Kapitulu 7
Si Mormon ha kombida i Lamanites gi manatatte na tiempo para u ma hongge i Kristo, aksepta i ebangheliu-ña, yan u fanma satba — Todu i humongge i Biblia siempre lokkue’ ma hongge i Lepblon Mormon.
1 Pues pa’go, atan, bai hu kuentusi i ritasos este siha na taotague ni’ ma na’libre, yanggen si Yu’os u na’i siha i fino’-hu, para u ma tungo’ put i tatan-ñiha; hunggan, hu kuentusi hamyo, i ritasos i gima’ Israel; ya este i palabras ni’ hu sangan:
2 Tungo’ na hamyo ginen i gima’ Israel.
3 Tungo’ na debi di en fanmañotsot, sino ti siña ma satba hamyo.
4 Tungo’ na debi di en pe’lo papa’ i atmas-miyu gera, ya basta manmagof ni’ ma chuda’ haga’, ya munga ma usa, solu ha kumanda hamyo si Yu’os.
5 Tungo’ na debi di en tingo’ i tiningo’ i tatan-miyu, ya en fanmañotsot nu i isao-miyu yan bidan-miyu baba, yan en fanmanhongge as Jesukristo, na guiya i lahen Yu’os, ya ma puno’ nu i Judios, ya ginen i alentos i Tata kumahulo’ ta’lo, ya ha ganna biktoria gi naftan; yan lokkue’ giya guiya na i inakka’ finatai ma kalammot.
6 Ya ha na’fatto i risureksion i matai, ni’ i taotao debi di ma hatsa para u tohge gi me’nan i siyan sentensia.
7 Ya ha na’fatto i ridiman i tano’, ni’ guiya i ma sodda’ tai isao gi me’na-ña gi dihan sentensia ma na’i gui’ para u saga gi fi’on Yu’os gi raino-ña, para u kanta tai finakpo’ na tuna yan i kantores siha, para i Tata, yan para i Lahi-ña, yan para i Espiritu Santo, ni’ unu na Yu’os, gi estadon minagof ni’ tai finakpo’.
8 Entonses fanmañotsot, ya en fanma takpange gi na’an Jesus, ya en go’te i ebanghelion i Kristo, ni’ siempre ma fa’na’gue hamyo, ti gi este ha’ na nota lao lokkue’ gi nota ni’ para u fatto gi Gentiles ginen i Judios, ni’ nota para u fatto ginen i Gentiles para hamyo.
9 Pues atan, ma tuge’ este para en fanmanhongge; pues yanggen en hengge pues siempre en hengge este lokkue’; yan yanggen en hengge este siempre en tingo’ put i tatan-miyu, yan lokkue’ i na’manman na cho’cho’ ni’ ma na’fatto ginen i alentos Yu’os entre siha.
10 Ya siempre lokkue’ en tingo’ na ritasos i simiyan Jacob hamyo; entonses manma kuenta hamyo entre i taotague gi fine’nana na kontratamiento; ya yanggen magahet na en hengge si Kristo, ya ma takpange hamyo, fine’nana nu i hanom, pues i guafi yan i Espiritu Santo, ya en tattiyi i ihemplon i Satbadot-ta, konsiste nu ayu i ha kumanda hit, siempre todu maolek giya hamyo gi ha’anen sentensia. Amen.