Ko e Tohi a Moromona

1Ti ko au ko Moromona, kua fakamau e au e tau mena ne kitia mo e logona e au mo e fakahigoa ai ko e Tohi a Moromona.

2Ti kua lata ai mo e magaaho ne fufu ai e Amarona ke he Iki e tau fakamauaga, ne hau a ia ki a au, (liga ko e hogofulu ia e haaku a tau tau ti kamata agataha au ke fakaako ai ke he tau fakaakoaga he haaku a tau tagata) ti pehe mai a Amarona ki a au: Kua kitia e au ko koe ko e tama loto matala, mo e mafiti ke mailoga;

3Ko e mena ia kaeke ke hoko atu a koe ke ua hogofulu ma fa haau a tau tau, kua manako au ke manatu e koe e tau mena ne kitia e koe ke he tau tagata nai; ti ka hoko atu a koe ke he tau ia, kia fina atu a koe ke he fonua ko Anatumu, ke he matiketike ko Sima; ti ko e mena ia ne toka ai e au ke he Iki e tau fakamauaga tapu oti hagaao ia ke he tau tagata nai.

4Ti, kitia la, kia uta e koe e tau lapa maka a Nifai; ka e toka hifo e maaga ne toe ke he mena ia ne toka ai; ti tohi ai e koe ke he tau lapa maka ia a Nifai e tau mena ne kua kitia ai e koe hagaao ia ke he tau tagata nai.

5Ti ko au nai, ko Moromona, ne tupu mai au ia Nifai, (ti ko Moromona e higoa he matua taane haaku) ne manatu e au e tau mena ne poaki mai e Amarona ki a au.

6Ti hoko ai, ko au ko Nifai ne hogofulu ma taha e haaku a tau tau, ne uta ai he haaku a matua taane ke he faahi toga he motu, ke he fonua ko Sarahema.

7Ko e fonua katoa ia kua puke ai ke he tau fale, ti tokologa ai foki mo e tau tagata kua tata ni ke hoko ke he oneone he tahi.

8Ti hoko ai, ke he tau ia ne kamata agataha ke hoko ai e taha felakutaki he tau tagata Nifai, ko lautolu ia ko e tau Nifai, ko e tau Iakopo mo e tau Iosefa mo e tau Sorama; ko e felakutaki nai, ko e felakutaki he vahaloto he tau Nifai mo e tau Lamana, tau Lemuela mo e tau Isamaeli.

9Ko e tau Lamana, tau Lemuela mo e tau Isamaeli ne fakahigoa a lautolu ko e tau tagata Lamana ti ko e na kau ne ua ne iloa lahi ai ko e tau Nifai mo e tau Lamana.

10Ne hoko ai, ne tau a lautolu he tau katofia a Sarahema tata ke he tau vai i Sitoni.

11Ti hoko ai, ne fakapotopoto ai he tau Nifai tokologa e tau tagata kua mole e tolu e afe tagata. Ti hoko ai, ko e tau ia ne loga ai e tau tau ne kaumahala moe mamate ai e tokologa he tau Lamana ne keli he tau Nifai.

12Ti hoko ai, ne liliu tua ai e tau tagata Lamana, ti kamata agataha ke mafola e motu; ke he liga fa e tau tau he nonofo mafola ai mo e nakai ha ha i ai ha fakamaligi toto.

13Ka e ne tumau ni e tau mahani kelea ke he motu katoa, kua lahi ni, a ti uta kehe ai he Iki e haana a tau tutaki fakahelehele, mo e tau mana, mo e tau fakamalolo gagao kua fakaoti ai ha ko e tau mahani kelea he tau tagata.

14Ti ne nakai ha ha i ai ha mena fakaalofa mai he Iki, mo e nakai ha ha i ai e Agaaga Tapu ke he ha taha, ha ko e tau mahani kelea he tau tagata mo e nakai tua.

15Ti ko au, he magaaho ia ne kua hogofulu ma lima e haaku a tau tau mo e loto matala, ko e mena ia ne fai fakakiteaga e iki ki a au ti iloa mo e logona ai e au e mitaki ha Iesu.

16Ti ne lali agataha au ke fakamatala atu ke he tau tagata nai, ka kua pa haaku a gutu, moe fakatapu au aua neke fakamatala atu ki a lautolu; he kitia la, ne fakafetoko pauaki a lautolu ke he ha lautolu a Atua; ti kua uta kehe ai e tau tutaki fakahelehele mai he motu, ha ko e ha lautolu a tau mahani kelea.

17Ka ne tumau ni ne nofo au mo lautolu ka kua fakatapu au nakai maeke ke fakamatala ki a lautolu, ha ko e tau loto uka ha lautolu; ti ko e tau loto uka ia ha lautolu a ti malaia ai e motu.

18Ti ko e tau kau fofo mena a Katianatoni ne ha ha i ai ke he tau Lamana, ne tolotologa ai ke he motu, kua pihia ai, a ti kamata ai e tau tagata ke fufu ai e ha lautolu a tau koloa uho ke he kelekele; moe momole noa ai, ha kua kaiaalu he Atua e motu, kua nakai maeke ke mau ai po ke liu foki ke moua ai.

19Ti hoko ai, ne ha ha i ai e tau taulatua, mo e tau mena fakataulatua moe tau mana; mo e malolo he tiapolo kua puke namo ke he motu katoa, ke hoko ke fakakatoatoa e tau kupu oti ne vagahau ai e Apinatai pihia foki mo Samuela ko e Lamana.