1Ko e magaaho nai, ko au, ko Nifai, kua nakai maeke ia au ke tohi e tau mena oti ne fakaako ke he haaku a tau tagata; kua nakai malolo au ke tohi e tau mena tuga he vagahau atu; ha ko e mena ka vagahau ha tagata e tau mena ha ko e malolo he Agaaga Tapu, kua uta he malolo he Agaaga Tapu e tau mena na ke he tau loto he fanau he tau tagata.

2Ka e kitia la, kua tokologa e tau tagata kua fakamao mo e totoko e tau loto ha lautolu ke he Agaaga Tapu, ti nakai fai mena ke nofo ai a ia, ko e mena ia, kua tiaki ke he e lautolu loga e tau mena kua tohi mo e manatu ni ke he tau mena kua nakai aoga ha mena he tau mena ia.

3Ka e ko au, ko Nifai, kua tohi e au e tau mena ne tohi e au, mo e manatu e au kua aoga lahi e tau mena ia ke he tau tagata haaku. Kua liogi au ma lautolu he tau aho oti, mo e tafe foki e haaku a tau hihina mata he pouli he po, ha ko lautolu; kua tagi atu foki au ke he haaku a Atua ke he tua, ti kua iloa e au to fanogonogo mai a ia ke he haaku a tagi.

4Ha kua iloa e au to fakatapu he Atua e haaku a tau liogi ke eke mo monuina ma e haaku a tau tagata. Ti ko e tau kupu kua tohi e au mo e loto lolelole to eke e tau kupu ia mo mena malolo ki a lautolu; ha kua hataki atu he mena nai a lautolu ke taute e tau mena mitaki; kua fakailoa atu foki ki a lautolu e tau mamatua ha lautolu; kua vagahau atu foki hagaao ki a Iesu mo e hataki a lautolu ke tua ki a ia, mo e fakatumau ke he fakahikuaga, ko e moui tukulagi haia.

5Ha kua vagahau fakalahi ke totoko ke he hala ke lata mo e tau mena mooli; ko e mena ia, to nakai ita e taha ha ko e tau kupu kua tohi e au, ka to pihia ni ka ha ia ia e agaaga he tiapolo.

6Kua fakaheke lahi au ke he tau mena kua mukamuka, kua fakaheke foki au ke he tau mena mooli; kua fakaheke foki au ha ko Iesu, ha kua fakamoui e ia e haaku agaaga mai i teoli.

7Kua ha ha ia au e fakaalofa ma e tau tagata haaku, mo e tua fakalahi au ki a Iesu to feleveia au mo e loga he tau tagata kua nakai fai hala,

8Kua ha ha ia au e fakaalofa ke he tau tagata Iutaia — kua pehe au, ma tau tagata Iutaia, ha ko e kakano ne tupu mai ai au.

9Kua fakaalofa foki au ke he tau Tagata Kehe. Ka e kitia la, kua nakai maeke au ke amaamanaki ki a lautolu a to talia ni a lautolu ki a Keriso, mo e huhu atu ke ke gutuhala pu kilu, mo e o atu ai ke ke puhala kua hako ke hoko atu ke he moui, mo e fakatumau ke he puhala na a to mole atu ai e magahala ne nofo tauteute ai.

10Ko e magaaho na ma haaku tau matakainaga fakahelehele na e, mo e tau tagata Iutaia foki mo mutolu oti kana kua nonofo ke he lalolagi, kia fanogonogo a mutolu ke he tau kupu nai mo e tua ki a Keriso; ti kaeke kua nakai tua ke he tau kupu nai, kia tua ki a Keriso. Ti kaeke ke tua a mutolu ki a Keriso to tua foki a mutolu ke he tau kupu nai, ha ko e tau kupu nai ha Keriso a ia, ne foaki mai e ia ki a au; mo e fakaako ai e tau tagata oti kana ke eke ai e tau mena mitaki.

11Kaeke nakai ko e tau kupu ha Keriso, kia fakafili e mutolu — to fakakite e Keriso ki a mutolu ha ko e haana malolo mo e lilifu, ko e tau kupu ni haana , ke he tau aho fakamui; ha ko e mena to tutu a koe mo au mo e femataaki ki mua he haana nofoa fakafili; to iloa ai e mutolu he mogo ia ne poaki e ia ki a au ke tohi e tau mena nai, pete ni kua lolelole au.

12Ti kua liogi au ke he matua ke he higoa ha Keriso ke maeke he tokologa ia tautolu, ka nakai oti; ke fakamomoui ke he haana kautu ke he aho lahi ia fakamui.

13Ti ko e magaaho nai, ma haaku tau matakainaga fakahelehele na e, ko mutolu mai he magafaoa a Isaraela, ko mutolu oti kua nonofo ke he lalolagi nai, kua vagahau atu au ki a mutolu ke tuga e leo he taha kua vagahau mai he kelehele: Mavehe a, a to hoko ke he aho lahi na.

14Ko mutolu kua nakai mafai ke taofi ke he fakaalofa he Atua, mo e fakalilifu ke he tau kupu he tau tagata Iutaia, mo e haaku foki a tau kupu, po ke tau kupu ka tuku mai he gutu he Punua Mamoe he Atua, kitia la, kua mavehe atu fakahiku au ha ko e tau kupu nai ke fakahala ai a mutolu ke he aho fakamui.

15Ha ko e tau mena kua fakamau e au ke he lalolagi nai, to fakafili aki a mutolu ke he nofoa fakafili; ha kua pihia ne poaki mai he Iki ki au, ti kua lata ni ke omaoma e au. Amene.