1Kitia la to tokologa ai — he aho ka kamata ai au ke eke ai e tau gahua mitaki haaku ma lautolu, ke maeke ai ia au ke manatu e tau maveheaga ne kua eke ai e au mo e tau fanau he tau tagata, ka liu fakaolo atu foki e lima haaku ke laga ua aki ke laveaki ai e haaku a tau tagata, ko e magafaoa a Isaraela.

2To manatu foki e au e tau maveheaga ne kua eke ai e au ki a koe, ma Nifai, ti pihia foki ke he haau a matua, ke maeke ai ia au ke manatu foki e haau a tau fanau; ti ko e tau kupu foki he haau a fanau to vagahau mai ai he gutu haaku ki a lautolu; ti ko e tau kupu foki haaku to taogo atu foki ke he tau mata pokopoko oti he lalolagi, mo puhala ke he haaku a tau tagata, ko e magafaoa a Isaraela.

3Ha ko e mena to taogo fano ai e haaku a tau kupu — to tokologa foki a lautolu e tau Tagata Kehe ka pehe, mai; Ko e Tohi Tapu! Ko e Tohi Tapu! Kua ha ha ia mautolu e Tohi Tapu, kua nakai lata ke fai Tohi Tapu foki.

4Ka e pehe mai e Iki ko e Atua: Ma tau goagoa na e, to moua e lautolu e Tohi Tapu; ti to moua mai ai he tau Iutaia, ko e haaku a tau tagata he maveheaga i tuai, Ti fakaaue nakai a lautolu ke he tau tagata Iutaia ke he Tohi Tapu ne moua mai ia lautolu? Hanai, ko e hagaao fefe e manatu na he tau Tagata Kehe? Na manatu nakai e lautolu e tau fenoga, mo e tau gahua mo e tau mamahi he tau tagata Iutaia mo e ha lautolu a fakamakutu mai ki a au, ke foaki mai ai e fakamouiaga ke he tau Tagata Kehe?

5Oi ma tau Tagata Kehe na manatu nakai e mutolu e tau tagata Iutaia ko e haaku a tau tagata he maveheaga i tuai? Nakai; ka kua kaiaalu e mutolu a lautolu mo e fakavihia mo e nakai kumikumi atu ke liu laveaki mai a lautolu. Ka e kitia la, to liuaki atu oti e au e tau mena nai ki luga he tau ulu ha mutolu; ha kua nakai nimo ia au ko e Iki, e haaku a tau tagata.

6Ma goagoa na e, kua pehe mai: ko e Tohi Tapu, kua ha ha ia mautolu e Tohi Tapu, mo e kua nakai lata foki ia mautolu ke moua foki taha Tohi Tapu. Kua moua kia e mutolu e Tohi Tapu ka e nakai ki mai ia he tau Iutaia?

7Nakai kia iloa e mutolu na tokologa e falu a kautu, ka e nakai taha ni? Nakai kia iloa e mutolu ko au ko e Iki ha mutolu a Atua, ne tufugatia ai e tau tagata oti, mo e manatu foki e au a lautolu kua nonofo ai ke he tau motu ikiiki he tahi; ti pule foki au ke he lagi katoa foki mo e tau mena i lalo he lalolagi; mo e tuku atu foki e haaku a kupu ke he tau fanau he tau tagata, pihia foki mo e tau kautu oti he lalolagi?

8Ko e mena ia kua vagavagahau a mutolu, ha ku a logona ai foki e mutolu e loga he haaku a tau kupu? Iloa nakai e mutolu ko e fakamooliaga he na kautu ne ua, ko e fakamooli ia ki a mutolu ko au ko e Atua kua manatu ai e au e taha kautu tuga ke he taha! Ko e mena ia kua vagahau atu foki e au e tau kupu kua tatai ke he taha kautu tuga ke he taha kautu. Ti kaeke ke fakalataha ai e na kautu ne ua ko e tau fakamooliaga na ne ua to lafi fakalataha ai foki.

9Kua eke e au e tau mena nai ke fakakite atu ke he tokologa kua tatai ni au i ne afi mo e aho nai mo e to hoko ke he tukulagi; mo e vagahau atu foki e au e haaku a tau kupu ke he haaku ni a finagalo. Ti kaeke kua vagahau e au e taha kupu, aua neke manatu a mutolu kua nakai maeke ia au ke vagahau foki e taha; ha ko e haaku a gahua kua nakai la fakaoti ia to pihia foki a to hoko ke he fakahikuaga he tagata ke kamata mai he magaaho ia ke hoko atu ke he tukulagi.

10Ko e mena ia, ha kua moua e mutolu e Tohi Tapu, aua neke manatu a mutolu kua katoatoa ki ai e haaku a tau kupu; po ke manatu foki a mutolu ne nakai fekau e au ke tohia ai falu a mena loga.

11Ha kua poaki atu au ke he tau tagata oti, mai he faahi uta mo lalo, mai foki i tokelau ki toga, mo e tau motu ikiiki foki he tahi, ke tohi ai e lautolu e tau kupu kua vagahau atu e au ki a lautolu; ha ko e mena mai he tau tohi na kua fakamau ai e tau mena ke fakafili ai e au e lalolagi, mo e tau tagata oti ke lata mo e tau gahua ha lautolu, pihia mo e tau mena kua tohia ai.

12Kitia la, to vagahau atu au ke he tau tagata Iutaia, mo e to fakamau ai e lautolu; mo e to vagahau atu foki au ke he tau tagata Nifai to fakamau ai foki, e lautolu mo e to vagahau atu foki au ke he tau fanau he magafaoa a Isaraela ne kua takitaki kehe ai e au, to fakamau foki e lautolu, mo e to vagahau atu foki au ke he tau kautu oti he lalolagi to fakamau ai foki e lautolu haaku a tau kupu.

13To hoko mai ai e magahala ke moua ai he tau fanau Iutaia e tau kupu he tau Nifai mo e to moua foki he tau Nifai e tau kupu he tau Iutaia, mo e to moua ai foki he tau Nifai mo e tau Iutaia e tau kupu he maga fanau a Isaraela ne galo mo e to moua foki he fanau ne galo ha Isaraela e tau kupu ha Nifai mo e tau Iutaia.

14Ti hoko ai e magahala ke he haaku a tau tagata, mai he magafaoa a Isaraela, ke fakamaopoopo ai ke he motu ne kua fifili ma lautolu: mo e to fakamaopoopo ai e haaku a tau kupu ke taha ni. To fakakite atu e au ki a lautolu ne kua latau mai ke he haaku a kupu mo e haaku a tau tagata foki he magafaoa a Isaraela, ko au ko e Atua ne mavehe mo Aperahamo, to manatu e au e haana a tau fanau ke hoko ke he tukulagi.