1Kitia la ne hoko ai ke he magaaho, ne tagi atu au, ko Nifai, ke he haaku a Iki ko e Atua, ha ko e ita he haaku a tau matakainaga.

2Ka e kitia la, kua tupu lahi e ita ha lautolu ki a au, ti lali ai a lautolu ke uta kehe e haaku a moui.

3Hanai, ne feguigui ai a lautolu ki a au, mo e pehe: Kua manatu e tehina ha tautolu ke pule ki a tautolu, ti kua loga foki e tau matematekelea ha tautolu ha ko ia; ko e mena ia, kua lata ke kelipopo e tautolu a ia, ke nakai liu a tautolu ke matematekelea ai ha ko e haana a tau kupu. He kitia la, kua nakai manako a tautolu ke pule a ia ki a tautolu; ha kua ha ha ia tautolu e tau matakainaga momotua e pule ke he tau tagata nai.

4Ti kua nakai tohi e au ke he tau lapa maka nai e tau kupu oti ne loma e lautolu ki a au. Ka kua lata ni ke fakailoa atu, ne kumi a lautolu ke uta kehe ai e haaku a moui.

5Ne hoko ai, ne fakailoa mai he Iki ki a au, ko Nifai ke hola kehe mai ia lautolu ke he tutakale, fakalataha mo lautolu foki kua manako ke o atu mo au.

6Ko e mena ia, ne hoko ai, kua fehola kehe au, ko Nifai, mo e haaku a magafaoa mo Soroma mo e haana magafaoa, mo Samu, ko e haaku a taokete mo e haana magafaoa, mo Iakopo mo Iosefa, ko e lafu tehina haaku, mo e tau lafu mahakitaga haaku, mo lautolu oti kua manako ke o atu mo au. Ti ko lautolu oti ne o atu mo au, ne tua a lautolu ke he tau fakailoaaga mo e tau fakakiteaga mai he Atua; ko e mena ia, ne fanogonogo ai a lautolu ke he haaku a tau kupu.

7Ti uta e mautolu e tau fale ie mo e tau mena foki kua lata mo mautolu, mo e fenoga a mautolu ke he tutakale ke he loga e tau aho. Ti mole atu he loga e tau aho he o fenoga ai a mautolu, ne fakatu ai e tau fale ie ha mautolu.

8Ti ne manako e tau tagata haaku ke fakahigoa ai e matatepu na ko Nifai; ko e mena ia ne ui ai e mautolu e matatepu ia ko Nifai.

9Ti ne fakahigoa ai a lautolu ne nonofo mo au a lautolu ko e tau tagata Nifai.

10Ti ne makau mo e omaoma e mautolu e tau fakatufono mo e tau poakiaga he Iki, ke he tau mena oti ke tuga mo e tau fakatufono ha Mose.

11Ti ne fakalataha e Iki mo mautolu; ti muhu mena lahi a mautolu; ha kua gana e mautolu e tau tega, mo e helehele ai loga he tau fua. Ti kamata a mautolu ke leveki e tau fuifui mamoe, mo e tau povi, mo e falu a manu kehekehe foki.

12Ti ko au ko Nifai ne ta mai foki e au, e tau lapa maka veo, mo e mena veliveli foki, po ke takitaki puhala ne tauteute ai he lima he Iki ma e matua taane haaku, ke tuga mo e tau mena kua tohi ai.

13Ti hoko ai, ne kua monuina lahi a mautolu, mo e tupu tokologa ai ke he motu.

14Ti uta e au, ko Nifai, e pelu ha Lapana, mo e talaga e tau pelu foki tuga e pelu ia, neke o mai a lautolu ko e tau Lamana ke fakaoti a mautolu; ha kua iloa e au kua vihiatia lahi a lautolu ki a au mo e haaku a tau fanau, mo e haaku a tau tagata.

15Ti ne fakaako ai e au e haaku e tau tagata ke talaga e tau fale, mo e fakaaoga ai e tau akau ke he tau mena loga mo e gahua lapatoa, mo e apa kula, mo e veo, mo e lapatoa maō mo e auro mo e ario, mo e falu a maka uho foki, ne loga lahi ai ke he motu.

16Ti ne talaga ai e au, ko Nifai e faituga; ti talaga ni e au tuga e faituga ne tufugatia e Solomona, ka e ne nakai taute aki e au e tau mena uho loga; ha kua nakai moua ai ha mena pihia ke he motu nai ko e mena ia ati nakai maeke ke talaga ai tuga e faituga ha Solomona. Ka ko e talagaaga he faituga nai, kua taute ke tuga e faituga ha Solomona; ti ko e tau mena ne tufuga aki kua homo atu ni.

17Ti hoko ai, ko au ko Nifai, ne fakaako e au e haaku a tau tagata ke gahua malolo, mo e fakagahua e tau lima ha lautolu.

18Ti hoko ai, ne manako a lautolu ke eke a au mo patuiki ha lautolu. Ka ko au ko Nifai, kua nakai manako ke fai patuiki a lautolu; pete ni a ia, kua eke e au ma lautolu e tau mena kua malolo au ki ai.

19Ti kitia la, ne kua fakakatoatoa ai e tau kupu he Iki ke he tau matakainaga haaku, to eke au mo takitaki mo e faiaoga ha lautolu, ko e mena ia, ne kua takitaki mo e faiaoga au ki a lautolu, ke tuga mo e tau poakiaga he Iki, a to hoko ai ke he magaaho ne fakafualoto a lautolu ke uta kehe e haaku a moui.

20Ko e mena ia, kua fakakatoatoa ai e tau kupu he Iki ne vagahau mai ki a au, ne pehe mai: Kaeke ke nakai talia e lautolu e tau kupu haaku to uta kehe a lautolu mai i mua he Iki. Ti kitia la, ne kua uta kehe e ia a lautolu mai i mua haana.