Ko e Tohi a Enosa

1Kitia la, ne hoko ai, kua fakamooli ai e au ko Enosa, mo e iloa ai e au haaku a matua ko ia ko e tagata malolo, ha kua fakaako e ia au ke he vagahau haana, ti pihia foki ni ke he finagalo he Atua, ki a fakamonuina e higoa he haaku a Atua ke he mena ia —

2To tala atu e au ki a mutolu haaku a taufaagatua ki mua he Atua fakamua to moua e au e fakamagaloaga he haaku a tau hala.

3Kitia la, ne fano au mo e takafaga manu ke he vao; mo e logona ai e au e tau kupu ne fa logona mau e au mai he haaku a matua hagaao atu ke he moui tukulagi, mo e fiafia he tau tagata tapu kua hufia ai ke he haaku a loto.

4Nukua hoge haaku a agaaga; ti fakatokotui atu ai au ki mua Haana ne tufugatia au, ti tagi atu ai au ki mua haana ke he liogi kua fakaleo lahi mahaki ke mafanatia ai haaku a loto, ke he aho katoa kua tagi atu ai au ki a ia, hanai, ne hoko mai e po, ne fakatumau ai ni haaku a leo ki luga a to hoko atu ke he lagi.

5Ti hoko mai ai e leo ki a au, kua pehe mai; Enosa na e, kua fakamagalo tuai haau a tau hala to fakamonuina a koe.

6Ti ko au nai ko Enosa, kua iloa e au, kua nakai fatipiko e Atua; ko e mena ia, kua uta kehe tuai haaku a tau hala.

7Ti pehe ai au: Ko e Iki na e, kua eke fefe e tau mena ia?

8Ti pehe, mai a ia ki a au; ha ko e haau a tua ki a Keriso ne nakai logona tuai po ke kitia fakamua e koe. To loga foki e tau tau ke mole atu to fakakite mai a Ia ke he tino; ko e mena ia, fano a, koe, ha ko e haau a tua, kua katoatoa ai a koe.

9Ne hoko ai, ko e magaaho ne logona ai e au e tau kupu nai, ti kamata agataha ke logona e au e mena ne manako au ke lagomatai haaku a tau matakainaga ko e tau tagata Nifai; ko e mena ia, ne liligi atu ai e au haaku a loto katoa ki mua he Atua ma lautolu.

10Ti ko e magaaho ne taufetului ai au ke he agaaga, kitia la, ko e leo he Atua kua hoko mai ke he loto haaku, pehe: To ahiahi atu au ke he haau a tau matakainaga fakalata ni ke he ha lautolu a malolo he leveki e haaku a tau poakiaga. Kua foaki atu e au ki a lautolu e motu nai, ko e motu kuasakatapu ai to nakai fakamalaia e au a to mahani kelea, ko e mena ia to a ahi atu ai au ke he haau a tau matakainaga ke tuga kua vagahau atu e au, ti ko e ha lautolu a tau holifono to tuku atu ni e au mo e momoko ki luga he tau ulu ha lautolu.

11Kua mole atu he logona e au, ko Enosa e tau kupu ia, a ti kamata agataha haaku a tua ke he Iki ke malolo ti liogi atu ai au ki a ia mo e ole fakamakamaka, ma e haaku a tau matakainaga ko e tau tagata Lamana.

12Ne hoko ai, kua mole atu he liogi au mo e gahua fakamakamaka ai, ti pehe mai e Atua ki a au: To foaki atu e au ki a koe e mena kua manako a koe ki ai ha ko e haau a tua.

13Ti ko e magaaho nai, kitia la, ko e manako hanai kua manatu au ki ai, kaeke kua pihia ko e haaku a tau tagata ko e tau tagata Nifai, ka veveli ai ha ko e ha lautolu a tau holifono, ti kaeke ke fakaotioti ai a lautolu, ka e nakai fakaotioti ai e tau tagata Lamana, ti kua ha ha i ai he Atua e tau fakamauaga he haaku a tau tagata, ko e tau tagata Nifai; ti kaeke kua pihia to ha ha i ai e malolo he lima tapu haana ke liuaki mai ke he tau aho fakamui ke he tau tagata Lamana ke liga fakamomoui ai a lautolu —

14Ha ko e vaha nai, kua uka lahi ha mautolu a laliaga ke liu fakatu mai a lautolu ke he tua mooli, ti kua mavehe ai a lautolu ha ko e ita, kaeke kua pihia, to moumou e lautolu e tau mena ne fakamau ai e mautolu mo mautolu foki fakalataha mo e tau mena tuai he tau matua ha mautolu.

15Ko e mena ia, kua iloa ai e au, ko e Iki ko e Atua kua maeke ia ia ke leveki ha mautolu a tau fakamauaga; ti tagi atu ai au tumau ki a ia, ha ko e mena pehe mai a ia ki a au; ko e tau mena oti kua ole a mutolu ki ai mo e tua, mo e taofi to moua ai ha ko e higoa a Keriso, to moua ai e mutolu.

16Ti kua ha ha ia au e tua ti ne tagi atu ai au ke he Atua ke leveki e tau tohi kua fakamau; ti taute ai e ia e maveheaga ki a au to ta mai e ia ke he tau tagata Lamana he magaaho kua tonu ki ai.

17Ko au ko Enosa, kua iloa e au, tuga mo e maveheaga ne taute ai e ia mo au, to pihia ni; ko e mena ia kua okioki ni e haaku a agaaga.

18Ti pehe mai e Atua ki a au: Ko e haau a tau matua foki ne ole mai ki a au ke he mena nai; to eke ni pihia ki a lautolu ke lata mo e ha lautolu a tua; ha ko e tua ha lautolu kua tatai ni mo koe.

19Ne hoko ai he magaaho nai, ko au ko Enosa, ne fina atu au ke he tau tagata Nifai, moe perofeta age ki a lautolu e tau mena ka hohoko mai, mo e fakamooli ai ke he tau mena ne logona mo e kitia ai e au.

20Ti fakamooli ai au ne kumikumi fakamakutu e tau tagata Nifai ke liu fakatu mai e tau tagata Lamana ke tua mo e fakamooli ke he Atua. Ka ko e ha mautolu a tau gahua, kua nakai kautu; kua fakatumau ni e ha lautolu a vihiatia, mo e takitaki ai ni he ha lautolu a tau manatu kelea ti tupu ai e favale mo e keli tagata a lautolu, kua puke namo ai ke he teva mo e tau mena kelea oti mo e kai ai ke he tau manu favale mo e nonofo ke he tau fale ie, mo e fanoa ai he tutakale mo e ha lautolu a tau tapulu kili manu kuku ke he ha lautolu a tau tokupu mo e hifi puga ai foki ha lautolu a tau ulu; ti makaka a lautolu ke he fana fiti mo e fua ulu miti mo e toki. Ti tokologa ia lautolu ne nakai kai ke he ha mena ka ko e tau vala manu mata ni; mo e tumau e fakamakamaka ha lautolu he kumi ia mautolu ke kelipopo ai.

21Ne hoko ai, ne gahua ai he tau tagata Nifai e fonua, mo e to ai loga e tau tega kehekehe, mo e tau akau kai, mo e tau fuifui manu totolo, mo e tau fuifui povi kehekehe mo e tau koti, mo e tau koti vao, katoa foki mo e loga e tau tolofonua.

22Ti tokologa foki e tau perofeta ha ha ia mautolu. Ka ko e tau tagata kua fakamao ni ha lautolu a tau ua mo e uka lahi ke maama ai.

23Ti nakai fai mena kehe ka ko e favale lahi ni, ko e fakamatala atu, mo e tau perofetaaga ke he tau ogo tau, mo e taufetoko mo e moumou mena, mo e fatiaki atu ki a lautolu e mate, mo e leva he moui tukulagi, mo e fakafiliaga mo e malolo he Atua, mo e tau mena oti ia, ke fakalagalaga mau atu ki a lautolu ke matakutaku ke he Atua. Kua pehe au ne nakai fai mena kua ku mai he tau mena ia, ti ko e tau hatakiaga ni kua mahino, kua tautaofi ai a lautolu mo e nakai mafiti ke fakaotioti ai. Ti pihia etau mena ne, tohi e au hagaao ki a lautolu.

24Ti kitia ai e au e tau felakutaki he tau tagata Nifai mo e tau tagata Lamana he tau aho he haaku a moui.

25Ne hoko ai, kua motua tuai haaku a tino mo e mole atu ai e taha e teau mo e fitu e hogofulu ma hiva e tau tau, tali mai he toka he matua ha mautolu ko Lihai a Ierusalema.

26Ti kitia e au kua lata tuai ke hifo au ke he haaku a tukuaga, kua moua e au e malolo mai he Atua kua lata ke fakamatala mo e perofeta atu au ke he tau tagata nai mo e tuku atu e tau kupu kua tonu kua ha ha i ai ia Keriso. Ti fakamatala pihia e au ke he tau aho oti he haaku a moui, mo e fiafia lahi ai he he tau mena kua tokuluga ia he lalolagi.

27Ti kua teitei tuai ke fano au ke he mena ke okioki ai, mo e haaku a Fakamoui; ha kua iloa e au, ko ia ke okioki ai au. Ti fiafia ai au he magaaho ka liliu ai haaku a tino fakalalolagi ke he tino nakai mate, mo e tu ai ki mua haana; mo e kitia ai e au haana a fofoga mo e fiafia lahi, ti pehe mai a ia ki a au. Hau a ki a au ke monuina ai ha ko e mena ha ha i ai e mena kua tauteute e au ke nofo ai a koe he fale he haaku a Matua. Amene.