1Ti hoko ai, ne mole atu e tau ke tolugofulu ma fa aki, ti pihia mo e tau ke tolugofulu ma lima aki, ti kitia la ko e tau tutaki a Iesu ne fakatu e lautolu taha lotu a Keriso ke he motu ia. Ti ko e tokologa ne o atu ki a lautolu, mo e fakatokihala mooli mai he ha lautolu a tau hala, ne papatiso ai ke he higoa a Iesu; ti moua foki e lautolu e Agaaga Tapu.

2Ti hoko ai ke he tau ke tolugofulu ma ono aki, ko e tau tagata oti kua liliu oti a lautolu ke he Iki, ke he motu katoa, ko e tau Nifai mo e tau Lamana, ti nakai ha ha i ai ha taufetoko mo e tau vagahau ia lautolu ti ko e tau tagata oti kua mahani hakohako e taha ke he taha.

3Ti kua tatai e tau mena oti ha lautolu; ko e mena ia, kua nakai ha ha i ai ha muhu mena po ke ha nonofogati, ha fakatupa mo e tokanoaaga mo e moua e lautolu e fakaalofa ia mai he lagi.

4A ti hoko ai ke he tau ke tolugofulu ma fitu aki ti mole atu ia foki, ne tumau ni e mafola ke he motu.

5Ne ha ha i ai e tau gahua lalahi moe mitaki, ne taute ai he tau tutaki a Iesu, ti hoko ai ne fakamalolo e lautolu e tau gagao, mo e fakamomoui a lautolu ne kua mamate, mo e fakafano a lautolu ne kulikuli, mo e tau matapouli kua fakamaama ha lautolu a tau mata, ko e tau teliga tuli kua maeke ke logona, ko e tau mana loga kua taute e lautolu ke he tau fanau he tau tagata; ti nakai noa ka e taute ni e lautolu ke he higoa a Iesu.

6Ti fakaoti pihia e tau ke tolugofulu ma valu aki, ti pihia foki e tau ke tolugofulu ma hiva aki, mo e fagofulu, mo e taha, mo e tau ke fagofulu ma ua aki, hanai, ti pihia ke hoko ke he tau ke fagofulu ma hiva aki, he mole, ti pihia ke he limagofulu, mo e taha, mo e limagofulu ma ua aki; hanai, ti pihia ke hoko ke limagofulu ma hiva aki e tau tau he mole.

7Ti fakamonuina lahi he Iki a lautolu ke he motu; hanai, ati liu talaga foki e lautolu e tau maaga ke he tau maaga ne vela ai.

8Hanai, pihia ke he maaga lahi ko Sarahema, ne liu talaga foki e lautolu.

9Ka ne loga e tau maaga ne tomo ai, ti kua ha ha i ai e vai ke he tau mena ia; ko e mena ia kua nakai maeke ai he tau maaga nai ke fakafoou ai.

10Ti ko e magaaho nai, kitia la, kua hoko ai ko e tau tagata Nifai kua malolo moe tupu tokologa he magaaho ku, ti ne eke a lautolu mo tau tagata meā mo e mitaki.

11Ti fai hoana mo e fai taane a lautolu, mo e fakamonuina ai ke he tau monuina loga ne mavehe he Iki ki a lautolu.

12Ti ne nakai liliu atu a lautolu ke he tau tauteaga mo e tau gahua he tau fakatufono a Mose; ka kua mumui atu a lautolu ke he tau poakiaga ne moua e lautolu mai he ha lautolu a Iki ko e ha lautolu a atua, ne tutaki atu ke he fakanopogi mo e liogi, mo e fakalataha auloa ai ke liogi moe fanogonogo ke he tau kupu he Iki.

13Ti hoko ai, ne nakai ha ha i ai ha taufetoko ke he tau tagata oti kana, he motu katoa; ka ne ha ha i ai e tau mana lalahi ne taute ai he tau tutaki a Iesu.

14Ti hoko ai, ne mole atu e tau ke fitugofulu ma taha aki, ti pihia mo e tau fitugofulu ma ua aki, hanai, mo e mafola, a to hoko ke mole atu e tau fitugofulu ma hiva aki; hanai, mole atu mo e tau ke taha e teau aki, ti ko e tau tutaki a Iesu, ne fifili e ia kua o atu oti ke he parataiso he Atua, ka ko e tokotolu ne lata ke nonofo ai; ti ne ha ha i ai falu a tutaki ne fakauku ke hukui a lautolu; ti kua tokologa he atu hau ia kua mole atu.

15Ti hoko ai, ne nakai ha ha i ai ha tau fetoko ke he motu, ha ko e fakaalofa he Atua kua nofo ke he tau loto he tau tagata.

16Ne nakai ha ha i ai ha mahekeheke, po ke tau latau, po ke miha, po ke feuaki, po ke fati piko, po ke ha kelipopo tagata, po ke ha eke fakakelea; ti ko e mooli kua nakai ha ha i ai foki ha tagata kua mua atu e fiafia he tau tagata oti ne tufugatia he lima he Atua.

17Ne nakai ha ha i ai ha fofō mena, po ke ha tagata kelipopo tagata, ne nakai ha ha i ai ha Lamana po ke ha veheveheaga tagata, ka kua taha ni a lautolu, ko e tau fanau a Keriso ko lautolu ke moua e kautu he Atua.

18Ti ko e monuina ha a ia ha lautolu? Ha kua fakamonuina he Iki a lautolu ke he tau mena oti; hanai, ti fakamonuina pihia mo e muhu mena ai ke hoko ke taha e teau mo e hogofulu aki e tau tau he mole, mo e mole atu e atuhau fakamua ia mai ia Keriso, mo e nakai ha ha i ai ha tau fetoko ke he motu katoa.

19Ti hoko ai, ko Nifai ko ia ne leveki ai e tau fakamauaga fakahiku nai, (ne tohia e ia ke he tau lapa maka a Nifai) ne mate a ia, ti leveki ai he haana a tama ko Amosa; mo e tohia ai foki e ia he tau lapa maka a Nifai.

20ti leveki ai e ia ke he valugofulu ma fa e tau tau, mo e tumau agaia e mafola ke he motu, ka ko e tokogaogao ne fehola mai he lotu mo e fakahigoa e lautolu a lautolu ko e tau Lamana ti ko e mena ia kua kamata ai foki ke ha ha i ai e veveheaga ko e tau Lamana ke he motu.

21Ti hoko ai, ne mate foki a Amosa, (ti ko e taha e teau mo e hivagofulu ma fa aki e tau tau tali he haele mai a Keriso) ko e tau fakamauaga ne leveki ai ha haana a tama ko Amosa; ne tohia ai foki e ia ke he tau lapa maka a Nifai; ne tohia ai foki i loto he tohi a Nifai, ko e tohi nai a ia.

22Ti hoko ai, ne mole atu e ua e teau he tau tau; ti ne mole atu ai foki e atu hau ke ua aki, ko e toko fiha maka ne toe agaia.

23Ti ko e magaaho nai ko au, ko Moromona kua fakakite ke iloa e mutolu ko e tau tagata kua tokologa lahi, kua nonofo ai ke he motu katoa, ti kua muhu koloa lahi a lautolu, ha ko e ha lautolu a muhu mena ia Keriso.

24Ti ko e magaaho nai he tau ke ua e teau mo e fakamua aki, ne kamata ai ke ha ha i ai falu kua tokoluga e tau manamanatuaga, tuga kua tapulu ai a lautolu ke he tau tapulu tau uka, mo e tau ai e tau penina kehekehe, mo e tau koloa fulufuluola kehekehe he lalolagi.

25Ti kamata mai he magahala ia kua nakai tatai e ha lautolu a tau koloa mo e ha lautolu a tau mena moua.

26Mo e kamata agataha ke ha ha i ai e tau vahega tagata kehekehe; mo e kamata a lautolu ke fakatu hake e tau lotu ia lautolu ni, ke moua mena ai, mo e kamata ke fakatikai ai e lotu a Keriso.

27Ti hoko ai, ko e magaaho ne mole atu ai e ua e teau mo e hogofulu e tau tau kua loga ai e lotu ke he motu; hanai, ne loga e lotu ne talahau kua iloa e Keriso, ka e fakatikai ai e loga he tau fakaakoaga he haana a evagelia, lahi ke pihia a ti moua ai e lautolu loga e tau mahani kelea, mo e taute ai e tau mena tapu ki a lautolu ne nakai kua lata ki ai ha ko e ha lautolu a tau mahani.

28Ti ko e lotu nai kua tupu lahi ha ko e tau mena kelea, ha ko e malolo a Satani foki kua hufia ke he tau loto ha lautolu.

29Ti ha ha i ai foki taha lotu ne fakatikai e Keriso; mo e eke fakakelea e lotu mooli a Keriso, ha ko e ha lautolu a tau loto holoilalo mo e tua ki a Keriso, mo e eke fakakelea atu foki ki a lautolu ha ko e tau mana loga ne taute e lautolu.

30Ko e mena ia ne hokotia e pule ha lautolu ke he tau tutaki a Iesu ne nonofo agaia mo lautolu, mo e tuku a lautolu ke he fale puipui; ka ko e mana he kupu he Atua, ne ha ha ia lautolu, kau iihi ua ai e fale puipui, mo e o atu a lautolu moe taute ai e tau mana loga ki a lautolu.

31Pete ia he loga he tau mana ne taute ai, ne loto maō ni e tau tagata, mo e tatao ia lautolu ke keli, tuga ni e tau Iutaia i Ierusalema ne tatao e lautolu a Iesu ke keli, ha ko e haana a tau kupu.

32Ti tolo e lautotu a lautolu ke he tau afi kakā ka kua o mai a lautolu mo e nakai haofia.

33Ti tolo foki e lautolu a lautolu ke he tau ana he tau manau favale, ka ne fefeua a lautolu mo e tau manu favale tuga e tama tote mo e punua mamoe; mo e o mai ai a lautolu he tau mena ia mo e nakai haofia ai.

34Pete ia, ka e ne loto mao ni e tau tagata, ha kua takitaki a lautolu he tokologa e tau ekepoa mo e tau perofeta pikopiko, ke ati hake ai loga e lotu, mo e taute ai e tau mena kelea loga. Ne fakakelea atu a lautolua ke he tau tagata a Iesu; ka e nakai taui atu he tau tagata a Iesu. Ti pihia, ne liu tua a lautolu mo e nakai tua, mo e tau mahani kelea, he taha tau ke he taha tau a to mole atu e ua e teau mo e tolugofulu e tau tau.

35Ti ko e magaaho nai ne hoko ai, ko e tau nai, hanai, ko e tau ke ua e teau mo e tolugofulu ma taha aki, ne kua mavehevehe lahi e tau tagata.

36Ti hoko ai ko e tau nai ne tutu mai e tau tagata ne higoa ai ko e tau Nifai ti ko lautolu ne tua mooli a lautolu ki a Keriso; ne ha ha i ai falu ne higoa ai ko e tau Lamana — tau Iakopo, tau Iosefa mo e tau Sorama.

37Ko e mena ia ko lautolu ne tua mooli ki a Keriso; mo lautolu ne tapuaki fakamooli ki a Keriso (ne ha ha i ai e toko tolu e tau tutaki a Iesu ne momoui agaia) ne ha ha i ai e tau Nifai, ko e tau Iakopo mo e tau Iosefa mo e tau Sorama.

38Ti hoko ai, ko lautolu ne tiaki e evagelia ne fakahigoa ko e tau Lamana, ko e tau Lemuela, ko e tau Isamaeli, ne nakai liu tua ha lautolu a tua, ka ne fakafetoko pauaki a lautolu ke he evagelia a Keriso; ti ne fakaako e lautolu ha lautolu a tau fanau ke aua neke tua, ke tuga ni e tau matua ha lautolu he kamataaga ne liliu tua ai.

39Ti pihia ha ko e tau mahani kelea mo e fakalialia he tau matua ha lautolu tali mai he kamataaga. Ti ne fakaako a lautolu ke vihiatia atu ke he tau fanau he Atua, tuga ni ne fakaako mai he kamataaga, he tau Lamana ke vihiatia e tau fanau a Nifai.

40Ti hoko ai, ne mole atu e ua e teau mo e fagofulu ma fa aki e tau tau ti pihiia e tau mena ne hoko ai ke he tau tagata. Ti ko lautolu ne mahani kelea kua malolo lahi a lautolu mo e mua a lautolu he tokologa ki a lautolu e tau tagata he Atua.

41Ti ne tumau ni e ati hake e lautolu e tau lotu ke lata mo lautolu ni mo e fakafulufuluola aki e lautolu e tau mena uho kehekehe. Ti mole ai e ua e teau mo e limagofulu aki e tau tau, ti pihia e tau ne ua e teau mo e onogofulu aki he mole atu.

42Ti hoko ai, ko lautolu e tau tagata ne mahani kelea ne kamata a lautolu ke ati hake e tau omonuo fufu mo e tau kau a Katianatoni.

43Ti pihia e tau tagata ne higoa ai ko e tau tagata a Nifai ne kamata a lautolu ke loto fakatokoluga, ha ko e ha lautolu a tau koloa kua mua atu he loga, ne hakehake ai a lautolu ke tuga mo e ha lautolu a tau matakainaga ko e tau Lamana.

44Ti ko e magaaho nai ne kamata ai ke momoko e tau tutaki ha ko e tau agahala he lalolagi.

45Ti hoko ai ke he magaaho ne mole atu e tolu e teau tau, ne tatai ni e tau mahani kelea he tau Nifai mo e tau Lamana kua tatai e taha ke he taha.

46Ti hoko ai, ko e tau fofo mena a Katianatoni ne laputia ai ke he motu katoa; ti ne nakai ha ha i ai taha ne tututonu ka ko e tau tutaki ni a Iesu. Ti ne fakaputu fakaloga ai e lautolu e tau auro mo e tau ario, mo e o fano ai a lautolu he tau puhala o fano kehekehe.

47Ti hoko ai ne mole atu ai e tolu e teau mo e lima aki he tau tau, (ne tumau agaia e tau tagata ke he tau mahani kelea) ne mate ai a Amosa; ti ko e haana a matakainaga ko Amarona ko ia ne leveki e tau fakamauaga ke he magaaho ia.

48Ti hoko ai, ko e magaaho ne tolu e teau mo e uafulu e tau tau he mole atu, ko Amarona ne lagomatai he Agaaga Tapu, ne fufu e ia e tau lapa maka tapu — hanai, pihia mo e tau lapa maka tapu oti ne fakaholo mai fakahaga he taha atu hau ke he taha atu hau, kua tapu ia, pihia a to hoko mai ai ke tolu e teau mo e uafulu e tau tau he mole atu e haele mai a Keriso.

49Ti ne fufu atu e ia ke he Iki ke maeke ke liu ta mai ai ke he toe tagata he magafaoa a Iakopo ke lata ai mo e tau perofetaaga mo e tau maveheaga he Iki. Ti pihia e fakaotiaga he fakamauaga a Amarona.