.

33 Ma kur yinʼed raed nga lan e loew nga fithikʼ e gamanman ni malboch, mar fafeal gaed fapi gamanman nib malboch ni boed ni ma rinʼ beeʼ nib bitir nge ba saaf; marbaed ngar chuw gaed u fithikʼraed, ni dawor ra madʼad gaed.

34 Machane, fapi gidiiʼ e ra ʼelʼel niged gumʼirchaʼraed, ya ke wawliyraed bogi priest nib yoʼor nge profet ni deriyulʼ ngar toeyed e galasia nib yoʼor, ma ngar rinʼed gubin mite denen. Mar liiʼed fapi gidiiʼ rokʼ Yesus; machane fapi gidiiʼ rokʼ Yesus e dakur cham gaed bayay. Ere aray rogon ni mʼay e mich roraed mar almarin gaed ko kireb, u rebo duw ngo reb, nge yaeni madaʼ ko ngiyalʼ ni ke mʼay e bin lʼagruw miriʼay nge guyey e duw.

35 Ere chiney yibi buch u lan e biney duw, arragon, u lan e bin lʼagruw miriʼay nge guyey nge taʼareb e duw, ni yibi aw e makiiʼ nga thilin fapi gidiiʼ.

36 Me yibi buch u lan e re duw ney ni yibi mʼug ba ulung i gidiiʼ ni kanoeg e Nephites ngoraed, ma yaed e tin riyulʼ e gidiiʼ rokʼ Kristus; ma fithikʼraed e bay boech e gidiiʼ riy ni ke yoeg fapi Lamanites ni—Jacobites, Josephites, nge Zoramites;

37 Ere tin riyulʼ e gidiiʼ nib michaenʼraed ngakʼ Kristus, nge tin riyulʼ e gidiiʼ ni ma liyoer ngakʼ Kristus, (e bay fadalip i gachalpen Yesus u fithikʼraed ni yaed faram e ngkur pired) e kanoeg e Nephites, nge Jacobites, nge Josephites, nge Zoramites ngoraed.

38 Me yibi buch ni piʼin ni fek yathin fare gospel e ni piningraed ni Lamanites, nge Lemuelites, nge Ishmaelites; machane dar malog gaed ko mich, ni boed e pi chitamangraed u napʼan nra malog gaed ko mich, ya yaed manang ni nra lemniged ni ngar togopluw gaed ko fare gospel rokʼ Kristus; mar filed ngakʼ pifakraed ni dabi michaenʼraed.

39 Ma ri bachan fare denen nge fananikan rokʼ e pi chitamangraed, ni boed aram ko sommʼon. Ma nifil ngoraed ni ngar fananikayed e pi gidiiʼ rokʼ Got, ni boed fapi Lamanites nifil ngoraed ni ngar fananikayed e pi gidiiʼ rokʼ Nephi aram ko sommʼon.

40 Me yibi buch ni ke mʼay lʼagruw miriʼay nge aningeg i ragag nge aningeg e duw, ma aray rogon e pi gagyeg rokʼ fapi gidiiʼ. Ma tin nib gel e kireb rokʼ ko fapi gidiiʼ e ra yoʼor gaed, mar yoʼor gaed ko fapi gidiiʼ rokʼ Got.

41 Ma kur ululiyed i sunmiy fapi galasia ni fan ngoraed, mar nunuw niged ko gubin mit banʼen ni thʼabi fel. Ere aray rogon ni mʼay e bin lʼagruw miriʼay nge wugem e duw, nge ku aram rogon ko bin lʼagruw miriʼay nge nelʼ i ragag e duw.

42 Me yibi buch ni tin kireb ko fapi gidiiʼ e ra tabab gaed bayay ni sunmiy e pi michmich nge pi ulung rokʼ Gadianton nib miith.

43 Nge ku aram rogon ko fapi gidiiʼ ni kanoeg ni yaed fapi gidiiʼ ku Nephi e ra tabab gaed ko ufʼuf u lan gumʼirchaʼraed, ni bachan e pi falaʼab roraed, mar yowlop gaed ni boed walagraed, ni fapi Lamanites.

44 Ma aram ko ngiyalʼ ney e fa piʼin gachalpen e tabab e kirbaenʼ ngoraed ni fan e pi denen nu fayleng.

45 Me yibi buch u napʼan ni ke mʼay dalip miriʼay e duw, ma fapi gidiiʼ ku Nephi nge fapi Lamanites e kari gel e kireb roraed, ni taʼareb rogon.

46 Me yibi buch ni fapi moroʼroʼ ku Gadianton e ra garar gaed u dakean gaʼangin yang fare nam; ma dakuriy beeʼ nib matʼaw ma kemus ni yigoʼ fapi gachalpen Yesus. Ma gol nge silber e kar chaʼariyed nib yoʼor ni faraed, mar folchuwayʼ gaed nib yoʼor mit.

47 Me yibi buch u tomuren ni ke mʼay dalip miriʼay nge lal e duw, (ma fapi gidiiʼ e kur ululiyed e paer u fithikʼ e kireb) me yimʼ Amos; ere walagen ni Ammaron, e chaʼariy fare chep.

48 Me yibi buch u napʼan ni ke mʼay dalip miriʼay nge riliwʼ e duw, ma Ammaron, ni ke wawliy fare Kan ni Thothup, e mithaeg fapi chep nib thothup—arragon, rriyulʼ gubin fapi chep ni kan thapeg iyib nga butʼ u rebo mfen ngo rebo mfen, nib thothup—iyib nge madaʼ ko bin dalip miriʼay nge riliwʼ e duw ko fare wub rokʼ Kristus.

49 Me mithaeg e pinnʼem ngakʼ nga paʼ fare Somoel, ni nge yog ni yib ngakʼ bayay e tin ni ke magaey ko gidiiʼ ku Jacob, nrogon fapi prophecy nge fapi michmich rokʼ fare Somoel. Ere aray rogon ni mus fare chep rokʼ Ammaron.