1Ko e mena ia ma Iakopo na e, kua vagahau atu au ki a koe: Ko koe, ko e uluaki haaku ne fanau ai ke he tau aho he haaku a matematekelea ke he tutakale. Kitia la, ko e vaha ne tama tote ai a koe ne matematekelea lahi foki a koe ha ko e tau mahani hemu he haau a tau matakainaga.

2Pete ni ia ma Iakopo, ko e haaku a uluaki he tutakale, kua iloa e koe e lilifu mo e tau mitaki he Atua; to fakatapu e ia ki a koe e haau a matematekelea ke moua ai e koe e tolomakiaga.

3Ko e mena ia to fakamonuina ai e haau a moui, mo e to nonofo fakalataha mo e mafola a koe mo e haau a matakainaga ko Nifai, ko e haau a tau aho foki to fakamole ai ke he gahua he Atua. Ko e mena ia, kua iloa e au kua laveaki tuai a koe, ha ko e mahani tututonu he haau a Fakamoui; ha kua tuga he iloa e koe, ka hoko mai e katoatoaaga he tau magaaho, to haele mai a ia ke lata mo e fakamouiaga he tagata.

4Kua kitia foki e koe ke he haau a vaha fuata e haana a lilifu; ko e mena ia, kua fakamonuina tuai a koe fakalataha mo lautolu kua takitaki e ia ke he tino, ha kua tatai ni e Agaaga he Atua, i neafi, aho nai, ke hoko ke he tukulagi. Ko e puhala foki kua tauteute tuai mai he veliaga he tagata, ti ko e fakamouiaga kua ataina.

5Kua lahi foki e hatakiaga ke he tau tagata ke iloa ai e mitaki mai he kelea. Kua foaki atu foki e tau fakatufono ke he tau tagata. Mai foki he fakatufono kua nakai tonu taha po ke, ko e fakatufono foki ke uta kehe ai e tau tagata. Hanai, ko e fakatufono fakalalolagi ke uta kehe ai a lautolu, ti pihia foki, ke he fakatufono fakaagaaga, to mamate ai a lautolu mai he mena kua mitaki, mo e moua ai e matematekelea tukulagi.

6Ko e mena ia, kua hoko mai ai e fakamouiaga ha ko e Mesia Tapu ha kua puke namo ni a ia ke he fakaalofa mo e mooli.

7Kitia la, kua foaki mai e ia a ia ke matulei ma e tau hala, mo e fakamooli foki ke he fakatufono, ma lautolu kua moua ai e tau loto malipilipi mo e tau loto holoilalo to nakai moua ke he taha foki e fakahikuaga he fakatufono.

8Ko e mena ia, kua mahuiga ai, ke fakailoa atu e tau mena nai ke he tau tagata oti he lalolagi ke iloa ai e lautolu kua nakai maeke ha tagata ke he tino ke hu atu ke he kautu he Atua, ka e kua maeke ni ke he tau mahani mitaki mo e fakaalofa noa he Mesia Tapu, he foaki e ia haana a moui fakatino tagata, mo e liu fakamoui mai foki ke he malolo he Agaaga, ke foaki mai ai, e liu tu mai he mate, ko ia foki ko e uluaki he liu tu mai.

9Ko e mena ia, ko ia ko e fua uluaki he tau fua oti ki mua he Atua, ha kua maeke foki a ia ke ole lalo atu ke he Atua ma e tau fanau he tau tagata, ti ko lautolu kua tua ki a ia to fakamomoui ai.

10Ha ko e ole lalo haana ma e tau tagata oti, kua maeke ai he tau tagata oti kana ke o atu ke he Atua; ko e mena ia kua tutu ai a lautolu ki mua haana ke fakafili ai ke he puhala tonu mo e tapu ha ha ia ia. Ko e mena ia, ko e fakaotiaga he tau fakatufono ne foaki mai he Tama Tapu haana, mo e tau fakahala foki kua fakatoka ki ai, ko e tau fakahala ia, kua kehe mai he tau mena kua fakatoka ke fiafia ai ke lata ai mo e lukutotoaga.

11ha kua pauaki ni ke pihia, ke fai fetokoaga e tau mena oti. Kaeke kua nakai pihia ma haaku a tama uluaki he tutakale kua nakai fakaai ke hoko mai e tututonu po ke tau mahani kelea foki, po ke tau mena tapu mo e tau mena ke matematekelea ai po ke tau mena kua mitaki po ke kelea. Ko e mena ia, kua lata he tau mena oti ke lafi fakalataha ke taha ni; ko e mena ia, kaeke kua pihia, kua taha foki e tino ke hoko ki ai e mate. Ka nakai fai moui to nakai fai mate foki, to nakai fai mena popo po ke nakai popo foki, po ke fiafia po ke matematekelea foki, manamanatuaaga mitaki po ke fakagoagoa.

12Ko e mena ia, kaeke ke eke ai e tau mena mai he mena noa; ko e mena ia, a po kua nakai fai kakano e fakaotiaga he tufugatiaaga. Ko e mena ia, ko e tau mena nai kua moumou aki e loto matala he Atua mo e haana a amaamanakiaga tukulagi, mo e haana a malolo mo e haana fakaalofa noa mo e fakafiliaga he Atua.

13Kaeke ke pehe mai a mutolu kua nakai fai fakatufono, to pehe mai foki a mutolu kua nakai fai agahala. Kaeke foki kua pehe mai a mutolu kua nakai fai agahala to pehe foki a mutolu kua nakai fai tututonu. Ti kaeke ke nakai fai tututonu kua nakai fai fiafia foki. Ti kaeke kua nakai fai tututonu po ke fiafia to nakai fai fakahala po ke matematekelea. Kaeke foki kua nakai ha ha i ai e tau mena na, kua nakai fai Atua foki. Kaeke foki kua nakai fai Atua kua nakai fai tautolu po ke lalolagi foki; ha ko e mena to nakai fai tufugatiaage ke he tau mena oti ke gahua mo e taute ai; ko e mena ia kua galo noa ai e tau mena oti.

14Ti ko e mena ia ma haaku tau fanau kua vagahau atu ai e au e tau mena nai ke monuina mo e lotomatala ai a mutolu; ha koe mena ha ha i ai e Atua ne tufugatia foki e ia e tau mena oti, he lagi mo e lalolagi mo e tau mena oti kana kua ha ha i ai, ko e tau mena ke taute mo e gahua ki ai.

15Kua fakakite mai foki e haana a tau amaamanakiaga kua tukulagi ni ke lata mo e fakaotiaga he tagata, tuga he mole atu ai e tufugatia e ia e tau mamatua uluaki ha tautolu, pihia foki mo e tau manu totolo mo e tau manu lele he pulagi, kua mitaki ni ko e tau mena oti kua tufugatia ai, ne pauaki ni ke fai fetokoaga; tuga ni e kehekeheaga he fua akau fakatapu mo e akau he moui; ha kua magalo e taha ka e kona e taha.

16Ko e mena ia ne foaki atu he Atua ke he tagata e tau mena ke eke ai e ia ki a ia ni. Ko e mena ia kua nakai maeke he tagata ke gahua a ia, a to fakaohooho a ia he mena mitaki po ke mena kelea.

17Ti ko au ko Lihai, tuga mo e tau mena kua totou e au, kua lata ke pehe, ne fai agelu he Atua ne to mai he lagi tuga mo e tau mena kua tohia, ko e mena ia, kua eke agataha a ia mo tiapolo ne kumikumi atu a ia ke he tau mena kua kelea, ki mua he Atua.

18Ha kua to mai a ia he lagi, moe matematekelea ai tukulagi, kua kumi atu foki a ia ke he tau mena ke matematekelea ai e tau tagata oti, ko e mena ia, ne vagahau atu ai a ia ki a Eva, hanai, ko e gata tuai a ia ko ia ko e tiapolo, mo e eke ai foki a ia mo matua he tau pikopiko oti kana, kua vagahau atu a ia, kia kai e koe e fua akau tapu ti nakai mate ai a koe, ka e to tatai ai a koe mo e Atua, ke iloa ai e mitaki mo e kelea.

19Mole atu he kai e Atamu mo Eva e fua he akau tapu kua vega kehe mai a laua he fonua ko Etena, ke gahua ai ke he kelekele.

20Ti fanafanau ai e laua e tau fanau, hanai, ko e magafaoa he lalolagi katoa.

21Ko e tau aho ne momoui ai e tau fanau he tau tagata kua fakaloaloa ni tuga ne finagalo ki ai e Atua, ke maeke ai a lautolu ke fakatokihala ke he tino, ha ko e mena ia, ko e magaaho ia ke gahua ai ti kua fakaloa foki e magaaho ke momoui ai a lautolu, ke lata mo e tau fakatufono he Iki ko e Atua, kua tuku mai ke he tau fanau he tau tagata. Ha kua tuku atu e ia e fakatufono ke fakatokihala e tau tagata oti; ha kua fakakite atu e ia ke he tau tagata oti, kua galo noa a lautolu ha ko e holifono he tau mamatua uluaki ha lautolu.

22Kitia la a ne mai nakai holifono a Atamu ne nakai veli a ia, ka e to nofo ni a ia ke he fonua i Etena. Ti ko e tau mena oti ne kua tufugatia ai to pihia foki ni, tuga he kamataaga; to tukulagi a lautolu mo e nakai fai fakaotiaga.

23To nakai fai fanau a lautolu; to nonofo noa ni a lautolu mo e nakai iloa ai e fiafia, ha ko e mena nakai iloa e lautolu e kelea; nakai eke ai foki ha mena mitaki, ha ko e mena nakai iloa e lautolu e agahala.

24Ka e kitia la, kua eke ni e tau mena oti ke he iloilo haana ne iloa e tau mena oti.

25Ne veli a Atamu kia ha ha i ai e tau tagata, kua tufugatia e tau tagata, ke moua ai e lautolu e fiafia.

26To haele mai e Mesia ka katoatoa ai e tau magaaho; ke fakamomoui ai e tau fanau he tau tagata mai he veliaga ha Atamu, kua fakamomoui a lautolu mai he veliaga to moua ai e lautolu e tokanoaaga tukulagi, ke iloa ai e mitaki mo e kelea; mo e gahua ni a lautolu ma lautolu ni, ka e nakai fekafekau noa ai, to fakatoka ai foki ke he fakatufono e fakahalaaga lahi ke he aho lahi fakamui, ke lata ia mo e tau fakatufono kua foaki mai he Atua.

27Ko e mena ia kua tokanoa ai e tagata ke he tino; ti kua foaki atu foki ki a lautolu e tau mena loga kua lata ma e tagata. Kua ataina foki a lautolu ke fifili e tokanoaaga mo e moui tukulagi, ke he fakamafolaaga he tau tagata oti, po ke fifili ke he fakatupa mo e mate, tuga e fakatupaaga mo e malolo he tiapolo; kua kumi a ia kia matematekelea e tau tagata oti ke tuga a ia.

28Ma haku tau fanau, kua manako au ke onoono atu a mutolu ki a ia ne eke e Mafola, mo e fanogonogo atu ke he haana a tau fakatufono ne mua, mo e fakamooli ke he haana a tau kupu, mo e fifili foki ke he moui tukulagi, ke tuga e finagalo he haana a Agaaga Tapu.

29Ti aua ia neke fifili ke he mate tukulagi, ke tuga ia mo e finagalo he tino mo e agaaga kelea kua ha i ai, kua tuku ai ke he agaaga he tiapolo e malolo ke hele ai, mo e takitaki atu ai a koe ki teoli, mo e pule ai a ia ki a koe ke he haana a kautu.

30Kua vagahau atu ai e au e tau kupu gahoa nai ki a mutolu oti ma haku tau fanau, ke he haaku a tau aho fakahikuhiku nai he haaku a tau gahua; ti kua fifili ni au ke he faahi mitaki, ke lata ia mo e tau kupu he perofeta. Ti kua nakai fai mena foki au ne amanaki ki ai ko e mafola tukulagi ni ma e tau agaaga ha mutolu. Amene.