1 Me yibi buch ni guwaen iyaen u fithikʼ fapi Nephites, mug kalnganʼug ko fare michmich ni kug tay ni dab kug ayuwegraed; mar piiʼed ngog bayay ni nggu gagyeg nag e pi salthaw roraed, ya yaed be sap ngog ni gowa rayog ni nggu chuwegraed ko pi gafgow roraed.

2 Machane musap gaed, dakuriy e athap rog, ya gumnang ni bay e gechig rokʼ Somoel ni bay yibi aw ngoraed; ya darur kalgaed ngaenʼraed ko pi denen roraed, ma yaed be athamgiliy e yafos roraed ni darur meybil gaed ngakʼ e Chaʼanem ni sunmiy raed.

3 Me yibi buch ni fapi Lamanites e rabaed ngomaed ni mael u napʼan ni kug miil gaed ko fare binaw nu Jordan; machane musap gaed, ni tuluf raed ngar suloed ma dar feked fare binaw ko ngiyalʼ nem.

4 Me yibi buch ni kur baed ni mael ngomaed bayay, ma ki paer fare binaw u paʼmaed. Ma kubay boech e binaw niki paer u paʼ fapi Nephites, ni yoror riy nib noemow e tileg raed ni deyog ni nga ranoed nga lan e nam ni bay nga mʼon romaed, ni ngar gatheayed e gidiiʼ ko nam romaed.

5 Machane i yibi buch ni pi binaw nug waroed u taʼaben, e dariy e gidiiʼ riy, ya ke gatheayraed fapi Lamanites, ma pi binaw roraed nib achichig, nge pi nochi binaw roraed, nge pi binaw roraed e kan urufiy; ere aray rogon ni mʼay e bin dalip miriʼay nge medilip nge mereb e duw.

6 Me yibi buch u lan e bin dalip miriʼay nge meruk iragag e duw ma fapi Lamanites e rabaed ngomaed bayay ko mael, mug sakʼiy gaed nggu tapngiyed yaed u fithikʼ e mʼuthaenʼ; machane gubin ma rib mʼay fan, ya riyaed boʼor ni arame riyitʼed fapi gidiiʼ ko Nephites nga tanggin i rifrifanʼay raed.

7 Me yibi buch ni kug miil gaed bayay, ma piʼin romaed ni miil nib machreg ngakʼ fapi Lamanites e ra miil gaed, ma piʼin dar miil gaed e ra yog gaed ngakʼ fapi Lamanites e ni thʼaeb raed nga butʼ min liiʼraed ngar mʼaed.

8 Ere chiney e musap gaed, gag Mormon, dagur nomeg ninge magaf anʼug nga rogon i weliy fan ngakʼ e gidiiʼ e pi rachaʼ nge puʼoeg rachaʼ ni woed ni kan tay nga pʼoewcheg; machane gag, e bachan e gumnang ni pinnʼey e thingar ni weliy ngan nang, nge gubin banʼen nib miith ma dabisiy ni ngan yiʼiy nag u dakean e naʼun—

9 Nge ku aram rogon nga morngaʼagen e pinnʼey ni thingari yib ngakʼ e piʼin ni ke magaey ko pi gidiiʼ ney, nge ku aram rogon ngakʼ fapi Gentiles, ni ireram e piʼin ni yoeg fare Somoel ni yaedra garareg e pi gidiiʼ ney, ma pi gidiiʼ ney e bay ra lemniged ni dariy gamʼing raed u fithikʼraed—ere gube yol ni kug ngochngoch nag, ya dagur nomeg ni nggu piiʼ bbabyor nib sug ko pinʼen ni kug guy, ni bachan e motochiyel ni kan piiʼ ngog, nge ku bachan e nga dabi gele kirbaenʼ romed ni bachan e ngongol ni kireb ko pi gidiiʼ ney.

10 Ere chiney e musap gaed, baʼaray e tin ni gube weliy ngakʼ pifakraed, nge ku aram rogon ngakʼ fapi Gentiles ni yaed e piʼin ni kar ayuweged fapi gidiiʼ ku Israel, make tamilang laniyaenʼraed riy ma kar nanged ko uw e be yib e tawaʼath roraed riy.

11 Ya gumnang ni yaed e piʼin nra kirebaenʼ raed ko gafgow nra tay fapi gidiiʼ ku Israel; arragon, ra kirbaenʼ raed ko gafgow rokʼ e pi gidiiʼ ney; ra kirbaenʼ raed ni pi gidiiʼ ney e dar kalgaed ngaenʼraed ni nge yog ni ngar thap gaed ngakʼ Yesus.

12 Chiney e pinnʼey e ni yoloey ni nge yaen ko tin ni ke magaey ko gidiiʼ ku Jacob; ma kan yoloey ni aray rogon, ni bachan e manang Got ni kireb e dabiyog ni nge thapeg e pinnʼey ngoraed; ma ngan mithaeg nga tan paʼ Somoel ni bay yibi mʼug ko ngiyalʼ inʼen nib mʼagaen ngay.

13 Ere baʼaray fare motochiyel ni kan piiʼ ngog; ere musap gaed, pinnʼey e bay yibi mʼug u rogon e motochiyel rokʼ Somoel, u napʼan ni be guy nib mʼag, u lan e gonop rokʼ.

14 Ere musap gaed, pinnʼey e ra yaen ngakʼ e pi Jew ni dar michaenʼraed; ya baʼaray fan ni nge yaen e pinnʼey ngoraed—ni gomanga yog ni ngan pingegaenʼraed ngar nanged ni Yesus e ir Kristus, ni Fak fare Got nib fos; ni nge yog ni fachaʼ ni Chitamangiy e nge fek iyib, u dakean fachaʼ ni thʼabi Tʼuf rokʼ, e muruwel rokʼ nib gaaʼ mab manechubog, ni ngan sulweg fapi Jews, ara gubin fapi gidiiʼ ku Israel, ko fare nam ni taferaed, niʼir e kepiiʼ fare Somoel ni Got roraed ngoraed, ni nge yog ni muguʼul fare mʼag rokʼ;

15 Ma pifak e pi gidiiʼ ney e nge yog ni poloʼ e michaen roraed ko gospel rokʼ, ni bay yib ngoraed rokʼ fapi Gentiles; ya pi gidiiʼ ney e bay ni garareg raed, mar manged bogi gidiiʼ nib lumor, nib dirngal, mab sug ko fananikan, ni dabiyog i weliy rogon ya ba thumʼ ngaruʼ e tin ni kug guyed u fithikʼmaed, arragon, nge ku aram rogon ko tin ni kan guy u fithikʼ fapi Lamanities, ni fan e biney e bachan e dar michaenʼraed ma yaed be liyoer ko liyos.

16 Ya musap gaed, fare Kan ni Thothup rokʼ Somoel e ke chuw rokʼ e pi chitamangraed; ma kar pired ni demoy Kristus nge Got roraed u fayleng; ma yibe tuluf raed iyaen ni woed fitiruʼ e grain nibe unupaʼ e nifeng.

17 Ur moyed bingyalʼ ni bogi gidiiʼ nib felʼ dakean, ma immoy Kristus roraed niʼir e tagfal roraed; arragon, i powiʼiyraed Got ni fachaʼ ni Chitamangiy.

18 Machane chiney, e musap gaed, Moʼoniyanʼ e be powiʼiyraed iyaen, ni boed fitiruʼ e grain nibe unupaʼ e nifeng, ara boed ba mʼuw nibe unupaʼ e nʼew, ni dariy e laey ara yiluy riy, ara dariy banʼen ni nge yapʼ nag; ere rogon e re mʼuw nem, e aram rograed.

19 Ere musap gaed, fare Somoel e ketel e pi tawaʼath roraed, ni gomanga boech make yog ngoraed u lan fare nam, ni fan ngakʼ fapi Gentiles ni bay ra tafnayed fare nam.

20 Machane musap gaed, ra yibi buch ni bay ni tuluf raed me garareg raed fapi Gentiles; ma tomuren ni ke tuluf make garareg raed fapi Gentiles, ma musap gaed, ma arame bay yib ngaenʼ Somoel fare mʼag ni tay ngakʼ Abraham nge gubin e gidiiʼ ku Israel.

21 Ma kura yib ngaenʼ Somoel e pi meybil rokʼ e piʼin nib matʼaw, ni kan piiʼ ngakʼ ni fan ngoraed.

22 Ma arame, O gimed e pi Gentiles, uw rogon ma rayog ni ngam sakʼiy gaed u mit fare gelingin Got, gathi kemus ni gimed ra kalngaenʼ mi gimed chef nga orel ko pi wok romed nib kireb?

23 Damnanged ni gimed bay u lan paʼ Got? Damnanged ni gubin e gelingin ma bay rokʼ, ma rayog ni nge non ni nge yabochboch e fayleng nga taʼabang ni boed e babyor ni kan bichibichiy?

24 Ere, mu kalgaed ngaenʼmed, magmed sobutʼ niged gimed u pʼoewchen, ara dangay ma ra togopluw ngomed u rogon e justice—ara dangay ma ra yaen e tin ni ke magaey u pifak Jacob u fithikʼmed ni boed ba layon, me guchguchuymed ni pʼachichig yang, ma dariy beeʼ ni rayog ni ngan ayuweg.