I Lepblon Mormon

1 Pues pa’go, guahu, si Mormon, hu fa’tinas nota nu ayu siha i hu li’e’ yan hungok, ya hu agang i Lepblon Mormon.

2 Ya guihi na tiempo anai ha na’na’ si Ammaron i nota siha gi Saina, matto giya guahu, (Guahu gaige guennao gi dies años ya hu tutuhon tumungo’ put i manera ni’ maneyak i taotao-hu) ya ilek-ña si Ammaron giya guahu: Hu li’e’ na fotmat hao na patgon, yan chaddek manungo’;

3 Entonses, yanggen esta hao gaige gi bente yan kuattro na años ya-hu na un hasso este siha i un li’e’ put este siha na taotague; ya yanggen esta matto hao guihi na idat, hanao para i lugat ni’ na’an-ña Antum, gi ekso’ ni’ ma agang Shim; ya gaige guihi na hu po’lo para i Saina todu i sagradu na tinige’ put este siha na taotague.

4 Yan atan, chule’ i plegon Nephi, ya i pumalu po’lo ha’ anai un sodda’; ya debi di un matka gi plegon Nephi todu siha ni’ un li’e’ put este na taotague.

5 Ya guahu, si Mormon, ni’ disendenten Nephi (ya i na’an tata-hu Mormon) hu hasso siha i ha kumanda yu’ si Ammaron.

6 Pues matto i tiempo, na guahu, komu esta onse años, ha konne’ yu’ si tata-hu haya gi lugat, i lugat na’an-ña Zarahemla.

7 Todu i lugat guihi tinampe ni’ gima’ siha, ya sen meggai taotao, esta kulan i inai gi tasi.

8 Ya matto i tiempo guini na sakkan na guaha gera gi Nephites, ni’ ha konsiste i Nephites yan i Jacobites yan i Josephites yan i Zoramites; ya este na gera entalo’ i Nephites, yan i Lamanites yan i Lemuelites yan i Ishmaelites.

9 Pa’go i Lamanites yan i Lemuelites yan i Ishmaelites manma agang Lamanites, ya i dos grupu ma agang i Nephites yan i Lamanites.

10 Pues matto i tiempo na i gera ma tutuhon entre siha gi kanton Zarahemla, fi’on i hanom gi Sidon.

11 Pues matto i tiempo na i Nephites ma rikohi meggai na lalahi, esta mas di trenta mit. Ya matto i tiempo na meggai geran-ñiha guini na sakkan, ya i Nephites ma ganna i Lamanites ya meggai ma puno’.

12 Pues matto i tiempo na i Lamanites ma halla tatte i fuetsan-ñiha, ya guaha pas gi tano’; ya guaha pas gi ennao i kuattro años, ya taya’ manmatai.

13 Lao mampos meggai isao siha gi lugat, esta i Saina ha konne’ i ma gofli’e’ na disipulu-ña, ya i che’cho’ milagru yan latto’ pumara put i isao i taotao siha.

14 Ya taya’ rigalu ginen i Saina, ya taya’ i Espiritu Santo ha fattoigue, put i baban-ñiha yan i tai hinenggen-ñiha.

15 Ya guahu, ni’ kinse años ya fotmat i hinasso-ku, entonses ha bisita yu’ i Saina, ya hu chagi yan tungo’ i minaolek Jesus.

16 Ya malago’ yu’ para bai hu pagat gi este siha na taotague, lao machom i pachot-hu, ya ma pruhibi yu’ para bai hu pagat giya siha; sa’ atan manatborotao gi Yi’os-ñiha; ya i ma gofli’e’ na disipulu siha manma laknos huyong ginen i lugat, put i isao-ñiha.

17 Lao sumaga ha’ yu’ gi entre siha, lao ma pruhibi yu’ para bai hu pagat giya siha, put i mahettok i kurason-ñiha ya put i mahettok i kurason-ñiha ma matditu i lugat put siha.

18 Ya este i Gadianton na sakke siha, ni’ manggaige gi Lamanites, ma hatme i tano’, esta i mañasaga guihi ma na’na’ i tisoron-ñiha gi tano’; ya mampalakse’, sa’ ha matditu i tano’ i Saina, ya ti siña ma go’te, pat chule’ tatte ta’lo.

19 Ya matto i tiempo na guaha a’atte siha, yan che’cho’ bruha, yan atte siha; ya i alentos i mala gaige todu gi hilo’ i lugat, esta ma kumple i fino’ Abinadi, yan lokkue’ si Samuel i Lamanite.