Fare Babyor ku Mormon

1 Ere chiney e gag, Mormon, e gu falʼeg babyoren e tin nug guy nge tin nug rungʼag, mug tunguy fithingan ni fare Babyor ku Mormon.

2 Ma napʼan e re ngiyalʼ innʼen ni mithaeg Ammaron fapi chep nga paʼ fare Somoel, me yib ngog, (Gag ni gonpon e ba ragag e duw rog, me tabab i fil ngog boech banʼen u rogon yalen e llowaenʼ ko gidiiʼ rog) me gaʼar Ammaron ngog: gumnang ni gur beeʼ nib bitir nib tamilang anʼum, ma gab papay i nangfan banʼen;

3 Ere, napʼan ni nge yaeni gaman e riliwʼ nge aningeg e duw rom ma gubaʼadag ni ngam lemnag e pinʼen ni kam guy ni morngaʼagen e pi gidiiʼ ney; ma napʼan ni ke aram urngin e duw rom mag yaen ko fare binaw ni Antum, nga dakean bangi falang ni bay noeg ni Shim; ireram e gin ni kug kʼeyag riy nga paʼ fare Somoel gubin fapi chep nib thothup ni kan ker nga dakean e plates ni morngaʼagen e pi gidiiʼ ney.

4 Ma musap, gara fek fapi plates ku Nephi ni fan ngom, ma tin ni ke magaey e ngam pag u roem ko gin bay riy; ma ngam ker nga dakean fapi plates ku Nephi gubin e pinʼen ni kam guy ni morngaʼagen e pi gidiiʼ ney.

5 Ma gag, Mormon, ni gidiiʼ ku Nephi, (ma fithingan e chitamag e Mormon) e yib nganʼug e pinʼen ni chiyliy Ammaron ngog.

6 Me yibi buch ni gag, ni ragag nge taʼareb e duw rog, e fekeg e chitamag iyaen nga lan e nam nib sor nga yimuch, iyaen ko fare nam nu Zarahemla.

7 Ma dakean fare nam ni poloʼ e ke suguy e naʼun, ma fapi gidiiʼ e ke chugur urngiraed ko yanʼ u dappʼelʼay.

8 Me yibi buch u lan e re duw ney ni tabab ba mael u thilin fapi Nephites, ni yaed fapi Nephites, nge fapi Jacobites nge fapi Josephites nge fapi Zoramites; ma re mael ney e mael u thilin fapi Nephites, nge fapi Lamanites nge fapi Lemuelites nge fapi Ishmaelites.

9 Ere fapi Lamanites nge fapi Lemuelites nge fapi Ismaelites e kanoeg ni yaed e Lamanites, ma gal ulung nem e Nephites nge Lamanites.

10 Me yibi buch ni tabab e mael u thilraed ko mathil u Zarahemla, u charen e raen nu Sidon.

11 Me yibi buch ni fapi Nephites e ra kunuyed nga taʼabang bulung i pumoʼon nib yoʼor, ni yaed bayoʼor ko guyey e biyuʼ. Me yibi buch ni ku lan e re duw nem ma bay inyay nra mael gaed, ni fapi Nephites e ra gel gaed ngakʼ fapi Lamanites nib boʼor iyaed e ra liiʼed.

12 Me yibi buch ni fapi Lamanites e ra paged e tin ni yaed be nomeg, me awe gapas u lan fare binaw; me paer ni bay e gapas ni gonpon e aningeg e duw napʼan, ni arame dakun puʼoeg e rachaʼ.

13 Machane denen e garar iyaen u dakean fare nam ni poloʼ, ni aram fan ni fare Somoel e fek fadalip i gachalpen nib tʼuf rokʼ nge chuwegraed, nge pi muruwel ko maʼangʼang nge golnag e liliy e tal ni bachan e denen ko gidiiʼ.

14 Ma arame dakuriy e tawaʼath ni yib rokʼ fare Somoel, ma fare Kan ni Thothup e daki yib ngakʼ beeʼ, ni bachan e denen roraed ma kar malog gaed ko mich.

15 Ere gag, u napʼan ni ragag nge lal e duw rog ma bachan e badake ba tamilang anʼug, ere yibi mʼug fare Somoel ngog, mug thamiy mug nang falʼngin Yesus.

16 Ere gu nomeg ni nggu machib ngakʼ e pi gidiiʼ ney, machane dan bing lʼugnag, ya ni siyeg ni dab gu machib ngoraed; ya musap, ur tanam niged rogon e togopluw ngakʼ e Got roraed; ere fapi gachalpen nib tʼuf rokʼ e fekraed nga wuruʼ fare binaw, ni bachan e denen roraed.

17 Machane gag e gu magaey u fithikʼraed, machane danpageg ni nggu machib ngoraed, ni bachan e ʼelʼel u gumʼirchaʼraed; ma bachan e ʼelʼel u gumʼirchaʼraed min kireb nag waʼathan fare nam ni fan ngoraed.

18 Ere pi Gadianton ni moroʼroʼ ney, ni yaed bay u fithikʼ fapi Lamanites, e kar suguyed dakean fare nam, ni arame pi gidiiʼ ni yaed bay riy e ra tabab gaed i mithaeg e pi falaʼab roraed nga fithikʼ e butʼ; me mʼurmʼur doew ni dabkiyog ni ngan koel, ni bachan e ke kireb nag fare Somoel waʼathan butʼan fare nam, ere dabkiyog ni ngar koeled, ara ngar feked bayay.

19 Me yibi buch ni yib e pi tapig nib machmach, nge motokan, nge pig; me garar gelingin fachaʼ ni moʼoniyanʼ u dakean gaʼangin yang fare nam, ma arame muguʼul gubin fapi thin rokʼ Abinadi, nge ku faʼanem i Samuel ni fare Lamanite.