1 Me yibi buch ni fapi Lamanites e dakur baed ni mael bayay nge madaʼ nga napʼan ni ke mʼay ragag e duw. Ere musap gaed, kug piiʼ e muruwel ko gidiiʼ rog, ni fapi Nephites, ni ngar falʼeged rogon e pi binaw roraed nge talin e cham roraed ko ngiyalʼ inʼen ni bay e mael.

2 Me yibi buch ni fare Somoel e gaʼar ngog: Mu gaʼar ngakʼ e pi gidiiʼ ney—Mu kalgaed ngaenʼmed, mi gimed yib ngog, ngan tawfe nagmed, magmed toey bayay e galasia rog, ma rayog ni ngam pired ni dabkum mʼaed.

3 Mugog ngakʼ e pi gidiiʼ ney, machane rib mʼay fan; ma dar nanged ni fare Somoel e ire ke ayuwegraed ko yamʼ, me bing woʼen ngoraed ni ngar kalgaed ngaenʼraed. Ere musap gaed, ra ʼelʼel niged gumʼirchaʼraed ngakʼ fare Somoel ni Got roraed.

4 Me yibi buch u tomuren ni ke mʼay e biney ni ragag e duw, make yaeni poloʼ, dalip miriʼay nge nelʼ iragag e duw ni ke yaen, u napʼan fare wub rokʼ Kristus, ma fare pilung ko fapi Lamanites e piiʼ bbabyor nge yib ngog, niʼir e gunang riy ni yaed be falfalʼeg rograed ni ngar baed bayay ko mael ngomaed.

5 Me yibi buch nug guy rogon ni gidiiʼ rog e ngar kunuyed yaed nga taʼabang ko fare nam ni Kanpag, ngab binaw ni bay nga mathil, u bangi banʼen nib achig radan nib sor iyaen ko fare binaw nga leluʼoch.

6 Ere ireram e gin nug tayed e pi salthaw romaed riy, ni gomanga yog ni ngug tileged e salthaw ko fapi Lamanites, ni gomanga yug dabra baed ngar koeled pi binaw romaed; ere ku yororiyed gamaed roraed ko gubin e pi salthaw romaed.

7 Me yibi buch nu lan e bin dalip miriʼay nge nelʼ iragag nge taʼareb e duw ni yib fapi Lamanites ko fare binaw nu Kanpag ngomaed ko mael; me yibi buch nug gelgaed ngoraed u lan e re duw nem, ma arame ra suloed ko binaw roraed bayay.

8 Ma lan e bin dalip miriʼay nge nelʼ iragag nge lʼagruw e duw e kur baed bayay ko mael. Ma kug gelgaed ngoraed bayay, mug liiʼed boʼor iyaed ngar mʼaed, ma pi ldoew roraed e ninʼ nga maday.

9 Ere chiney, ni bachan e biney e nʼen ni ke rinʼ e gidiiʼ rog, ni fapi Nephites, mar tabab niged e ufanthin nga gelingraed, mar tabab gaed i micheg nga tharmiy ni ngar tayed puluwon i rachaʼen pi walagraed ni kar mʼaed nga paʼ e pi toʼogor roraed.

10 Mar micheged nga tharmiy; kuer rogon nga gilʼ Got, ni yaedra yaen ko mael ngakʼ e pi toʼogor roraed, ni ngar thirifed raed u dakean e nam.

11 Me yibi buch ni gag, Mormon, e rug siyegeg ko ngiyalʼ ney iyaen nga mʼon ni dab kug mang tagafal nge gaaʼ ko pi gidiiʼ ney, ni bachan e kireb nge fananikan roraed.

12 Musap gaed, kaʼaram iyib ni kug powiʼiyraed, ni yug aram rogon e kireb roraed ma kug powiʼiyraed ni ke yoʼor yay u napʼan e mael, ma kug tʼufeg raed, u rogon fare tʼufeg rokʼ Got ni bay rog, u poloʼ i gumʼirchaʼeg; ma kug piiʼeg ni poloʼ u fithikʼ e meybil ngakʼ e Got rog ni poloʼ e rran ni fan ngoraed; machane, de michaenʼ anʼug ngay, ni bachan e kari ʼelʼel gumʼirchaʼraed.

13 Ma dalip yay ni kug chuwegraed u lani paʼ e pi toʼogor roraed, ma dawor ra kalgaed ngaenʼraed ko pi denen roraed.

14 Ma napʼan ni kar michmich gaed u dakean gubin e pinʼen nib mathngeluwol ni ke tay Somoel ma Tathapeg i Yesus Kristus romaed ngoraed, ni yaedra yaen ngakʼ e pi toʼogor roraed ko mael, ma ngar falbiyed rachaʼen pi walagraed, ere musap gaed yib laman fare Somoel ngog, ni gaʼar:

15 Falbiyan e kireb e gag e ba milfan ngog, ma bay gu piiʼ puluwon; ma musap gaed, pi gidiiʼ ney bay ni thirif raed u dakean e fayleng, ni bachan e dar kalgaed ngaenʼraed u tomuren ni kug ayuwegraed.

16 Me yibi buch nug siyegeg ko yaen ko cham ngakʼ e pi toʼogor rog; mug rinʼ boed ni ke chiyliy Somoel ngog; mug toffan ni kug mang mich riy ni nggu dag ko fayleng e pinʼen ni kug guy ma kug rungʼag, u rogon e pinʼen nibe dag fare Kan ni Thothup niʼir e ke micheg e pinʼen ni bay yib.

17 Ere gube yol ngomed, e Gentiles, ma kuʼaram rogon ngomed, e gidiiʼ ku Israel, napʼan nra tabab fare muruwel, ni ngam falʼeged rogmed ni ngam suloed ko fare nam ni tafenmed;

18 Arragon, musap gaed, gube yol ngomed gubin e gidiiʼ ko tin tomur e rran u fayleng; arragon, ngomed fare ragag nge lʼagruw i ganong ku Israel, ni yira pufthin nagmed u rogon e pi muruwel romed nra pufthin nagmed fare ragag nge lʼagruw i gidiiʼ ni melʼeg raed Yesus ni ngar manged gachalpen u lan fare binaw nu Jerusalem.

19 Ma kug beyol ngakʼ e tin ni ke magaey ko pi gidiiʼ ney, ni yaed e ra pufthin nagraed fare ragag nge lʼagruw i gachalpen ni melʼegraed Yesus u dakean e biney e nam; ma yaed e ra pufthin nagraed fare ragag nge lʼagruw i gachalpen ni melʼegraed Yesus u lan fare nam nu Jerusalem.

20 Ma pinnʼey e dag fare Kan ni Thothup ngog; ere gube yol ngomed gubin e gidiiʼ. Ere baʼaray fan ni gube yol ngomed, nge yog ni ngam nanged ni gimed gubin ma thingar mu sakʼiy gaed nga mʼon u gilʼ e pufthin rokʼ Kristus, arragon, gubin e gidiiʼ ni bay thaʼan ko gidiiʼ ko fare tabinaew rokʼ Adam; ma thingar mu sakʼiy gaed ngan pufthin nagmed ko pi muruwel romed, ko ba mangil fa ba kireb;

21 Ma ngki yog ni michaenʼmed ko fare gospel rokʼ Yesus Kristus, ni bay yib nga fithikʼmed; ma ku aram rogon ngakʼ fapi Jews, ni gidiiʼ rokʼ Somoel ni falʼeg ba mʼag u thilraed, ni ku ra yib ngoraed yug reb e mich ni nge micheg ni boed fachaʼ, niʼir e kar guyed ma kar rungʼaged laman; ni aram Yesus, niʼir e kar liiʼed ngemʼ, ma riʼir Kristus ma riʼir Got.

22 Ere gubaʼadag ni gomanga yog nug pingegaenʼ gubin e gidiiʼ ni bay ko tin tomur e rran u fayleng ni ngar kalgaed ngaenʼraed mar falʼeged rograed ni ngar sakʼiy gaed nga mʼon u gilʼ e pufthin rokʼ Kristus.