Ko e Tohi ke Ua Aki a Nifai

1Ti ko e magaaho nai kua mole atu ai e vagahau haaku ko Nifai, mo e fakaako atu ke he haaku a tau lafu, kua vagahau atu foki he matua ha mautolu ko Lihai loga foki he tau mena ki a lautolu — ke he tau mena lalahi ne eke ai he Atua ha lautolu he magaaho ne ta mai ai e ia a lautolu he maaga ko Ierusalema.

2Kua vagahau atu foki a ia ki a lautolu ke he tau mahani fa totoko ha lautolu ke he moana ne fenoga mai ai mo e tau fakaalofa he Atua, ha kua laveaki e ia ha lautolu a tau momoui, mo e nakai haofia ai ki luga he moana puke lahi.

3Kua vagahau atu foki a ia, ki a lautolu hagaao ia ke he motu he maveheaga, ne kua moua ai e lautolu mo e fakalofa noa he Atua, ne fakailoa mai ki a tauto lu, ke fehola kehe mai he maaga ko Ierusalema.

4Kitia la, he vagahau mai e ia, kua kitia e au e fakakiteaga, mo e iloa ai e au kua moumou mooli tuai a Ierusalema, a ne mai na nonofo a tautolu i Ierusalema, liga kua mamate foki a tautolu.

5Pete ia, he vagahau mai e ia, kua fehagai foki a tautolu mo e tau matematekelea loga, kua moua tuai e tautolu e motu he maveheaga, ko e motu kua fifili mai he tau motu kehekehe, ko e motu kua mavehe mai he Atua ki a au, ke nonofo faihau ai e haaku a tau fanau. Hanai kua mavehe mai he Iki e motu nai ki a au, ma e tau fanau haaku ke nonofo ai tukulagi, pihia foki mo lautolu kua takitaki mai he Iki he falu a motu, ke he haana a lima.

6Ko e mena ia, ko au ko Lihai, kua perofeta atu e tau mena kua fakakite mai he agaaga i loto ia au, to nakai fakaai taha ke hoko mai ke he motu nai, ka nakai takitaki mai he lima he Iki.

7Ko e mena ia, kua fakatapu ai e motu nai, ki a ia ka fakatu mai ai e ia. Ti kaeke kua pihia, kua lata ia lautolu ke fekafekau atu ki a ia, tuga kua fakakite mai ai he tau fakatufono kua foaki mai e ia, to eke ai e motu mo fonua ataina ma lautolu; ko e mena ia, to nakai fakaai ke kaumahala ai ke he tau fi; kaeke kua pihia, to kaumahala ni ha ko e tau mahani kelea; ti kaeke foki ke tupu lahi ai e tau mahani kelea to malaia ai e motu, ka e ko lautolu kua mahani tututonu to fakatumau ni e fakamonuinaaga ke he tukulagi.

8Kitia la, kua lotomatala ke ua iloa ai he falu a kautu e motu nai, he kitia la, to fofo ai he falu a kautu e motu, mo e nakai fai fonua foki ke lata mo e tau hukui he tau aho a mui.

9Ko e mena ia, ko au ko Lihai, kua moua ai e maveheaga, pihia foki mo lautolu ka takitaki mai he Atua he maaga ko Ierusalema. Kua lata ke omaoma ke he haana a tau fakatufono, to muhu mena ai a lautolu ke he motu nai, to puipui foki a lautolu mai he falu a kautu, ke eke ai e motu nai mo motu ha lautolu. Ti kaeke foki ke fakatumau a lautolu ke omaoma ke he tau fakatufono he Atua to fakamonuina a lautolu ke he tau mena oti he motu nai, to nakai mahaikava taha ia lautolu po ke uta kehe ai e motu he maveheaga nai ia lautolu, ka e to nonofo mafola ai a lautolu tukulagi.

10Ka e kitia la, to hoko mai e magaaho, to nonofo ai a lautolu ke he pouli mo e nakai tua ke he ha mena taha, kua mole atu foki he moua e mutolu e tau fakamonuinaaga mai he lima he Iki — mo e moua ai foki e lotomatala ke he tufugatia he lalolagi, mo e tau tagata oti, kua iloa ai e lilifu mo e tau gahua lalahi ne eke he Atua mai he kamataaga he lalolagi; moua ai foki e lautolu e pule malolo ke eke ai e tau mena oti ha ko e tua, moua ai foki e tau fakatufono tali mai he kamataaga, mo e mitaki foki haana kua takitaki mai a tautolu ke he motu he maveheaga kitia la, kua tala atu pehe kaeke ke hoko mai e aho na, ti kaeke ke nakai talia e mutolu e Tama Tapu ha Isaraela, ko e Mesia mooli, ko e Fakamoui mo e Atua ha lautolu, kitia la, ko e fakafiliaga haana kua tonu to hoko mai ki a lautolu.

11Hanai, to ta mai e ia e falu he tau kautu kehe ki a lautolu, to foaki atu foki e ia ki a lautolu e malolo, to uta kehe foki e ia, mai ia lautolu e tau fonua ha lautolu, mo e to fakamavehevehe e ia a lautolu, mo e moumou ai.

12Hanai, to mole atu ai e taha hau ke he taha hau, to ha ha i ai e lahi he fakamaligi toto, mo e tokologa ke ahiahi atu ki a lautolu, ko e mena ia ma haaku tau fanau, kua manako au ke manatu e mutolu e tau mena nai; hanai, kua manako au ke manatu e mutolu mo e fanogonogo mai ke he haaku a tau kupu.

13Oi, kia aala mai a; aala mai a he mohe, hanai tuga ni kua mohe i teoli, mo e lulu kehe e tau filifili mamafa na kua lili i a mutolu, ko e tau filifili a na ne kua lili ai e fanau he tau tagata, mo e uta kehe ai a lautolu ke fakatupa ai ke he pahua kua ha ha i ai e matematekelea mo e tagi aue.

14Aala mai! mo e matike mai a he kelekele, mo e fanogonogo atu ke he tau kupu akonaki he matua ukiuki kua tata lahi mai e magaaho ke fakatakoto ai e haana a tau alaga ke he tukuaga, mo e ogoogonoa, kua nakai maeke ha tagata o fenoga ke li liu mai ai; toe gahoa ni e tau aho ti fina atu au he puhala na ka o atu ai e tau tagata oti he lalolagi.

15Ka e kitia la, kua laveaki mai he Atua e haaku a moui mai i teoli kua kitia foki e au e haana a lilifu, ti kua nofo tukulagi ni au, ke he lima fakaalofa haana.

16Ti manako au ke manatu e mutolu ke onoono atu ke he tau puhala gahua mo e tau fifiliaga he Iki; kitia la, ko e lavelave he loto haaku a na mai he kamataaga.

17Kua pehia ai e haaku a loto ke he momoko he taha magaaho ke he taha magaaho, ha kua matakutaku mau, ke he uka mo e mao he tau loto ha mutolu, kua maeke he Iki ko e Atua ha mutolu, ke he haana a ita ke he tau mahani kelea ha mutolu, ke uta kehe ai a mutolu mo e fakaoti ai tukulagi.

18Po ke, to fakamalai ka ai e ia a mutolu ke he tau magahala he taha hau ke he taha hau; to feleveia ai foki a mutolu ke he pelu mo e hoge, mo e fakavihia foki, mo e to takitaki foki a mutolu ke he finagalo mo e paeaaga he tiapolo.

19Ma haaku tau fanau na e, kia nakai hoko mai e tau mena nai ki a mutolu, ka kia eke a mutolu mo tau tagata fifili mo e fiafia foki ki ai e Iki. Ka e kitia la, to eke ai e haana a finagalo ha ko e haana a tau puhala kua tututonu ni tukulagi.

20ti kua pehe mai a ia: Kaeke ke omaoma mai a mutolu ke he haaku a tau poaki, to muhu mena ai a mutolu ke he motu; kaeke ni kua nakai omaoma a mutolu ke he haaku a tau poaki to uta kehe ai a mutolu mai i mua haaku.

21Ko e magaaho nai, kia fiafia ai e haaku a agaaga ia mutolu, mo e toka ai he loto haaku e lalolagi nai mo e fiafia ni, ha ko mutolu, ka e nakai moua ai e au e tagi mo e momoko ke he haaku a haele atu ke he tukuaga, kia mamatike mai a he kelekele, ma haaku tau fanau na e, mo e eke a mo tau tagata, mo e pipi mau ke he taha ni e manatu mo e loto, kua fakalataha ke he tau mena oti, mo e nakai haofia ai a mutolu ke he fakapaeaaga.

22Kia nakai fakamalaia ai a mutolu ke he malaia mamahi; mo e nakai lauia ai ke he ita he Atua tututonu ki a mutolu, mo e moumou ai, hanai, ko e moumouaga tukulagi ha na he agaaga mo e tino.

23Ala mai a, ma haku tau fanau; kia tui a ke he tau papatau he tututonu, kia lulu kehe e tau filifili kua lili ai a mutolu, mo e fehola kehe ai mai he pouliouli mo e tutu hake a ki luga mai he kelekele.

24Aua neke liu totoko atu a mutolu ke he matakainaga ha mutolu, ha ko e tau kupu haana kua mua atu ia, mo e omaoma foki a ia ke he tau fakatufono tali mai he magaaho ne toka ai e tautolu a Ierusalema; mo e eke ai foki a ia mo kanavaakau ke he lima he Atua ke takitaki mai a tautolu ke he motu he maveheaga; a ne mai nakai fai ia, kua mamate ni a tautolu ke he tutakale ha ko e hoge; pete ia ne lali foki a mutolu ke uta kehe ai e haana a moui; hanai, ti kua lahi mahaki e matematekelea haana ha ko mutolu.

25Kua vivi mo e matakutaku lahi au ha ko mutolu, neke liu matematekelea foki a ia, kitia la, kua hokotaki e mutolu a ia mo e pehe kua lali a ia ke kumi malolo mo e pule atu ki a mutolu, ka e iloa e au nakai taute pihia e ia, ke kumi malolo ke pule ki a mutolu, ka e kua kumi atu a ia ke he lilifu he Atua, mo e tau mena ke monuina ai a mutolu tukulagi.

26Kua feguiguiaki a mutolu ha kua vagahau fakahako a ia ki a mutolu. Kua pehe foki a mutolu kua matila e haana a tau kupu; kua pehe foki a mutolu kua ita a ia ki a mutolu; ka e kitia la, ko e matila he haana a tau kupu, ko e matila haia he malolo he tau kupu he Atua, ne ha ha ia ia; mo e tau mena foki ne pehe a mutolu ko e ita, ko e mena mooli, ke tuga mo e tau mena kua ha ha he Atua, kua nakai maeke ke taofi ai, ka e fakakite atu ni fakamooli e tau mahani kelea ha mutolu.

27Kua lata nai ke moua ai e ia e malolo he Atua, pihia ke hoko ke he haana a tau poakiaga ki a mutolu, kua lata ke omaoma ki ai. Kitia la, nakai ko ia, ka ko e Agaaga he Iki i loto ia ia, kua maeke ke hafagi ai e haana a gutu ke vagahau mai ai, kua nakai maeke ke taofi ai.

28Ma haku tama, ko Lamana, mo Lemuela foki mo Samu mo e haaku a tau fanau, ko e tau fanau taane ha Isamaeli, kitia la, kaeke ke fanogonogo a mutolu ke he tau kupu a Nifai to nakai malaia a mutolu. Ti kaeke ni kua omaoma a mutolu ki a ia, to toka hifo e au taha fakamonuinaaga ma mutolu, hanai, ko e fakamonuinaaga fakamua haaku.

29Kaeke ke nakai fanogonogo a mutolu ki a ia, to uta kehe e au e fakamonuinaaga fakamua haaku, hanai, mo e haaku a fakamonuinaaga, mo e toka ai ki luga ia ia.

30Ti ko e mena ia ma Soroma na e, kua vagahau atu au ki a koe: Kitia la ko koe ko e fekafekau a Lapana; pete ni a ia kua ta mai foki a koe mai he maaga ko Ierusalema, iloa e au ko koe ko e kapitiga mooli ke he haaku a tama ko Nifai, ke hoko ke he tukulagi.

31Ko e mena ia, ha ko e haau a mahani fakamooli to fakamonuina ai e haau a tau fanau fakalataha mo e haana a tau fanau, ke nonofo mo e muhu mena ai ke he motu nai; to nakai fai mena taha ke tauhele atu po ke lutu ai ke he tau mena moua ha lautolu ke he motu nai ke hoko ke he tukulagi, ka ko e tau mahani kelea ni ha lautolu.

32Ko e mena ia kaeke ke omaoma a mutolu ke he tau fakatufono he Iki, ha kua fakatapu e ia e motu nai mo e eke ai ma e tau fanau haau fakalataha mo e tau fanau he tama taane haaku.