1 Pues matto i tiempo na i trenta yan mina’kuattro na años maloffan, yan lokkue’ i trenta yan mina’singko, ya atan i disipulon Jesus ma fa’tinas guma’ Yu’os Kristo gi todu i tano’ gi uriya. Ya i mineggai ni’ manmatto giya siha, ya manmañotsot put i isao-ñiha, manma takpange gi na’an Jesus; yan ma risibi lokkue’ i Espiritu Santo.

2 Ya matto i tiempo gi trenta yan mina’sais na años, i taotao siha todu manma kombiette gi Saina, gi todu lugat, todu i Nephites yan Lamanites, ya taya’ atgomento yan kompetensia giya siha, ya todu taotao husto akton-ñiha kontra i otro.

3 Ya todu mamparehu siha; entonses taya’ riku yan popble, kaotibu yan libre, lao todu manlibre, yan ma chagi i regalon i langet.

4 Pues matto i tiempo na i trenta yan mina’siette na años maloffan lokkue’, ya ma kontenuha para guaha pas gi tano’.

5 Ya meggai dangkolo yan na’manman na cho’cho’ ma cho’gue i disipulon Jesus, esta ma na’homlo’ i malangu, yan ma na’la’la’ i matai, yan ma na’famokkat i ke’yao, yan ma na’fanli’e’ i bachet, yan ma na’fanhungok i tangnga; ya todu klasen milagru ma cho’gue gi famagu’on i taotao ya taya’ ma na’setbe para ma cho’gue i milagru siha solu gi na’an Jesus.

6 Ya pues i trenta yan mina’ocho na sakkan manmaloffan yan kontodu i trenta yan mina’nuebi yan i kuarenta yan mina’unu, yan i kuarenta yan mina’dos, hunggan maloffan tanto i kuarenta yan mina’nuebi na sakkan, yan lokkue’ i singkuenta yan mina’unu, yan i singkuenta yan mina’dos, hunggan, tanto i singkuenta yan mina’nuebi na sakkan manmaloffan.

7 Ya i Saina ha na’famprosperu siha gi tano’; hunggan, esta ma hatsa si’udat siha ta’lo gi anai mangkimason.

8 Hunggan, tanto ayu i dangkolo na si’udat Zarahemla ma hatsa ta’lo.

9 Lao meggai siha na si’udat manma fondo, ya mantinatne nu i hanom; entonses este siha na si’udat ti siña ma hatsayi.

10 Pues pa’go atan, matto i tiempo na i taotao Nephi siha manmetgot, ya manmotteplika chaddek, ya manhusto yan na’magof na toatague.

11 Ya manassagua, yan manma bendisi konsiste gi mineggai prumesa siha ni’ ha fa’tinas i Asaina giya siha.

12 Ya i lina’la’-ñiha esta ti ginen i otdenansian i lain Moises; lao i lina’la’-ñiha ginen i tinago’ siha ni’ ma risibi ginen i Saina yan i Yi’os-ñiha, ya ma kontenuha gi ayunat yan tinaitai, yan gi mandaña’ para u fanmanaitai yan ma hungok i fino’ i Saina.

13 Ya matto i tiempo na taya’ atgomento gi taotague siha, gi todu i lugat; lao meggai na milagru siha ma cho’gue i disipulon Jesus.

14 Ya matto i tiempo na i sitenta yan mina’unu na sakkan manmaloffan yan lokkue’ i sitenta yan mina’dos na sakkan, hunggan, estaki i sitenta yan mina’nuebi na sakkan manmaloffan; hunggan, tanto sien años manmaloffan, ya i disipulon Jesus, ni’ ha ayek, manhanao todu para i paradison Yu’os, fuera di i tres ni’ managa; ya meggai otro disipulu manma otdena para tahguen-ñiha; yan lokkue’ meggai gi ayu na hinirasion esta manmaloffan.

15 Pues matto i tiempo na taya’ binibu gi tano’ put i guinaiya para si Yu’os ni’ gaige gi kurason i taotao.

16 Ya taya’ embidia, pat mumu, pat atborotu, pat puta, pat dinagi, pat pekno’, pat hafa na maneran etgu’i; ya magahet taya’ mas manmagof na taotague gi halom todu i taotao ni’ manmafa’tinas ginen i kannai Yu’os.

17 Taya’ sakke, pat pekno’, yan taya’ lokkue’ Lamanites, pat hafa na maneran ites; lao manunu siha, i famagu’on i Kristo, yan irideron i rainon Yu’os.

18 Ya sen manma bendisi siha! Sa’ i Saina ha bendisi siha gi todu i bidan-ñiha; hunggan, tanto ma bendisi yan maolek lina’la’-ñiha estaki maloffan siento yan dies años; ya i fine’nana na hinirasion ginen i Kristo maloffan esta, ya taya’ atborotu gi todu i lugat.

19 Ya matto i tiempo na si Nephi, guiya i gumo’te i uttemo na nota (ya ha tuge’ gi plegon Nephi) matai ya i lahi-ña Amos tumahgue gui’; ya ha tuge’ gi plegon Nephi lokkue’.

20 Ya ha chule’ i nota ennao i ochenta yan kuattro años, ya guaha ha’ pas gi tano’, fuera di didide’ ha’ na patten i taotao ni’ maninatborotao ginen i gima’ Yu’os ya ma chule’ i na’an Lamanites siha; entonses gumuaha ta’lo Lamanites gi tano’.

21 Pues matto i tiempo na si Amos matai lokkue’ (ya siento yan nubenta yan kuattro años desde i finatton Kristo) ya i lahi-ña Amos tumahgue gui’ gi nota; ya ha tuge’ gi plegon Nephi; yan lokkue’ ma tuge’ gi lepblon Nephi, ya guiya este na lepblo.

22 Ya matto i tiempo na dos sientos años manmaloffan esta; ya i sigundo na hinirasion esta maloffan fuera di noskuantos.

23 Pues pa’go guahu, si Mormon, malago’ yu’ na en tingo’ na i taotao manmotteplika, esta manma chalapon gi todu i hilo’ i tano’, ya mansen riku, put i fottunan-ñiha gi i Kristo.

24 Pues pa’go, guini gi dos sientos yan mina’unu na añu guaha giya siha manma hatsa gi banida, taiguihi i ma usa guaguan na magagu, yan todu maneran petlas, yan todu i guaguan siha na kosas i tano’.

25 Ya desde ayu na tiempo i guinahan-ñiha yan i prupiedat-ñiha ti mamparehu esta gi entre siha.

26 Ya ma tutuhon manma dibida siha entre klas; ya ma tutuhon ma hatsa guma’ Yu’os para ganansian-ñiha, yan ma tutuhon ma ñega i magahet na guma’ Yu’os Kristo.

27 Pues matto i tiempo na anai maloffan dos sientos yan dies años meggai siha guma’ Yu’os gi tano’; hunggan, meggai guma’ Yu’os prumufisiha na ma tungo’ si Kristo, lao ma ñega bula patten i ebangheliu-ña, esta ma risibi todu maneran mala siha, ya ma na’i ayu i sagradu giya siha i ma pruhibi put i isao-ñiha.

28 Ya este na guma’ Yu’os ha motteplika chaddek put i isao siha, yan ginen i alentos Satanas ni’ bumense i kurason-ñiha.

29 Yan ta’lo, guaha otro guma’ Yu’os ni’ muñega i Kristo; ya ma petsigi i magahet na guma’ Yu’os Kristo, put i umitden-ñiha yan i hinenggen-ñiha gi Kristo; yan ma chatli’e’ siha put i meggai milagru ni’ ma cho’gue gi entre siha.

30 Entonses ma usa alentos yan aotoridat gi disipulon Jesus ni’ mañiha, ya ma po’lo gi halom presu; lao ginen i alentos i fino’ Yu’os, ni’ gaige giya siha, i presu ma’pe’ talo’, ya manhuyong ya ma cho’gue meggai milagru entre siha.

31 Sinembatgo, sin ayu i milagru siha, i taotague ma na’mahettok i kurason-ñiha, ya ma espiha para ma puno’ siha, parehu tanto i Judios giya Jerusalem ni’ ma espiha para ma puno’ si Jesus, konsiste gi fino’-ña.

32 Ya manma daggao halom gi hetnon guafi, lao manhuyong sin chetnudan.

33 Yan manma yute’ halom gi kellat machalek na ga’ga’ siha, ya manhugando yan i machalek na ga’ga’ siha kulan i patgon yan i kinilu; ya manhuyong sin hafa na chetnudan.

34 Sinembatgo, i taotao ma na’mahettok i kurason-ñiha, sa’ mangginiha ni’ meggai pale’ siha yan fatso na prufeta siha para ma hatsa meggai na guma’ Yu’os, yan para ma cho’gue todu manera na cho’cho’ baba. Ya ma na’lamen i taotao Jesus siha; lao i taotao Jesus ti ma na’lamen siha. Ya pues sigi ha’ mandidide’ gi tai hinengge yan mala, sakkan esta sakkan, tanto esta dos sientos yan trenta años maloffan.

35 Pues pa’go matto i tiempo guini na sakkan, hunggan, gi dos sientos ya trenta yan mina’unu na sakkan, guaha dangkolon dibision gi taotao siha.

36 Ya matto i tiempo na guini na sakkan mangahulo’ taotague ni’ manma fa’na’an Nephites, ya manmagahet manmanhongge gi Kristo; ya giya siha guaha manma agang nu i Lamanites —Jacobites, yan Josephites, yan Zoramites;

37 Entonses i magahet na manhongge gi Kristo, yan i magahet na manadora gi Kristo, (tanto i tres disipulon Jesus ni mañaga) manma agang Nephites, yan Jacobites, yan Josephites, yan Zoramites.

38 Ya matto i tiempo na ayu siha i ruminunsia i ebangheliu manma agang Lamanites, yan Lemuelites, yan Ishmaelites; ya ti mandidide’ gi tai hinengge, lao manatborotao kontra i ebanghelion i Kristo; ya ma fa’na’gue i famagu’on-ñiha na munga manmanhongge, tanto i tatan-ñiha, desde i tutuhon, ni’ ti manhongge.

39 Ya ginen i mala yan chinatli’e’ i tatan-ñiha, tanto desde i tutuhon. Ya manma fa’na’gue para ma chatli’e’ i famagu’on Yu’os, taiguihi i Lamanites ni’ manma fa’na’gue para ma chatli’e’ i famagu’on Nephi desde i tutuhon.

40 Ya matto i tiempo na dos sientos yan kuarenta yan kuattro años esta manmaloffan, ya este i bidan i taotao siha. Ya i mas manmala siha na taotague manmetgot, ya mas meggai ki nu ayu siha i taotao Yu’os.

41 Ya ma kontenuha ma hatsa guma’ Yu’os para siha, yan ma adotna ni’ todu maneran prisiosu na kosas. Ya esta maloffan dos sientos yan singkuenta años, yan lokkue’ dos sientos yan sisenta años.

42 Pues matto i tiempo na i manmala siha na taotague ma tutuhon humatsa i sikretu na prinimeti yan inetnon i Gadianton.

43 Yan lokkue’ i taotague ni’ manma agang i taotao Nephi mambanidosu gi kurason-ñiha, put i mineggai guinahan-ñiha, ya manai bali taiguihi i che’lon-ñiha i Lamanites.

44 Ya desde este na tiempo i disipulu siha mantriste put i isao i tano’.

45 Pues matto i tiempo na anai tres sientos años maloffan, tanto i taotao Nephi yan i Lamanites mansen mala parehu i unu esta i otro.

46 Pues matto i tiempo na i Gadianton na sakke siha manma chalapon gi todu i tano’; ya taya’ husto solu i disipulon Jesus. Ya ma rikohi oru yan plata siha, yan ma tulaika todu maneran kumetsio.

47 Pues matto i tiempo na despues maloffan tres sientos yan singko años, (ya i taotao mañasaga ha’ gi isao-ñiha) matai si Amos; ya i che’lu-ña si Ammaron, ha tahgue tumuge’ i nota.

48 Pues matto i tiempo na anai maloffan tres sientos yan bente años, si Ammaron, ni’ ginege’te nu i Espiritu Santo, ha na’na’ i sagradu na nota siha — hunggan, tanto todu i sagradu na nota siha ni’ ma na’i papa’ hinirasion esta hinirasion, ni’ mansagradu — tanto i tres sientos yan bente años desde i finatton i Kristo.

49 Ya ha na’na’ hulo’ para i Saina, ya puedi u huyong ta’lo gi ritasos i gima’ Jacob, konsiste gi prufisiha yan prumesan i Saina. Ya este i uttemon i notan Ammaron.